2014, നവംബർ 17, തിങ്കളാഴ്‌ച

കംമ്യുനിസ്റ്റുകാരെ ചരിത്രം പഠിപ്പിയ്ക്കാന്‍ നടക്കുന്ന ആര്‍.എസ്.എസ് / യുവമോര്‍ച്ചാ സംഘികള്‍ക്ക് ഒരു മറുപടി..

കുറച്ചു വര്‍ഷങ്ങള്‍ ആയി, ഫേസ്ബുക്ക് ഉള്‍പ്പടെ ഉള്ള സോഷ്യല്‍ നെറ്റ്‌വര്‍ക്ക് സൈറ്റുകളില്‍ കൂടെ തങ്ങളുടെ നയങ്ങള്‍ക്ക് അനുകൂലമാകും വിധം നുണകളുടെ കൂമ്പാരം ഒഴുക്കുന്നതിന് വേണ്ടി, ഡല്‍ഹിയില്‍ ഒരു ഓഫീസ് തുറന്നു വെച്ചിരിയ്ക്കുന്ന ഒരു പാര്‍ട്ടിയാണ് ബി.ജെ.പി എന്നത് എല്ലാവര്‍ക്കും അറിയാവുന്ന വസ്തുത ആണ്. കഴിഞ്ഞ തെരഞ്ഞെടുപ്പ് കാലത്ത് നരേന്ദ്രമോഡിയ്ക്ക് വേണ്ടി ഫോട്ടോഷോപ്പുകളും, വ്യാജവാര്‍ത്തകളും ചമച്ച് സോഷ്യല്‍ നെറ്റ്‌വര്‍ക്ക് സൈറ്റുകളില്‍ പ്രചരിപ്പിയ്ക്കാന്‍ വന്‍പിച്ച മത്സരം തന്നെ സംഘപരിവാര്‍ ഭക്തര്‍ നടത്തുകയുണ്ടായി. അതിന്റെ ഒരു ഉദാഹരണം ഇവിടെ കാണാം.
"മോഡിയുടെ ഫോട്ടോഷോപ്പ് തരികിടകള്‍"
എന്തായാലും ഇപ്പോള്‍ ഭരണം കിട്ടിയ സ്ഥിതിയ്ക്ക്, പുരോഗമന പ്രസ്ഥാനങ്ങളുമായി ഇഴ ചേര്‍ന്നു കിടക്കുന്ന കേരളത്തിന്റെ ചരിത്രം തന്നെയങ്ങ് മാറ്റി എഴുതി കളയാം എന്നൊരു വ്യാമോഹം സംഘപരിവാര സദാചാരികള്‍ക്ക് ഉണ്ടായതില്‍ അതിശയം ഇല്ല. അതിന്റെ ഭാഗമായി ആര്‍.എസ്.എസ്, യുവമോര്‍ച്ച എന്നീ സംഘടനകളുടെ പേരില്‍ കുറെ പോസ്റ്റുകളും, പോസ്റ്ററുകളും ഫേസ്ബുക്കില്‍ പറന്നു കളിയ്ക്കുന്നുണ്ട്.
ഇന്ത്യയില്‍ കമ്മ്യുണിസ്റ്റ് പാര്‍ട്ടി ആദ്യമായി ഉണ്ടായത് 1936ലും, കേരളത്തില്‍ കമ്മ്യുണിസ്റ്റ് പാര്‍ട്ടി ഉണ്ടായത് 1939ലും ആണെന്നും, ആയതിനാല്‍ കേരളത്തിന്റെ സാമൂഹിക പരിഷ്കരണ സമരങ്ങളില്‍ ആ പാര്‍ട്ടിയ്ക്ക് ഒരു പങ്കും ഇല്ലെന്ന് തെളിയുന്നു... കാരണം എന്താ... കേരളത്തിലെ എല്ലാ സാമൂഹിക പരിഷ്കരണവും 1939 ന് മുന്‍പേ അവസാനിച്ചു പോയി... അതിനാല്‍ വീരവാദം മുഴക്കാതെ “ചരിത്രം പഠിയ്ക്കൂ സഖാക്കളെ” എന്നൊക്കെ വമ്പിച്ച ആഹ്വാനം ഒക്കെ ചെയ്താണ് ഗോള്‍വള്‍ക്കറിന്റെയും ഗോഡ്സേയുടെയും പിന്‍തലമുറക്കാരുടെ പ്രചാരണ പോസ്റ്ററുകള്‍..
ഒരു പെണ്ണും ആണും കൂടി ചുംബിച്ചാല്‍ തകര്‍ന്നു പോകുന്ന അത്ര ദുര്‍ബലമായ ആ.ഭാ.സം (ആര്‍ഷ ഭാരത സംസ്കാരം) എന്ന കണ്ണാടിപാത്രം, കണ്ണിലെ കൃഷ്ണമണി പോലെ “സംരക്ഷിച്ചു” നിര്‍ത്തുന്ന സംഘപരിവാറുകാരുടെ വിവരകേടുകള്‍ക്ക് മറുപടി എഴുതി, വിലപ്പെട്ട സ്വന്തം സമയം നഷ്ടമാക്കാന്‍, ദിഗംബരന്‍ സാധാരണ തുനിയാറില്ല. “നായയുടെ വാല് കുഴലില്‍ ഇട്ട് നേരെയാക്കാന്‍” ശ്രമിയ്ക്കുന്നത് പോലൊരു വ്യഥാവ്യായാമം ആണ്, ആ.ഭാ.സക്കാരെ ചരിത്രം പഠിപ്പിയ്ക്കാന്‍ പോകുന്നത് എന്ന് അറിയാം.
പക്ഷെ ചരിത്രം അറിയാത്ത ഒരു പുതുതലമുറയെ “ആശയകുഴപ്പത്തില്‍” ആക്കാന്‍ ഉള്ള ഒരു ശ്രമമല്ലേ എന്ന് തോന്നിയതിനാല്‍, മറുപടി എഴുതാം എന്ന് കരുതി.
ഇനി നമുക്ക് ആ ആ.ഭാ.സം പോസ്റ്ററില്‍ ഉള്ള ആദ്യവാചകം നോക്കാം..
“ഭാരതത്തില്‍ കമ്മികള്‍ ഉണ്ടായത് 1936ല്‍”...
ഈ പോസ്റ്റര്‍ തയ്യാറാക്കിയ ആര്‍.എസ്.എസ്സുകാരന്റെ “ചരിത്രവിജ്ഞാനം” ശരിയ്ക്കും അളക്കുന്ന വാചകം..
എന്താണെന്നല്ലേ..
ഇന്ത്യയില്‍ കമ്മ്യുണിസ്റ്റ് പാര്‍ട്ടി ഉണ്ടായത് 1936ല്‍അല്ല.
കൃത്യമായി പറഞ്ഞാല്‍ 1925 ഡിസംബർ 26ല്‍....
ആ ദിവസം കാൻപൂരിൽ വച്ചാണ്‌ ബ്രിട്ടീഷ് ഇന്ത്യയിലെ വിവിധ കമ്മ്യൂണിസ്റ്റ്സംഘങ്ങളുടെ ആദ്യത്തെ സമ്മേളനം നടക്കുന്നത്. അവിടെ വച്ചാണ് സി.പി.ഐ (കമ്മ്യുണിസ്റ്റ് പാര്‍ട്ടി ഓഫ് ഇന്ത്യ) എന്ന രാഷ്ട്രീയ പ്രസ്ഥനത്തിന്റെ ഉദയം പ്രഖ്യാപിക്കപ്പെടുകയും അതിന്റെ ഭരണഘടന അംഗീകരിക്കപ്പെടുകയും ചെയ്തത്. സ:എസ്.വി.ഘാട്ടെ ആയിരുന്നു സി.പി.ഐയുടെ ആദ്യ ജനറൽസെക്രട്ടറി.
എന്നാല്‍ ഈ സമ്മേളനം നടക്കുന്നതിന് വളരെ മുന്‍പ് തന്നെ, ഇന്ത്യയിലെ പല ഭാഗത്തും ആയി കമ്മ്യുണിസ്റ്റ് ഗ്രൂപ്പുകള്‍ പ്രവര്‍ത്തിച്ചിരുന്നു. 1917ല്‍ നടന്ന റഷ്യന്‍ വിപ്ലവത്തിന്റെ വിജയം ആയിരുന്നു ഈ ഗ്രൂപ്പുകള്‍ ഉണ്ടാകാനുള്ള പ്രചോദനം. 1920 ഒക്ടോബര്‍ 17ന് തന്നെ റഷ്യയില്‍ ജോലി ചെയ്തിരുന്ന ചില വിദേശഇന്ത്യക്കാര്‍, എം.എന്‍.റോയ്, അബനി മുഖര്‍ജി എന്നിവരുടെ നേതൃത്വത്തില്‍ ഒത്തുചേര്‍ന്ന് മോസ്കോയില്‍ വെച്ച് ഒരു കമ്മ്യുണിസ്റ്റ് ഗ്രൂപ്പിന് രൂപം നല്‍കിയിരുന്നു. പിന്നീട് ഇന്ത്യയിലും ധാരാളം കമ്മ്യുണിസ്റ്റ് ഗ്രൂപ്പുകള്‍ ഉണ്ടായി.
അവയില്‍ പ്രധാനപ്പെട്ടവ ഇവയായിരുന്നു.
1) മുസാഫിര്‍ അഹമ്മദിന്റെ നേതൃത്വത്തില്‍ ഉള്ള ബംഗാള്‍ ഗ്രൂപ്പ്
2) എസ്.എ ദാന്ഗെയുടെ നേതൃത്വത്തില്‍ ഉള്ള ബോംബെ ഗ്രൂപ്പ്
3) ശിങ്കാരവേലു ചെട്ടിയാരുടെ നേതൃത്വത്തില്‍ ഉള്ള മദ്രാസ്‌ ഗ്രൂപ്പ്
4) ഗുലാം ഹുസൈന്റെ നേതൃത്വത്തില്‍ ഉള്ള പഞ്ചാബ് ഗ്രൂപ്പ്
5) ഷൌക്കത്ത് ഉസ്മാനിയുടെ നേതൃത്വത്തില്‍ ഉള്ള സംയുക്ത മധ്യമേഖല ഗ്രൂപ്പ്
കമ്മ്യുണിസ്റ്റ് പാര്‍ട്ടി പ്രവര്‍ത്തനങ്ങള്‍ രാജ്യദ്രോഹ ക്രിമിനല്‍ കുറ്റമായി കണക്കാക്കി ബ്രിട്ടീഷുകാര്‍ നിരോധിച്ച അക്കാലത്ത്, രഹസ്യമായി ആയിരുന്നു ഈ ഗ്രൂപ്പുകളുടെ പ്രവര്‍ത്തനം.
1921നും 1924നും ഇടയില്‍, ഒന്നാം പെഷവാര്‍ ഗൂഡാലോചന കേസ്, മോസ്കോ ഗൂഡാലോചന കേസ് , രണ്ടാം പെഷവാര്‍ ഗൂഡാലോചന കേസ്, കാണ്പൂര്‍ ഗൂഡാലോചന കേസ് എന്നിങ്ങനെ നാല് ഗൂഡാലോചന കേസുകള്‍ ആണ് ബ്രിട്ടീഷ് സര്‍ക്കാര്‍ കമ്മ്യുണിസ്റ്റ് നേതാക്കന്മാരുടെ മേല്‍ ചുമത്തിയത്.
ഇവയില്‍ ഏറ്റവും പ്രമാദമായ കാണ്പൂര്‍ ഗൂഡാലോചന കേസില്‍, 1924 മാര്‍ച്ച് 17ന് സഖാക്കള്‍ എം.എന്‍.റോയ്, എസ്.എ.ദാന്ഗെ, മുസാഫിര്‍ അഹമ്മദ്, നളിനി ഗുപ്ത, ഷൌക്കത്ത് ഉസ്മാനി, ആര്‍.സി.ശര്‍മ്മ എന്നിവര്‍ക്കെതിരെ കുറ്റപത്രം സമര്‍പ്പിച്ചു. “ബ്രിട്ടീഷ് സാമ്രാജ്യത്തെ തകര്‍ത്ത് ഇന്ത്യയെ സ്വതന്ത്രരാജ്യം ആക്കാന്‍ സായുധ വിപ്ലവം നടത്താന്‍ ഗൂഡാലോചന നടത്തി എന്നായിരുന്നു” അവര്‍ക്കെതിരെ ചുമത്തിയ കുറ്റം.
അന്ന് നിലവില്‍ ഉണ്ടായിരുന്ന നിയമം അനുസരിച്ച് കോടതി നടപടികള്‍ സെന്‍സര്‍ ചെയ്യാതെ റിപ്പോര്‍ട്ട് ചെയ്യാന്‍ പത്രങ്ങള്‍ക്ക് അവകാശം ഉണ്ടായിരുന്നു. അതിനാല്‍ ഈ കേസിന്റെ വിചാരണയും റിപ്പോര്‍ട്ടുകളും വഴി കമ്മ്യുണിസ്റ്റ് പ്രസ്ഥാനത്തെ കുറിച്ച് രാജ്യമാകെ ചര്‍ച്ച നടക്കാനും, അത് വഴി കമ്മ്യുണിസ്റ്റ് ആശയങ്ങള്‍ക്ക് നല്ല പ്രചാരണം കിട്ടാനും ഇടയായി.
മേല്‍ പറഞ്ഞ ഗ്രൂപ്പുകള്‍ ഉള്‍പ്പെടെ രാജ്യത്തിന്റെ പല ഭാഗത്തും വര്‍ഷങ്ങള്‍ ആയി പ്രവര്‍ത്തിച്ചു വന്ന കമ്മ്യുണിസ്റ്റ് ഗ്രൂപ്പുകള്‍ ആണ് കാണ്പൂരില്‍ സമ്മേളനം കൂടി സി.പി.ഐ രൂപീകരിച്ചത്.
കമ്മ്യുണിസ്റ്റ് പാര്‍ട്ടിയുടെ രൂപീകരണത്തിന് മുന്പ് തന്നെ ഇന്ത്യയില്‍ എങ്ങും കമ്മ്യുണിസ്റ്റ് പ്രവര്‍ത്തനങ്ങള്‍ സജീവം ആയിരുന്നു എന്ന്‍ പറയാന്‍ വേണ്ടി മാത്രമാണ് ഇത്രയും വിശദീകരിച്ചത്.
ബ്രിട്ടീഷ് അധികാരികളുടെ കണ്ണ് വെട്ടിച്ച്, നിരോധിയ്ക്കപ്പെട്ട അവസ്ഥയിലും കമ്മ്യുണിസ്റ്റ് പാര്‍ട്ടി പ്രവര്‍ത്തനം വ്യാപകം ആക്കാനായി കമ്മ്യുണിസ്റ്റ് പ്രവര്‍ത്തകര്‍ ഒരു തന്ത്രം പ്രയോഗിച്ചു. അക്കാലത്ത് പ്രധാനമായി രാഷ്ട്രീയ രംഗത്ത്‌ ഉണ്ടായിരുന്നു ഇന്ത്യന്‍ നാഷണല്‍ കൊണ്ഗ്രെസ്സില്‍ ചേര്‍ന്ന് പ്രവര്‍ത്തിച്ച്, അതിനുള്ളില്‍ ഇടതുപക്ഷ-സോഷ്യലിസ്റ്റ് ഗ്രൂപ്പുകള്‍ ഉണ്ടാക്കി പ്രവര്‍ത്തനം വ്യാപകം ആക്കുക. ഇന്ത്യന്‍ നാഷണല്‍ കൊണ്ഗ്രെസ്സിനുള്ളില്‍ ഒരു സോഷ്യലിസ്റ്റ് ഗ്രൂപ്പ് ഉണ്ടാക്കാനും, അത് വഴി വിജയകരമായി സ്വന്തം സംഘടനാ പ്രവര്‍ത്തനങ്ങള്‍ മുന്നോട്ടു കൊണ്ട് പോകാനും കമ്മ്യുണിസ്റ്റ് പ്രവര്‍ത്തകര്‍ക്ക് കഴിഞ്ഞു. അതോടൊപ്പം തന്നെ അഖിലേന്ത്യ വർകേഴ്സ് ആൻഡ്‌ പെസന്റ്സ് പാർട്ടി എന്ന പേരിലും ഒരു തൊഴിലാളി സംഘടന ഉണ്ടാക്കി കമ്മ്യുണിസ്റ്റ് പ്രവര്‍ത്തനങ്ങള്‍ രാജവ്യാപകം ആക്കി. വിദ്യാർഥി സംഘടനയായ എ.ഐ.എസ്.എഫ് , കർഷക സംഘടനയായ അഖിലേന്ത്യ കിസാൻ സഭ (എ.ഐ.കെ.എസ്), പുരോഗമന സാഹിത്യ സംഘടന എന്നിവ 1936ല്‍ സംഘടിപ്പിക്കപ്പെട്ടു
കേരളത്തിലും ഇത്തരത്തില്‍ ഇന്ത്യന്‍ നാഷണല്‍ കോൺഗ്രസ്സ്‌ സംഘടനയുടെ ഉള്ളില്‍ കോൺഗ്രസ്സ് സോഷ്യലിസ്റ്റ്‌ വിഭാഗം എന്ന ലേബലില്‍ ആയിരുന്നു കമ്മ്യുണിസ്റ്റുകാരുടെ പ്രവര്‍ത്തനം. അക്കാലത്ത് നടന്ന ഗുരുവായൂര് സത്യാഗ്രഹം അടക്കമുള്ള എല്ലാ സാമൂഹിക പ്രക്ഷോഭങ്ങളിലും കമ്മ്യുണിസ്റ്റ് പ്രവര്‍ത്തകര്‍ ഈ വിധം സജീവമായി പങ്കെടുത്തു.
കേരളമെങ്ങും സംഘടനാപ്രവര്‍ത്തനം വ്യാപിച്ചു കഴിഞ്ഞു എന്ന് ഉറപ്പിച്ച ശേഷം, കോൺഗ്രസ്സ്‌ സംഘടനയിൽ കോൺഗ്രസ്സ് സോഷ്യലിസ്റ്റ്‌ വിഭാഗമായി പ്രവര്‍ത്തിച്ചിരുന്ന കമ്മ്യുണിസ്റ്റ് പ്രവര്‍ത്തകര്‍, 1939 ഡിസംബറിൽ കണ്ണൂർ ജില്ലയിലെ പിണറായിയിലെ പാറപ്രത്ത് വച്ച് കേരളത്തിലെ ഒവ്ദ്യോഗിക കമ്മ്യൂണിസ്റ്റ്‌ പാർട്ടിയ്ക്ക് രൂപം കൊടുത്തു. ജന്മികളും, ഭൂപ്രഭുക്കന്മാരുടെ നടത്തിയ ചൂഷണങ്ങള്‍ക്കെതിരെ കര്‍ഷകരെയും, തൊഴിലാളികളെയും, കുടിയാന്മാരെയും സംഘടിപ്പിച്ചു ശക്തമായി പൊരുതി തന്നെയാണ് ചുരുങ്ങിയ കാലം കൊണ്ട് കേരളത്തിലെ ഏറ്റവും നിര്‍ണ്ണായകമായ ഒരു രാഷ്ട്രീയ പ്രസ്ഥാനമായി കമ്മ്യുണിസ്റ്റ് പാര്‍ട്ടി വളര്‍ന്നത്‌. “ഭൂപരിഷ്കരണം”, “വിദ്യാഭ്യാസ സംരക്ഷണം”, “തൊഴിലാളികളുടെ അവകാശ സംരക്ഷണം”, “സമ്പൂര്‍ണ്ണ സാക്ഷരത” എന്നിവയൊക്കെ കേരളത്തില്‍ സാധ്യമായതില്‍ കമ്മ്യുണിസ്റ്റ് പാര്‍ട്ടിയുടെ പങ്ക് നിഷേധിയ്ക്കാന്‍, തലയ്ക്കു വെളിവുള്ള ആരെകൊണ്ടും കഴിയില്ല. “അമേരിക്കന്‍ മോഡല്‍ സ്വതന്ത്ര തിരുവിതാംകൂര്‍” എന്ന ദിവാന്‍ സി.പി യുടെ സ്വപ്നത്തിന്റെ ചിറകരിഞ്ഞ് കേരള സംസ്ഥാന രൂപീകരണം സാധ്യമാക്കിയ പ്രക്ഷോഭങ്ങളിലും കമ്മ്യുണിസ്റ്റുകാര്‍ വഹിച്ച പങ്ക് നിസ്തുലം ആണ്.
ഇനി പോസ്റ്ററിലെ മറ്റ് വാചകങ്ങള്‍ ശ്രദ്ധിയ്ക്കാം.
ചാന്നാര്‍ ലഹള, വൈക്കം സത്യാഗ്രഹം, ഗുരുവായൂര് സമരം എന്നൊക്കെ ഉള്ള ആ വാചക കസര്‍ത്ത് കണ്ടാല്‍ തോന്നുക 1936 എന്ന വര്‍ഷത്തോടെ കേരളത്തിലെ എല്ലാ സാമൂഹിക പരിഷ്കരണ പ്രസ്ഥാനങ്ങളും അവസാനിച്ചു എന്നും, കേരളം “ജാതി മത സാമ്പത്തിക ആസ്വമത്വങ്ങള്‍ ഇല്ലാത്ത ഒരു “മാവേലി നാട്” ആയി മാറി എന്നും ആണ്. ചരിത്രത്തെ കുറിച്ചുള്ള വിവരകേടിന്റെ ഇതിലും വലിയ ഉദാഹരണം വേറെ ഇല്ല.
അയിത്തച്ചോടനം നടത്തിയത് കൊണ്ട് കേരളത്തിൽ ജാതിചിന്തയും അയിത്തവും ഒക്കെ 1917 സ്വിച്ചിട്ട പോലെ നിന്നു എന്നു വിശ്വസിക്കണമെങ്കിൽ‌ അത് ‌ജന്മനാ മന്ദബുദ്ധികള്‍ ആയ സംഘികൾക്കേ പറ്റൂ.
ജാതിഭ്രാന്തിന്റെ പീഡനങ്ങള്‍ പിന്നെയും വളരെകാലം തുടര്‍ന്നു. ഒരു ദിവസം ഒരുമിച്ചിരുത്തി പന്തിഭോജനം നടത്തിയ ശേഷം വര്‍ഷത്തിലെ ബാക്കി മുഴുവന്‍ ദിവസവും കുഴി കുത്തി പാളയിൽ കഞ്ഞി കൊടുക്കയും ചെയ്താൽ ജാതിഭ്രാന്തും അയിത്തവും മാറില്ല. ജാതി മത വ്യത്യാസം നോക്കാതെ അടിച്ചമര്‍ത്തപ്പെട്ടവന്റെ കുടിലുകളില്‍ ചെന്ന് കയറി ആ അശരണരുടെ സ്നേഹത്തിന്റെ നേരകഞ്ഞിയില്‍ ഒരു പങ്ക് പറ്റി, കമ്മ്യുണിസ്റ്റ് സഖാക്കള്‍ ആ ജാതിഭ്രാന്തിന്റെ വേലിക്കെട്ടുകള്‍ തകര്‍ക്കുകയായിരുന്നു.
കേരളത്തിന്റെ മണ്ണില്‍ ശ്രീ നാരായണഗുരുവും, അയ്യന്‍കാളിയും, ചട്ടമ്പി സ്വാമികളും, വി.ടി.ഭട്ടതിരിപ്പാടും, സഹോദരന്‍ അയ്യപ്പനും ഒക്കെ വിതച്ച ജാതി, മതഭേദങ്ങള്‍ക്ക് എതിരെയുള്ള പോരാട്ടം മുന്നോട്ടു കൊണ്ട് പോയതും, അതിനെ ഇന്നത്തെ ആധുനിക സാമൂഹിക ക്രമത്തില്‍ എത്തിച്ചതിലും ഒക്കെ കമ്മ്യുണിസ്റ്റ് പ്രസ്ഥാനം വഹിച്ച നിര്‍ണ്ണായക പങ്കിനെ തള്ളികളയാന്‍, സ്വന്തം തൊഴിലിനോട് സത്യസന്ധത പുലര്‍ത്തുന്ന ഒരു ചരിത്രകാരനും കഴിയില്ല.
കുടിയാന് പാട്ടവസ്തുക്കളില്‍ മേലുള്ള അവകാശം 1865ല്‍ കിട്ടി എന്നാണ് ഈ പോസ്റ്റര്‍ ഇറക്കിയ മന്ദബുദ്ധികളുടെ അവകാശവാദം.
ഉണ്ടയാണ് കിട്ടിയത്!
അങ്ങനെ എളുപ്പമായിരുന്നു കാര്യങ്ങള്‍ എങ്കില്‍, ജന്മിമാര്‍ കുടിയാന് മേല്‍ നടത്തിയ ഉടമഅധികാരത്തെ ആധാരമാക്കി 1937 ല്‍ പോലും ചങ്ങമ്പുഴ കൃഷ്ണപിള്ളയ്ക്ക് “വാഴക്കുല” എന്ന കവിത എഴുതേണ്ട ഗതികേട് വരില്ലായിരുന്നു.
കുടിയാനെ അടിമയെപ്പോലെ കണ്ടിരുന്ന, അവന് ഒരു അവകാശവും നല്‍കാത്ത സാമൂഹിക വ്യവസ്ഥ പിന്നെയും സംസ്ഥാന രൂപീകരണത്തിന് ശേഷവും കേരളത്തില്‍ തുടര്‍ന്നിരുന്നു എന്നറിയാന്‍, ഈ പോസ്റ്റര്‍ ഇറക്കിയവന്‍ പണ്ട് സ്കൂളിലെ അപ്പര്‍ പ്രൈമറി ക്ലാസിലെ ചരിത്രപാഠം എങ്കിലും പഠിച്ചിരുന്നെങ്കില്‍ മതിയായിരുന്നു.
1957 ല്‍ അധികാരത്തില്‍ വന്ന ആദ്യകമ്മ്യുണിസ്റ്റ് സര്‍ക്കാര്‍, ജന്മിത്വം അവസാനിപ്പിച്ച് “കൃഷിഭൂമി കര്‍ഷകന്” എന്ന ലക്ഷ്യത്തോടെ കൊണ്ട് വരാന്‍ ശ്രമിച്ച ഭൂപരിഷ്കരണ നിയമത്തിനെതിരെ സംസ്ഥാനമൊട്ടുക്കും പ്രതിഷേധിച്ച പിന്തിരിപ്പന്മാരുടെ കൂട്ടത്തില്‍ ബി.ജെ.പിക്കാരുടെ ആദ്യരാഷ്ട്രീയ രൂപമായ “ജനസംഘവും” ഉണ്ടായിരുന്നു.
ഒടുവില്‍ 1970ൽ അച്യുതമേനോൻ സർക്കാർ ഭൂപരിഷ്കരണ നിയമം പ്രാബല്യത്തില്‍ ആക്കിയ ശേഷമാണ്, കേർളത്തിലെ ഏറിയ കൂറു കുടിയന്മാർക്കും സ്വന്തമായി ഭൂമി കിട്ടിയത്
ഇനി നമുക്ക് ഈ പോസ്റ്ററുകള്‍ ഇറക്കിയ ആര്‍.എസ്.എസ് എന്ന സംഘടനയുടെ ചരിത്രം പരിശോധിച്ചു നോക്കാം.
ഇന്ത്യയില്‍ കമ്മ്യുണിസ്റ്റ് പാര്‍ട്ടി ഉണ്ടായ അതേ വര്ഷം; 1925 ൽ ബ്രിട്ടീഷുകാരുടെ അനുഗ്രഹാശസ്സുകളോടെ ആയിരുന്നു രാഷ്ട്രീയ സ്വയം സേവക സംഘം എന്ന ആര്‍.എസ്.എസ്സിന്റെ ജനനം.
സ്വാതന്ത്ര്യ സമര പോരാട്ടത്തില്‍ താണ ജാതിക്കാരെയും, മുസ്ലീങ്ങളെയും പങ്കെടുപ്പിയ്ക്കുന്നതില്‍ പ്രതിഷേധിച്ച് ഇന്ത്യന്‍ നാഷണല്‍ കൊണ്ഗ്രെസ്സില്‍ നിന്നും രാജി വെച്ച ഹെഡ്ഗെവാര്‍ എന്നയാള്‍, ചാതുര്‍വര്‍ണ്ണ്യ വ്യവസ്ഥയെ പിന്തുടരുന്ന ഒരു സാമൂഹിക ജീവിതത്തെ സ്വപ്നം കണ്ട് ഉണ്ടാക്കിയ ആര്‍.എസ്.എസ്സിലെ ആദ്യകാല സര്‍സഞ്ചാലക്കുമാര്‍ എല്ലാം മറാത്താ ബ്രാഹ്മന്മാര്‍ ആയിരുന്നു.
കമ്മ്യുനിസ്ടുകാര്‍ നേരിട്ട പോലെ ബ്രിട്ടീഷ് സര്‍ക്കാരിന്റെ നിരോധനമോ, അടിച്ചമര്‍ത്തലോ, അറസ്റ്റും ജയില്‍വാസവും ഒന്നുമോ, ആര്‍.എസ്.എസ് ഒരിയ്ക്കലും നേരിട്ടിട്ടില്ല. എന്നിട്ടും ഇന്ത്യന്‍ സ്വാതന്ത്ര്യ സമരത്തില്‍ മരുന്നിന് പോലും ഒരു സ്വയം സേവകനും പങ്കെടുത്തിട്ടില്ല എന്നത് പ്രത്യേകം ശ്രദ്ധിയ്ക്കേണ്ട കാര്യം ആണ്.
രൂപീകൃതമായതു മുതൽ ഇന്നു വരെ ഭാരതം എന്ന ജനാധിപത്യ മതേതര രാജ്യത്തെ നശിപ്പിക്കാൻ ശ്രമിച്ച ഒരു സംഘടന വേറെ ഉണ്ടോ എന്ന് സംശയമാണ്. ബംഗാളിലെ ബാവുള്‍ഗായകരുടെ സംഘടന മുതല്‍ ചിദംബരത്തെ പാവക്കൂത്തുക്കാരുടെ കൂട്ടായ്മ വരെ സ്വാതന്ത്ര്യസമരത്തില്‍ പങ്കെടുത്തു എന്ന് ചരിത്രം. രാജ്യം മുഴുവൻ സ്വാതന്ത്ര്യ സമരത്തിന്റെ തീച്ചൂളയിലേക്ക് സ്വയം എടുത്തെറിഞ്ഞപ്പോൾ അതിന് മുഖം തിരിച്ചു നിന്നതു മുതൽ തുടങ്ങുന്നു സംഘികളുടെ ദേശ പ്രേമം!
“രാഷ്ട്രവൃക്ഷ് കീ ബീജ്’ എന്ന പുസ്തകത്തിൽ സംഘത്തിന്റെ സമുന്നത നേതാവ് ‘ഗുരുജി’ ഗോൾവാൾക്കർ തന്നെ പറയുന്നു, “സ്വാതന്ത്ര്യ സമരം സംഘത്തിന്റെ ലക്ഷ്യമല്ല എന്ന്!”
മുകളിൽ പറഞ്ഞ ‘പൂജനീയ’ ഗുരുജി ഗോൾവാൾക്കർ അത് കൊണ്ടും നിർത്തിയില്ല. സ്വാതന്ത്ര്യ സമരത്തിൽ പങ്കെടുത്ത് രക്തസാക്ഷികൾ ആയവരെ രാജ്യം ധീര ദേശാഭിമാനികൾ ആയി ഉയർത്തി കാട്ടുമ്പോൾ, സർ സംഘ ചാലകൻ അവരെ ഒക്കെ പുച്ഛിക്കുന്നത് നോക്കൂ:
"There is no doubt that such men who embrace martyrdom are great heroes and their philosophy too is pre-eminently manly. They are far above the average men who meekly submit to fate and remain in fear and inaction. All the same, such persons are not held up as ideals in our society. We have not looked upon their martyrdom as the highest point of greatness to which men should aspire. For, after all, they failed in achieving their ideal, and failure implies some fatal flaw in them."
സ്വാതന്ത്ര്യ സമരം നടക്കുമ്പോൾ മാങ്ങ പറിക്കാൻ പോയ രാഷ്ട്രീയ സ്വയം സേവക സംഘം ബ്രിട്ടീഷുകാരോടുള്ള വിധേയത്വവും മറച്ചു വെക്കുന്നില്ല. 1960ല്‍ ഇന്‍ഡോറില്‍ ഗോള്‍വാള്‍ക്കര്‍ പറഞ്ഞത് ഇങ്ങനെ:
"Many people worked with the inspiration to free the country by throwing the British out. After formal departure of the British this inspiration slackened. In fact there was no need to have this much inspiration. We should remember that in our pledge we have talked of the freedom of the country through defending religion and culture. There is no mention of departure of the British in that."
സ്വാതന്ത്ര്യ സമരത്തിന്റെ ഏഴയലത്ത് കൂടെ പോയിട്ടില്ലെങ്കിലും, ബ്രിട്ടീഷുകാർക്ക് വിടുവേല ചെയ്തെങ്കിലും, ദേശപ്രേമത്തിന്റെ ബാനർ പിടിക്കുന്നത് സംഘപരിവാരത്തിന് മാത്രം പതിച്ചു കിട്ടിയ ഒരു അവകാശമെന്ന രീതിയിലാണവരുടെ പെരുമാറ്റം.
കേരളത്തില്‍ താണജാതിക്കാരെയും, അന്യമതസ്ഥരെയും ദ്രോഹിയ്ക്കാനും, അടിച്ചമര്‍ത്താനും കൂട്ട് നിന്ന ഒരു ചരിത്രപാരമ്പര്യം മാത്രം ഉള്ള പിന്തിരിപ്പന്മാരായ സംഘപരിവാറുകാര്‍ ഒന്നോര്‍ക്കുക..
കമ്മ്യുണിസ്റ്റ് പ്രസ്ഥാനങ്ങളുടെ കേരളത്തിലെ സ്ഥാനം അളക്കാന്‍ മാത്രം ധാര്‍മികതയോ, ചരിത്ര പിന്തുണയോ നിങ്ങള്‍ക്കില്ല. ഒരു സാമൂഹിക മാറ്റവും നിങ്ങള്‍ ഇവിടെ ഉണ്ടാക്കിയിട്ടുമില്ല. വല്ല സദാചാര പോലീസ് ഗുണ്ടായിസം കാണിയ്ക്കാനും, വല്ലപോഴും ഒരു “മാറാട്” പുന:സൃഷ്ടിയ്ക്കാനും മാത്രമേ നിങ്ങള്‍ക്ക് കഴിയൂ.. അത് കൊണ്ട് തന്നെയാണ് ഇന്നും കേരള ജനത നിങ്ങളെയൊക്കെ കേരള സമൂഹത്തിന്റെ വേലിക്കപ്പുറത്ത്‌ നിര്‍ത്തിയിരിയ്ക്കുന്നത്.

2014, ഒക്‌ടോബർ 30, വ്യാഴാഴ്‌ച

മാറ് മറച്ചൊരു സമരവും, സദാചാര ഗുണ്ടാ വിരുദ്ധ കൂട്ടായ്മയും!

വര്‍ഷം 1829.
തിരുവിതാംകൂര്‍ മുഴുവന്‍ ആ വാര്‍ത്ത കാട്ടുതീ പോലെ പടര്‍ന്നു.
ചാന്നാര്‍ ജാതിയില്‍ പെട്ട പെണ്ണുങ്ങള്‍ മാറ് മറച്ച് “റവുക്ക” ധരിച്ച്, ഒരു പ്രതിഷേധ ജാഥ നടത്താന്‍ പോകുന്നു. ആ പ്രതിഷേധത്തിന്റെ ലക്ഷ്യം ഒന്ന് മാത്രം.
പെണ്ണുങ്ങള്‍ക്ക്‌ മാറ് മറച്ചു നടക്കാനുള്ള അവകാശം നല്‍കുക.
ചാന്നാര്‍ സമുദായത്തിലെ തന്നെ പുരോഗമനചിന്തയുള്ള യുവാക്കള്‍ ആയിരുന്നു ജാഥയുടെ പ്രധാന സംഘാടകര്‍.
ആ ജാഥയെ കുറിച്ചുള്ള വാര്‍ത്ത കേരള സമൂഹത്തെയാകെ ഇളക്കി മറിച്ചു. സമുദായ പ്രമാണിമാര്‍ ഞെട്ടി.
പെണ്ണുങ്ങള്‍...അതും താണജാതിക്കാര്‍ .. അവര്‍ക്കിത്ര ധിക്കാരമോ?
ബ്രാഹ്മണ- ക്ഷത്രിയ വരേണ്യ വര്‍ഗ്ഗം കോപം കൊണ്ട് വിറച്ചു!
അന്ന് വരെ നാട്ടില്‍ പാരമ്പര്യമായി നിലനിന്ന ചില സമ്പ്രദായങ്ങള്‍ ഉണ്ടായിരുന്നു. കേരള സംസ്കാരത്തിന്റെ തകര്‍ക്കാനാകാത്ത മാമൂലുകള്‍. അതില്‍ വളരെ പ്രധാനമായിരുന്നു മാറ് മറയ്ക്കാതെ നടക്കുന്ന പെണ്ണുങ്ങളുടെ വസ്ത്രധാരണ സമ്പ്രദായം.
ഒറ്റനോട്ടത്തില്‍ത്തന്നെ ഒരാള്‍ ഏത് ജാതിയില്‍പ്പെട്ടവനാണെന്ന് അറിയണം, ആ വിധത്തിലേ വസ്ത്രം ധരിക്കാവൂ എന്നായിരുന്നു നാട്ടുനടപ്പ്. അതായത്, ഉടുക്കുന്നത് ജാതിഭേദവും അവസ്ഥാഭേദവും അനുസരിച്ച് മാത്രം. മുട്ടിനു മേല്‍വരെ, മുട്ടുവരെ, കണങ്കാല്‍ വരെ, എന്നിങ്ങനെ വ്യത്യസ്ത വസ്ത്രധാരണ സമ്പ്രദായം ഓരോ ജാതിയ്ക്കും അനുവദിച്ചിരുന്നു.
ബ്രാഹ്മണ സ്ത്രീകള്‍ക്ക് ഇല്ലത്തു നിന്നും പുറത്തു പോകുമ്പോള്‍ മാത്രം, ഒരു മേല്‍മുണ്ട്‌ ഉപയോഗിച്ച് മാറ് മറയ്ക്കാന്‍ അവകാശം സിദ്ധിച്ചിരുന്നു. എന്നാല്‍ അമ്പലത്തിലെ വിഗ്രഹത്തിനു മുന്നില്‍ ആ സ്ത്രീ മാറിലെ നഗ്നത തുറന്നുകാട്ടണം എന്ന് വ്യവസ്ഥ വെച്ചിരുന്നു.
ബ്രാഹ്മണര്‍ക്ക് തൊട്ട് താഴത്തെ പദവിയുള്ള നായര്‍ സമുദായത്തിലെ സ്ത്രീകള്‍, അവരെക്കാളും ഉയര്‍ന്ന ജാതിയില്‍ ഉള്ള നമ്പൂതിരി ബ്രാഹ്മണര്‍ക്ക് മുമ്പില്‍ മാറ് മറയ്ക്കാന്‍ പാടില്ല എന്നതായിരുന്നു വ്യവസ്ഥ.
അവര്‍ണ ജാതിക്കാര്‍ മാറ് മറയ്ക്കാനേ പാടില്ലായിരുന്നു എന്നതാണ് വിലക്ക്. മുട്ടിനുമേലെ അരക്കുതാഴെയായി എത്തിനില്‍ക്കുന്ന തരത്തിലുള്ള ഒരു ഒറ്റമുണ്ടു മാത്രമായിരുന്നു ഉടുക്കാന്‍ അനുവാദമുണ്ടായിരുന്നത്.
അക്കാലത്ത് സവര്‍ണ സമുദായത്തിനിടക്ക് നിലനിന്നിരുന്ന ആചാരങ്ങളായ നമ്പൂതിരി ബ്രാഹ്മണരുടെ മുന്നില്‍ നായര്‍സ്ത്രീ മാറിലെ മറ നീക്കി നഗ്നത പ്രദര്‍ശിപ്പിച്ചുകൊണ്ടുള്ള അഭിവാദ്യമര്‍പ്പിക്കല്‍, ദേവദാസി സമ്പ്രദായം, നായര്‍ തറവാടുകളിലെ സ്ത്രീകള്‍ ശീലിച്ചുവന്ന സംബന്ധം, സവര്‍ണ്ണര്‍ അവര്‍ണ്ണ സ്ത്രീകളുടെ മേല്‍ സ്വന്തം സൌകര്യം അനുസരിച്ച് നിലനിര്‍ത്തിവന്ന വേഴ്ച തുടങ്ങിയവ എല്ലാം, വളരെ കാലമായി അനുവര്‍ത്തിച്ചുവന്ന ശീലമെന്ന നിലക്ക് കേരളസംസ്കാരത്തിന്റെ ഭാഗമായിരുന്നു. മാറ് മറച്ചു നടത്തുന്ന പ്രതിഷേധം അതിനെ ഒക്കെ ചോദ്യം ചെയ്യുന്നതിന്റെ തുടക്കമായി അവര്‍ കരുതി.
എല്ലാ ജാതിയിലും പെട്ട പെണ്ണുങ്ങളുടെ നഗ്നമായ മുലകള്‍ കണ്ട് വളര്‍ന്ന സവര്‍ണ്ണ വര്‍ഗ്ഗത്തിനെ, ആ പ്രതിഷേധ ജാഥയെ പറ്റിയുള്ള വാര്‍ത്ത തന്നെ വെകിളി പിടിപ്പിച്ചതില്‍ അത്ഭുതം ഉണ്ടോ!
എന്തായാലും ജാഥ തീരുമാനിച്ച ദിവസം വന്നെത്തി. വഴിയുടെ രണ്ടു വശവും ആളുകള്‍ തിങ്ങി കൂടി. ‘റവുക്ക’ ധരിച്ച പെണ്ണുങ്ങളെ ജീവിതത്തില്‍ ആദ്യമായി കാണുന്നതിലുള്ള ആകാംഷ ആയിരുന്നു പലര്‍ക്കും.
പറഞ്ഞ സമയത്ത് തന്നെ ജാഥ തുടങ്ങി. മുപ്പതോളം പെണ്ണുങ്ങള്‍ ആയിരുന്നു ജാഥയില്‍ പങ്കെടുത്തത്.
അവരുടെ മുഖത്ത് പരിഭ്രമവും, ഭയവും ഒരുപോലെ നിറഞ്ഞിരുന്നു.
മുട്ടോളം എത്തുന്ന വെള്ള മുണ്ടും, ജീവിതത്തില്‍ ആദ്യമായി ധരിച്ച വെളുത്ത ‘റവുക്ക’യും ആയിരുന്നു വേഷം. അവര്‍ വരിവരിയായി നടന്നു. ജാഥയുടെ രണ്ടു വശത്തും സംഘാടകര്‍ ആയ ചാന്നാര്‍ യുവാക്കള്‍, സംരക്ഷകര്‍ എന്ന പോലെ കൈയ്യില്‍ വടികളുമായി അവരെ അനുഗമിച്ചു.
ജാഥ കാണാന്‍ കൂടിയ ആളുകളില്‍ പലരും ഈ പെണ്ണുങ്ങളെ നോക്കി കൂകി വിളിച്ചു പരിഹസിച്ചു. അസഭ്യവര്‍ഷം വേണ്ടുവോളം രണ്ടു വശത്തും നിന്നും ഉയര്‍ന്നു. എന്നിട്ടും പതറാതെ ജാഥ മുന്നോട്ടു നീങ്ങി.
ജാഥ പോയിരുന്ന പാതയുടെ രണ്ടു വശത്തും ആള്‍കൂട്ടവും, എതിര്‍പ്പുകളും കൂടി കൂടി വന്നു. സ്വന്തം സംസ്കാരം മറന്ന് വിദേശ സംസ്കാരത്തെ പോലെ ‘റവുക്ക’ ധരിച്ച പെണ്ണുങ്ങളെ ആള്‍കൂട്ടം ശാപ വാക്കുകള്‍ കൊണ്ട് പൊതിഞ്ഞു.
ചുറ്റുമുള്ള ആള്‍കൂട്ടം കൂടുന്നതനുസരിച്ച് പെണ്ണുങ്ങളുടെ ധൈര്യവും ചോര്‍ന്നു പോകാന്‍ തുടങ്ങി. അസഭ്യവര്‍ഷം സഹിയ്ക്കാനാകാതെ ഒരു പെണ്ണ് “റവുക്ക” വലിച്ചു കീറി മാറ്റി തന്റെ നഗ്നമായ മാറിടം ജനത്തിന് കാട്ടികൊടുത്തു. അഭിനന്ദനശബ്ദത്തോടെ ജനകൂട്ടം അവളെ പ്രോത്സാഹിപ്പിച്ചു.
ഇത് മറ്റ് പെണ്ണുങ്ങളെയും സ്വാധീനിച്ചു. അവര്‍ ഓരോരുത്തരായി ‘റവുക്ക’ മാറ്റി തുടങ്ങി. സംഘാടകര്‍ ആയ യുവാക്കള്‍ ആവശ്യപ്പെട്ടിട്ടും വീണ്ടും ‘റവുക്ക’ ധരിയ്ക്കാന്‍ അവര്‍ കൂട്ടാക്കിയില്ല.
ഒടുവില്‍ ജാഥ ലക്ഷ്യസ്ഥാനത്ത് എത്തിയപ്പോള്‍ ‘റവുക്ക’ ധരിച്ച ഒരേ ഒരു പെണ്ണ് മാത്രമേ അതില്‍ ഉണ്ടായിരുന്നുള്ളൂ. സംഘാടകരില്‍ ധനികനായ ഒരാളുടെ ഭാര്യ ആയിരുന്നു ആ പെണ്ണ്.
ആ പ്രതിഷേധ സമരം പരാജയപ്പെട്ടു എന്ന് ചുരുക്കി പറയാം. പിന്നീടും വര്‍ഷങ്ങള്‍ കഴിഞ്ഞാണ് എല്ലാ ജാതിക്കാരായ പെണ്ണുങ്ങള്‍ക്കും മാറ് മറച്ച് ‘റവുക്ക’, ‘ജമ്പര്‍’, തുടങ്ങിയ മേല്‍വസ്ത്രങ്ങള്‍ ധരിയ്ക്കാന്‍ അവകാശം കിട്ടിയത്.
എന്നാല്‍ പുരോഗമന ആശയക്കാരായ ഒരു പറ്റം യുവാക്കള്‍ നടത്തിയ, ആ പ്രതിഷേധജാഥ ഒരു തീപ്പൊരി ആയിരുന്നു.
സമൂഹത്തില്‍ അന്ന് വരെ നില നിന്ന യാഥാസ്ഥിതിക മാമൂലുകളെ ധൈര്യപൂര്‍വ്വം വെല്ലുവിളിച്ച്, പുതിയ കാഴ്ചപ്പാടുകള്‍ തേടാന്‍ പ്രേരിപ്പിയ്ക്കുന്ന ഒരു സാമൂഹികമാറ്റത്തിന്റെ തീപ്പൊരി. ഇപ്പോ
ള്‍ കേരളത്തിലും അത് പോലൊരു മാറ്റത്തിന്റെ തീപ്പൊരി പടരുകയാണ്.
വ്യക്തികളുടെ സ്വകാര്യജീവിതത്തിന്‍ മേല്‍ ബലമായി കടന്നു കയറി സ്വന്തം മത-സാംസ്കാരിക യാഥാസ്ഥിതിക നിയമങ്ങള്‍ നിര്‍ബന്ധപൂര്‍വ്വം അടിച്ചേല്‍പ്പിയ്ക്കാന്‍ ശ്രമിയ്ക്കുന്ന “സദാചാര പോലീസ്” എന്ന് ഓമനപേരില്‍ അറിയപ്പെടുന്ന ‘സാംസ്കാരിക ഗുണ്ട’കളുടെ ചിറകരിയാന്‍ വേണ്ടിയുള്ള ഒരു സാമൂഹികമാറ്റത്തിന്റെ തീപ്പൊരി.
ഏതൊരു ആണും, പെണ്ണും ഒന്നിച്ചിരിയ്ക്കുന്നത് കണ്ടാലോ, സംസാരിയ്ക്കുന്നത് കണ്ടാലോ, ഉടനെ ‘സംസ്കാരത്തിന്റെ’ വാളും പൊക്കിപ്പിടിച്ച് ചാടി വീഴുക എന്നതാണ് സദാചാര ഗുണ്ടകളുടെ സ്വഭാവ സവിശേഷത.
‘മത സംസ്കാരം’ പറഞ്ഞ് സദാചാരം പറയുന്ന സംഘടനകളും, നാട്ടിലെ സദാചാര സൂക്ഷിപ്പുകാര്‍ എന്ന് സ്വയം കരുതുന്ന പ്രമാണിമാരും, എന്തിന് നിയമപാലകന്റെ കുപ്പായം ഇട്ടും കൊണ്ട് സദാചാര പ്രസംഗം നടത്തുന്ന ചില പോലീസുകാര്‍ വരെ ഈ ‘സദാചാര ഗുണ്ടകളുടെ പട്ടികയില്‍ ഉണ്ട്.
പ്രണയം എന്നത് ഏതൊരു മനുഷ്യനെ സംബന്ധിച്ചും ഏറ്റവും മനോഹരമായ ഒരു വികാരം ആണ്. അത് അനുഭവിച്ചവന് മാത്രമേ അതിന്റെ മനോഹാരിത മനസ്സിലാക്കാന്‍ കഴിയൂ. അത് അറിയാത്തവര്‍ ആണ് സദാചാര ഗുണ്ടകളില്‍ ഭൂരിഭാഗവും.
ആണും പെണ്ണും തമ്മില്‍ ഉള്ള ഒരേ ഒരു വികാരം പ്രണയം ആണെന്ന സങ്കല്‍പ്പവും ഈ സദാചാര മേലാപ്പില്‍ അവര്‍ ചുമക്കുന്നുണ്ട്.
സദാചാര ഗുണ്ടകളുടെ മുഖത്തടിയാണ് കൊച്ചിയില്‍ നടക്കാന്‍ പോകുന്ന പ്രതിഷേധ കൂട്ടായ്മ.
എത്ര എതിര്‍പ്പുകള്‍ നേരിട്ടാലും, ഇത്തരം കൂട്ടായ്മകള്‍ കേരളത്തില്‍ എങ്ങും നടക്കണം എന്നാണ് ദിഗംബരന് അഭിപ്രായം. ഒരു ആണും പെണ്ണും ഒരുമിച്ചിരിയ്ക്കുന്നത് കണ്ടാല്‍, ഞരമ്പ്‌ രോഗം വരുന്ന അവസ്ഥ കേരളത്തിലെ ശരാശരി പുരുഷന്റെ തലച്ചോറില്‍ ഇല്ലാതാകുന്നതു വരെ.
ഈ കൂട്ടായ്മയ്ക്ക് എല്ലാ വിജയാശംസകളും നേരുന്നു.
===============
വാല്‍കഷ്ണം:
സദാചാര വിരുദ്ധമായ ഹോട്ടല്‍ അടിച്ചു തകര്‍ക്കാന്‍ വന്നിട്ട് നീ എന്തര് ശിവാ, മിണ്ടാതെ മൊബൈലും നോക്കി നിക്കണെ..
സരിത ആന്റിയുടെ വാട്സ്ആപ്പ് ക്ലിപ്പ് ഇപ്പോള്‍ മൊബൈലില്‍ കിട്ടിയതെ ഉള്ളൂ അണ്ണാ.. ഞാനതൊന്നു കണ്ട് തീര്‍ക്കട്ടെ

2014, ഒക്‌ടോബർ 23, വ്യാഴാഴ്‌ച

“ആ പോലീസ് ഓഫീസറെ ആരും ബോംബ്‌ എറിഞ്ഞില്ല..”

2005ൽ, ആ നശിച്ച ദിവസം, സർക്കിൾ ഇൻസ്‌പെക്ടർ മോഹനൻ നായർ മഹാത്മാഗാന്ധിയുടെ പേരിലുള്ള കോളേജില്‍ പോയത്, ഒരു രക്ഷാകര്‍ത്താവായി പി.ടി.എ യോഗത്തില്‍ പങ്കെടുക്കാന്‍ ആയിരുന്നില്ല. എം.ജി. കോളേജില്‍ വിദ്യാര്‍ഥികള്‍ തമ്മില്‍ അടിയും,കുത്തും,ബോംബേറും ഒക്കെയായി സംഘര്‍ഷം നടക്കുന്നു എന്നും, ഉടനെ വന്നില്ലെങ്കില്‍ കോളെജിനുള്ളില്‍ ശവങ്ങള്‍ വീഴും എന്നും പരാതി ലഭിച്ചപ്പോള്‍, മേലധികാരികളുടെ ഉത്തരവ് അനുസരിച്ച് പാഞ്ഞെത്തുകയായിരുന്നു.
(അയാളുടെ വിവരകേട്‌. അല്ലാതെന്താ)
പോലീസിനെ കണ്ടപ്പോള്‍ ഒരു ബോംബ്‌ സ്വയം പറന്നു വന്ന് സർക്കിൾ ഇൻസ്‌പെക്ടർ മോഹനൻ നായരുടെ വലതുകാലില്‍ പ്രണാമം അര്‍പ്പിയ്ക്കുകയാണ് ഉണ്ടായത്. അതിന്റെ പരിണിതഫലമായി അദ്ദേഹത്തിന് ഉപയോഗ്യശൂന്യമായ കാലുമായി ഒരു വര്‍ഷത്തോളം ആശുപത്രി കിടക്കയില്‍ കിടന്ന് സമയം കളയേണ്ടി വന്നു. അദ്ദേഹത്തിന്റെ ഒപ്പം ഒരു “കൂട്ടിന്” ആശുപത്രിയില്‍ പ്രവേശിപ്പിയ്ക്കപ്പെട്ട രണ്ട് എസ്.ഐ മാരും ചില പോലീസുകാരും അത്രയും കാലം കിടക്കേണ്ടി വരാത്തത്, ആ ബോംബിന് മോഹനൻ നായരോട് മാത്രം തോന്നിയ പ്രത്യേക പ്രണയം കൊണ്ടാണ് എന്നതും പ്രസ്താവ്യമാണ്.
അതൊക്കെ വിധിയുടെ അനിവാര്യമായ തമാശകള്‍ എന്നല്ലേ മനസ്സിലാക്കേണ്ടത്..
എന്നാല്‍ ഈ ‘നിസ്സാര’ സംഭവം നടന്ന ഉടനെ, കേരളാ പൊലീസ്, മാരാര്‍ജി ഭവനില്‍ നിന്നും അനുമതി വാങ്ങാതെ, എം.ജി കോളേജ് കാമ്പസിൽ കയറി ഒരു അതിഭീകര ‘രാജദ്രോഹ’ റെയ്ഡ് നടത്തുകയും, അവിടെ നിന്ന് ബോംബ്‌, കത്തി, വടിവാളുകള്‍, ഹോക്കിസ്റ്റിക്കുകള്‍, കമ്പിപാരകള്‍ തുടങ്ങിയ കളിപ്പാട്ടങ്ങളുടെ ഒരു കമനീയശേഖരം കണ്ടെത്തി കവര്‍ച്ച ചെയ്യുകയും, എട്ടും പൊട്ടും തിരിയാത്ത ആദര്‍ശ ധീരരും, രാജ്യസ്നേഹികളും ആയ 32 ആര്‍ഷ ഭാരത സാംസ്കാരിക പൈതങ്ങളെ പിടികൂടി അവര്‍ക്ക് മേല്‍ വധശ്രമം, സ്‌ഫോടകവസ്‌തുക്കളുടെ ഉപയോഗം, സംഘംചേരൽ, ഗൂഢാലോചന തുടങ്ങിയ വകുപ്പുകൾ ചുമത്തി കള്ളകേസ് എടുക്കുകയും ചെയ്തു.
ഒരു ബോംബിന് സ്വയം മോഹനൻ നായരോട് തോന്നിയ പ്രണയത്തിന് ആര്‍ഷ ഭാരത പൈതങ്ങള്‍ എന്ത് പിഴച്ചു?
എവിടെ കേട്ടിട്ടുണ്ട് ഇത് പോലെ ഒരു അനീതി..
ഈ അനീതിയ്ക്ക് പരിഹാരം തേടിയാണ് കേസിലെ പതിനേഴാം പ്രതിയായിരുന്ന ആദർശ് എന്ന പൈതല്‍, കരുണാമയന്‍ എന്ന് പുകള്‍പെറ്റ കേരളമുഖ്യമന്ത്രി ഉമ്മന്‍ ചാണ്ടി ഗാന്ധിയെ കണ്ടത്.
പൈതല്‍ കൂടുതല്‍ ഒന്നും പറഞ്ഞില്ല.. ഒരു വാറോല ആ കാലുകളില്‍ സമര്‍പ്പിച്ച്‌ കരഞ്ഞു പറഞ്ഞു.. “എനിയ്ക്ക് പൊലീസ് കോൺസ്റ്റബിളായി നിയമനഉത്തരവ് ലഭിച്ചെങ്കിലും കേസുള്ളതിനാൽ ജോലിയിൽ പ്രവേശിക്കാനാവുന്നില്ല. ഞാന്‍ നിരപരാധി ആണ്. തിരുവുള്ളം കനിയണം. മാപ്പാക്കണം.”
ചാണ്ടി ഗാന്ധി പണ്ടേ മനുഷ്യത്വത്തിന്റെ പര്യായം ആണ്. കേരളത്തിലെ കൊണ്ഗ്രെസ്സിന്റെ കിരീടം വെയ്ക്കാത്ത ലീഡറെ പണ്ട് ഒരു പെണ്ണ്-ചാര കേസില്‍ കുടുക്കി മുഖ്യമന്ത്രി കസേരയില്‍ നിന്നും തെറിപ്പിയ്ക്കാന്‍ കളിച്ചു എന്നൊക്കെ ശത്രുക്കള്‍ അപവാദം പറയുന്നുണ്ടെങ്കിലും, തട്ടിപ്പ് കേസിലെ പ്രതികളുടെ കുടുംബ കാര്യങ്ങള്‍ക്ക് പോലും രഹസ്യ “മധ്യസ്ഥ” പ്രാര്‍ത്ഥന നടത്തി കൊടുക്കാന്‍ മടിയ്ക്കാത്ത ആ മാനുഷികതയുടെ വലിപ്പം അറിഞ്ഞവര്‍, അത്തരം ആരോപണങ്ങള്‍ വിശ്വസിയ്കുന്ന പതിവില്ല.
ചാണ്ടി ഗാന്ധി ജനസമ്പര്‍ക്ക പരിപാടിയ്ക്ക് വന്ന തളര്‍വാത രോഗിയെ നോക്കുന്ന പോലെ, ആര്‍ഷ ഭാരത പൈതലെ അടിമുടി നോക്കി. പിന്നെ കയ്യില്‍ തന്ന വാറോല മണപ്പിച്ചു നോക്കി.
“നല്ല നിരപരാധി മണം”.
മാത്രമല്ല അതില്‍ സ്വന്തം പാര്‍ട്ടിക്കാരന്‍ ആയ സ്ഥലം എം.എല്‍.എ യുടെ ശുപാര്‍ശയും ഉണ്ട്. പിന്നെന്തു വേണം!
ഉടനെ അദ്ദേഹം തീര്‍പ്പ് കല്‍പ്പിച്ചു.
“ശരിയാണ്. ഇവന്‍ നിരപരാധി ആണ്. ആരവിടെ.. ഇവനെ കേസില്‍ നിന്നും മോചിപ്പിച്ചു, പോലീസില്‍ കൂടിയ ഏതെങ്കിലും പദവിയില്‍ പ്രതിഷ്ടിയ്ക്കൂ”
ഒരു സര്‍ക്കിള്‍ ഇന്‍സ്പെക്ടറെ വീഴ്ത്താന്‍ കഴിവുള്ളവനെ കുറഞ്ഞത്‌ എസ്.പി പദവി എങ്കിലും നല്‍കണം എന്നുണ്ടായിരുന്നു ആ മഹാത്മാവിന് മനസ്സില്‍. പക്ഷെ, അത്രയ്ക്ക് ഇപ്പോള്‍ വേണ്ട എന്ന്‍ തോന്നിയത് മനസ്സിന്റെ ഒരു ചാഞ്ചാട്ടം കൊണ്ട് മാത്രം..
മുഖ്യമന്ത്രിയുടെ നിർദ്ദേശത്തെ തുടർന്ന് ആഭ്യന്തരസെക്രട്ടറി സിറ്റിപൊലീസ് കമ്മിഷണറോട് കേസ് പിൻവലിക്കാൻ എതിർപ്പില്ലെന്നുള്ള റിപ്പോർട്ട് ആവശ്യപ്പെട്ടു.
എന്നാല്‍ അവിടെയും ഉണ്ടല്ലോ ശകുനം മുടക്കികള്‍.
കേസ് പിൻവലിക്കാനുള്ള നീക്കത്തെ ശക്തമായി എതിർത്ത് അന്വേഷണ ഉദ്യോഗസ്ഥനായ കന്റോൺമെന്റ് അസി. കമ്മിഷണർ സിറ്റി പൊലീസ് കമ്മിഷണർക്ക് റിപ്പോർട്ട് നൽകി. ബോംബേറിൽ പരിക്കേറ്റ സി.ഐ മോഹൻനായർ ഒരു വർഷം ചികിത്സയിൽ കഴിഞ്ഞതാണെന്നും രണ്ട് എസ്.ഐമാർക്കും നിരവധി പൊലീസുകാർക്കും പരിക്കേറ്റ കേസാണെന്നും അസി. കമ്മിഷണർ ചൂണ്ടിക്കാട്ടി. ഗുരുതര സ്വഭാവമുള്ള കേസ് പിൻവലിക്കരുതെന്ന അന്വേഷണ ഉദ്യോഗസ്ഥന്റെ റിപ്പോർട്ട് അതേപടി കമ്മിഷണർ ആഭ്യന്തര സെക്രട്ടറിക്ക് കൈമാറി.
ഇതെന്തൊരു ധിക്കാരം!
സ്വന്തം ജീവനും ജീവിതവും പണയം വച്ചും ക്രമസമാധാനം പാലിക്കാൻ മുന്നിട്ടിറങ്ങുന്ന പോലീസുകാർക്കല്ല, അവരെ കടന്നാക്രമിക്കുന്ന ക്രിമിനലുകൾക്കാണ് മനുഷ്യത്വപരമായ സമീപനത്തിന് അർഹതയുള്ളതെന്ന് അധികാരത്തിന്റെ കുത്തകാവകാശിയായ മുഖ്യമന്ത്രി സാക്ഷാൽ ഉമ്മൻ ചാണ്ടി തന്നെ, തീർപ്പ് കല്പിച്ചുകഴിഞ്ഞ കേസാണിത്. അപ്പോള്‍ പറയുന്ന പോലെ ഒരു റിപ്പോര്‍ട്ട് ഉണ്ടാക്കി, പറയുന്ന സ്ഥലത്ത് ഒപ്പിട്ട് കൊടുക്കാതെ, ധിക്കാരം പറയുന്നോ?
കമ്മീഷണരുടെ റിപ്പോര്‍ട്ട് ദേ ചവറ്റുകുട്ടയില്‍!
ഒരു പ്രതിയെ മാത്രം വെറുതെ വിട്ടാല്‍ മറ്റ് 31 പ്രതികള്‍ പിണങ്ങില്ലേ? ഇനി അവര്‍ക്കും ഭാവിയില്‍ ഒരു പി.എസ്.സി ജോലി കിട്ടിക്കൂടാ എന്നുണ്ടോ? (നിയമന നിരോധന കാലത്ത് എന്ത് പി.എസ്.സി എന്ന് ചോദിയ്ക്കരുത്). എം.ജി കോളേജില്‍ ചെയ്ത പോലെ, ഇനിയും എന്തെല്ലാം ആര്‍ഷ ഭാരത സേവനങ്ങള്‍ നടത്തേണ്ട പൈതങ്ങള്‍ ആണ് അവര്‍. അവരെ വെറുതെ ഒരു നിസ്സാര കേസില്‍ ശിക്ഷിയ്ക്കുകയോ?
ശാന്തം.. പാപം!
ഉമ്മന്‍ ചാണ്ടി ഗാന്ധി അലറി.
“ആരവിടെ... എല്ലാ പ്രതികളെയും നിരപരാധികള്‍ ആയി നാം പ്രഖ്യാപിയ്ക്കുന്നു. ഉടനെ കേസെല്ലാം പിന്‍വലിച്ചു ഈ പൈതങ്ങളെ സ്വതന്ത്രര്‍ ആക്കൂ. ഏതെങ്കിലും പോലീസുകാരന്‍ എതിര്‍ത്താല്‍, അവനെ പകരം പ്രതിയാക്കി കേസ് എടുക്കുന്നതായിരിയ്ക്കും.”
അങ്ങനെ പൊലീസിന്റെ അതിശക്തമായ എതിർപ്പ് അവഗണിച്ച്, ഒരു പ്രതിയുടെ അപേക്ഷയിൽ 32 പ്രതികളെയും വിട്ടയക്കാൻ സർക്കാർ തീരുമാനിക്കുകയായിരുന്നു.
ഇതാണ് ശരിയ്ക്കും മാവേലിനാട്!
2012 ഡിസംബർ 27നാണ് ആഭ്യന്തര വകുപ്പിൽ നിന്ന് കേസ് പിൻവലിക്കുന്നതിനുള്ള അനുമതിയായത്. ഇതിന്റെ അടിസ്ഥാനത്തിൽ ആരംഭിച്ച നടപടിക്രമങ്ങളുടെ ഭാഗമായി 2013 ഒക്ടോബർ 18ന് തിരുവനന്തപുരം ഒന്നാംക്ലാസ് അഡിഷണൽ സെഷൻസ് ജഡ്‌ജ് കെ.എസ്. അംബിക കേസ് തള്ളുകയും ചെയ്തു.
(എറിഞ്ഞവനും എറി കൊണ്ടവനും ഇല്ലാത്ത പരാതിയാണോ ഇനി കോടതിയ്ക്ക്... പുല്ല്... ദേ കിടക്കുന്നു നിന്റെ കേസ്..)
ചാണ്ടി മിശീഹയ്ക്ക് സ്തുതിയായിരിയ്ക്കട്ടെ...
അങ്ങനെ കേസൊക്കെ പിന്‍വലിച്ചു, എല്ലാം പറഞ്ഞ് കോമ്പ്ലിമെന്റ്സ് ആക്കി ഇരുന്നപ്പോള്‍ ആണ്, ചില ചാനലുകാരും പത്രക്കാരും ചേര്‍ന്ന്, രഹസ്യമായി നടന്ന ഈ സംഭവങ്ങള്‍ ഒക്കെ കുത്തിപൊക്കി കൊണ്ട് വന്ന് സര്‍ക്കാരിനെ നാറ്റിയ്ക്കാന്‍ നോക്കുന്നത്..
അവന്റെയൊക്കെ തലയില്‍ “ഹുദ് ഹുദ്’ വീഴട്ടെ..
ഇതൊക്കെ കണ്ട് ചാണ്ടി ഗാന്ധി പേടിയ്ക്കുമെന്നാണ് ഇവന്റെയൊക്കെ വിചാരം..
നടന്നത് തന്നെ..
കഴിഞ്ഞ കുറച്ചു കാലമായി, കോടതികളില്‍ നിന്നും തെറി കേള്‍ക്കാത്ത ഒരു ദിവസം ഇല്ല. എന്നിട്ടും ചാണ്ടിയുടെ തൊലിപ്പുറത്ത് അത് ഏറ്റിട്ടില്ല..
പിന്നെയാണ് ഇത്.
ദിവസവും ‘എന്ടോസള്‍ഫാന്‍’ കുടിച്ച് ജീവിയ്ക്കുന്നവനെയാണ്, എലിവിഷം കാട്ടി പേടിപ്പിയ്ക്കുന്നത്.
=================
വാല്‍കഷണം:
എന്തരെടെ ശിവാ, കൈയ്യില്‍ കുറെ ബോംബുമായി പോകുന്നത്?
പി.എസ്.സി റാങ്ക് ലിസ്റ്റില്‍ എന്റെ പേര് വന്നു അണ്ണാ.. കുറച്ചു പോലീസുകാരോട് പണ്ടേ ഉള്ള കലിപ്പ് ബാക്കിയുണ്ട്. അതൊന്ന് തീര്‍ത്തിട്ട് വരാം.

2014, ഒക്‌ടോബർ 8, ബുധനാഴ്‌ച

“സംഘദര്‍ശന്‍” : ഇന്നത്തെ പരിപാടികള്‍...

(ശ്രീ നരേന്ദ്ര മോഡിയുടെ നേതൃത്വത്തില്‍ ബി.ജെ.പി സര്‍ക്കാര്‍ ഒറ്റയ്ക്ക് അധികാരത്തില്‍ വന്നതിനു ശേഷം, പ്രതീക്ഷിച്ചതിലും വേഗത്തില്‍ തന്നെ രാജ്യത്ത് സംഘപരിവാര്‍ ആശയങ്ങള്‍ പ്രാവര്‍ത്തികമാക്കാനുള്ള ശ്രമങ്ങള്‍ നടക്കുന്നതാണ് നാം കാണുന്നത്. നാല് മാസം തികയുന്നതിന് മുന്‍പ് തന്നെ, ജനങ്ങളുടെ നികുതി പണത്തില്‍ പ്രവര്‍ത്തിയ്ക്കുന്ന ദേശീയ മാധ്യമമായ ദൂരദര്‍ശനില്‍, ചരിത്രത്തില്‍ ആദ്യമായി, ഇന്ത്യാ മഹാരാജ്യത്ത് ഒരു പഞ്ചായത്ത് പ്രസിഡന്റിന്റെ അധികാരം പോലും ഇല്ലാത്ത, ഒരു വര്‍ഗീയ സംഘടനാ നേതാവ് മാത്രമായ ആര്‍.എസ്.എസ് തലവന്റെ പ്രസംഗം തത്സമയം കാണിച്ച്, സര്‍ക്കാര്‍ തങ്ങളുടെ ലക്‌ഷ്യം വ്യക്തമാക്കിയിരിയ്ക്കുന്നു. ഇങ്ങനെ പോയാല്‍ ഇനി ഒരു നാല് വര്ഷം കഴിഞ്ഞാല്‍ ദൂരദര്‍ശന്‍ പൂര്‍ണ്ണമായും ഒരു ‘സംഘ ദര്‍ശന്‍’ ആകും എന്ന് സംശയമില്ല. )
അപ്പോള്‍ പ്രതീക്ഷിയ്ക്കാവുന്ന പരിപാടികളുടെ ഒരു ഏകദേശ രൂപം
========================================================
“സംഘദര്‍ശന്‍”
ഇന്നത്തെ പരിപാടികള്‍...
രാവിലെ 6:00 മണിയ്ക്ക് വേദ പാരായണം: സ്വാമി ആഘോരാനന്ദ
രാവിലെ 7:00 മണിയ്ക്ക് ഗീതാ പാരായണം : സ്വാമി അസ്സിമാനന്ദ
രാവിലെ 8:00 മണിയ്ക്ക് “ദണ്ടയും വാളും’ ഉപയോഗിച്ചുള്ള ആയോധന പരിശീലന മുറകള്‍. അവതരണം: കാര്യവാഹക് മുബൈ ദാമോദര്‍ജി
രാവിലെ 9:00 മണിയ്ക്ക് സദാചാര മാര്‍ഗ്ഗദര്‍ശക പ്രഭാഷണം : പൂജനീയ ആശ്രാം ബാപ്പു
രാവിലെ 10:00 മണിയ്ക്ക് “ലവ് ജിഹാദിനെ’ ചെറുക്കാനുള്ള നൂറു വഴികള്‍” എന്ന വിഷയത്തില്‍ പ്രത്യേക ക്ലാസ് : സ്വാമി അഗ്നിവേശ്.
രാവിലെ 11:00 മണിയ്ക്ക് പൂജ വഴി പ്രകൃതിക്ഷോഭം തടയുന്നതെങ്ങനെ അഥവാ നിരീശ്വര വാദികള്‍ മലവിസര്‍ജ്ജനം ചെയ്താലുള്ള ദോഷങ്ങള്‍: മാര്‍ഗ്ഗ ദര്‍ശനം– കുമാരി ഉമാഭാരതി.
ഉച്ചയ്ക്ക് 12:00 മണിയ്ക്ക് പാചകരംഗം : ഗോമൂത്രം ഉപയോഗിച്ചുള്ള ആരോഗ്യപ്രദമായ പാനീയങ്ങള്‍ തയ്യാറാക്കുന്ന വിധം: സ്വാമിനി റിതംബര.
ഉച്ചയ്ക്ക് 1:00 മണിയ്ക്ക് മധുര ലോകസഭ മണ്ഡലത്തിലെ ജനങ്ങളുടെ പ്രത്യേക അഭ്യര്‍ത്ഥ മാനിച്ച് സിനിമാ നടി ഹേമാമാലിനിയുടെ ദര്‍ശന അഭിമുഖം.
ഉച്ചയ്ക്ക് 2:00 മണിയ്ക്ക് ശാസ്ത്ര പരിപാടി: മംഗള്‍യാനും ആര്‍ഷ ഭാരത പുരാതന ശാസ്ത്രങ്ങളും. അവതരണം ഡോ: ഗോപാലകൃഷ്ണന്‍
ഉച്ചയ്ക്ക് 3:00 മണിയ്ക്ക് “ഇന്നത്തെ ഹിന്ദുവാര്‍ത്ത”. വായിയ്ക്കുന്നത് ഡോ: സുബ്രമണ്യം സ്വാമി.
വൈകിട്ട് 4:00 മുതല്‍ 6:00 വരെ നാഗ്പൂരില്‍ നടക്കുന്ന ആര്‍.എസ്.എസ് ബൌധിക് ബൈട്ടക്കില്‍ നേതാക്കന്മാരുടെ പ്രസംഗം – ലൈവ് കവറേജ്.
വൈകിട്ട് 6:00 മണിയ്ക്ക് ചരിത്ര മെഗാസീരിയല്‍ “മഹാഗുരു ഗോള്‍വര്‍ക്കര്‍”
വൈകിട്ട് 7:00 മണിയ്ക്ക് ക്രൈം മെഗാസീരിയല്‍ “മോഹന്‍ലാല്‍ ഗാന്ധിയും മഹാത്മാഗോട്സെയും”
രാത്രി 8:00 മണിയ്ക്ക് വാര്‍ത്താ അധിഷ്ടിത പരിപാടി “പോലീസ് എന്‍കൌണ്ടര്‍”: അവതരണം ശ്രീ അമിത്ഷാ
രാത്രി 9:00 മണിയ്ക്ക് “വിചാരധാര” : എങ്ങനെ രാമരാജ്യം സൃഷ്ട്ടിയ്ക്കാം” അവതരണം: മോഹന്‍ ഭാഗവത്.
രാത്രി 10:00 മണിയ്ക്ക് സാമ്പത്തിക വിചാരം. “വ്യവസായത്തിന് വേണ്ടി സര്‍ക്കാര്‍ വനഭൂമിയും, പാവപ്പെട്ട കര്‍ഷകരുടെ കൃഷിഭൂമിയും പരിസ്ഥിതി നിയമങ്ങളും, സമരങ്ങളും മറികടന്ന് ഏറ്റെടുക്കാനുള്ള എളുപ്പമാര്‍ഗ്ഗങ്ങള്‍” അവതരണം: പൂജനീയ അടാനി മഹാരാജ്
രാത്രി 11:00 മണിയ്ക്ക് "ഹിന്ദു സിനിമകള്‍" സിനിമാ, സീരിയല്‍ മേഖലയിലെ പ്രമുഖര്‍ പങ്കെടുക്കുന്ന പ്രത്യേക പരിപാടി.
രാത്രി 12:00 മണി മുതല്‍ മോഡി സ്തുതികള്‍: ഗുജറാത്ത് കാണ്ഡം മൂന്നാം ഭാഗം.
1:00 മണി മുതല്‍ രാവിലെ 6:00 വരെ "ആര്‍.എസ്.എസ് ഗാനങ്ങള്‍"

2014, സെപ്റ്റംബർ 10, ബുധനാഴ്‌ച

മോഡി “ഗുരുവും” കുട്ടികളും....

പണ്ട് ജര്‍മ്മനിയില്‍ സര്‍വ്വാധിപതിയായി ഹിറ്റ്ലര്‍ വാഴുന്ന കാലത്തെ കുറിച്ച് ഒരു തമാശ കഥയുണ്ട്.
ജനങ്ങള്‍ക്കിടയില്‍ തന്റെ സ്വാധീനം മനസ്സിലാക്കാന്‍ വേണ്ടി ഹിറ്റ്ലര്‍ വേഷം മാറി ഒരു സിനിമാ തീയറ്റര്‍ സന്ദര്‍ശിച്ചു. സിനിമ തുടങ്ങുന്നതിനു മുന്‍പ് ഹിറ്റ്ലറെ വാഴ്ത്തുന്ന ഒരു ദേശസ്നേഹ ഹ്രസ്വഗാനചിത്രീകരണം കാണിച്ചു. ഉടനെ എല്ലാവരും എഴുന്നേറ്റു നിന്ന് നാസി രീതിയില്‍ കൈ മുന്നോട്ടു നീട്ടിപ്പിടിച്ച്‌ അഭിവാദ്യം ചെയ്തു.
തന്റെ ആശയങ്ങളെ ജനങ്ങള്‍ എത്ര ഒരുമയോടെ ഉള്‍കൊള്ളുന്നു എന്ന് ചിന്തിച്ച് അഭിമാനത്തോടെ ഹിറ്റ്ലര്‍ എഴുന്നേല്‍ക്കാതെ തന്റെ സീറ്റില്‍ തന്നെ ഇരുന്നു.
പെട്ടെന്ന് അടുത്ത് എഴുന്നേറ്റു നിന്ന മാന്യന്‍ ഹിറ്റ്ലറെ തോണ്ടി വിളിച്ച് പതുക്കെ പറഞ്ഞു.
“ഈ തെണ്ടിയെ ബഹുമാനിയ്ക്കണം എന്ന് ഞങ്ങള്‍ക്കും ആഗ്രഹമില്ല സുഹൃത്തേ. പക്ഷെ, ആ നാസി നായിന്റെ മക്കള്‍ ആരെങ്കിലും കണ്ടാല്‍ പിന്നെ, കൊണ്സെന്‍ട്രേഷന്‍ ക്യാമ്പില്‍ കിടന്ന് ചാവേണ്ടി വരും. അത് കൊണ്ട് പെട്ടെന്ന് എഴുന്നേറ്റു നില്‍കൂ”..
ലോകത്തിലെ എല്ലാ ഏകാധിപതികളുടെയും ചരിത്രം പരിശോധിച്ചാല്‍, ഇത്തരത്തില്‍ സ്വന്തം ജനതയുടെ മേല്‍ നിര്‍ബന്ധപൂര്‍വ്വം അടിച്ചേല്‍പ്പിയ്ക്കപ്പെട്ട ഒരു ‘നിര്‍ബന്ധിത ബഹുമാനത്തിന്റെ’ കഥ കാണാന്‍ കഴിയും. തന്റെ നിര്‍ദേശങ്ങളെ ഒരു എതിര്‍പ്പും കാണിയ്ക്കാതെ, വള്ളി പുള്ളി വിടാതെ യന്ത്രങ്ങളെപ്പോലെ അനുസരിയ്ക്കുന്ന ഒരു അടിമ ജനത ഏതൊരു എകാധിപതിയുടെയും സ്വപ്നമാണ്.
ഗുജറാത്തിലെ ഭരണകാലത്ത് ഒരു ഏകാധിപതിയുടെ എല്ലാ ലക്ഷണങ്ങളും പലപ്പോഴും ഒരു മറ കൂടാതെ കാണിച്ചിട്ടുള്ള നരേന്ദ്ര ദാമോദര്‍ മോഡിയുടെ കൈയ്യില്‍, “അഴിമതി കടലിനേക്കാള്‍ ഭേദം വര്‍ഗീയ ചെകുത്താന്‍” എന്ന വിചാരത്തിന്റെ പുറത്ത്, ഇന്ത്യന്‍ ജനത പ്രധാനമന്ത്രി കസേര വെച്ചു കൊടുത്തപ്പോള്‍, പലരും ഭയന്നിരുന്നതും അത്തരം അടിച്ചെല്‍പ്പിയ്ക്കലുകളുടെ വരവിനെ തന്നെയാണ്.
എന്തായാലും അധികം കാത്തിരിയ്ക്കേണ്ടി വന്നില്ല.
അധ്യാപകദിനം ആയി നാം വര്‍ഷങ്ങള്‍ ആയി ആചരിയ്ക്കുന്ന സെപ്റ്റംബര്‍ അഞ്ചില്‍ തന്നെ തന്റെ അജണ്ടയുടെ ഉദ്ഘാടനം നടത്താനായിരുന്നു മോഡിയുടെ തീരുമാനം. അധ്യാപകദിനത്തെ “ഗുരു ഉത്സവ്” എന്ന് സംസ്കൃതവല്‍കരിയ്ക്കുക മാത്രമല്ല, അന്നേ ദിവസം രാജ്യത്തുള്ള എല്ലാ സ്കൂളുകളിലും തന്റെ പ്രസംഗം തത്സമയം സംപ്രേക്ഷണം നിര്‍ബന്ധമായി കാണിയ്ക്കണം എന്ന്‍ തിട്ടൂരവും വന്നു.
ലോകം ആരാധിച്ച ജവഹര്‍ലാല്‍ നെഹ്‌റുവും, രാജ്യം സ്നേഹിച്ച ലാല്‍ബഹാദൂര്‍ ശാസ്ത്രിയും അടക്കമുള്ള പല മഹാന്മാരായ പ്രധാനമന്ത്രിമാരും നമ്മെ ഭരിച്ചിട്ടുണ്ട്. അവരാരും ഒരിയ്ക്കലും ഇത്തരത്തില്‍ നിര്‍ബന്ധപൂര്‍വ്വം തങ്ങളുടെ പ്രസംഗം ആരെങ്കിലും കേള്‍ക്കണമെന്ന് വാശി പിടിച്ചിട്ടില്ല.
എന്നാല്‍ അവരെപ്പോലെയാണോ നമ്മുടെ “മോഡി ഗുരു”? അദ്ദേഹത്തിന് അവരെക്കാളും ഒക്കെ ഉയരെയല്ലേ സ്ഥാനം?
കുറഞ്ഞ പക്ഷം, ഇന്ത്യ മതത്തിന്റെ പേരില്‍ ന്യൂനപക്ഷആളുകളെ വെട്ടികൊല്ലുന്ന രാജ്യം ആണെന്നും, അതിന് ഭരണാധികാരികള്‍ തന്നെ ഒത്താശ ചെയ്തു കൊടുക്കാറുണ്ട് എന്നും ചുരുങ്ങിയ കാലത്തെ ഗുജറാത്ത് ഭരണം കൊണ്ട്, ലോകം മുഴുവന്‍ “(കു)പ്രസിദ്ധി” നേടികൊടുത്ത ചരിത്രമുള്ള മഹാനല്ലേ. പിന്നെ ഇത് ചെയ്തതില്‍ എന്താണ് അത്ഭുതം എന്ന് ആരാധകര്‍ ചോദിയ്ക്കുന്നു.
എന്നാല്‍ പിന്നെ മോഡി ഗുരു കുട്ടികള്‍ക്ക് നല്‍കിയ സാരോപദേശങ്ങള്‍ കേട്ട് കളയാം എന്ന് ദിഗംബരനും കരുതി. എന്തൊക്കെ വിലപിടിച്ച മൊഴി മുത്തുകള്‍ ആ വായില്‍ നിന്ന് തൊഴിയുന്നു എന്നറിയാനുള്ള ഒരു ആകാംഷ!
പ്രതീക്ഷ തെറ്റിയില്ല. ആ ജിഹ്വയില്‍ നിന്നും വീണ ചില മൊഴി മുത്തുകള്‍ കേട്ടപ്പോള്‍ “മൗനം വിദ്വാനു ഭൂഷണം” എന്ന പഴമൊഴിയുടെ വില തിരിച്ചറിഞ്ഞു.
ഇന്ത്യയുടെ രാഷ്ട്രപിതാവ് മോഹന്‍ലാല്‍ ഗാന്ധിയാണ് എന്ന് കണ്ടുപിടിച്ച ആ അപാര പൊതുവിജ്ഞാനത്തിന്റെ നിലവാരത്തില്‍ നിന്നും, മോഡി ഗുരു ഒരടി പോലും മുന്നോട്ടു പോയിട്ടില്ല എന്ന്‍ ആ കുട്ടികളുമായുള്ള സംവാദപരിപാടി തെളിയിച്ചു.
ഇത്തവണ അദ്ദേഹം തന്റെ വിജ്ഞാന ഭണ്ടാരം തുറന്നത് പുതിയൊരു അറിവുമായി ആണ്. “കാലാവസ്ഥാ വ്യതിയാനം” എന്ന പ്രതിഭാസം മനുഷ്യന്‍ വയസ്സാകുമ്പോള്‍ ഉണ്ടാകുന്ന ഒരു തോന്നല്‍ മാത്രമാണ് എന്നായിരുന്നു മോഡി ഗുരുവിന്റെ കണ്ടുപിടിത്തം.
ആസ്സാമില്‍ നിന്നുള്ള ഒരു വിദ്യാര്‍ഥി മോഡിഗുരുവിനോട് ചോദിച്ച ചോദ്യം ഇതായിരുന്നു. “ലോകമെങ്ങും ആശങ്കയോടെ ചര്‍ച്ച ചെയ്യുന്ന കാലാവസ്ഥാ വ്യതിയാനത്തെ പറ്റി താങ്കളുടെ അഭിപ്രായം എന്താണ്?”
അനന്തരം മോഡി ഗുരു ഉവാച.
“കാലാവസ്ഥാ വ്യതിയാനം എന്ന വാക്ക് തന്നെ തെറ്റല്ലേ! കാലാവസ്ഥയ്ക്ക് ഒരു വ്യതിയാനവും വന്നിട്ടില്ല. നമ്മുടെ സഹനശേഷിയ്ക്കും ശീലങ്ങള്‍ക്കും ആണ് മാറ്റം വന്നത്. നമ്മള്‍ മാറുന്നത് അനുസരിച്ച് സ്വയം മാറി സംതുലനം വരുന്ന വിധത്തില്‍ ആണ് ദൈവം ഈ ലോകത്തെ സൃഷ്ടിച്ചത്. യഥാര്‍ത്ഥത്തില്‍ നമ്മുടെ കുടുംബത്തില്‍ ചില ആളുകള്‍ വയസ്സകാരില്ലേ. അപ്പോള്‍ അവര്‍ പറയും ഭയങ്കര തണുപ്പ് എന്ന്. കാരണം തണുപ്പ് സഹിയ്ക്കാനുള്ള അവരുടെ കഴിവ് കുറഞ്ഞു. അതായത് കാലാവസ്ഥ അല്ല മാറിയത് നമ്മുടെ സഹനശേഷി ആണ്”.
എന്താ ഒരു അറിവ്, അല്ലെ!
ലോകത്ത് ഹരിത വാതകങ്ങളുടെ അമിത ഉപയോഗം മൂലവും, ആഗോള താപനം മൂലവും, പ്രകൃതി വിഭവങ്ങളുടെ അമിത ചൂഷണം മൂലവും കാലാവസ്ഥയില്‍ വരുന്ന വന്‍മാറ്റങ്ങളെ കുറിച്ച് പഠിയ്ക്കാനും, അതിനെ പ്രതിരോധിയ്ക്കാനും രാജ്യങ്ങള്‍ കോടിക്കണക്കിന് ഡോളര്‍ ചിലവഴിയ്ക്കുന്ന കാലമാണിത്. കാലാവസ്ഥാ വ്യതിയാനം കാരണം ഭക്ഷ്യസുരക്ഷ അപകടത്തില്‍ എന്ന് ഐക്യരാഷ്ട്ര സഭ തന്നെ മുന്നറിയിപ്പ് നല്‍കി കഴിഞ്ഞു.
അതിനെ പറ്റിയുള്ള വാര്‍ത്ത ഇവിടെ വായിയ്ക്കാം..
അങ്ങനെ ലോകം മുഴുവന്‍ ആശങ്കപ്പെടുമ്പോള്‍ ആണ്, ഇന്ത്യന്‍ പ്രധാനമന്ത്രി നമ്മുടെ കുട്ടികളെ പഠിപ്പിയ്ക്കുന്നത് “കാലാവസ്ഥാ വ്യതിയാനം വാര്‍ധക്യകാലത്തെ വെറുമൊരു തോന്നലാണ്” എന്ന്..
ഇമ്മാതിരി ഗുരുക്കന്മാര്‍ അധികം ഉണ്ടെങ്കില്‍ ഇന്ത്യയിലെ കുട്ടികള്‍ ഉപരിപഠനത്തിനായി വിദേശത്ത് പോകേണ്ടി വരില്ല.
സാധാരണക്കാരന്റെ ഭാഷയില്‍ പറഞ്ഞാല്‍ “നമിച്ചു ഗുരോ...നമിച്ചു.”

2014, സെപ്റ്റംബർ 4, വ്യാഴാഴ്‌ച

യുവമോർച്ചയും “മദ്യ”സമരവും ഒരു വെടിയ്ക്ക് പല പക്ഷികളും...

നമ്മുടെ നാടിന്റെ “സാംസ്കാരം” കാത്തു സൂക്ഷിയ്ക്കുന്നതില്‍ യുവമോര്‍ച്ച എന്ന ആര്‍.എസ്.എസ് ജൂനിയര്‍ സംഘത്തിന്റെ അദമ്യമായ അഭിനിവേശത്തെ പറ്റി ആര്‍ക്കെങ്കിലും സംശയം ഉണ്ടെങ്കില്‍, അവര്‍ പാകിസ്ഥാനികള്‍ മാത്രമായിരിയ്ക്കും, എന്ന കാര്യത്തില്‍ സംശയം ഇല്ലാത്തവര്‍ ആണല്ലോ നമ്മള്‍ ഇന്ത്യക്കാര്‍.
അന്യമതക്കാരന്റെ പള്ളയ്ക്ക് കത്തി കയറ്റിയും, കൂട്ടം കൂടി അവന്റെ ആരാധാനാലയങ്ങള്‍ തകര്‍ത്തും, വര്‍ഗീയലഹളകള്‍ ഉണ്ടാക്കിയും ഒക്കെ ഭാരതീയ “സംസ്കാരം” പൂത്തുലഞ്ഞ കാഴ്ചകള്‍ എത്രയോ അവര്‍ നാട്ടിന് നല്‍കിയിട്ടുണ്ട്.
നാല് സീറ്റില്‍ നിന്നും സ്വന്തം പാര്‍ട്ടിയെ രാജ്യം ഭരിയ്ക്കാനുള്ള ശേഷിയിലേയ്ക്ക് എത്തിച്ചതിനു പിന്നില്‍ ഇമ്മാതിരി “സാംസ്കാരിക വിപ്ലവ”ത്തിനുള്ള പങ്ക് ചെറുതല്ല.
എന്നാലും സംഘപരിവാറിന് എന്നും ഒരു കണ്ണിലെ കരടായിരുന്നു ഇന്ത്യയുടെ തെക്കേ അറ്റത്തുള്ള കേരളം എന്ന സംസ്ഥാനം.
വടക്കേ ഇന്ത്യയിലെ പോലെ, അമ്പലത്തിനടുത്ത് ഒരു പശുവിനെ കൊന്നു കൊണ്ടിട്ടാലോ, പള്ളിയ്ക്കടുത്ത് പന്നിയെ കൊന്നു കൊണ്ടിട്ടാലോ, ഒന്നും വര്‍ഗീയ ലഹള ഉണ്ടാക്കാന്‍ പറ്റാത്ത സംസ്ഥാനം ആയത് കൊണ്ട് മാത്രമല്ല...
ഇന്ന് വരെ ഒരു സീറ്റ് നിയമസഭയില്‍ പോലും ഉണ്ടാക്കാന്‍ പറ്റാതെ പോയ സംസ്ഥാനം എന്ന നിലയില്‍ കേരളം എന്നും സംഘപരിവാറിന് ബാലികേറാമലയായി നില്‍ക്കുന്നത് കൊണ്ട്...
മതത്തിന്റെ പേരില്‍ തമ്മില്‍ തല്ലാന്‍ ആളുകളെ കിട്ടാതിരുന്നാല്‍ എങ്ങനെ നമ്മുടെ ആര്‍ഷ ഭാരത പാര്‍ട്ടി വളരും???? സമ്പൂര്‍ണ്ണ സാക്ഷരത ഉള്ള ജനങ്ങള്‍ ഉണ്ടായാലുള്ള ഒരു കുഴപ്പമേ...
എന്തായാലും കേരളത്തില്‍ ഇപ്പോള്‍ യുവമോര്‍ച്ച കിടാങ്ങള്‍ ഒരു പുതിയ സമരത്തില്‍ ആണ്.
അത്തം മുതൽ ചതയം വരെ സംസ്ഥാനത്ത് മദ്യ നിരോധനം ഏർപ്പെടുത്തണം എന്നാണ് ആവശ്യം. സമരകേന്ദ്രങ്ങള്‍ സംസ്ഥാനത്തെ ബിവറേജസ് കോർപറേഷന്റെയും കൺസ്യൂമർ ഫെഡിന്റെയും ഔട്ട്‌ലെറ്റുകൾ.
ഗാന്ധിമാര്‍ഗ്ഗം ഒന്നുമല്ല സമരമാര്‍ഗ്ഗം.
(അല്ലെങ്കിലും ഗാന്ധിയെ നമ്മള്‍ക്ക് പണ്ടേ ഇഷ്ടമല്ല. നമ്മുടെ ഒരു “എക്സ്” സ്വയം സേവകന്‍ പണ്ട് ആ ചങ്ങാതിയെ കാച്ചി കളഞ്ഞപ്പോള്‍, നാട് മുഴുവന്‍ മധുരം വിളമ്പി ആഘോഷിച്ച പാരമ്പര്യമാണ് നമ്മുടെ സംഘടനയ്ക്കുള്ളത്)
കച്ചവട കേന്ദ്രങ്ങള്‍ തല്ലി തകര്‍ക്കുക, ജീവനക്കാരെ സഹിതം പൂട്ടി ഇടുക, തടയാന്‍ വരുന്ന പോലീസുകാരന്റെ തല തല്ലിപൊളിയ്ക്കുക തുടങ്ങിയ കലാപരിപാടികള്‍ മാത്രമാണ് മിനിമം ഐറ്റം..
ആദ്യം കേട്ട് കഴിഞ്ഞാല്‍ സംഗതി നല്ലതാണെന്ന് തോന്നും. സമ്പൂര്‍ണ്ണ മദ്യ നിരോധനം ഉള്ള കിനാശ്ശേരി ആണ് ഗാന്ധിജി കണ്ട സ്വപ്നം എന്നല്ലേ മഹാകവി ഇന്നസെന്റ് പാടിയത്.
പക്ഷെ അവിടെയും ചില രസം കൊല്ലികള്‍ അനാവശ്യ സംശയങ്ങള്‍ ഉയര്‍ത്തുന്നു.
മദ്യനിരോധനം അത്തം മുതൽ ചതയം വരെ മാത്രം മതി എന്നത് ഏതു കോത്താഴത്തെ നയം ആണ് എന്നതാണ് ഒന്നാമത്തെ ചോദ്യം. ബാക്കിയുള്ള മുഴുവന്‍ ദിവസവും കേരളത്തില്‍ മദ്യം നിറഞ്ഞ് ഒഴുകട്ടെ എന്നാണോ ആര്‍ഷ ഭാരത യുവസാംസ്കാരികരുടെ നയം?
അപ്പോള്‍ യുവമോര്‍ച്ച കിടാങ്ങള്‍ പറയുന്നു “ഓണം” എന്ന ഉത്സവം ആയത് കൊണ്ടാണ് ഈ സമയത്ത് മദ്യം വേണ്ട എന്ന്. ഒരു മാതിരി ശ്രീരാമ സേന (അതോ വാനര സേനയോ) മോഡല്‍ സാംസ്കാരിക പോലീസ് നയം.
അപ്പോള്‍ ന്യായമായും ക്രിസ്മസ് കാലത്ത് മദ്യം വില്‍ക്കണ്ട എന്ന് ക്രിസ്ത്യന്‍ യുവജന സംഘടനകളും, റംസാന്‍ കാലത്ത് മദ്യം വില്‍ക്കണ്ട എന്ന് മുസ്ലീം യുവജന സംഘടനകളും സമരം ചെയ്യുന്നതും ഇനി കേരളം കാണേണ്ടി വരുമോ എന്ന് ദിഗംബരന് സംശയം.
ബീഫ് നിരോധിയ്ക്കണം എന്ന് പറഞ്ഞ് സംഘ പരിവാറും, പന്നിയിറച്ചി നിരോധിയ്ക്കണം എന്ന് പറഞ്ഞ് ജിഹാദികളും സമരം നടത്തുന്ന ഒരു കാലം കൂടി ആയാല്‍, ഒക്കെ പൂര്‍ണ്ണം ആകും.
ഇനി വര്‍ഗീയലക്ഷ്യങ്ങള്‍ മാറ്റി നിര്‍ത്തി നോക്കിയാലും അനാവശ്യചോദ്യങ്ങള്‍ വേറെയും വരുന്നുണ്ട്.
സമരം ബിവറേജസ് കോർപറേഷന്റെയും കൺസ്യൂമർ ഫെഡിന്റെയും ഔട്ട്‌ലെറ്റുകള്‍ക്ക് മുന്നില്‍ മാത്രം നടത്തിയാല്‍ മതിയോ... സ്റ്റാര്‍ കൂടിയ ബാറുകളും, കള്ള്ഷാപ്പുകളും ഒക്കെ പിന്നെ വില്‍ക്കുന്നത് പായസം ആണോ? അവിടെയും പോയി സമരം നടത്താന്‍ എന്താണ് തടസ്സം എന്നൊക്കെ പോകുന്നു ചോദ്യങ്ങള്‍..
അവിടെയാണ് ഈ സമരത്തിന്റെ ഒളിച്ചിരിയ്ക്കുന്ന സാമ്പത്തിക വശങ്ങള്‍ ചോദ്യം ചെയ്യപ്പെടേണ്ടത്. കേരളത്തില്‍ ഇപ്പോള്‍ നടപ്പക്കപ്പെട്ട പുതിയ മദ്യനയം ആണ് ഈ സമരത്തിന്റെ പ്രധാന അജണ്ടയ്ക്കു പിന്നില്‍ എന്നുള്ള സംശയം പ്രബലമാണ്.
ഓണം കഴിഞ്ഞാല്‍ കേരളത്തിലെ ഫൈവ് സ്റ്റാര്‍ ഒഴികെയുള്ള മുഴുവന്‍ ബാറുകളും പൂട്ടണമെന്ന് സര്‍ക്കാര്‍ നോട്ടീസ് കൊടുത്തു കഴിഞ്ഞിരിയ്ക്കുന്നു. പൂട്ടാന്‍ പോകുന്ന ബാറുകളുടെ പ്രധാന പ്രശ്നം, ഓണത്തെ മുന്നില്‍ കണ്ട് വാങ്ങി വെച്ച മദ്യത്തിന്റെ വന്‍പിച്ച സ്റ്റോക്കുകള്‍, എങ്ങനെ ഇത്രയും കുറഞ്ഞ സമയം കൊണ്ട് വിറ്റ് തീര്‍ക്കും എന്നതാണ്.
കൂടിയ കാശ് കൊടുത്ത് ഇതൊക്കെ വാങ്ങി കുടിയ്ക്കാന്‍ സാധാരണ-മദ്യവര്‍ഗ്ഗ ജനങ്ങളെ കിട്ടാന്‍ പാടാണ്. അവരൊക്കെ ഏതെങ്കിലും ബിവറേജസ് കോർപറേഷന്റെയും കൺസ്യൂമർ ഫെഡിന്റെയും ഔട്ട്‌ലെറ്റുകള്‍ക്ക് മുന്നില്‍ നിന്ന് ക്യൂ കിടന്ന് തള്ളി, വില കുറഞ്ഞ “സാധനവും” വാങ്ങി വീട്ടില്‍ കൊണ്ട് പോയി അടിച്ചു തീര്‍ക്കും.
അവരെയൊക്കെ നമ്മുടെ ബാറില്‍ കയറ്റാന്‍ എന്താ വഴി? ബിവറേജ് പൂട്ടിയ്ക്കാന്‍ സമരം എങ്കില്‍ സമരം....
അവന്റെയൊക്കെ അമ്മാതിരി കുടി മുട്ടിച്ചാല്‍ പിന്നെ, ഓണത്തിന് അവനൊക്കെ “ഡ്രൈ” ആയി നടക്കുമെന്നാണോ വിചാരം.. നമ്മുടെ ബാറില്‍ കയറാതെ വേറെ എന്ത് വഴി.! നമ്മുടെ കച്ചവടവും കൂടും, നിരോധനത്തിന് മുന്‍പേ, ഉള്ള സ്റ്റോക്കുകള്‍ തീര്‍ന്നും കിട്ടും..
ഒരു വെടിയ്ക്ക് മൂന്നോ നാലോ പക്ഷി...
യുവമോര്‍ച്ച സമരം ലക്ഷ്യം വെച്ചത് ബിവറേജസ് കോർപറേഷന്റെയും കൺസ്യൂമർ ഫെഡിന്റെയും ഔട്ട്‌ലെറ്റുകളെ മാത്രം ആകുന്നതില്‍ ആര്‍ക്കെങ്കിലും എന്തെങ്കിലും സംശയം ഉണ്ടെങ്കില്‍ ഈ സാമ്പത്തിക വശം ചിന്തിച്ചാല്‍ മതി.
കേരളത്തില്‍ ഭരണം ഒന്നും കിട്ടിയിട്ടില്ലെങ്കിലും ബി.ജെ.പി നേതാക്കള്‍ക്ക് അബ്കാരിമേഖലയില്‍ ഉള്ള സ്വാധീനം ചെറുതല്ല എന്നത് കൂടെ കൂട്ടി വായിയ്ക്കണം.
ഏതാനും ആഴ്ചകള്‍ക്ക് മുന്‍പ് കാസര്‍കോട് കാഞ്ഞങ്ങാട് ഉള്ള, മുന്‍ നഗരസഭാ അംഗമായ ബി.ജെ.പി നേതാവിന്റെ വിവാദ നാല് നക്ഷത്ര ഹോട്ടലിന് ബാര്‍ ലൈസന്‍സ് അനുമതി നല്‍കിയ കാഞ്ഞങ്ങാട് നഗരസഭാ തീരുമാനം റദ്ദാക്കാന്‍, കെ.പി.സി.സി നേതൃത്വം ശ്രമിച്ചതിന്റെ പേരില്‍ ഉണ്ടായ വിവാദങ്ങള്‍ തന്നെ ഇതിന് തെളിവാണ്.
ഒപ്പം മദ്യനയത്തെ ശക്തമായി എതിര്‍ക്കുന്ന വെള്ളാപ്പള്ളി അടക്കമുള്ള സമുദായ നേതാക്കളെ സന്തോഷിപ്പിയ്ക്കാനും ഈ സമരം വഴി കഴിയുമെന്ന് സംഘപരിവാരം കണക്ക് കൂട്ടുന്നു. സമരം കള്ളുഷാപ്പുകള്‍ക്ക് മുന്നില്‍ എത്താത്തതിനു കാരണം അതാണ്‌.
വടക്കേ ഇന്ത്യയില്‍ പയറ്റിയ എല്ലാ തന്ത്രങ്ങളും കേരളത്തില്‍ പ്രയോഗിയ്ക്കാനും വര്‍ഗീയ ചേരിതിരിവ്‌ ഉണ്ടാക്കി രാഷ്ട്രീയ നേട്ടം കൊയ്യാനും സംഘപരിവാര്‍ കുറെ കാലങ്ങളായി ശ്രമിയ്ക്കുന്നുണ്ട്.
ഉത്തരേന്ദ്യന്‍ ആചാരങ്ങള്‍ ആയ “രക്ഷാബന്ധനും”, “ഗണേശോത്സവവും”, ഒക്കെ കേരളത്തില്‍ വ്യാപകമാക്കി പ്രചരിപ്പിച്ചതിന് പിന്നില്‍ ആ അജണ്ട ആണ് ഉള്ളത്. ഇതിനെ ഒരു ഭാഗം തന്നെയാണ് ഓണത്തെ ഒരു “ഹിന്ദു ആഘോഷം” ആക്കി മാറ്റി ഹൈജാക്ക് ചെയ്യാനുള്ള യുവമോര്‍ച്ചയുടെ ഈ ശ്രമവും!
കേരളത്തിന്റെ ഓണമോ, വിഷുവോ ഒന്നും ഇന്ന് വരെ ഒരു വടക്കേ ഇന്ത്യന്‍ സംസ്ഥാനത്തും കൊണ്ട് വരാന്‍ അബദ്ധത്തില്‍ പോലും ഇവര്‍ ശ്രമിച്ചിട്ടില്ല എന്ന് മനസ്സിലാക്കുമ്പോള്‍ ആണ് ഈ “സാംസ്കാരിക കൈമാറ്റത്തിന്റെ” യഥാര്‍ത്ഥ അജണ്ട വെളിയില്‍ വരിക.
ഓണത്തിന് “ബിവറേജ്/കൺസ്യൂമർ ഫെഡ് മദ്യം” നിരോധിയ്ക്കുക എന്ന ഇത്തവണത്തെ ആവശ്യം, ഇനി ഭാവിയില്‍ ഓണത്തിന് ബീഫ് കച്ചവടം നിരോധിയ്ക്കുക എന്ന അജണ്ടയിലേയ്ക്ക് മാറാന്‍ അധികം കാലതാമസം വരില്ല എന്ന് അര്‍ത്ഥം!
==============================
വാല്‍കഷ്ണം:
"സമരം ചെയ്ത് ബിവറേജ് പൂട്ടിച്ചിട്ട് നീ എങ്ങോട്ട് പോണു, ശിവാ?"
"വല്ലാത്ത ക്ഷീണം... ഞാനാ ബാറില്‍ പോയി ക്ഷീണം മാറ്റിയിട്ട് വരാം മാഷേ.."

2014, ഓഗസ്റ്റ് 23, ശനിയാഴ്‌ച

“ന്യൂനപക്ഷ പ്രീണനം” എന്ന “വിപ്പിംഗ് ബോയ്‌”....

“വിപ്പിംഗ് ബോയ്‌” അഥവാ ‘തല്ലുകൊള്ളാനുള്ള പയ്യന്‍” എന്നൊരു പ്രയോഗമുണ്ട് ഇംഗ്ലീഷ് ഭാഷയില്‍. പതിനഞ്ച് പതിനാറാം നൂറ്റാണ്ടുകളില്‍ ഇംഗ്ലണ്ടിലെ രാജവംശങ്ങളില്‍ നിലനിന്നിരുന്ന ഒരു വിചിത്ര സമ്പ്രദായത്തില്‍ നിന്നായിരുന്നു ഈ പ്രയോഗം ഉണ്ടായത്. രാജകുമാരന്മാര്‍ തെറ്റ് ചെയ്താലോ, പഠനത്തില്‍ മോശമായാലോ, അനുസരണകേട് കാണിച്ചാലോ, അവരെ തല്ലാന്‍ അധ്യാപകര്‍ക്ക് കഴിയില്ലല്ലോ. അതിനാല്‍ രാജകുമാരന് വേണ്ടി തല്ലു കൊള്ളാന്‍ നിയമിതനായ ബാലന്മാരെയാണ് “വിപ്പിംഗ് ബോയ്‌” എന്ന് വിളിച്ചിരുന്നത്‌. രാജകുമാരന്റെ കൂടെ എപ്പോഴും നിഴലായി കാണുന്ന വിപ്പിംഗ് ബോയി, രാജകുമാരന്റെ തെറ്റുകളുടെ ശിക്ഷ, അടിയായി സ്വന്തം ശരീരത്തില്‍ ഏറ്റു വാങ്ങിയാണ് ജീവിച്ചു പോന്നിരുന്നത്.
ഇന്ത്യന്‍ നാഷണല്‍ കൊണ്ഗ്രെസ്സ് എന്ന ഇന്ത്യയിലെ ഏറ്റവും പഴക്കമുള്ള ഒരു രാഷ്ട്രീയ പാര്‍ട്ടി കഴിഞ്ഞ ലോകസഭ തെരഞ്ഞെടുപ്പില്‍, അതിന്റെ ഇന്ന് വരെയുള്ള ചരിത്രത്തിലെ ഏറ്റവും വലിയ പരാജയം ഏറ്റു വാങ്ങിയത് നാം കണ്ടു. പ്രതിപക്ഷമായ ഭാരതീയ ജനതാ പാര്‍ട്ടി ഒറ്റയ്ക്ക് ഭൂരിപക്ഷം നേടി അധികാരത്തിലും വന്നു. ഭരണം പോയിട്ട് പ്രതിപക്ഷ നേതൃസ്ഥാനം പോലും ജനങ്ങള്‍ തന്നില്ല. വല്ലാത്ത ചെയ്ത്തായി പോയി എന്നല്ലാതെ എന്ത് പറയാന്‍.
എന്ത് കൊണ്ട് ഈ തിരിച്ചടി ഉണ്ടായി എന്ന് “ത്വാത്തിക അവലോകനം” നടത്തി റിപ്പോര്‍ട്ട് സമര്‍പ്പിയ്ക്കാന്‍ ഒരു കമ്മിറ്റിയെ കൊണ്ഗ്രെസ്സ് ഹൈകമാന്‍ഡ് നിയോഗിച്ചു.
ഇമ്മാതിരി അവലോകനങ്ങള്‍ നടത്തി തഴക്കവും പഴക്കവും ഉള്ള ആസ്ഥാന ‘ബുദ്ധിജീവിയും’ ആദര്‍ശവാനും ആയ അറയ്ക്കപ്പരമ്പില്‍ കുര്യന്‍ ആന്റണിയ്ക്ക് ആയിരുന്നു പതിവ് പോലെ ഈ റിപ്പോര്‍ട്ട് മഹാകാവ്യവും രചിയ്ക്കാനുള്ള കമ്മിറ്റിയുടെ നേതൃത്വചുമതല നല്‍കിയത്. ആന്റണിക്ക് പുറമെ, മുകുള്‍ വാസ്‌നിക്, ആര്‍.സി.ഖുണ്ഡ്യ അവിനാശ് പാണ്ടെ എന്നീ പേരുകേട്ട കുറ്റാന്വേഷകര്‍ ആയിരുന്നു സമിതിയിലെ മറ്റ് അംഗങ്ങള്‍.
എന്ത് കൊണ്ട് ആന്റണിയെ ഈ ജോലി ഏല്‍പ്പിച്ചു എന്ന് ആര്‍ക്കെങ്കിലും ഒരു സംശയം ഉണ്ടായിരുന്നെങ്കില്‍, അത് ആ റിപ്പോര്‍ട്ട് പുറത്തു വന്നതോടെ തീര്‍ന്നു. ഷെര്‍ലക് ഹോംസിനെ പോലും നാണിപ്പിയ്ക്കുന്ന വേഗത്തില്‍ അദ്ദേഹം ഈ കേസിന് തുമ്പുണ്ടാക്കി പ്രതിയെ കണ്ടു പിടിച്ചു കളഞ്ഞു. (ചുമ്മാതാണോ കഴിഞ്ഞ സര്‍ക്കാരില്‍ അദേഹത്തെ ‘പ്രതിരോധ മന്ത്രി ആക്കിയത്!)
“ന്യൂനപക്ഷ പ്രീണനം” എന്ന ഭീകരന്‍ ആണത്രേ മുഖ്യപ്രതി. പേര് കേട്ടാല്‍ പാവമെന്നു തോന്നിയാലും അങ്ങനെ അല്ല കാര്യങ്ങളുടെ കിടപ്പ്. വെറും ഭീകരന്‍ അല്ല, കൊടുംഭീകരന്‍ ആണവന്‍!
അല്ലെങ്കില്‍ പിന്നെ, കൊണ്ഗ്രെസ്സ് പോലൊരു ആദര്‍ശപാര്‍ട്ടി നയിച്ച, തങ്കപ്പെട്ട ജനപ്രിയഭരണത്തിന്റെ നേട്ടങ്ങള്‍ പോലും വിസ്മരിച്ചു കൊണ്ട്, ജനങ്ങള്‍ കൂട്ടത്തോടെ ആ.ഭാ.സ (ആര്‍ഷ ഭാരത സംസ്കാര) പാര്‍ട്ടിയ്ക്ക് വോട്ടു ചെയ്യുമോ? അവന്‍ തന്നെയാണ് കാരണം.
കൊണ്ഗ്രെസ്സ് ഭരണത്തിന്‍ കീഴിലെ കഴിഞ്ഞ അഞ്ചു വര്ഷം രാജ്യത്തിന്റെ വികസനം റോക്കറ്റ് പോലെ കുതിച്ചുയരുകയായിരുന്നു എന്ന് ആന്റണി സംഘത്തിന് അറിയുന്ന പോലെ മറ്റാര്‍ക്കാണ് അറിയാവുന്നത്. തേനും പാലും തെരുവുകളില്‍ ഒഴുകുകയായിരുന്നു. കള്ളവും ചതിയും ഒട്ടുമില്ലാത്ത ആ ഭരണത്തെ മാവേലി ഭരണത്തിന് മുകളില്‍ പ്രതിഷ്ടിച്ചാലും മതിയാകില്ല. ആ ഭരണം കൊണ്ടുവന്ന വികസനത്തിന്റെ “സുഖം” കാരണം ജനങ്ങള്‍ “അയ്യോ ഇനിയും വികസിപ്പിയ്ക്കല്ലേ, സിംഗ് എമ്മാനെ” എന്ന് വിലപിച്ച്, ആനന്ദാശ്രുക്കള്‍ പൊഴിയ്ക്കുകയായിരുന്നു പതിവ്.
അങ്ങനെ ജനപ്രീതിയില്‍ ആകാശം മുട്ടി നില്‍ക്കുന്ന സമയത്താണ് “ന്യൂനപക്ഷ പ്രീണനം” എന്ന ഭീകരന്‍ കയറി വിളയാടിയത്. രാജ്യത്ത് ന്യൂനപക്ഷങ്ങളെ അമിതമായി പ്രീണിപ്പിയ്ക്കാന്‍ നമ്മുടെ പാര്‍ട്ടി “അമിതമായി” ശ്രമിയ്ക്കുന്നു എന്ന് ഭൂരിപക്ഷത്തിന് സംശയം ഉണ്ടാക്കുക എന്ന കൊടുംക്രൂരത ആണ് ലവന്‍ ചെയ്തു കളഞ്ഞത്. ജനപിന്തുണ പോകാന്‍ ഇതിലും വലിയ കാരണം വേണോ?
അല്ലാതെ പലരും പറയും പോലെ ഭരണത്തിന്റെ കുഴപ്പമോ, നാല്‍പ്പതു വയസ്സ് കഴിഞ്ഞിട്ടും പക്വത വരാത്ത നമ്മുടെ യുവരാജാവിന്റെ തുഗ്ലക്ക് പരിഷ്കാരങ്ങളോ, അഴിമതിയ്ക്കെതിരെ രാജ്യമെങ്ങും ഉണ്ടായ ജനകീയമുന്നേറ്റങ്ങളോ ഒന്നും അല്ല കാരണം. “ന്യൂനപക്ഷ പ്രീണനം” .. അവന്‍ തന്നെയാണ് കാരണം.
പ്രതിയെ തിരിച്ചറിഞ്ഞ സ്ഥിതിയ്ക്ക് ഇനി നമുക്ക് പ്രശ്ന പരിഹാരവും നോക്കണം. ലവന്മാര്‍ക്കു ഭൂരിപക്ഷം കുറവായിരുന്നെങ്കില്‍ പണ്ടത്തെ പോലെ കുറേയെണ്ണത്തെ ചാക്കില്‍ കയറ്റി ഭരണം പിടിയ്ക്കാന്‍ നോക്കാമായിരുന്നു. അമ്പത് സീറ്റ് പോലും തികച്ചില്ലാത്തതിനാല്‍ അതിനുള്ള ആരോഗ്യം ഇപ്പോള്‍ ഇല്ല. അഞ്ചു വര്ഷം സമയം ഉണ്ടല്ലോ.
ന്യൂനപക്ഷത്തെ പ്രീണിപ്പിയ്ച്ചാല്‍ വോട്ടു കിട്ടില്ലെങ്കില്‍, ഇനി ഭൂരിപക്ഷത്തെ പ്രീണിപ്പിച്ചു നോക്കാം. അല്ല പിന്നെ..
എങ്കിലും ഒരു ചോദ്യം മാത്രം ബാക്കി.... "രാജാവ് നഗ്നന്‍ ആയിരുന്നു" എന്ന സത്യം ആര് വിളിച്ചു പറയും?

2014, ഓഗസ്റ്റ് 16, ശനിയാഴ്‌ച

"പെയ്മെന്റ് സീറ്റ്" - എന്തിനീ നുണപ്രചരണം...

അന്വേഷണ കമ്മീഷന്‍, ഒരു സി.പി.ഐ നേതാവും കൈകൂലി വാങ്ങിയതായി പറഞ്ഞിട്ടില്ല.
ഓരോ ഇലക്ഷനും അതാത് പ്രദേശത്ത് നിന്നും പ്രാദേശികമായി ജനങ്ങളില്‍ നിന്നും ഇലക്ഷന്‍ ഫണ്ട് പിരിച്ചെടുക്കുന്ന സമ്പ്രദായമാണ് സി.പി.ഐ ഇന്ന് വരെ പിന്തുടര്‍ന്ന് പോന്നത്.
ആ പാര്‍ട്ടി സംഘടനാ രീതികള്‍ക്ക് വിരുദ്ധമായി, ഇലക്ഷന്‍ ചെലവ് മുക്കാല്‍ പങ്കും സ്ഥാനാര്‍ഥിയെ കൊണ്ട് വഹിപ്പിച്ചു എന്ന കമ്മീഷന്‍ റിപ്പോര്‍ട്ടിലെ കണ്ടെത്തല്‍ ആണ്, ഈ മാധ്യമങ്ങള്‍ "പെയ്മെന്റ് സീറ്റ്" എന്നാക്കി മാറ്റി സി.പി.ഐയെ അപമാനിയ്ക്കാന്‍ നോക്കുന്നത്.
അച്ചടക്ക നടപടി ഉണ്ടായത് സംഘടനാപരമായ പിഴവുകള്‍ക്ക് ആണ്. അല്ലാതെ സാമ്പത്തിക തിരിമറികള്‍ക്ക് അല്ല.
ഇന്ത്യയില്‍ മത്സരിയ്ക്കുന്ന എല്ലാ മണ്ഡലങ്ങളിലെയ്ക്കും ചിലവിനായി വേണ്ട തുക അംബാനി,ടാറ്റ,അടാനി അടക്കമുള്ള വന്‍മുതലാളിമാരില്‍ നിന്നും ഡല്‍ഹിയില്‍ വെച്ച് മൊത്തമായി വാങ്ങി, ഒന്നര രണ്ട് കോടി വീതം ഓരോ മണ്ഡലത്തിലേയ്ക്ക് കൊടുത്ത് വിടുന്ന സമ്പ്രദായം ആണ് കൊണ്ഗ്രെസ്സ്, ബി.ജെ.പി പോലുള്ള പാര്‍ട്ടികള്‍ക്ക് ഉള്ളത്.
അങ്ങനെ കൊടുത്തയയ്ക്കുന്ന ഇലക്ഷന്‍ ഫണ്ടില്‍ നിന്നും സ്ഥനാര്‍ഥികളും, പ്രാദേശിക നേതാക്കളും കൈയ്യിട്ടു വാരുന്നതായി നൂറു കണക്കിന് ആരോപണങ്ങള്‍ ആണ് ഓരോ ഇലക്ഷന്‍ തീരുമ്പോഴും ഈ പാര്‍ട്ടികളില്‍ ഉണ്ടാകുക. എന്നിട്ട് ഒരിടത്ത് പോലും പേരിന് പോലും ഒരു അന്വേഷണം നടത്താനോ, അച്ചടക്ക നടപടി എടുക്കാനോ ഉള്ള ആര്‍ജ്ജവം ഇന്ന് വരെ ഇവരാരും കാട്ടിയിട്ടില്ല.
മൂക്കിന്‍ തുമ്പ് വരെ അഴിമതിയുടെയും, ജാതീയതയുടെയും, അച്ചടക്ക ലംഘനങ്ങളുടെയും ചെളിയില്‍ മുങ്ങി നില്‍ക്കുന്ന വലതുപക്ഷ പാര്‍ട്ടികള്‍ക്കും, അവരുടെ കുഴലൂത്തുകാരായ മാധ്യമങ്ങള്‍ക്കും, സ്വന്തം വിരലില്‍ പറ്റിയ ചെളി പരസ്യമായി തുടച്ച് അന്തസ്സോടെ നടന്നു നീങ്ങുന്ന സി.പി.ഐ പോലൊരു പ്രസ്ഥാനത്തെ വിമര്ശിയ്ക്കാന്‍ എന്ത് ധാര്‍മിക അവകാശം ആണ് ഉള്ളത്?

2014, ഓഗസ്റ്റ് 14, വ്യാഴാഴ്‌ച

വെഞ്ഞാറന്മൂട് ശശിയ്ക്ക് ഒരു സാദാ സി.പി.ഐ പ്രവര്‍ത്തകന്റെ കത്ത്...

ശ്രീ വെഞ്ഞാറന്മൂട് ശശിയ്ക്ക്,
സഖാവ് വെഞ്ഞാറന്മൂട് ശശി എന്നായിരുന്നു അഭിസംബോധന ചെയ്യാന്‍ താത്പര്യം..
എന്നാല്‍ അത് വഴി താങ്കളുടെ 'വികാരം' വ്രണപ്പെട്ടാലോ എന്ന് കരുതിയാണ് "ശ്രീ" എന്നാക്കിയത്.. തിരുവുള്ളം പൊറുക്കണം..
പാര്‍ട്ടിയിലെ പ്രക്രിയയുടെ ഭാഗമായി അച്ചടക്കനടപടിയ്ക്ക് വിധേയനായി, ജില്ലാ സെക്രെട്ടറി സ്ഥാനം നഷ്ടമായി പുറത്തിറങ്ങിയ ഉടനെ തന്നെ "ഇനി ഞാന്‍ സി.പി.ഐയില്‍ തുടരില്ല" എന്ന് മാധ്യമങ്ങളോട് ഉദ്ഘോഷിയ്ക്കുകയും, കഴിഞ്ഞ രണ്ട് ദിവസമായി ചാനല്‍ ചര്‍ച്ചകളില്‍ പങ്കെടുത്ത് ഒരുപാട് വിവരകേടുകള്‍ വിളിച്ചു പറഞ്ഞതും ഒക്കെ കണ്ടു കൊണ്ടിരിയ്ക്കുമ്പോള്‍, സത്യത്തില്‍ ദിഗംബരന് ചോദിയ്ക്കാന്‍ തോന്നിയത്, പഴയ ഒരു ജഗതി ശ്രീകുമാര്‍ ഡയലോഗ് ആണ്..
"അറിയാമെല്ലാഞ്ഞിട്ടു ചോദിക്കുവാ... താന്‍ ആരുവാ" എന്ന ഡയലോഗ്..
എങ്കിലും "എന്നെയാരും പിടിയ്ക്കണ്ട...ഞാനിപ്പം രാജി വെയ്ക്കും" എന്ന മട്ടില്‍ മാധ്യമങ്ങള്‍ തോറും നടത്തിയ ചവിട്ടുനാടകങ്ങള്‍ കണ്ടപ്പോള്‍, എന്നാല്‍ അതിനൊരു തീരുമാനം ആയിട്ട് മതി അത്തരം ചോദ്യം എന്ന് തോന്നിയതിനാല്‍ കാത്തിരിയ്ക്കുകയായിരുന്നു..
ഇപ്പോള്‍ അതൊക്കെ ഒരു കരയ്ക്കായ സ്ഥിതിയ്ക്ക് ചില ചോദ്യങ്ങള്‍ ചോദിയ്ക്കാതെ വയ്യ..
താങ്കള്‍ ഏതു കമ്മ്യുണിസ്റ്റ് ആശയങ്ങളില്‍ വിശ്വസിച്ചാണ് സി.പി.ഐയെ പോലൊരു പാര്‍ട്ടിയില്‍ ചേര്‍ന്നത്‌?
ജില്ലാ സെക്രെട്ടറി ആകുക എന്നതായിരുന്നോ താങ്കളുടെ വിപ്ലവ ലക്‌ഷ്യം?
അധികാരം പോയാല്‍ പാര്‍ട്ടിയെ ഉടുതുണി പോലെ വലിച്ചെറിയാനുള്ള പാര്‍ട്ടി ബോധമേ താങ്കള്ക്കുണ്ടായിരുന്നോള്ളോ?
പാര്‍ട്ടി അച്ചടക്ക നടപടിയില്‍ പരാതി ഉള്ള പക്ഷം, താങ്കള്‍ക്കെതിരെ അനീതിയാണ് നടന്നത് എന്ന തോന്നല്‍ ഉണ്ടെങ്കില്‍, അതിനെതിരെ പാര്‍ട്ടി കണ്ട്രോള്‍ കമ്മീഷനില്‍ അപ്പീല്‍ നല്‍കി, ആ നടപടിയ്ക്കെതിരെ പൊരുതാനുള്ള ജനാധിപത്യബോധം എന്ത് കൊണ്ട് ഇല്ലാതെ പോയി?
അതോ സ്വന്തം തെറ്റിന്റെ വലിപ്പം കാരണം, അപ്പീല്‍ പോയാലും ജയിയ്ക്കില്ല എന്ന് സ്വയം മനസ്സിലാക്കിയത്‌ കൊണ്ടോ? അത് കുറ്റം സമ്മതിക്കുന്നു എന്നതിന് തുല്യമല്ലേ?
ഒടുവില്‍ ഒരേ ഒരു ചോദ്യം..
ഇത്രയും ഡ്രാമ കാണിച്ചാല്‍, "അയ്യോ സഖാവേ പോകല്ലേ..അയ്യോ സഖാവേ പോകല്ലേ" എന്ന് പറഞ്ഞ് ഏതെങ്കിലും സി.പി.ഐക്കാരന്‍ താങ്കളുടെ കാല് പിടിയ്ക്കുമെന്ന് പ്രതീക്ഷിച്ചോ?
എന്നാല്‍ മനസ്സിലാക്കുക...
താങ്കള്‍ ഈ പാര്‍ട്ടി വിട്ടു പോയാല്‍ ആരും കരയാന്‍ പോകുന്നില്ല ...
കാരണം ഈ പാര്‍ട്ടി നിലനില്‍ക്കുന്നത് ഏതെങ്കിലും വ്യക്തികളുടെ ബലത്തില്‍ അല്ല. ആദര്‍ശങ്ങളോട് ഉള്ള പ്രതിബദ്ധതയുടെ കരുത്തില്‍ ആണ്.. പല അധികാര മോഹികളും ഈ പാര്‍ട്ടിയില്‍ നിലനില്‍ക്കാന്‍ കഴിയാതെ പുറത്തു പോയിട്ടുണ്ട്...
സ്ഥാപക നേതാക്കളില്‍ ഒരാളായ എസ്.എ. ഡാങ്കേയെ വരെ പാര്‍ട്ടി വിരുദ്ധ പ്രവര്‍ത്തനത്തിന് പുറത്താക്കിയിട്ടുണ്ട്.
എന്തിന്, തിരുവനന്തപുരം ജില്ലയിലെ തലയെടുപ്പുള്ള നേതാവും, മുന്‍മന്ത്രിയും ആയിരുന്ന ഭാര്‍ഗ്ഗവി തങ്കപ്പനെ, മണിച്ചന്റെ ഡയറിയില്‍ കൈക്കൂലി നല്‍കിയിരിക്കുന്നതായി രേഖപ്പെടുത്തി കണ്ടതിന്റെ പേരില്‍, അന്വേഷണം നടത്തി അച്ചടക്ക നടപടി സ്വീകരിച്ച് പുറത്താക്കിയ പാരമ്പര്യമുള്ള ഒരു പാര്‍ട്ടിയാണിത്‌..
അപ്പോഴൊന്നും ഒരു രോമം പോയ വേദന പോലും ഞങ്ങള്‍ക്ക് തോന്നിയിട്ടില്ല.
കാരണം ആ ഓരോ നടപടികളും ഞങ്ങളുടെ പ്രിയപ്പെട്ട പാര്‍ട്ടിയുടെ അന്തസ്സ് കൂട്ടിയതായി മാത്രമേ ഞങ്ങള്‍ക്ക് തോന്നിയിട്ടുള്ളൂ.. അത് കൊണ്ട്...
താങ്കള്‍ അല്ല, കമ്മ്യുണിസ്റ്റ് ആദര്‍ശങ്ങളോട് പ്രതിബദ്ധത ഇല്ലാത്ത ആരോ പുറത്തു പോകട്ടെ..
ഞങ്ങള്‍ക്ക് വെറും "തൃണം" മാത്രം...!
==================
വാല്‍കഷണം: -
സി.പി.ഐ യില്‍ നിന്നും പുറത്തു പോയ വെഞ്ഞാറന്മൂട് ശശി ആര്‍.എസ്.പിയില്‍ ചേര്‍ന്നതായി കേള്‍ക്കുന്നു. ഇടതുമുന്നണിയെ പാര വെച്ച് യു.ഡി.എഫിലേയ്ക്ക് കാല് മാറിയ അവന്മാര്‍ക്ക്, അങ്ങനെ തന്നെ വേണം!

2014, ഓഗസ്റ്റ് 13, ബുധനാഴ്‌ച

തിരുവനന്തപുരത്തെ സ്ഥാനാര്‍ഥി നിര്‍ണ്ണയ വിഷയത്തില്‍ സി.പി.ഐ യെ വിമര്‍ശിക്കുന്നവരോട്..

സി.പി.ഐയ്ക്കെതിരെ ഫേസ്ബുക്കില്‍ കിടന്നു കാറുന്ന വലതുപക്ഷ രാഷ്ട്രീയ ജീവികള്‍ അറിയാന്‍...
“കേരളത്തിലെ സമീപകാല രാഷ്ട്രീയ ചരിത്രത്തിലെങ്ങുമില്ലാത്ത സംഘടനാ നടപടിയാണ് സി.പി.ഐയില്‍ ഉണ്ടായിരിക്കുന്നത്. സ്ഥാനാര്‍ത്ഥി നിര്‍ണയത്തെച്ചൊല്ലിയും ഫണ്ട് ശേഖരണത്തിലെ ക്രമക്കേടുകളെച്ചൊല്ലിയും പാര്‍ട്ടികളില്‍ വിവാദമുണ്ടാകാറുണ്ടെങ്കിലും അച്ചടക്ക നടപടി സാധാരണമല്ല.”
ഇടതുപക്ഷത്തെ താറടിച്ചു കാണിയ്ക്കാന്‍ കിട്ടുന്ന ഏറ്റവും ചെറിയ അവസരത്തെ പോലും ഒരു മാധ്യമ ആഘോഷമാക്കി മാറ്റാറുള്ള മലയാളത്തിലെ ഒരു പ്രമുഖ വലതുപക്ഷ ദിനപത്രം, തിരുവനന്തപുരത്തെ തെരഞ്ഞെടുപ്പ് പരാജയവിഷയത്തില്‍, സി.പി.ഐ യില്‍ നടന്ന അച്ചടക്കനടപടിയെ പറ്റി റിപ്പോര്‍ട്ട് ചെയ്തപ്പോള്‍ ചേര്‍ത്ത ഒരു വാചകമാണ് മുകളില്‍ പറഞ്ഞത്.
കമ്മ്യുണിസ്റ്റ് വിരുദ്ധരെ പോലും അതിശയിപ്പിച്ച, ഇത്തരം ശക്തമായ സംഘടനാനടപടികള്‍ സ്വീകരിയ്ക്കാന്‍ ഉള്ള സി.പി.ഐ എന്ന പ്രസ്ഥാനത്തിന്റെ ആര്‍ജവത്തിന്റെയും ആദര്‍ശശുദ്ധിയുടെയും തെളിവായി മാറുകയാണ് ഈ വാക്കുകള്‍..
പാര്‍ട്ടിയുടെ പ്രഖ്യാപിത നിലപാടുകളില്‍നിന്ന് വ്യതിചലിക്കുന്നവര്‍ എത്ര ഉന്നതരായാലും മുഖം നോക്കാതെ നടപടിയെടുക്കാന്‍ ആര്‍ജവമുള്ള പാര്‍ട്ടിയാണ് സി.പി.ഐയെന്ന് വീണ്ടും വീണ്ടും അടിവരയിടുന്നു ഈ നടപടികള്‍..
പാര്‍ട്ടിയുടെ രാഷ്ട്രീയനയത്തിനെതിരെ നിലപാടെടുത്തതിന്, സ്ഥാപക നേതാക്കളില്‍ ഒരാളായ എസ്.എ.ഡാങ്കെയെ പോലും പുറത്താക്കാന്‍ മടി കാണിച്ചിട്ടില്ലാത്ത, സി.പി.ഐയുടെ ധൈര്യത്തിനും, ആദര്‍ശപാരമ്പര്യത്തിനും, ചരിത്രത്തിനും ഒപ്പം നില്‍ക്കാന്‍ ഇന്ത്യയിലെ തന്നെ മറ്റൊരു രാഷ്ട്രീയകക്ഷിയ്ക്കും കഴിയില്ല എന്ന് നിസംശയം പറയാം.
അത് തന്നെയാണ് സി.പി.ഐയെ വ്യത്യസ്തമാക്കുനതും..
ഓരോ ഇലക്ഷന്‍ കഴിയുമ്പോഴും ഉണ്ടാകുന്ന ഓരോ പുതിയ ജാതിമത കീഴടങ്ങലുകളും, സാമ്പത്തിക ആരോപണങ്ങളും ഒരു ബഹുമതിയായി മാത്രം കണക്കാക്കുന്ന വലതുപക്ഷ രാഷ്ട്രീയ പാര്‍ട്ടികള്‍ക്ക് ഇതൊക്കെ മനസ്സിലാകും എന്ന് ഞങ്ങള്‍ പ്രതീക്ഷിയ്ക്കുന്നില്ല...
മൂക്കറ്റം ചാണകകുഴിയില്‍ മുങ്ങി നില്‍ക്കുന്ന നിങ്ങള്‍ക്കൊന്നും, വിരലില്‍ പറ്റിയ ചെളി തുടച്ചു ധൈര്യത്തോടെ മുന്നോട്ടു നീങ്ങുന്ന ഞങ്ങളെ കുറ്റം പറയാന്‍ യാതോരു ധാര്‍മിക അര്‍ഹതയും ഇല്ല..
അതിനാല്‍ തന്നെ നിങ്ങളുടെ ജല്പനങ്ങളെ അര്‍ഹിയ്ക്കുന്ന അവന്ഞയോടെ ഞങ്ങള്‍ അവഗണിയ്ക്കുന്നു..
(ഫോട്ടോ:- കേരള കൌമുദിയില്‍ വന്ന റിപ്പോര്‍ട്ട്‌)

2014, ഓഗസ്റ്റ് 4, തിങ്കളാഴ്‌ച

വേദനിയ്ക്കുന്ന കോടീശ്വരന്മാര്‍ക്ക് വേണ്ടി ഒരു സര്‍വകലാശാല ???

അവിചാരിതമായാണ് ശാസ്ത്ര സാങ്കേതിക സര്‍വ്വകലാശാലയെ പറ്റിയുള്ള, ഈ വാര്‍ത്ത ദിഗംബരന്റെ ശ്രദ്ധയില്‍ പെട്ടത്..
എഞ്ചിനീയറിംഗ് കോളേജുകളെ സര്‍വകലാശാലകളില്‍ നിന്നും വേര്‍പ്പെടുത്തി, ഒന്നിച്ചു ചേര്‍ത്ത് ഉണ്ടാക്കാന്‍ പോകുന്ന ഈ പുതിയ സര്‍വകലാശാല തീര്‍ച്ചയായും നല്ലൊരു ഉദ്യമമാണ് എന്നാണ് ദിഗംബരന് തോന്നുന്നത്. എഞ്ചിനീയറിംഗ് വിദ്യാഭ്യാസത്തിന്റെ നിലവാരം ഉയര്‍ത്താന്‍ ഈ സര്‍വകലാശാലയ്ക്ക് കഴിയട്ടെ എന്നും ആശംസിയ്ക്കുന്നു..
എന്നാല്‍ വാര്‍ത്ത മുഴുവന്‍ വായിച്ചപ്പോള്‍, എന്തോ കല്ലുകടി ... സര്‍വ്വകലാശാലയെ നിയന്ത്രിയ്ക്കാന്‍ പോകുന്ന ഭരണസമിതിയുടെ ഘടനയും, ചെയര്‍മാന്‍ എന്ന പുതിയ പദവിയില്‍ ആര്‍ക്കൊക്കെ വരാം എന്നുമൊക്കെ നോക്കുമ്പോള്‍ തോന്നിയ കല്ലുകടിയാണ്..
ഭരണസമിതിയില്‍ അക്കാദമിക രംഗത്തെ പ്രമുഖര്‍, സര്‍ക്കാര്‍ ഉദ്യോഗസ്ഥര്‍ എന്നിവരെയൊക്കെ ഉള്‍പ്പെടുത്തുന്നതില്‍ ഒരു എതിരഭിപ്രായവും ഉണ്ടാവേണ്ട കാര്യമില്ല,,
പക്ഷെ ആയിരം കോടി വിറ്റുവരവുള്ള ബഹുരാഷ്ട്ര കമ്പനിയുടെ സി.ഇ.ഒ , വ്യവസായ പ്രമുഖര്‍ എന്നിവരെ എന്ത് മാനദണ്ഡം നോക്കിയാണ് ഭരണ സമിതിയില്‍ ഉള്‍പ്പെടുത്താന്‍ തീരുമാനിച്ചിരിയ്ക്കുന്നത്?
(999 കോടി വിറ്റുവരവ് ഉള്ള വ്യവസായിക്ക് പ്രത്യേക ഡിസ്കൌണ്ട് കൊടുക്കുമോ എന്ന് വാര്‍ത്ത പറയുന്നുമില്ല)
ചാന്‍സിലര്‍ ആയ ഗവര്‍ണ്ണര്‍, വി.സി. എന്നിവര്‍ക്കിടയില്‍ പുതുതായി സൃഷ്ട്ടിച്ച "ചെയര്‍മാന്‍" പദവിയിലും "അന്താരാഷ്ട്ര തലത്തില്‍ പ്രമുഖനായ വ്യവസായികള്‍ക്ക്" പ്രത്യേക സംവരണം കാണുന്നുണ്ട്..
ചുരുക്കി പറഞ്ഞാല്‍, ഭാവിയില്‍ പത്മശ്രീ കിട്ടാത്ത 'പ്രാഞ്ചിയെട്ടന്മാരെ' കുടിയിരുത്താന്‍ വേണ്ടിയാണോ ഇമ്മാതിരി ഒരു സര്‍വകലാശാല ഉണ്ടാക്കുന്നത്‌ എന്ന്, ഇമ്മിണി ചെറിയ സംശയം തോന്നിയാല്‍ തെറ്റ് പറയാന്‍ പറ്റുമോ?
ഇത്തരം ഒരു നീക്കം ശരിയ്ക്കും ആ സര്‍വകലാശാലയുടെ ശരിയായ ഉദ്ദേശത്തെ തന്നെ അട്ടിമറിയ്ക്കുകയില്ലേ? ഇത് മുളയിലേ തന്നെ എതിര്‍ക്കപ്പെടെണ്ടത് തന്നെയല്ലേ?

2014, ജൂൺ 22, ഞായറാഴ്‌ച

അത് താനല്ലയോ ഇത് .....

മറ്റേതൊരു ഇന്ത്യക്കാരനേയും പോലെ ദിഗംബരനും ആശങ്കയില്‍ ആണ്.. ആശങ്ക എന്ന് പറഞ്ഞാല്‍ ഉല്‍പ്രേക്ഷയുടെ ലക്ഷണത്തില്‍ പറയുന്ന ആശങ്ക..
“മറ്റൊന്നിൻ ധർമ്മയോഗത്താലതുതാനല്ലയൊ ഇത്‌ എന്നു വർണ്യത്തിലാശങ്ക ഉൽപ്രേക്ഷാഖ്യയലംകൃതി.” എന്നാണല്ലോ ലക്ഷണം!
ഇന്ത്യക്കാര്‍ ഇപ്പോള്‍ അനുഭവിയ്ക്കുന്നതും ഈ ആശങ്ക തന്നെയാണ്.
കടലില്‍ നിന്ന് രക്ഷപ്പെടാന്‍, ചെകുത്താന്റെ വായില്‍ തല വെച്ച് കൊടുത്തോ എന്ന് ലളിതമായി പറയാനാകുന്ന ആശങ്ക.
ഒന്നാം യു.പി.എ ഭരണകാലത്ത് ഇടതുമുന്നണിയുടെ ശക്തമായ ഇടപെടല്‍ മൂലം നടത്താനാകാതെ പോയ പല “സാമ്പത്തിക പരിഷ്കാരങ്ങളും”, രണ്ടാം യു.പി.എ ഭരണകാലത്ത്, ഗ്രഹണി പിടിച്ച ചെറുക്കന് ചക്കകൂട്ടാന്‍ കിട്ടിയാല്‍ കാണിയ്ക്കുന്ന ആക്രാന്തത്തോടെ നടപ്പാക്കിയതിനാണല്ലോ മന്‍മോഹന്‍ സിംഗിനെ ജനം ഭരണത്തില്‍ നിന്നും വലിച്ചെറിഞ്ഞത്.
പകരം കയറ്റി ഇരുത്തിയ അവതാരത്തിന്റെ ഇപ്പോഴത്തെ രൂപം കാണുമ്പോള്‍ ആശങ്ക എങ്ങനെ വരാതിരിയ്ക്കും...
തലക്കെട്ട്‌ ഇല്ലന്നേ ഉള്ളൂ.. ബാക്കി അടിമുടി മന്‍മോഹന സിംഗം തന്നെ...... വാക്കിലും നോക്കിലും...
“അത് താനല്ലയോ ഇത് എന്ന് എങ്ങനെ സംശയിയ്ക്കാതിരിയ്ക്കും..... മന്‍മോഹനെ കടത്തി വെട്ടില്ലേ എന്ന് പോലും സംശയം.....
രണ്ടാം യു.പി.എ സര്‍ക്കാര്‍ നടപ്പാക്കിയ പരിഷ്കാരങ്ങള്‍ക്ക് വേഗം പോരാ, പോരാ.. ആക്സിലേറ്റര്‍ ഇടൂ.. എന്നൊക്കെ പറഞ്ഞ് അംബാനി മുതല്‍ അടാനി വരെയുള്ള നല്ലവരായ ദേശീയ മുതലാളിമാരും, വാള്‍മാര്‍ട്ട് പോലുള്ള വിദേശ മുതലാളിമാരും കൊങ്ങയ്ക്ക് പിടിച്ചപ്പോള്‍, എല്ലാം അവരുടെ ഇഷ്ടത്തിന് വിട്ടു കൊടുത്ത മന്മോഹന രൂപം, ആ പരിഷ്കാരങ്ങള്‍ മൂലം ജീവിതം പൊരുതി മുട്ടിയ നാട്ടുകാരോട് പറഞ്ഞ ചില വാക്കുകള്‍ ഉണ്ട്..
“ഈ പരിഷ്കാരങ്ങള്‍ നടപ്പാക്കിയേ തീരൂ.. അതിനു ചില കഠിന തീരുമാനങ്ങള്‍ എടുക്കേണ്ടി വരും. അത് വഴിയേ സാമ്പത്തിക നില മെച്ചപ്പെടൂ. അല്ലാതെ പണം മരത്തില്‍ കായ്ക്കില്ല”..
എന്തത്ഭുതം.. മന്മോഹന രൂപത്തിന് പകരം വന്ന നരേന്ദ്ര രൂപത്തില്‍ നിന്നും ഉതിര്‍ന്നു വീഴുന്നതും അതേ വാക്കുകള്‍ തന്നെ..
“പരിഷ്കാരങ്ങള്‍ നടപ്പാക്കിയേ തീരൂ. ചില കഠിന തീരുമാനങ്ങള്‍ എടുക്കേണ്ടി വരും. അത് വഴിയേ സാമ്പത്തിക നില മെച്ചപ്പെടൂ.”
ചുരുക്കി പറഞ്ഞാല്‍, പേരും രൂപവും മാറി എന്നേ ഉള്ളൂ... ഉള്ളിലിരിയ്ക്കുന്ന രൂപങ്ങള്‍ എല്ലാം ഒന്ന് തന്നെ..
എന്‍.ഡി.എ എന്ന പേര് മാറ്റി മൂന്നാം യു.പി.എ എന്ന് വിളിച്ചാലും വലിയ വ്യത്യാസം വരില്ല എന്നര്‍ത്ഥം ..
ജനത്തെ ഇമ്മാതിരി “സാമ്പത്തികപരിഷ്കാരത്തില്‍” മുക്കി ‘വറുത്തെടുക്കുമോ’, അതോ മുന്‍പത്തെ പോലെ ‘വേവിച്ചെടുക്കുമോ’ എന്നേ നോക്കേണ്ടതുള്ളൂ..
സ്വദേശി, ഭാരതീയം, പാരമ്പര്യം തുടങ്ങിയ വാക്യങ്ങള്‍ ഒക്കെ ആര്‍.എസ്.എസ് ശാഖകളിലെ മുദ്രാവാക്യങ്ങളില്‍ മാത്രം മതി. ഭരിയ്ക്കുമ്പോള്‍ വിളിയ്ക്കാന്‍ വേറെ മുദ്രാവാക്യങ്ങള്‍ ഉണ്ട്..
അംബാനി/അടാനി/വാള്‍മാര്‍ട്ട് മുതലാളിമാര്‍ കീ ജയ്... സബ്സിഡികള്‍ തുലയട്ടെ... മാര്‍ക്കറ്റ് വിജയിക്കട്ടെ...
===============
ചില മക്കളുടെ കൈയിലിരിപ്പ് കാരണം നാട്ടുകാര്‍ പറയാറുണ്ട്‌ " അവനെ അപ്പന്‍ എത്രയോ ഭേദം ആയിരുന്നു".
മോഡി കാരണം മന്മോഹനസിംഗത്തിനും, "നല്ല പേര്" കിട്ടാന്‍ എല്ലാ സാധ്യതയും ഉണ്ട്..

2014, ജൂൺ 16, തിങ്കളാഴ്‌ച

റോമാനഗരം കത്തുമ്പോള്‍ വീണ വായിച്ചു രസിയ്ക്കുന്നവര്‍...

ഇറാക്കില്‍ ആഭ്യന്തര യുദ്ധം കൊടുമ്പിരി കൊള്ളുന്നു.. കൊള്ളയും, കൊലയും എങ്ങും പടരുന്നു... ബാഹ്യലോകവുമായുള്ള വാര്‍ത്താവിനിമയ ബന്ധങ്ങളും നിഷേധിയ്ക്കപ്പെട്ടു, നിത്യജീവിതത്തിന് വേണ്ട സാധനങ്ങള്‍ പോലും കിട്ടാതെ ജനങ്ങള്‍ വലയുന്നു...
ക്രൂരമായ യുദ്ധമേഖലകളില്‍, മരണത്തിനും ജീവിതത്തിനും ഇടയില്‍, അനിശ്ചിതത്തിന്റെ ആശങ്കകള്‍ നിറച്ച് ജീവിയ്ക്കുകയാണ് ആയിരക്കണക്കിന് വിദേശ ഇന്ത്യാക്കാര്‍...
സുരക്ഷിതമായി തിരികെ നാട്ടില്‍ പോകണമെന്ന ഒരേ ഒരു ആഗ്രഹമേ അവര്‍ക്കുള്ളൂ... എന്നാല്‍ ജനങ്ങള്‍ വന്‍ ഭൂരിപക്ഷത്തോടെ തെരഞ്ഞെടുത്ത ഇന്ത്യന്‍ സര്‍ക്കാര്‍ അവരോട് നിര്‍ദാക്ഷണ്യം പറയുന്നു...
"നിങ്ങളെ ഒഴിപ്പിയ്ക്കാന്‍ ഞങ്ങള്‍ക്ക് താത്പര്യം ഇല്ല. വേണമെങ്കില്‍ സ്വന്തം ചെലവില്‍ രക്ഷപ്പെട്ടു കൊള്ളൂ"..
"ഇന്ത്യന്‍ പൌരന്‍" എന്ന അഭിമാനത്തില്‍ വിദേശത്ത് ജീവിയ്ക്കുന്ന വിദേശ ഇന്ത്യക്കാര്‍, ഈ സര്‍ക്കാരിന് ശരിയ്ക്കും ആരാണ്?
വിദേശപണം ലഭിയ്ക്കാന്‍ വേണ്ടിയുള്ള, കറവ വറ്റിയാല്‍ അറുക്കാന്‍ വില്‍ക്കുന്ന, കറവപശുക്കള്‍ മാത്രമോ?
ഇറ്റാലിയന്‍ നാവികര്‍ ഇന്ത്യയില്‍ തടവില്‍ ആയപ്പോള്‍, ആ ഭരണകൂടം ഒന്നടങ്കം അവര്‍ക്ക് വേണ്ടി പ്രവര്‍ത്തിച്ച രീതി കണ്ടവരാണ് നമ്മള്‍.. സ്വന്തം പൌരന്മാരെ സംരക്ഷിയ്ക്കനായി ഏതു യുദ്ധത്തിനും തയ്യാറാകുന്ന അമേരിക്കന്‍, റഷ്യന്‍ ഭരണകൂടങ്ങളെയും ലോകം കാണുന്നു..
പക്ഷെ, നമ്മുടെ ഭരണകൂടങ്ങള്‍ മാത്രം, എന്ത് കൊണ്ട് പൌരന്റെ ജീവന് വില കല്‍പ്പിയ്ക്കുന്നില്ല?....
സ്വന്തം പൌരന്മാര്‍ക്ക് വിദേശത്ത് ഒരു ചെറിയ ബുദ്ധിമുട്ട് നേരിട്ടാല്‍, എല്ലാം മാറ്റിവെച്ച് ഓടിയെത്തി ഇടപെടുന്ന; അമേരിക്ക, ഇറ്റലി, റഷ്യ, ബ്രിട്ടന്‍ മുതലായ രാജ്യങ്ങളിലെ സര്‍ക്കാരുകള്‍ക്ക്, അവരുടെ പൌരന്മാരോടുള്ള സ്നേഹം കണ്ടു നമുക്ക് അസൂയപ്പെടാം..
ഇന്ത്യന്‍ പൌരന്മാരോടല്ലെങ്കില്‍, ആരോടാണ് ഈ സര്‍ക്കാറിന് ഉത്തരവാദിത്വം????
ഇപ്പോള്‍ പ്രധാനമന്ത്രി പദത്തില്‍ ഇരിയ്ക്കുന്ന, (കഴിഞ്ഞ വര്ഷം നൂറു കാറില്‍ പതിനായിരം പേരെ പ്രളയത്തില്‍ നിന്നും രക്ഷിച്ച), "അത്ഭുത"മനുഷ്യന്‍ തന്നെ ഇതിന് ഉത്തരം പറയുമെന്ന് പ്രതീക്ഷിയ്ക്കാമോ? ....

2014, ജൂൺ 13, വെള്ളിയാഴ്‌ച

"ലിംഗശങ്ക" അലട്ടുന്നവര്‍....

ചന്ദ്രചൂഡന്‍ സഖാവ് ആളു മാന്യന്‍ ആണ് എന്നൊരു തെറ്റിദ്ധാരണ നാട്ടുകാര്‍ക്കൊക്കെ ഉണ്ടായിരുന്നു.
സ്വന്തം പാര്‍ട്ടിയില്‍ സംസ്ഥാന സെക്രെട്ടറി ആകാന്‍ മത്സരിച്ചു തോറ്റപ്പോള്‍, ഗ്രൂപ്പ് കളി വഴി തന്നെ തോല്‍പ്പിച്ചവരുടെ തന്നെ കാല് നക്കി, "ദേശീയ സെക്രെട്ടറി" സ്ഥാനം തന്നെ നേടിയെടുത്തു എന്നതല്ലാതെ, അവരുടെ ലിംഗം ഏതെന്നു തിരക്കാനൊന്നും ആദ്ദേഹം നടന്നില്ല.
ഇടതു മുന്നണി വെച്ച് നീട്ടിയ രാജ്യസഭ എം.പി സ്ഥാനം, അതേ ഗ്രൂപ്പ് കളിക്കാര്‍ തട്ടിത്തെറിപ്പിച്ചപ്പോഴും ആദ്ദേഹത്തിന് "ലിംഗസംശയം" തോന്നിയില്ല.
തമ്മിലടിച്ച്‌ പാര്‍ട്ടി പലതായി പിളര്‍ന്ന്, കൈയ്യില്‍ ഉണ്ടായിരുന്ന കൊല്ലം ലോകസഭ സീറ്റ് നഷ്ടപ്പെട്ടപ്പോഴോ, അടുത്ത മൂന്നു ലോകസഭ തെരഞ്ഞെടുപ്പുകളിലും സ്വന്തം സ്ഥാനാര്‍ഥി ഇല്ലാതിരുന്നപ്പോഴും, ഒന്നും അദ്ദേഹത്തിന് "ലിംഗശങ്ക" ഉണ്ടായതായി ചരിത്രത്തില്‍ തെളിവില്ല...
ഇടതുമുന്നണിയുടെ ചിലവില്‍ വളര്‍ത്തിയെടുത്ത പാര്ട്ടിയ്ക്കതീതമായ “പ്രതിച്ഛായ” ഉള്ള പ്രേമചന്ദ്രന്‍ എന്നൊരു സ്ഥാനാര്‍ഥി, അന്നൊക്കെ മന്ത്രി, എം.പി എന്നീ നിലകളില്‍ ആകെ "ബിസി" ആയതിനാലായിരുന്നു അപ്പോഴൊന്നും കൊല്ലം സീറ്റിനെപറ്റി "ലിംഗശങ്ക" തോന്നാത്തത് എന്നത്, ചിന്തിയ്ക്കുന്നവര്‍ക്ക് കിട്ടുന്ന ദ്രിഷ്ടാന്തം...
ഒരു സുപ്രഭാതത്തില്‍, അന്ന് വരെ പറഞ്ഞതെല്ലാം വിഴുങ്ങി , തലേ രാത്രി വരെ “ജനദ്രോഹി സരിതാ ചാണ്ടി” എന്ന് തെറി വിളിച്ചു നടന്ന ഉമ്മന്‍ചാണ്ടിയുടെ കാല്‍ക്കല്‍ വീണ് സാഷ്ടാംഗം നമിച്ച്, നല്ലവണ്ണം തടവി, ഒരു ലോകസഭ സീറ്റ് ഒപ്പിച്ചെടുത്തപ്പോഴും ആ സംശയം അദ്ദേഹത്തെ അലട്ടിയില്ല.
ബംഗാളില്‍ ഇപ്പോഴും ഇടതു മുന്നണിയെ താങ്ങി നടക്കുമ്പോഴും ഇല്ലായിരുന്നു ആ സംശയം...
ഒടുവില്‍ ഇപ്പോഴാണ് ശരിയ്ക്കും സംശയം തോന്നിയത്... ലവനല്ലേ ആണും പെണ്ണും കേട്ടവന്‍ എന്ന്..
സംശയം മാറാന്‍ ഒറ്റ വഴിയേ കാണുന്നുള്ളൂ പ്രൊഫസര്‍ സാറേ.. സ്വന്തം ഭാര്യയോടു ചോദിയ്ക്കുക..
പിന്നെയും സംശയം മാറിയില്ലെങ്കില്‍, നാട്ടുകാരോട് ചോദിയ്ക്കുക.. അവര്‍ സംശയം മാറ്റി തരും.
==========================
"വിപ്ലവം ലിംഗത്തിലൂടെ" എന്നൊരു തിയറി പ്രോഫസ്സരില്‍ നിന്നും ഉടനേ പ്രതീക്ഷിയ്ക്കാം എന്ന് തോന്നുന്നു.... ഇന്ത്യന്‍ കമ്മ്യുനിസതിന്റെ ഒരു ഭാഗ്യമേ...
=========================
വാല്‍കഷ്ണം : പ്രോഫെസ്സര്‍ തേങ്ങ ഉടച്ചാല്‍ താന്‍ ചിരട്ടയെങ്കിലും ഉടയ്ക്കണ്ടേ എന്ന് കരുതി, അച്ഛന്‍ ഉണ്ടാക്കിയ നല്ല പേരിന്റെ തഴമ്പ് തടവി ജീവിയ്ക്കുന്ന മന്ത്രി ഷിബുവും ഒരു സംശയം പറഞ്ഞിട്ടുണ്ട്..
കൊല്ലത്ത് എത്ര വാര്‍ഡുകളില്‍ ആര്‍.എസ്.പി ജയിച്ചിട്ടുണ്ട്, എത്രയെണ്ണത്തില്‍ സി.പി.ഐ ജയിച്ചിട്ടുണ്ട് എന്നൊക്കെ ഒന്ന് തിരക്കി നോക്കിയാല്‍ തീരാവുന്ന ചെറിയ സംശയം മാത്രമാണ് അത് എന്നതിനാല്‍, ആ സംശയത്തിന് ദിഗംബരന്‍ മറുപടി പറയുന്നില്ല..

2014, മേയ് 24, ശനിയാഴ്‌ച

നീലകുറുക്കന്‍ അറിയാതെ കൂകിയപ്പോള്‍!

ഒ.രാജഗോപാലിന്റെ അഭിമുഖം ഏഷ്യാനെറ്റിലെ “പോയിന്റ്‌ ബ്ലാങ്ക്” പരിപാടിയില്‍ കണ്ടപ്പോള്‍, ഇത്രയും എഴുതാതിരിയ്ക്കുന്നത് ശരിയല്ല എന്ന് തോന്നി.
രാജഗോപാലിന്റെ ഗുണഗണങ്ങള്‍ ആയി ആര്‍.എസ്.എസ്സുകാര്‍ പറയുന്ന “വിനയം” എന്ന സാധനം നാലയലത്ത് കൂടി പോയിട്ടില്ലാത്ത ഒരു അഭിമുഖം.
സംഭാഷണത്തിന്റെ മുക്കാല്‍ ഭാഗവും കേരളീയരെയും, പ്രത്യേകിച്ച് തിരുവനന്തപുരത്തുകാരെയും അപഹസിയ്ക്കാനും, ആക്ഷേപിയ്ക്കാനും ആണ് രാജഗോപാല്‍ ഉപയോഗിച്ചിരിയ്ക്കുന്നത്.
“ഇന്ത്യയിലെ മറ്റു പ്രദേശങ്ങളില്‍ ഉള്ളവരേക്കാള്‍, കേരളീയര്‍ വലിയ യോഗ്യത ഉള്ളവര്‍ ആണെന്നാണോ കരുതുന്നത്?” എന്ന മട്ടില്‍ ആയിരുന്നു അധിക്ഷേപങ്ങളില്‍ മുക്കാലും...
പതിനാറാം തീയതി ഉച്ച വരെ മന്ത്രി കുപ്പായം തലോടി കൊണ്ടിരുന്നിട്ട്, അത് മടക്കി വെച്ച് എഴുന്നേറ്റു പോകേണ്ടി വന്നതില്‍, രാജഗോപാലിന് ഉണ്ടായ വ്യക്തിപരമായ വിഷമം മനസിലാക്കാം.
പക്ഷെ, അതിന്റെ പേരില്‍ മലയാളികളെ അധിക്ഷേപിയ്ക്കാന്‍ ഇയാള്‍ക്കെന്തു യോഗ്യത!
കഴിഞ്ഞ തെരഞ്ഞെടുപ്പില്‍ തിരുവനന്തപുരത്ത് ബി.ജെ.പി സ്ഥാനാര്‍ഥിയും അവരുടെ സംസ്ഥാന പ്രസിഡന്റുമായ പി.കൃഷ്ണദാസ് പിടിച്ചത് എന്പതിനായിരത്തിനടുത്ത് വോട്ടു മാത്രമാണ്. ബി.എസ്.പി സ്ഥാനാര്‍ഥി നീലലോഹിത ദാസന്‍ നാടാര്‍ക്കും പിറകില്‍ നാലാം സ്ഥാനത്ത് ആയിരുന്നു അന്ന് ബി.ജെ.പിയുടെ സ്ഥാനം. അതായത് തിരുവനന്തപുരത്ത് ബി.ജെ.പി പാര്‍ട്ടിക്കാരും, അനുഭാവികളും ഒക്കെ കൂടെ ആകെയുള്ള വോട്ട് അത്ര മാത്രം എന്നര്‍ത്ഥം!
ഇത്തവണ ഏകദേശം രണ്ടുലക്ഷം വോട്ടു ബി.ജെ.പി കൂടുതല്‍ പിടിച്ചെങ്കില്‍ അതിനു പ്രധാന കാരണം, കേന്ദ്രത്തില്‍ മോഡി അധികാരത്തില്‍ വന്നാല്‍ രാജഗോപാല്‍ ക്യാബിനെറ്റ് മന്ത്രി ആകും എന്നുള്ള ശക്തമായ പ്രചാരണം ആയിരുന്നു എന്ന്, തിരുവനന്തപുരത്തെ ഏതു കൊച്ചു കുട്ടിയ്ക്കും അറിയാവുന്ന കാര്യം ആണ്.
കൊണ്ഗ്രെസ്സ് അധികാരത്തില്‍ വന്നാല്‍ മന്ത്രിയാകുന്ന ശശി തരൂര്‍ മറുവശത്ത്.... രാഷ്ട്രീയ പാരമ്പര്യം ഇല്ലാത്ത ഒരു പുതുമുഖം ആയ ഇടതു സ്ഥാനാര്‍ഥി കൂടി വന്നതോടെ, മന്ത്രി ആകാന്‍ സാധ്യത ഉള്ള രണ്ട് പേര്‍ തമ്മിലുള്ള പോരാട്ടം എന്ന നിലയില്‍, രാജഗോപാല്‍ - ശശി തരൂര്‍ മുഖ്യപോരാട്ടം ആയി തെരഞ്ഞെടുപ്പ് രംഗം മാറി എന്ന് ചുരുക്കം.
അതു കൊണ്ട്, ബി.ജെ.പിയ്ക്ക് എണ്‍പതിനായിരം മാത്രം പാര്‍ട്ടി വോട്ടുകള്‍ ഉള്ള ഒരു മണ്ഡലത്തില്‍, ഇത്ര അധികം വോട്ടു നല്‍കി രണ്ടാം സ്ഥാനത്ത് കൊണ്ട് വന്ന തിരുവനന്തപുരത്തുകാരോട് നന്ദി കാണിച്ചില്ലെങ്കിലും, അപഹസിയ്ക്കരുത്..
പിന്നെ എന്ത് കൊണ്ട് ജയിച്ചില്ല എന്ന് ചോദിച്ചാല്‍, അതിനുള്ള ഉത്തരം രാജഗോപാല്‍ ആ അഭിമുഖത്തില്‍ പറഞ്ഞ ഒരു ആക്ഷേപത്തില്‍ ഒളിഞ്ഞിരിപ്പുണ്ട്.
“ഇന്ത്യയിലെ എല്ലാ പ്രദേശത്ത് നിന്നുള്ള ഹിന്ദുക്കളും (?) അയോദ്യയില്‍ ബാബറി മസ്ജിത് പൊളിച്ചിട്ട്‌ രാമക്ഷേത്രം പണിയാന്‍ ഇറങ്ങി പുറപ്പെട്ടപ്പോള്‍, ബാബറി പള്ളി പൊളിച്ചതിന് എതിരെ പ്രമേയം പാസ്സാക്കിയ നിയസഭയാണ് കേരളത്തില്‍ ഉള്ളത്” എന്നായിരുന്നു രാജഗോപാലിന്റെ ആ വലിയ ആക്ഷേപം..
പ്രിയ രാജഗോപാല്‍.... പുറമേ എത്ര സ്വാതികന്റെ കുപ്പായം അണിഞ്ഞാലും, താങ്കളുടെ ഉള്ളില്‍ മറഞ്ഞിരിയ്ക്കുന്ന ആ വര്‍ഗ്ഗീയ ആര്‍.എസ്.എസ്സ് വേഷം ഉണ്ടല്ലോ... അത് ഒന്ന് കൊണ്ട് മാത്രമാണ് താങ്കള്‍ ഒരിയ്ക്കലും കേരളത്തില്‍ നിന്നും ജയിയ്ക്കാതെ പോകുന്നതിന് കാരണം...
കാരണം, സാധാരണകേരളീയര്‍ക്ക് മതത്തിന്റെ പേരില്‍ ആക്രമണങ്ങള്‍ നടത്തുന്ന, വര്‍ഗീയ സംഘര്‍ഷങ്ങള്‍ ഉണ്ടാക്കുന്ന, മനുഷ്യനെ വിഘടിപ്പിയ്ക്കുന്ന, ഒരു സംഘടനയോടും സന്ധി ചെയ്യാന്‍ കഴിയില്ല..
അത് മാറ്റാന്‍ കോടിക്കണക്കിന് ആസ്തിയുടെ സ്ഥാപനങ്ങളും, ചാനലും ഭരിയ്ക്കുന്ന താങ്കളുടെ ആള്‍ദൈവം വിചാരിച്ചാലും കഴിയില്ല...
ഇനിയെങ്കിലും മനസ്സിലാക്കുക...

2014, മേയ് 20, ചൊവ്വാഴ്ച

“കമ്മ്യൂണിസ്റ്റുകൾ ഒന്നിക്കണം” ...ശരിയാണ് ...പക്ഷെ ലയനം എന്തിന്?

അഖിലേന്ത്യതലത്തില്‍ നേരിട്ട തിരിച്ചടിയെ തുടര്‍ന്ന് കമ്മ്യുണിസ്റ്റ് പാര്‍ട്ടികളുടെ ലയനത്തെ കുറിച്ച് പല വേദികളിലും ചര്‍ച്ചകള്‍ ഉയരുന്നത് കാണാന്‍ കഴിഞ്ഞു. ജനയുഗം പത്രം എഴുതിയ മുഖപ്രസംഗം ഈ ചര്‍ച്ചകളെ മുഖ്യധാരാ മാധ്യമങ്ങളില്‍ വരെ വലിയൊരു ചര്‍ച്ചയാക്കി വളര്ത്തിയിരിയ്ക്കുന്നു. ഇത്രയുമായ സ്ഥിതിയ്ക്ക്, ഈ വിഷയത്തെ കുറിച്ച് ദിഗംബരന്റെ വ്യക്തിപരമായ അഭിപ്രായം ചോദിച്ച് ലഭിച്ച പല സുഹൃത്തുകളുടെയും സന്ദേശങ്ങള്‍ക്ക് മറുപടി എഴുതേണ്ടതുണ്ട് എന്ന് കരുതുന്നു.
ഇന്ത്യയിലെ എല്ലാ കമ്മ്യുണിസ്റ്റുകളും ഇടതുപക്ഷ ചിന്താഗതി ഉള്ള ജനങ്ങളും ഒക്കെ ഒന്നിയ്ക്കണം എന്ന് ഏതു സാധാരണ പ്രവര്‍ത്തകനെയും പോലെ ദിഗംബരനും ആഗ്രഹിയ്ക്കുന്നു. അത് കാലഘട്ടത്തിന്റെ ആവശ്യവും ആണ്.
പക്ഷെ, സി.പി.ഐ – സി.പി.എം ലയനം എന്ന ആവശ്യത്തെകുറിച്ചാണ് ചോദ്യം എങ്കില്‍ അത് ഇപ്പോള്‍ പാടില്ല എന്ന് തന്നെയാണ് ദിഗംബരന്റെ വ്യക്തിപരമായ അഭിപ്രായം. അതിന് വ്യക്തമായ കാരണങ്ങളും ഉണ്ട്.
കമ്മ്യുണിസം എന്ന ആശയത്തെ പിന്തുടരുന്നു എങ്കിലും, സ്വന്തമായി വിഭിന്നമായ വ്യക്തിത്വം ഉള്ള രണ്ട് പാര്‍ട്ടികള്‍ ആണ് സി.പി.ഐ യും സി.പി.എമ്മും എന്നത് തന്നെയാണ് പ്രധാനമായ കാരണം. ഇന്ത്യന്‍ രാഷ്ട്രീയത്തിലും, കേരള രാഷ്ട്രീയത്തിലും, ജനങ്ങള്‍ക്കിടയിലും ഈ രണ്ടുപാര്ട്ടികളും ഉള്ള സ്ഥാനവും വ്യത്യസ്തം ആണ്. സി.പി.ഐയ്ക്ക് പകരക്കാരന്‍ ആകാന്‍ സി.പി.എമ്മിനോ, സി.പി.എമ്മിന് പകരക്കാരന്‍ ആകാന്‍ സി.പി.ഐയ്ക്കോ കഴിയില്ല എന്ന് ചുരുക്കം.
അതേ സമയം സി.പി.എമ്മിന്റെ പ്രവര്‍ത്തന ശൈലിയില്‍ കാണാറുള്ള സ്റ്റാലിനിസ്റ്റ് സമീപനങ്ങള്‍ സി.പി.ഐയുടെ നിലപാടുകളില്‍ കാണാറില്ല. അത് കൊണ്ട് തന്നെ, ചന്ദ്രശേഖരന്‍ വധം പോലുള്ള രാഷ്ട്രീയകൊലപതകങ്ങളുടെയോ, “പരനാറി”, “കുലംകുത്തി” പോലുള്ള അധിക്ഷേപങ്ങളുടെയോ ഭാരം ചുമക്കേണ്ട ഗതികേട് സി.പി.ഐയ്ക്ക് വരാറുമില്ല.
ഇനി അതെല്ലാം ഏറ്റെടുക്കണം എന്നാണോ ലയനവാദികളുടെ അഭിപ്രായം?
സി.പി.ഐയുമായി യോജിയ്ക്കാന്‍ കഴിയാത്ത ഇടതുപക്ഷക്കാര്‍ക്ക് പ്രവര്‍ത്തിയ്ക്കാന്‍ കഴിയുന്ന പ്ലാറ്റ്ഫോം ആയി സി.പി.എമ്മും, സി.പി. എമ്മുമായി യോജിയ്ക്കാന്‍ കഴിയാത്ത ഇടതുപക്ഷക്കാര്‍ക്ക് പ്രവര്‍ത്തിയ്ക്കാന്‍ കഴിയുന്ന പ്ലാറ്റ്ഫോം ആയി സി.പി.ഐയും നിലനില്‍ക്കുന്നതാണ് നല്ലത്.
സി.പി.ഐ, സി.പി.എം എന്നിവ മാത്രമല്ല, ഇന്ത്യയില്‍ പ്രവര്‍ത്തിയ്ക്കുന്ന എല്ലാ ഇടതുപക്ഷ പ്രസ്ഥാനങ്ങളെയും ഒന്നിച്ച് ഒരു ഐക്യമുന്നണി സംവിധാനത്തിന് കീഴില്‍ കൊണ്ട് വരുന്നതാകും ഇപ്പോഴത്തെ സാഹചര്യത്തില്‍ നല്ലത്. അതില്‍ പരസ്പരം ലയിയ്ക്കാന്‍ കഴിയുന്ന ചെറുഗ്രൂപ്പുകള്‍ പരസ്പരം ചര്‍ച്ച വഴി ലയനത്തിന്റെ മാര്‍ഗ്ഗം സ്വീകരിച്ചോട്ടെ.
ഒപ്പം ഇപ്പോള്‍ സായുധമാര്‍ഗ്ഗം സ്വീകരിച്ച നക്സല്‍ - മാവോ ഗ്രൂപ്പുകളുമായും ചര്‍ച്ച നടത്തി അവരെയും ജനാധിപത്യത്തിലെയ്ക്കും, കമ്മ്യുണിസ്റ്റ് ഐക്യമുന്നണിയിലെയ്ക്കും കൊണ്ട് വരാനുള്ള ശ്രമങ്ങള്‍ നടത്തണം. (പല സംസ്ഥാനങ്ങളിലും മുഖ്യധാരാ കമ്മ്യുണിസ്റ്റ് പ്രസ്ഥാനങ്ങളെക്കാള്‍ ജനപിന്തുണ ഇത്തരം ഗ്രൂപ്പുകള്‍ക്ക് ഉണ്ട് എന്നത് മറക്കാന്‍ പാടില്ല)
ഈ തെരഞ്ഞെടുപ്പ് തിരിച്ചടി സഖാക്കള്‍ക്ക് വലിയ വേവലാതി ഉണ്ടാക്കുന്നു എന്നറിയാം. കമ്മ്യുണിസ്റ്റ് പ്രസ്ഥാനങ്ങള്‍ ഇല്ലാതാകാന്‍ പോകുകയാണോ എന്ന് വരെ ചിലര്‍ ഭയപ്പെടുന്നു.
പക്ഷെ, അത്തരം ഒരു ആശങ്കയും ദിഗംബരന് ഇല്ല. മറിച്ച് നരേന്ദ്രമോഡിയെ പോലൊരു വര്‍ഗ്ഗീയ ഫാസിസ്റ്റ് നയിയ്ക്കുന്ന സര്‍ക്കാരിന്റെ ഭരണത്തിന്‍ കീഴില്‍ ഇനിയുള്ള അഞ്ചു വര്‍ഷങ്ങള്‍, ഇന്ത്യന്‍ കമ്മ്യുണിസ്റ്റ് പ്രസ്ഥാനങ്ങള്‍ക്ക്‌ ജനപിന്തുണ തിരികെ നേടാന്‍ വലിയൊരു സാധ്യത ആണ് തുറന്നു തന്നിരിയ്ക്കുന്നത് എന്നാണ് ദിഗംബരന്റെ അഭിപ്രായം.
ഫാസിസത്തെ എതിര്‍ത്ത് ജനകീയപക്ഷത്ത് നിന്നു പോരാടാന്‍ ലഭിച്ച ചരിത്രപരമായ അവസരം മുതലാക്കുകയാണ് കമ്മ്യുണിസ്റ്റ് പാര്‍ട്ടികള്‍ ചെയ്യേണ്ടത്.
നാം നമ്മുടെ വേരുകളിലെയ്ക്ക് തിരികെ പോകേണ്ട സമയമാണിത്. നമ്മുടെ അടിസ്ഥാനപരമായ ലക്‌ഷ്യം ജനങ്ങള്‍ക്ക്‌ വേണ്ടി പോരാടുക എന്നതാണ്, അല്ലാതെ തെരഞ്ഞെടുപ്പിലെ കുറെ സീറ്റുകള്‍ നേടുക എന്നതല്ല.
ജനങ്ങള്‍ക്കൊപ്പം പ്രവര്‍ത്തിച്ച്, അംബാനിയുടെയും, അടാനിയുടെയും, ആര്‍.എസ്.എസ്സിന്റെയും നിയന്ത്രണത്തില്‍ ഭരിയ്ക്കാന്‍ പോകുന്ന വര്‍ഗീയ സര്‍ക്കാരിന്റെ ജനദ്രോഹ നയങ്ങള്‍ക്കെതിരെയും, രാജ്യത്തിന്റെ പൊതുമുതല്‍ മുതലാളിമാര്‍ക്ക് കാഴ്ച വെയ്ക്കുന്ന സാമ്പത്തിക നയങ്ങള്‍ക്ക് എതിരെയും, വര്‍ഗീയ സദാചാരപോലിസ് നയങ്ങള്‍ക്കും എതിരെ പൊരുതാന്‍ തയ്യാറാകുക.
ജനങ്ങള്‍ക്ക്‌ ഒപ്പം നില്‍ക്കുക... അവര്‍ക്ക് വേണ്ടി പൊരുതുക. ഇപ്പോള്‍ തഴഞ്ഞ ജനം തന്നെ അപ്പോള്‍ നമ്മെ ഉയര്‍ത്തും. അല്ലാതെ ഒരു കുറുക്കുവഴിയും തേടരുത്‌.
കമ്മ്യുണിസ്റ്റ് പാര്‍ട്ടികള്‍ ലോകസഭയില്‍ ഏറ്റവും കൂടുതല്‍ സീറ്റുകള്‍ നേടിയത്, കഴിഞ്ഞ ബി.ജെ.പി ഭരണത്തിന് ശേഷം നടന്ന തെരഞ്ഞെടുപ്പില്‍ ആണെന്ന സത്യം മറക്കരുത്.
ഇന്നത്തെ തിരിച്ചടികള്‍ നാളെയുടെ പാഠങ്ങള്‍ ആണ്.. സ്വയം വളരാതെ മറ്റാരെ പിന്തുണയ്ക്കാന്‍ നടന്നിട്ടും കാര്യം ഇല്ല.
ബി.ജെ.പി ഇതര കൊണ്ഗ്രെസ്സ് ഇതര മുന്നണി അല്ല നമ്മുടെ ലക്‌ഷ്യം.. ഇടതുമുന്നണി ആണ്. അതിന്റെ വളര്‍ച്ച ആണ്. അതിനു വേണ്ടിയാകട്ടെ നമ്മുടെ പ്രവര്‍ത്തനങ്ങള്‍.
സഖാക്കളേ മുന്നോട്ട്.......

2014, മാർച്ച് 19, ബുധനാഴ്‌ച

തിരുവനന്തപുരവും, ശശി തരൂരും, പാഴായ വാഗ്ദാനങ്ങളും..

2009ല്‍ കൊണ്ഗ്രെസ്സ് പാര്‍ട്ടി മെമ്പറോ തിരുവനന്തപുരം നിവാസിയോ അല്ലാത്ത ശശി തരൂരിനെ സ്ഥാനാര്‍ത്ഥിയാക്കി കൊണ്ഗ്രെസ്സ് ഹൈകമാന്‍ഡ് നൂലില്‍ കെട്ടിയിറക്കിയപ്പോള്‍ ആദ്യം ഞെട്ടിയത് കേരളത്തിലെ കൊണ്ഗ്രെസ്സ് നേതൃത്വം ആയിരുന്നു. വര്‍ഷങ്ങളുടെ പ്രവര്‍ത്തന പാരമ്പര്യം ഉള്ള ഒരുപാട് നേതാക്കളെ തഴഞ്ഞ്, ഐക്യരാഷ്ട്രസഭയില്‍ നിന്നും പെന്‍ഷന്‍ പറ്റിയ ശേഷം ബിസ്നസ്സുമായി കറങ്ങി നടന്ന ശശി തരൂരിനെ സ്ഥാനാര്‍ഥിയായി തെരഞ്ഞെടുത്തത്, രാഹുല്‍ ഗാന്ധിയുമായുള്ള വ്യക്തിബന്ധം കൊണ്ടായിരുന്നു.
ശശിതരൂരിന്റെ ഗ്ലാമറും, അന്തര്‍ദേശീയ ഇമേജിനും അപ്പുറം ജനങ്ങളെ ആകര്‍ഷിച്ചത്, ഇലക്ഷന്‍ സമയത്ത് അയാള്‍ വാരി കോരി വിതറിയ കെട്ടുകണക്കിന് വാഗ്ദാനങ്ങള്‍ ആയിരുന്നു. മാത്രമല്ല ജയിച്ചാല്‍ മന്ത്രി ആകുമെന്ന് കൊണ്ഗ്രെസ്സ് നേതൃത്വവും ഉറപ്പ് കൊടുത്തിരുന്നു. പൊന്നാനി സീറ്റിനെ ചൊല്ലി ഇടതുമുന്നണിയില്‍ ഉണ്ടായ സി.പി.എം-സി.പി.ഐ പടലപിണക്കവും, ഇടതുപക്ഷക്കാരനായ നീലലോഹിതദാസന്‍ നാടാരുടെ ബി.എസ്.പി സ്ഥാനാര്‍ഥിവേഷവും ചേര്‍ന്നപ്പോള്‍ വലിയ ഭൂരിപക്ഷത്തില്‍ തന്നെ ശശി തരൂര്‍ ജയിയ്ക്കുകയുണ്ടായി.
അഞ്ചു വര്‍ഷങ്ങള്‍ക്കു ശേഷം വീണ്ടും ഒരു ഇലക്ഷന്‍ വരുമ്പോള്‍, കാര്യങ്ങള്‍ അത്ര എളുപ്പമല്ല ശശിതരൂരിന്. തരൂരിനെ പോലെ തന്നെ വിദ്യാഭ്യാസപരമായി ഏറെ നേട്ടങ്ങള്‍ നേടിയ, ആതുരസേവന മേഖലയില്‍ ജനങ്ങളോടൊപ്പം വര്‍ഷങ്ങളായി പ്രവര്‍ത്തിയ്ക്കുന്ന ഒരു സാധാരണ തിരുവനന്തപുരത്തുകാരനെ ഇടതുമുന്നണി സ്ഥാനാര്‍ഥി ആക്കിയിരിയ്ക്കുന്നു. തര്‍ക്കങ്ങള്‍ ഒന്നുമില്ലാത്തതിനാല്‍ മുന്‍പത്തെക്കാളും ശക്തമായി സി.പി.എം – സി.പി.ഐ ഐക്യം തിരുവനന്തപുരത്ത് പ്രവര്‍ത്തിയ്ക്കുന്നു. നീലലോഹിതദാസന്‍ നാടാര്‍ ഇടതുപാളയത്തില്‍ തിരിച്ചെത്തി ഇടതുസ്ഥാനാര്‍ഥിയ്ക്ക് വേണ്ടി പ്രവര്‍ത്തിയ്ക്കുന്നു. ബി.ജെ.പി സ്ഥാനാര്‍ഥി ആയി രാജഗോപാലിന്റെ വരവ്, കഴിഞ്ഞ തവണ തരൂരിന് കിട്ടിയ നിഷ്പക്ഷ വോട്ടുകളില്‍ വിള്ളല്‍ വീഴ്ത്തുമെന്ന് ഏറെകുറെ ഉറപ്പുമാണ്. അടുത്ത ഭരണം കൊണ്ഗ്രെസ്സിനു കിട്ടുമോ എന്ന കാര്യത്തില്‍ ചിദംബരവും, പി.സി.ചാക്കോയും അടക്കമുള്ള കൊണ്ഗ്രെസ്സ് നേതാക്കള്‍ പോലും സംശയം പ്രകടിപ്പിയ്ക്കുന്നതിനാല്‍, ജയിച്ചാല്‍ മന്ത്രി ആകും എന്ന ഭീക്ഷണിയും ഇത്തവണ മുഴക്കാന്‍ പറ്റില്ല.
എന്നാല്‍ ഇതിനെക്കാളും തരൂരിനെ വലയ്ക്കുന്നത് പാലിയ്ക്കാനാകാതെ പോയ വാഗ്ദാനങ്ങളെ കുറിച്ചുള്ള ജനങ്ങളുടെ ചോദ്യങ്ങള്‍ ആണ്. അതില്‍ ഏറ്റവും പ്രധാനം തിരുവനന്തപുരത്തെ ഹൈകോടതി ബെഞ്ചിനെ കുറിച്ചുള്ളതാണ്.
തിരുവനന്തപുരത്ത് ഹൈകോടതി ബെഞ്ച്‌ സ്ഥാപിയ്ക്കണം എന്ന ആവശ്യത്തിന് വര്‍ഷങ്ങളുടെ പഴക്കമുണ്ട്. അതിന് വേണ്ടിയുള്ള സമരം ജനകീയരോഷമായി കത്തിപടര്‍ന്നു കയറിയ സമയത്തായിരുന്നു തരൂര്‍ ഇടപെട്ടത്. താന്‍ ജയിച്ചാല്‍ ഒരു വര്‍ഷത്തിനകം തന്നെ ഹൈകോടതി ബെഞ്ച്‌ കൊണ്ട് വരും എന്നായിരുന്നു തരൂരിന്റെ വാഗ്ദാനം. ജയിച്ചാല്‍ മന്ത്രിയാകാന്‍ സാധ്യത ഉള്ള ആള്‍ എന്ന നിലയില്‍ തരൂരിന്റെ വാക്ക് വിശ്വസിച്ച്, ഹൈകോടതി ബെഞ്ച്‌ സമരസമിതി തുടര്‍ച്ചയായി നടത്തി വന്ന സമരപരിപാടികള്‍ നിര്‍ത്തി വെയ്ക്കുകയും ചെയ്തു. എന്നാല്‍ വര്ഷം അഞ്ചു കഴിഞ്ഞിട്ടും, മന്ത്രി കസേരയില്‍ ഏറെ നാള്‍ വിലസിയിട്ടും ആ വാഗ്ദാനം പാലിയ്ക്കാന്‍ തരൂരിന് കഴിഞ്ഞില്ല. കൊണ്ഗ്രെസ്സ് പാര്‍ട്ടിയില്‍ നിര്‍ണ്ണായക സ്വാധീനം ഉള്ള എറണാകുളം ലോബിയുടെ സമ്മര്‍ദം മൂലം കേന്ദ്ര ക്യാബിനെറ്റ് മീറ്റിംഗില്‍ ആ വിഷയം ഉന്നയിയ്ക്കാന്‍ പോലും തരൂര്‍ ശ്രമിച്ചില്ല. തരൂരിനെ വിശ്വസിച്ച് ജനകീയ പ്രക്ഷോഭം നിര്‍ത്തി വെച്ച സമരസമിതി, ഈ വിഷയത്തില്‍ എം.പി വഞ്ചിച്ചു എന്ന് പരസ്യമായി ആരോപിയ്ക്കുന്ന വിധത്തില്‍ കാര്യങ്ങള്‍ എത്തി നില്‍ക്കുന്നു.
ജനങ്ങള്‍ക്ക്‌ തരൂര്‍ നല്‍കിയ മറ്റൊരു വിചിത്ര വാഗ്ദാനം ആയിരുന്നു, താന്‍ എം.പി ആയാല്‍ തിരുവനന്തപുരം ലോകസഭയ്ക്ക് കീഴില്‍ വരുന്ന എഴു അസംബ്ലി മണ്ഡലങ്ങളിലും ഓരോ എം.പി ഓഫീസ് തുറന്ന്, ജനങ്ങളുടെ വിഷയങ്ങളില്‍ ഇടപെട്ട് പരാതികള്‍ പരിഹരിയ്ക്കും എന്നത്. ഓഫീസ് ചിലവുകള്‍ക്ക് സര്‍ക്കാര്‍ നല്‍കുന്ന പണം തികയാത്ത പക്ഷം സ്വന്തം കീശയില്‍ നിന്ന് കാശ് ഇറക്കിയായാലും 7 ഓഫീസുകള്‍ പ്രവര്‍ത്തിപ്പിയ്ക്കും എന്നായിരുന്നു വാഗ്ദാനം.
എന്നാല്‍ ഒരിയ്ക്കലും പാലിയ്ക്കപ്പെടാതെ പോയ ഈ വാഗ്ദാനം എം.പി തന്നെ സൌകര്യപൂര്‍വ്വം മറന്നു. ആകെ തിരുവനന്തപുരം സിറ്റിയുടെ ഒരു മൂലയിലായി തുറന്ന ഓഫീസ് മാത്രമാണ് ഈ അഞ്ചു വര്‍ഷവും ഉണ്ടായിരുന്നത്. ആ ഓഫീസില്‍ ഓണത്തിനും സംക്രാന്തിയ്ക്കും മാത്രം വന്നിരുന്ന വിരുന്നുകാരന്‍ ആയിരുന്നു എന്നതിനാല്‍ തന്നെ, എം.പിയെ കാണാനുള്ള അവസരം വോട്ടു നല്‍കിയ പ്രജകള്‍ക്ക് അപൂര്‍വ്വമായേ കിട്ടിയുള്ളൂ.
അതിലും രസകരമായിരുന്നു “ബാര്‍സലോണ ഇരട്ടനഗരം” വാഗ്ദാനം.
സാധാരണ ജനങ്ങള്‍ കേട്ടിട്ടില്ലാത്ത ഒരു “ന്യൂ ജെനെരെഷന്‍” വാഗ്ദാനം ആയിരുന്നു അത്. ബാര്‍സലോണ സിറ്റിയുടെ സഹോദരനഗരം (Twin city) എന്ന സ്ഥാനം കൊടുത്ത് തിരുവനന്തപുരം സിറ്റിയെ യൂറോപ്പിനെ പോലെ വികസിപ്പിച്ചു കളയും എന്നായിരുന്നു തരൂരിന്റെ വാഗ്ദാനം. ഇമ്മാതിരി പദപ്രയോഗങ്ങള്‍ കേട്ടു പരിചയം ഇല്ലാത്ത പാവപ്പെട്ട ജനങ്ങള്‍ അതെന്തോ വലിയ സംഭവം ആണെന്ന് കരുതി കൈയടിച്ചു. ബാര്സെലോണ നഗരത്തില്‍ നിന്നും വികസനം തിരുവനന്തപുരത്തേയ്ക്ക് ഒഴുകും എന്നായിരുന്നു പാവങ്ങള്‍ കരുതിയത്‌.
പക്ഷെ എന്തായിരുന്നു വാസ്തവം?
സഹോദരനഗരം (Twin city) എന്നത് അന്തര്‍ദേശീയതലത്തിലെ ഒരു നയതന്ത്ര സ്ഥാനപ്പേര്‍ മാത്രമാണ് എന്നതാണ് സത്യം. ഏതു നഗരത്തിനും മറ്റൊരു നഗരത്തെ സഹോദരനഗരം (Twin city) ആയി പ്രഖ്യാപിയ്ക്കാം. വല്ലപ്പോഴും പരസ്പര സൌഹൃദത്തിനു വേണ്ടി കലാ-സാംസ്കാരിക കൈമാറ്റങ്ങള്‍ നടത്തുക, പരസ്പര സന്ദര്‍ശനങ്ങള്‍ നടത്തുക എന്നിങ്ങനെ നയതന്ത്ര ബന്ധങ്ങള്‍ക്ക് അപ്പുറം മറ്റൊരു വികസന-സാമ്പത്തിക ബന്ധവും അത്തരം പ്രഖ്യാപനങ്ങള്‍ക്ക് ഇല്ല എന്നതാണ് സത്യം. “ട്വിന്‍സിറ്റി” എന്ന സ്ഥാനം യാതൊരു സാമ്പത്തിക ബന്ധങ്ങള്‍ക്കും വേണ്ടി ഉണ്ടാക്കിയ ഒന്നല്ലെന്ന് പിന്നീട് തിരുവനന്തപുരം സന്ദര്‍ശിച്ച ബാര്‍സലോണ സൌഹൃദസംഘം അടിവരയിട്ടു പറയുകയും ചെയ്തത് തന്നെ ഇത് കൊണ്ടാണ്.
ശശി തരൂറിനെ ഹൈകമാണ്ട് നൂലില്‍ കെട്ടി ഇറക്കുന്നതിനും പതിനഞ്ച് വര്‍ഷങ്ങള്‍ക്ക് മുന്‍പ് (1994) തന്നെ, അമേരിക്കയിലെ ഗാല്‍വെസ്ടോന്‍ (Galveston) നഗരത്തിന്റെ സഹോദരനഗരം (Twin city) എന്ന സ്ഥാനം നേടിയ സിറ്റിയാണ് തിരുവനന്തപുരം എന്ന സത്യം ഇതിനിടയില്‍ ഒളിപ്പിച്ചു വെയ്ക്കപ്പെട്ടു.
അന്ന് തിരുവനന്തപുരം സന്ദര്‍ശിച്ച ഗാല്‍വെസ്ടോന്‍ നഗര സൌഹൃദസംഘം സുനാമി ബാധിതരെ സഹായിയ്ക്കാന്‍ മുഖ്യമന്ത്രിയുടെ ദുരിതാശ്വാസ ഫണ്ടിലേയ്ക്ക് രണ്ട് ലക്ഷം രൂപ സംഭാവന നല്‍കിയത് മാത്രമായിരുന്നു ആ സ്ഥാനപ്പേര്‍ മൂലം കിട്ടിയ ആകെ നേട്ടം. ഇപ്പോഴും ഗാല്‍വെസ്ടോന്‍-തിരുവനന്തപുരം ട്വിന്‍സിറ്റി എന്ന വെബ്സൈറ്റില്‍ പോയാല്‍ തിരുവനന്തപുരം സഹോദരനഗരം (Twin city) എന്ന് കാണാം.
http://www.webdigi.com/gtscsociety/home.asp
ചുരുക്കി പറഞ്ഞാല്‍ എന്തോ വലിയൊരു സംഭവം എന്ന് സാധാരണക്കാരെ തെറ്റിദ്ധരിപ്പിയ്ക്കാന്‍ ഇറക്കിയ ഉള്ളു പൊള്ളയായ ഒരു വാഗ്ദാനം മാത്രമായിരുന്നു “ബാര്‍സലോണ ഇരട്ടസിറ്റി”. ബാര്‍സലോണ പട്ടണത്തിന്റെ വെബ്സൈറ്റില്‍ “ഇരട്ടസിറ്റി” എന്നൊരു സ്ഥാനപ്പേര് കിട്ടിയ കൊണ്ട് തിരുവനന്തപുരത്തിന് വലിയ ഗുണം ഒന്നും കിട്ടില്ലെന്ന്, ജനങ്ങള്‍ക്ക്‌ അറിയില്ലെങ്കിലും തരൂരിന് നന്നായി അറിയാം. അതിനാല്‍ തന്നെ ഇത്തവണ പുതിയ “ഇരട്ടസിറ്റി” വാഗ്ദാനങ്ങള്‍ ഒന്നും അദ്ദേഹം മുന്‍പോട്ടു വെച്ചിട്ടില്ല.
മൂന്നു വര്‍ഷത്തില്‍ അധികം മന്ത്രിസ്ഥാനം വഹിച്ചിട്ടും തിരുവനന്തപുരത്തിന്റെ റെയില്‍വേ മേഖലയില്‍ വികസനം എന്ന പേരില്‍ എന്തെങ്കിലും പുതിയ കാര്യങ്ങള്‍ നടപ്പിലാക്കാന്‍ തരൂരിന് കഴിഞ്ഞില്ല. റെയില്‍പാതകള്‍ ഇരട്ടിപ്പിയ്ക്കുന്നതിലോ, പുതിയ തീവണ്ടികള്‍ അനുവദിപ്പിയ്ക്കുന്നതിലോ, തിരുവനന്തപുരം നഗരത്തിന് പുറത്തുള്ള റെയില്‍വേ സ്റ്റെഷനുകള്‍ വികസിപ്പിയ്ക്കുന്നതിലോ ഒന്നും സ്വന്തം മന്ത്രിസ്ഥാനം ഉപയോഗപ്പെടുത്തി ശ്രമിയ്ക്കാന്‍ പോലും തരൂര്‍ ശ്രമിച്ചില്ല എന്ന ആക്ഷേപം ശക്തമാണ്. മമത ബാനര്‍ജി റെയില്‍വേ മന്ത്രി ആയിരുന്നപ്പോള്‍ പ്രഖ്യാപിച്ച പേട്ട റെയില്‍വേ മെഡിക്കല്‍ കോളേജിന്റെ കാര്യത്തില്‍ ഒരു ചെറുവിരല്‍ അനക്കാന്‍ പോലും കഴിയാതെ പോയതും ആ കഴിവുകേടിന്റെ ദ്രിഷ്ടാന്തം ആണ്.
പി.കെ.വാസുദേവന്‍ നായര്‍ എം.പിയായിരുന്നപ്പോള്‍ തുടങ്ങിയ തിരുവനന്തപുരം വിമാനത്താവള വികസന പദ്ധതികളുടെയും, പന്ന്യന്‍ രവീന്ദ്രന്‍ എം.പിയായിരുന്ന സമയത്ത് തുടക്കം കുറിച്ച മെഡിക്കല്‍ കോളേജ് വികാസന പദ്ധതികളുടെയും പിതൃത്വവും തരൂരിന് സ്വന്തം ക്രെഡിറ്റില്‍ എഴുതി ചേര്‍ക്കാന്‍ കഴിയില്ല.
പ്രാദേശികമായി വാര്‍ഡു കൌണ്‍സിലര്‍മാര്‍ക്കും പഞ്ചായത്ത് മെമ്പര്‍മാര്‍ക്കും ചെയ്യാവുന്ന കാര്യങ്ങള്‍ ആയ “കക്കൂസ് പണിഞ്ഞു, കലുങ്ക് കെട്ടി, ബസ്‌ വൈറ്റിംഗ്ഷെഡ്‌ കെട്ടി, റോഡു ടാര്‍ ചെയ്തു” എന്നിങ്ങനത്തെ കാര്യങ്ങളെ വന്‍“വികസന” പ്രവര്‍ത്തനങ്ങളുടെ ലിസ്റ്റ് എന്ന മട്ടില്‍, ലക്ഷകണക്കിന് രൂപ മുടക്കി മുന്‍നിരപത്രങ്ങളില്‍ ഫുള്‍പേജ് പരസ്യം ചെയ്തപ്പോള്‍ പോലും, തമിഴ്നാട്ടിലെ വല്ലവരും പണിഞ്ഞ റോഡിന്റെ ഫോട്ടോ കൊടുക്കേണ്ട ഗതികേടിലായിരുന്നു ശശി തരൂര്‍ എന്ന ആഗോളപൌരന്‍! അതിന്റെ പേരില്‍ ഫേസ്ബുക്ക് അടക്കമുള്ള സോഷ്യല്‍ നെറ്റ്‌വര്‍ക്ക് സൈറ്റുകളില്‍ അദ്ദേഹം കേട്ട തെറിയ്ക്ക് കണക്കില്ല.
ഇലക്ഷന്‍ അടുത്തപ്പോള്‍ നാട്ടുകാരെ കാണിയ്ക്കാനായി പല രാഷ്ട്രീയക്കാരും ചെയ്യുന്ന പോലെ തിരക്ക് പിടിച്ചു കുറെ ഉത്ഘാടനങ്ങളും മരാമത്ത് പണികളും നടത്തുകയും, നാട് നീളെ അതിന്റെ ഫ്ലെക്സുകള്‍ സ്ഥാപിച്ച് സ്വന്തം "വികസനം", പ്രചരിപ്പിയ്ക്കാനും തരൂര്‍ ശ്രമിച്ചു.
പക്ഷെ, അത്തരത്തില്‍ ഇലക്ഷന് പ്രഖ്യാപനത്തിന് ഒരു മാസം മുന്‍പ്, പെട്ടെന്ന് ടാറിട്ട് ഉത്ഘാടനം ചെയ്ത പേരൂര്‍ക്കട-വഴയില റോഡ്‌, പണിയുടെ "നിലവാരം" കാരണം, ഉത്ഘാടനം കഴിഞ്ഞ് മണികൂറുകള്‍ക്കകം പലയിടത്തും പൊളിഞ്ഞു തകര്‍ന്നത് വാര്‍ത്താ ചാനലുകള്‍ സംപ്രേഷണം ചെയ്തത് തരൂരിന് ക്ഷീണമായി.
വിളപ്പിന്ശാല നിവാസികളുടെ ശക്തമായ സമരം മൂലം മാലിന്യ നിര്‍മ്മാജ്ജനശാല അടച്ചു പൂട്ടിയ ശേഷം, തലസ്ഥാന നഗരം നേരിടുന്ന ഏറ്റവും വലിയ പ്രതിസന്ധി ആണ് മാലിന്യ നിര്‍മ്മാജ്ജനം. എന്നാല്‍ ഈ വിഷയത്തില്‍ ഇടപെടാനോ, ചര്‍ച്ച ചെയ്ത് പരിഹരിയ്ക്കാനോ, ബന്ധപ്പെട്ട കക്ഷികളുടെ ഒരു മീറ്റിംഗ് വിളിച്ച് കൂട്ടാന്‍ പോലുമോ സ്ഥലം എം.പി ശ്രമിച്ചില്ല എന്ന പരാതി ജനങ്ങള്‍ക്കുണ്ട്. ഈ വിഷയത്തില്‍ തിരുവനന്തപുരം കോര്‍പറേഷന്‍ നടത്തിയ നിയമ പോരാട്ടങ്ങളിലോ,പുതിയ മാലിന്യ നിര്‍മാര്‍ജ്ജന പദ്ധതികളില്‍ സഹകരിയ്ക്കാനോ, കേന്ദ്രസഹായം വാങ്ങി കൊടുക്കാനോ ശശി തരൂര്‍ ശ്രമിച്ചില്ല.
ഇടതു മുന്നണി സര്‍ക്കാരിന്റെ കാലത്ത് പണി തുടങ്ങിയ തമ്പാനൂര്‍ ബസ്‌ സ്റ്റേഷന്‍, പണി പൂര്‍ത്തിയാക്കാതെ ഉത്ഘാടനം ചെയ്ത് പബ്ലിസിറ്റിയ്ക്ക് ശ്രമിച്ചെങ്കിലും, ഇപ്പോഴും പ്രവര്‍ത്തനം തുടങ്ങാനാകാതെ കിടക്കുന്ന ആ ബസ്‌ സ്റ്റേഷന്‍ ഒരു ചോദ്യചിഹ്നം ആയി അവശേഷിയ്ക്കുന്നു. ഒരു ചെറുമഴ പെയ്താല്‍ വെള്ളക്കെട്ടാകുന്ന തമ്പാനൂര്‍ പ്രദേശത്ത് കഴിഞ്ഞ ഇലക്ഷന്‍ സമയത്ത് വാഗ്ദാനം ചെയ്ത പോലെ ഒരു വികസനവും കൊണ്ട് വരാന്‍ തരൂരിന് കഴിഞ്ഞില്ല.
തിരുവനന്തപുരത്തിന്റെ എം.പി ആയിരുന്നിട്ടും ഈ ജില്ലയെക്കാള്‍ എറണാകുളം ജില്ലയെ ആണ് തരൂര്‍ സ്നേഹിയ്ക്കുന്നത് എന്ന് തോന്നല്‍ ഉണ്ടാക്കുന്നതായിരുന്നു കൊച്ചി ഐ.പി.എല്‍ ടീമുമായി ബന്ധപ്പെട്ട അദ്ദേഹത്തിന്റെ ഇടപെടലും ആവേശവും. കുറെ വിയര്‍പ്പ് ഓഹരികളുടെ പങ്കും, ഒരു പുതിയ ഭാര്യയേയും തരൂരിന് ആ ഇടപെടല്‍ നേടി കൊടുത്തെങ്കിലും, രണ്ട് വര്‍ഷത്തിനകം കൊച്ചി ടീം തന്നെ ഇല്ലാതായതോടെ, അത് കേരളത്തെ സംബന്ധിച്ച് അര്‍ത്ഥശൂന്യം ആയ ഒരു അഭ്യാസമായി മാറി.
നല്ലൊരു സമയം വിദേശത്തും, ഡല്‍ഹിയിലും ചെലവഴിയ്ക്കുകയും, ഇതിനിടയില്‍ വ്യക്തിപരമായ വിവാഹമോചന – പുനര്‍വിവാഹ - കുടുംബപ്രശ്നങ്ങള്‍ക്കും ഇടയിലും പെട്ടതിനാല്‍ തിരുവനന്തപുരം മണ്ഡലത്തില്‍ തന്നെ കുറച്ചേ സമയം ചിലവഴിയ്ക്കാന്‍ തരൂരിന് കഴിഞ്ഞുള്ളു. സ്വന്തം എം.പിയെ ടി.വിയിലൂടെ കണ്ട് ഓര്‍മ്മ പുതുക്കാനായിരുന്നു വോട്ടു ചെയ്ത തിരുവനന്തപുരത്തെ പ്രജകളുടെ വിധി!
ഒരു മന്ത്രി എന്ന നിലയിലോ, ഒരു ജനപ്രതിനിധി എന്ന നിലയിലോ, ഒരു ഭര്‍ത്താവ് എന്ന നിലയിലോ ഒരിയ്ക്കലും സ്വന്തം കടമകളോട് നീതി പുലര്‍ത്താന്‍ കഴിയാതെ പോയ വ്യക്തി ആണ് ശശി തരൂര്‍ എന്ന് കഴിഞ്ഞ അഞ്ചു വര്‍ഷങ്ങള്‍ തിരുവനന്തപുരത്തിന് കാട്ടി തന്നു. എങ്കിലും രാഹുല്‍ ഗാന്ധിയുടെ വ്യക്തിപരമായ അനുഗ്രഹവര്‍ഷം ഉള്ള കാലത്തോളം, ഇലക്ഷനില്‍ തോറ്റാലും തന്റെ രാഷ്ട്രീയ ജീവിതത്തിന് ആയുസ്സ് ഉണ്ട് എന്ന് തരൂരിന് അറിയാം.
വീണ്ടും പുതിയ വാഗ്ദാനങ്ങളുമായി ശശി തരൂര്‍ മുന്നില്‍ എത്തുമ്പോള്‍, തിരുവനന്തപുരത്തെ വോട്ടര്‍മാര്‍, പാഴായി പോയ പഴയ വാഗ്ദാനമെല്ലാം ഓര്‍ക്കുമോ എന്ന് കാലം തെളിയിയ്ക്കും.