2010, നവംബർ 22, തിങ്കളാഴ്‌ച

അര്‍ദ്ധരാത്രിയിലും കൊച്ചുവെളുപ്പാന്കാലത്തും കുളിരണിയുമ്പോല്…

അങ്ങ് ദൂരെ ദൂരെ ടോയാക്കോയിലാണ് കഥ നടക്കുന്നത്.

വീര സാഹസിക കഥയൊന്നുമല്ല.

കുമ്പിട്ടും, ഓച്ചാനിച്ചും നിന്ന് നിര്‍വൃതിയടയുന്ന ഒരാളുടെയും,അതുകണ്ട് പുച്ഛത്തോടെ ചിരിക്കുന്ന മറ്റൊരാളുടെയും അറുബോറന്‍ കഥ.

കൊച്ചു വെളുപ്പാന്‍ കാലത്ത് 200 കിലോമീറ്റര്‍ കാര്‍ യാത്ര ചെയ്തെത്തിയാണ് കുമ്പിട്ടു നിന്നത്.,എല്ലാം മൂളിക്കേട്ടത്., തല കുലുക്കി സമ്മതിച്ചത്.
സ്വന്തം രാജ്യത്തെ ലോകത്തിന്റെ ശത്രുവായ ഒരാളുടെ കാല്‍ക്കല്‍ വെച്ച് ആ പാദങ്ങളില്‍ നോക്കി കൊതിയോടെയും അഭിമാനത്തോടെയും നിന്നത്.
കൊച്ചു വെളുപ്പാന്‍ കാലത്തു മന്‍മോഹന്റെ തലയിലോ ചെവിയിലോ തണുപ്പടിച്ച് കേറുകയൊന്നുമില്ല. തലയിലെ കെട്ട് കാതുകള്‍ കൂടി പൊതിയുന്നതായിരുന്നല്ലോ.
നെയ്യപ്പം തിന്നാല്‍ രണ്ടുണ്ട് ഗുണം എന്ന് പറഞ്ഞത് പോലെ തലയില്‍ കെട്ടുണ്ടായാല്‍ ഇങ്ങനെയും ഗുണമുണ്ട്.

ആ ഇരുപ്പൊന്നു കണ്ടാല്‍ ഏതു കൊണ്ഗ്രെസ്സുകാരനാണ് രോമാഞ്ചമുണ്ടാകാതിരിക്കുക? ആസനം കസേരയില്‍ ശരിക്കൊന്ന്‍ ഉറപ്പിച്ചത് പോലുമില്ല ഇരിക്കുന്നത് തോന്നിക്കുന്നതു പോലെ ബുഷിന്റെ മുന്പില്‍ ഇരുന്നു. എന്നാല്‍ ഇരുന്നതാണെന്ന് ബുഷിന്‌ പോയിട്ട് ബുഷിന്റെ വീട്ടിലെ നായകുട്ടിക്ക് പോലും തോന്നുകയുമില്ല.

ഈ ഇരുപ്പു കണ്ട് സോണിയഗാന്ധി മുതല്‍ കല്ലറ സരസമ്മ വരെ ആവേശത്താല്‍ പൊറുതിമുട്ടി. എ.കെ.ആന്റണി മുതല്‍ പി.ടി.തോമസ്‌ വരെ, വീരപ്പ മോയ് ലി മുതല്‍ ബൂത്ത്‌ പ്രസിഡന്റ്‌ കഠാര കുട്ടപ്പന്‍ വരെ, കെ.കരുണാകരന്‍ മുതല്‍ കരുണാലയം കരുണന്‍ വരെ, രമേശ്‌ ചെന്നിത്തല മുതല്‍ സുരേഷ് താഴേത്തല വരെ രോമഹര്‍ഷ പുളകിതരായി. തലയുയര്‍ത്തി പിടിച്ച് നടന്ന പ്രധാനമന്ത്രിയുണ്ടായിരുന്ന കാലമൊക്കെ എന്തൊരു ബോറാണെന്ന് ഇപ്പോള്‍ മുന്‍കാല പ്രാബല്യമുള്ള വേദനയോടെ അവര്‍ തിരിച്ചറിഞ്ഞു.

നെഹ്‌റു തൊപ്പിയുടെ കാലമൊക്കെ കൊഴിഞ്ഞു പോകാനുള്ളതാണ്.
മന്‍മോഹനെ പുകഴ്ത്തി വാനോളം ഉയര്‍ത്തിയത്‌ പോലെ, ഏതെങ്കിലും അമേരിക്കന്‍ പ്രസിഡന്റ്‌ നെഹ്‌റുവിനെ പുകഴ്ത്തിയിട്ടുണ്ടോ?

ഇനി പറയൂ;
നെഹ്‌റുവാണോ മിടുക്കന്‍, മന്മോഹനാണോ മിടുക്കന്‍?

ഉത്തരം പിടികിട്ടുന്നില്ലെങ്കില്‍ എം.ഐ.ഷാനവാസ് എന്ന അതുല്യ ബുദ്ധിശാലിയും, ജനങ്ങളുടെ സ്പന്ദനം തൊട്ടറിയാന്‍ അപാരസിദ്ധി വിശേഷമുള്ളയാളും ജനങ്ങള്‍ പലപ്രാവശ്യം അംഗീകാരം നല്കിയിട്ടുമുള്ള ചെറിയ മനുഷ്യനെ ബന്ധപ്പെടാവുന്നതാണ്.

ആണവകരാര്‍ ബുഷ്‌ വെച്ച് നീട്ടിത്തരുന്ന സ്വര്‍ണത്താലം ആണെന്ന് എല്ലാ കൊണ്ഗ്രെസ്സുകാര്‍ക്കും അറിയാവുന്നതാണ്.
ബുദ്ധിയുള്ള ആരെങ്കിലും സ്വര്‍ണത്താലം പുറംകാല്‍ കൊണ്ട് തട്ടിക്കളയുമോ?

ബുഷിന്‌ അമേരികയോടുള്ളതിനേക്കാള്‍ സ്നേഹം ഇന്ത്യയോടാനെന്ന കാര്യത്തിലും, ഉറക്കത്തില്‍ നിന്ന് വിളിച്ചുണര്‍ത്തി ചോദിച്ചാലും കൊണ്ഗ്രെസ്സുകാര്‍ക്ക് ശങ്ക ഉണ്ടാവുകയില്ല. മൂത്രശങ്ക ഉണ്ടാവുന്നത് പോലെ ഒരു ശങ്ക പോലും അമേരിക്കയുടെയും ബുഷിന്റെയും കാര്യത്തിലില്ല.

കരാര്‍ വെളിപ്പെടുത്തണം എന്നൊക്കെ ഇടതുപക്ഷക്കാര്‍ പറയും.
അവര്‍ പറഞ്ഞാല്‍ കാട്ടിക്കൊടുക്കാവുന്നതല്ല കരാര്‍.
അത് മന്ത്രിസഭയില്‍ ഉള്ളവര്‍ക്കേ കാണാനാവൂ എന്ന് ഇടതന്മാര്‍ക്ക് അറിയില്ലേ?
അമേരിക്കന്‍ സെനറ്റ് അനുകൂലമല്ലേ? പിന്നെന്തിനു ഉത്ക്കണ്o ?

എല്ലാമെല്ലാമല്ലേ, എന്റെ ചേലൊത്ത ബുഷല്ലേ എന്ന് പാടി നടന്നാല്‍ എന്തൊരു സന്തോഷമാണ്!

തമാശ പറയുന്ന കാര്യത്തില്‍ മന്‍മോഹന്‍ വിരുതനാണ്.
അത് കൊണ്ടാണ് രാജ്യം ഉറങ്ങുമ്പോള്‍, പാര്‍ലമെന്റിന്റെ കവാടങ്ങള്‍ അടഞ്ഞു കിടക്കുമ്പോള്‍ അര്‍ദ്ധ രാത്രിയില്‍ രാജ്യാന്തര ആണവോര്‍ജ്ജ ഏജന്‍സിയെ സമീപിച്ചത്.
വെളുപ്പിന് ബുഷ്‌ പറഞ്ഞയച്ചതാണ്. ഇന്ത്യയില്‍ കാലു കുത്തിയാല്‍ ഉടന്‍ കൈമാറണമെന്ന്! വന്നിറങ്ങി, അടുത്ത വെളുപ്പിന് കൈമാറി. അനുസരണയുടെ കാര്യത്തില്‍ ഒരു നല്ല കുട്ടിയാണ് താനെന്നോര്‍ത്തു ബുഷിനും, അത് തിരിച്ചറിഞ്ഞ് തനിക്കും ആനന്ദമുണ്ടായി.

അര്‍ദ്ധരാത്രിയില്‍ ആരോരും അറിയാതെ എന്തിനു കൈമാറി എന്നൊക്കെ ചിലര്‍ ചോദിക്കും. അവര്‍ക്കുള്ള ഉത്തരം മോയ് ലിയുടെ മെയ് വഴക്കത്തില്‍ നിന്ന് കിട്ടിയിട്ടുണ്ട്.
അര്‍ദ്ധരാത്രിയിലാണ് പല അത്ഭുതങ്ങളും വന്നു പിറക്കുന്നത്‌.
സ്വാതന്ത്ര്യം കിട്ടിയത് എപ്പോഴാണ്?
അര്‍ദ്ധരാത്രിയില്‍!
അപ്പോള്‍ സ്വാതന്ത്ര്യം വേണ്ടെന്നു വയ്ക്കേണ്ടത് എപ്പോള്‍?
അര്‍ദ്ധരാത്രി പോലെ നല്ലൊരു സമയം മറ്റേതുണ്ട്!

കരാര്‍ ഒക്കെ നന്നായി പഠിച്ചു കഴിഞ്ഞു.
പഠിക്കുന്ന കാര്യത്തില്‍ ഒരു വിട്ടുവീഴ്ചയും കൊണ്ഗ്രെസ്സുകാര്‍ ചെയ്യില്ല.

പാഠപുസ്തകത്തിന്റെ കാര്യം തന്നെ നോക്കിക്കോളൂ.
അടിച്ചു, തകര്‍ത്തു, എറിഞ്ഞു, ഉടച്ചു, പട്ടിണി കിടന്നു.
പിന്നീടാണ് പഠിക്കണമെന്ന് തോന്നിയത്.
അത് കൊണ്ട് അദ്വാനിയുടെയും,ജോഷിയുടെയും, താക്കറെയുടെയും കല്‍പ്പന പ്രകാരം ചരിത്രത്തെയും, പാഠപുസ്തകങ്ങളെയും താറുമാറാക്കിയ നാരായണന്‍ ഡോക്റ്ററുടെ നേതൃത്വത്തില്‍ കമ്മിറ്റി നിയോഗിച്ചത്.

അവര്‍ പഠിക്കും. കൊണ്ഗ്രെസ്സുകാര്‍ ഉറങ്ങും.

അര്‍ദ്ധരാത്രിയില്‍ ബുഷിന്റെ ചാക്കില്‍ കയറുന്നതിനൊപ്പം, കുറ്റാകൂരിരുട്ടത്തു ചാക്കുകളുമായി നടക്കുകയാണ്.
എണ്ണം തികയ്ക്കണം.
പണത്തിനു പണം. പദവിക്ക് പദവി.
ചാക്കില്‍ ഒന്ന് കയറിയാല്‍ മതി.

22 )0-തീയതി വരെയുള്ള രാത്രികളില്‍ ഈ പ്രക്രിയ തുടര്‍ന്ന് കൊണ്ടിരിക്കും.

ചാക്കിട്ടു പിടിത്തത്തിലും കാലുവാരലിലും ഉള്ള ഒരു സൂത്രവാക്യവും കൊണ്ഗ്രെസ്സുകാരെ പഠിപ്പിച്ചു തരാന്‍ ആരും വരേണ്ട.

സൂര്യന്‍ ഉദിക്കാതിരുന്നെങ്കില്‍, രാത്രി നീണ്ടു പോയെങ്കില്‍, ചാക്കുകളില്‍ ആളുകള്‍ കയറിയെങ്കില്‍ എന്നിത്യാദി പ്രാര്‍ഥനകള്‍ ആണ് ഇപ്പോള്‍ ബുഷിനോടുള്ളത്.

ബുഷ്‌ കനിയാതിരിക്കില്ല. ..

==============

പിന്കുറിപ്പ്:-
പൊന്നിന്‍ കുടത്തിനെന്തിനാ പൊട്ട്?
കാട്ടാറിനെന്തിനാണ് പാദസരം?
കണ്മണി ക്കെന്തിനാണ് ആഭരണം?

അതുപോലെ മുസ്‌ലിം ലീഗിനെന്തിനാണ് ധാര്‍മികത?

ലോകത്തെവിടെയും ഉള്ള മുസ്ലീങ്ങളെ ബുഷ്‌ കൊന്നു തള്ളട്ടെ!

ബാബറി പൊളിക്കാന്‍ കൂട്ട് നിന്ന കൊണ്ഗ്രെസ്സുകാരന്‍ സസുഖം വാഴട്ടെ.

പക്ഷെ ലീഗുകാര്‍ അര മന്ത്രികസേരക്ക് വേണ്ടി കൈ പൊക്കും.

അതിനൊപ്പം ആണവ കരാറിനെ മലപ്പുറത്തും മഞ്ചേരിയിലും കോഴിക്കോട്ട്ങ്ങാടിയിലും നിന്ന് എതിര്‍ത്തു കൊണ്ടേയിരിക്കും.

സബാഷ്....

പഹയനെന്താ പുത്തി!

============================

ജൂലൈ 16, 2008

2010, നവംബർ 9, ചൊവ്വാഴ്ച

പെണ്‍വാണിഭമഹിമയും ചെയര്‍മാന്‍പദവിയും ഒത്തുചേരുന്ന കല

''ഹാ! പാപമോമല്‍ മലരേ, ബത! നിന്റെ മേലും
ക്ഷേപിച്ചിതേ കരുണയറ്റ കരം കൃതാന്തന്‍!
വ്യാപാരമേ ഹനനമാം വനവേടനുണ്ടോ
വ്യാപന്നമായ് കഴുകനെന്ന്, കപോതമെന്നും?''

ആശാന്റെ വീണപൂവിലെ ഈ വരികള്‍ പെണ്‍വാണിഭങ്ങള്‍ തിമിര്‍ത്താടിയ, വാണിഭക്കാരുടെ ഉത്സവകാലത്ത് ഇരകളെ നോക്കിയും ആലോചിച്ചും ആരെല്ലാം ഉരുവിട്ടു. മലരിനെയോര്‍ത്ത് ആശാന്‍ പാടി. ഞെരിഞ്ഞമര്‍ന്ന 'മലരുകളെ' നോക്കി മനുഷ്യസ്‌നേഹികള്‍ ആവര്‍ത്തിച്ചുച്ചരിച്ചു.

അഹിംസയില്‍ അധിഷ്ഠിതമായി പ്രവര്‍ത്തിക്കുന്നുവെന്ന് നാഴികയ്ക്ക് നാല്‍പതുവട്ടം ഉരുവിടുന്ന രാഷ്ട്രീയ കക്ഷിയാണ് വൈദേശികനായ എ.ഒ.ഹ്യൂം സ്ഥാപിച്ച, വിദേശത്ത് ജനിച്ച് ഇന്ത്യക്കാരിയായി മാറിയ സോണിയാഗാന്ധി നയിക്കുന്ന ഇന്ത്യന്‍ നാഷണല്‍ കോണ്‍ഗ്രസ്.

പക്ഷേ മുനിസിപ്പല്‍ ചെയര്‍മാന്‍ പദവിയിലേയ്ക്ക് പരിഗണിക്കുമ്പോള്‍ പെണ്‍വാണിഭ വീരന്‍ പട്ടികയിലുണ്ടെങ്കില്‍ അദ്ദേഹത്തിന് മുന്തിയ പരിഗണന നല്‍കി അംഗീകരിക്കുമെന്നത് കോണ്‍ഗ്രസിന്റെ ഭരണഘടനയിലെ അലിഖിത വകുപ്പാണ്.
ഭരണഘടനയെ ധിക്കരിക്കുവാന്‍ കോണ്‍ഗ്രസായ കോണ്‍ഗ്രസുകാരൊന്നും തുനിയാറില്ല. നാലണ മെമ്പര്‍ഷിപ്പ് എടുക്കുന്ന കാലം മുതല്‍ അച്ചടക്കം എല്ലാ കോണ്‍ഗ്രസുകാര്‍ക്കും ഒപ്പം കൂടും.

അതുകൊണ്ട് മാത്രമാണ് ഭരണഘടനാ തത്വങ്ങള്‍ ഉയര്‍ത്തിപിടിച്ചുകൊണ്ട്, വിതുര പെണ്‍വാണിഭ കേസില്‍ വിചാരണ നേരിടുന്ന എം ഡി ജേക്കബിനെ ആലുവ മുനിസിപ്പല്‍ ചെയര്‍മാനായി ഐകകണ്‌ഠ്യേന നിശ്ചയിച്ചത്.

പക്ഷേ മഹിളാ കോണ്‍ഗ്രസുകാര്‍ക്ക് കോണ്‍ഗ്രസ് പാര്‍ട്ടിയുടെ നടപടിക്രമങ്ങള്‍ വേണ്ടത്ര പിടികിട്ടിയിട്ടില്ല. അതുകൊണ്ട് മാത്രം മഹിളാ കോണ്‍ഗ്രസിന്റെ സംസ്ഥാന ജനറല്‍ സെക്രട്ടറിയും കുറച്ച് അനുയായികളും പ്രതിഷേധവുമായി രംഗത്തുവന്നു.

പെണ്‍വാണിഭ കേസിലെ പ്രതിയെ മുനിസിപ്പല്‍ ചെയര്‍മാനാക്കുന്നത് കോണ്‍ഗ്രസിന് മോശമാണെന്ന് മഹിളാ ജനറല്‍ സെക്രട്ടറിപോലും പറയുന്നില്ല. മഹതി പറഞ്ഞത് ജനങ്ങള്‍ക്ക് നേരേയുള്ള വെല്ലുവിളിയാണെന്നാണ്.

കോണ്‍ഗ്രസിന് ഇത് അഭിമാനിക്കാവുന്ന ഭൂഷണമാണെന്ന് കോണ്‍ഗ്രസുകാരാകെ പറയുമെന്നതുകൊണ്ടാണോ ആവോ, ജനങ്ങള്‍ക്കു നേരെയുള്ള വെല്ലുവിളിയാണെന്ന് ഉച്ചൈസ്തരം പ്രഖ്യാപിച്ചത്.
ആര്‍ക്കറിയാം.

പെണ്‍വാണിഭത്തില്‍ പ്രതികളായിപെട്ടുപോയവരുടെ പിന്നിലാണ് അണികളും അനുയായികളും ഭൂരിപക്ഷം എന്നുള്ളതുകൊണ്ട് മഹിളാ ജനറല്‍ സെക്രട്ടറിയെക്കുറിച്ച് അവര്‍ കാതോടുകാതോരം മന്ത്രിക്കുവാന്‍ തുടങ്ങി.

പാര്‍ലമെന്റ് മുതല്‍ പഞ്ചായത്തുവരെ തിരഞ്ഞെടുപ്പ് വരുമ്പോള്‍ ആകാശംമുട്ടെയുള്ള മോഹങ്ങളുമായി അവതരിക്കുന്ന സ്ഥാനദാഹിയുടെ കൊതിക്കെറുവ് മാത്രമാണത്രെ അവരുടെ പ്രതികരണം.

പക്ഷേ ഇത്തരം ദുഷ്പ്രചരണങ്ങളൊന്നും മഹിളാ ജനറല്‍ സെക്രട്ടറിയെ തരിമ്പും തളര്‍ത്തുന്നില്ല. പെണ്‍വാണിഭ പ്രതിയെ ചെയര്‍മാനാക്കുന്നതിനെതിരെ നേതൃത്വത്തെ സമീപിക്കുമെന്നാണ് മഹതിയുടെ ഭീഷണി.

അതുകേട്ട് എറണാകുളത്തെ കോണ്‍ഗ്രസുകാര്‍ മാത്രമല്ല കേരളത്തിലെ കോണ്‍ഗ്രസുകാരാകെ ചിരിച്ചു ചിരിച്ചു തളരുകയാണ്.

രാത്രിയിലെ ഇരുട്ടില്‍, മറ്റൊരു വ്യക്തിയുടെ, മഞ്ചേരിയുടെ വസതിയില്‍വെച്ച് നാട്ടുകാര്‍ വളഞ്ഞുപിടികൂടുകയും പൊലീസ് സ്റ്റേഷനിലാവുകയും കോടതിയില്‍ കയറുകയും ചെയ്ത എ ഐ സി സി അംഗം രാജ്‌മോഹന്‍ ഉണ്ണിത്താനെ മാലോകരാകെ ടെലിവിഷനിലൂടെ കണ്ടിരുന്നു.
മാനം രക്ഷിക്കാന്‍ ഉണ്ണിത്താനെ കെ പി സി സി സസ്‌പെന്‍ഡ് ചെയ്തു. അന്വേഷണ സമിതിയെ നിയോഗിച്ചു.

കൊല്ലത്തു നിന്ന് ബംഗലൂരുവിലേയ്ക്കു പോകാന്‍ പുതിയ എളുപ്പവഴി കണ്ടെത്തി, മഞ്ചേരിയിലെത്തിയ ഉണ്ണിത്താനാണ് വലയിലായത്. പക്ഷേ ഉണ്ണിത്താന്‍ ചാനല്‍മുറികളില്‍ ചര്‍ച്ചയില്‍ പങ്കെടുത്ത് പലതും തുറന്നുപറയാനുണ്ടെന്നു പറഞ്ഞു. വേണ്ടിവന്നാല്‍ എല്ലാമെല്ലാം പറയുമെന്ന് ഭീഷണിപ്പെടുത്തി.

ഉണ്ണിത്താന്റെ സസ്‌പെന്‍ഷന്‍ പോയ വഴിയേതെന്ന് ആരുമാരും അറിഞ്ഞില്ല. വന്നപോലെ പോയത് പോയതുപോലെ വന്നു.
ഉണ്ണിത്താന്‍ കെ പി സി സിയിലും എ ഐ സി സിയിലും അംഗംതന്നെ.

ആ നേതൃത്വത്തോടാണ് മഹിളാ കോണ്‍ഗ്രസ് ജനറല്‍ സെക്രട്ടറി പരാതി പറയാന്‍ വെമ്പിനില്‍ക്കുന്നത്.
കോമഡി ആദ്യവസാനം നിറഞ്ഞുനില്‍ക്കുന്ന നാടകം കണ്ട് മലയാളി പ്രേക്ഷകര്‍ ആനന്ദിക്കുന്നു.

സൂര്യനെല്ലി കേസില്‍പെടുകയും ഇരയായ പെണ്‍കുട്ടി തിരിച്ചറിയുകയും ചെയ്ത 'ഗാന്ധിയനെ' വീണ്ടും എം പിയാക്കാമെങ്കില്‍, ആലുവാ പോലെ അലുവാ വലുപ്പമുള്ള മുനിസിപ്പാലിറ്റിയുടെ ചെയര്‍മാന്‍ പദത്തില്‍ വിതുര വാണിഭത്തില്‍ വിചാരണ നേരിടുന്ന ആള്‍ക്ക് ആസനമുറപ്പിച്ചുകൂടേ എന്ന ജേക്കബ് അനുയായികളുടെ ചോദ്യം ന്യായമല്ലേ എന്ന് കോണ്‍ഗ്രസുകാര്‍ ആരായുന്നു.

ചോദ്യം ചോദിക്കുന്നത് കോണ്‍ഗ്രസുകാര്‍, ചോദ്യ മുനയൊടിക്കുന്നത് കോണ്‍ഗ്രസുകാര്‍.
ഉത്തരം പറയാനും കോണ്‍ഗ്രസുകാര്‍ക്കേ കഴിയൂ.

പക്ഷേ ഉത്തരം കിട്ടാതെ അലയുകയാണ് സാധുക്കളായ ചില മഹിളാ കോണ്‍ഗ്രസുകാര്‍.

അവരുടെ കണ്ണുനീരിനും ഗദ്ഗദത്തിനും ശമനമുണ്ടാക്കാന്‍ ഉമ്മന്‍ചാണ്ടിയ്ക്കും രമേശ്‌ചെന്നിത്തലയ്ക്കും കനിവുണ്ടാകണമെന്ന് അനന്തതയിലേയ്ക്ക് നോക്കി നിലവിളിക്കാം.

പിള്ളയ്ക്കു വേണ്ടിയോരു താതനും ഭള്ളു പറഞ്ഞു നടക്കുന്ന മറ്റൊരു പിള്ളയും

പുത്രന്മാരായി പിറക്കുന്നത്‌ മുജ്ജന്മ ശത്രുക്കളാണെന്ന പ്രചാരണത്തിന് നിന്ന് കൊടുക്കാന്‍ ഒരു പിതാവും സന്നദ്ധമാവുകയില്ല.
അച്ഛന്റെ മുഖത്ത് നോക്കി പുലഭ്യം പറഞ്ഞാലും അപഹസിച്ചാലും ഒരു താതനും മകനെ എന്നെന്നേയ്ക്കുമായി തള്ളികളയാന്‍ ആവില്ല. മാനികളായ താതന്മാര്‍, ശത്രുതാഭാവവുമായി നില്‍ക്കുന്ന മക്കള്‍ ആണെങ്കിലും, അവര്‍ക്ക് ആപത്ഘട്ടം വന്നാല്‍ സഹായഹസ്തവുമായി ഓടിച്ചെല്ലും.

പുത്രവാത്സല്യത്തിന്റെ കാര്യത്തില്‍ പെരുമ കേട്ട കെ.കരുണാകരന് പുന്നാരമോന്‍ മുരളീധരന്‍ കരയിലുമല്ല വെള്ളത്തിലുമല്ല എന്ന മട്ടില്‍ കൈകാലിട്ടടിക്കുമ്പോള്‍, ഞാനൊന്നുമറിഞ്ഞില്ലേ രാമനാരായണാ എന്നാ മട്ടില്‍ ഇരിക്കുവാനോ നില്‍ക്കുവാനോ സാധ്യമല്ല എന്ന് ആര്‍ക്കാണ് അറിയാത്തത്.

എന്തൊന്തൊക്കെ മുരളി പറഞ്ഞില്ല. രണ്ടുംകെട്ട പണി കാണിക്കുന്നവര്‍ എന്ന് വരെ വിശേഷിപ്പിച്ചിട്ടുണ്ട്. ഏറ്റവും ഒടുവില്‍ സോണിയാഗാന്ധിയെ മദാമ്മ എന്ന് വിളിച്ചവര്‍ ഇപ്പോള്‍ തന്റെയോപ്പമില്ലെന്നു പറഞ്ഞ് വയ്യായ്കയുടെ കാലത്തും കുത്തിനോവിച്ചു. വീട്ടില്‍ കയറാതെ നടന്നു. അങ്ങോട്ട്‌ ചെന്നാല്‍ വാതിലടച്ച്‌ മുറിക്കകത്തിരുന്നു വേദനിപ്പിച്ചു.

എങ്കിലും മകന്‍ മകന്‍ തന്നെയാണ്.
അച്ഛന് അച്ഛന്റെതായ ചില കര്‍മ്മങ്ങള്‍ ഉണ്ട്.
ആ കര്‍മ്മ നിര്‍വഹണം ആണ് പത്രസമ്മേളനത്തില്‍ കൂടെ ഒളിയും മറയുമില്ലാതെ കണ്ണടച്ച് കാട്ടി ചില കാര്യങ്ങള്‍ പറഞ്ഞതിലൂടെ അരങ്ങേറിയത്.

മുരളീധരനെയും, കൂട്ടരെയും മുന്നണിയില്‍ എടുക്കണം. ഇപ്പോഴത്തെ പ്രതിപക്ഷം അങ്ങേയറ്റം ദുര്‍ബലമാണ്. പ്രതിപക്ഷത്തിന്റെ പണി എന്താണെന്ന് ഇപ്പോഴത്തെ നേതാക്കള്‍ക്കറിയില്ല. തന്റെ സ്വന്തം മകന്‍ ജനകൂട്ടത്തെ ആകര്‍ഷിക്കുവാന്‍ കഴിവും,കരുത്തും, സൌന്ദര്യവും ഉള്ള ജനപ്രിയനാണ്. സ്വന്തം മകനായത്‌ കൊണ്ട് വെറുതെ പറയുന്നതൊന്നുമല്ല. ഇപ്പോള്‍ തന്നെ മുരളി ചെന്ന് ചേര്‍ന്നതിനു ശേഷം എന്‍.സി.പി യ്ക്ക് പിന്നില്‍ അണിനിരന്നിരിക്കുന്ന ദശലക്ഷക്കണക്കിന്‌ ജനങ്ങളുടെ കൂട്ടത്തെ നോക്കിയാല്‍ പോരെ കാര്യം പിടികിട്ടാന്‍. മുരളിയുടെ ആഗമനത്തിനു ശേഷം,പിന്നാലെ ജനസാഗരം തിരയടിച്ചുയര്‍ന്നു കൊണ്ടിരിക്കുകയാണെന്ന് കണ്ണുള്ളവര്‍ക്കറിയാം.

സത്യം പറഞ്ഞ് പോയാല്‍ ഹാല്‍ഇളകുന്നവര്‍ ആണ് പണ്ടേയ്ക്ക് പണ്ടേ കൊണ്ഗ്രെസ്സിലുള്ളത്.

അമ്മായി ആനപ്പുറത്തിരുന്നുവെന്ന് പറഞ്ഞ് മരുമകള്‍ക്ക് തഴമ്ബ്‌ ഉണ്ടാവുകയില്ലെന്ന എല്ലാവര്ക്കും അറിയുന്ന സത്യം സോണിയാ ഗാന്ധിയെയും നാട്ടാരെയും ഓര്‍മ്മിപ്പിച്ചതിന് എന്തൊരു പുകിലായിരുന്നു ഇവിടെ.
രക്ഷ കിട്ടാന്‍ സോണിയാഗാന്ധിയില്ലായിരുന്നുവെങ്കില്‍ കൊണ്ഗ്രെസ്സിനെയും, ഇന്ത്യയെയും കടലെടുക്കുമായിരുന്നുവെന്നു പറയേണ്ടിയും,മുട്ടില്‍ ഇഴഞ്ഞു മാപ്പിരന്നു സമസ്താപരാധങ്ങളും പൊറുക്കണമേയെന്നു കേഴേണ്ടിയും വന്നു.

ഇപ്പോഴിതാ പ്രതിപക്ഷത്തിന് അവരുടെ പണി അറിയില്ലെന്നും, മകന്‍ മിടുമിടുക്കന്‍ ആണെന്നുമുള്ള സത്യം പറഞ്ഞപ്പോള്‍ പൊട്ടിപ്പുറപ്പെട്ടിരിക്കുന്നു കോലാഹലം.
വെറുതെയല്ല കൊണ്ഗ്രെസ്സ് നന്നാവാത്തത്.
എല്ലാ ദിവസവും നിയമസഭയില്‍ ഓരോരോ കാര്യം പറഞ്ഞ് ഇറങ്ങിപ്പോവല്‍ അല്ല പ്രതിപക്ഷത്തിന്റെ ജോലി എന്ന് ഓര്‍മ്മിപ്പിക്കുന്നത് തെറ്റാണോ?
ഉമ്മന്‍ ചാണ്ടി തന്റെ പാര്‍ട്ടിയില്‍ പെട്ട ആള്‍ അല്ലായിരുന്നുവെങ്കില്‍, പ്രതിപക്ഷ നേതാവിനെ കുറിച്ച് പറയേണ്ട വിധത്തില്‍ താന്‍ പറയുമായിരുന്നു എന്ന് പറഞ്ഞത് പാതകമെന്നോ?

ദിവസവും രണ്ടു വട്ടമെങ്കിലും ഇറങ്ങിപ്പോവുകയും നടുത്തളത്തിലിറങ്ങി മുദ്രാവാക്യം വിളിക്കുകയും ചെയ്താലേ ഉശിരുള്ള പ്രതിപക്ഷം ആവൂ എന്ന് അന്വേഷണ ഗവേഷണങ്ങള്‍ക്ക്‌ ശേഷം കണ്ടെത്തിയ ഉമ്മന്‍ചാണ്ടിക്കും കൂട്ടര്‍ക്കും ക്ഷമ കെടുന്നത്‌ മനസ്സിലാക്കുവാന്‍ കഴിയുന്നുണ്ട്.

ഇറങ്ങിപ്പോക്ക് ഒരു നിത്യ വിനോദവും നൂതന കലാപരിപാടിയുമായി ഉത്തരോത്തരം വളര്‍ത്താന്‍ തന്നെയാണ് അവരുടെ തീരുമാനം. ആരോഗ്യട്രിഡഗാത്രരായ തങ്ങളെ "ദുര്‍ബലം" എന്ന് പറഞ്ഞതാണ് അവരെ ഈരേ ചൊടിപ്പിച്ചത്. ഈ തടിയും പേശിബലവും പോരെങ്കില്‍ എം.എല്‍.എ മാര്‍ക്കായി പ്രത്യേകം സജ്ജമാക്കിയിരിക്കുന്ന ജിംനേഷ്യത്തില്‍ നിത്യേന ചെന്ന് പേശികളുടെ ശക്തി വര്‍ദ്ധിക്കുവാനും ഒരുക്കമാണ്.
അത് മനസ്സിലാക്കാതെ കരുണാകരന്‍ പത്ര സമ്മേളനം വിളിച്ചു തോന്നിയത് പറയുന്നതെന്തിനാണ്‌?

ഇനി മകനെ കൂടെ മുന്നണിയില്‍ എടുത്താലേ ദൌര്‍ബല്യം മാറുകയുള്ളൂ എന്നാണെങ്കില്‍ ആ വെള്ളം ഈ അടുപ്പില്‍ ചുടാവുകയില്ലെന്നു കാരണവര്‍ അറിഞ്ഞിരിക്കേണ്ടതാണ്. ഇപ്പോള്‍ പാര്‍ട്ടിക്കും,മുന്നണിക്കും അകത്തുള്ളവരെ കൊണ്ട് തന്നെ തോറ്റിരിക്കുകയാണ്.
കുറച്ചു പേരെ കൂടി പുറത്തിരുത്തിയാലെ തങ്ങളുടെ വഴി എളുപ്പം ആവുകയുള്ളൂവെന്ന് കരുതിയിരിക്കുമ്പോള്‍ വേലിയില്‍ ഇരുന്ന പാമ്പിനെയെടുത്ത് വേണ്ടാത്തിടത്തു വയ്ക്കാന്‍ ബുദ്ധിയുള്ള ആരെങ്കിലും മുതിരുമോ?
പിന്നെ വീട്ടുകാരെയാകെ അവഹേളിച്ചും,നിന്ദിച്ചും വീട്ടില്‍ നിന്നിറങ്ങിപ്പോകുമ്പോള്‍ ആലോചിക്കണമായിരുന്നു.,വീട്ടിലുണ്ടെങ്കില്‍ വിരുന്നു ചോറും കിട്ടുമെന്ന കാര്യം!

ഇപ്പോള്‍ കൂട്ടത്തിലാരുമില്ലാതെ അലയുമ്പോള്‍ പഴയ വീട്ടില്‍ നിന്ന് വിരുന്നു ചോറ് തരണമെന്ന് പറയുന്നത് നാണം കേട്ട പരിപാടിയാണ്. "കൊറ്റിനില്ലാത്തവന്‍ കോപ്പു മോഹിക്കുമോ?
വറ്റിനില്ലാത്തവന്‍ പാല്‍ കുടിച്ചീടുമോ?"
എന്ന് ചോദിച്ചത് മുരളീധരനോക്കെ അറിഞ്ഞിരിക്കാന്‍ വേണ്ടിയാണ്.

കരുണാകരന്‍ പറഞ്ഞത് കൊണ്ട് കാര്യങ്ങള്‍ തീര്‍ന്നെങ്കില്‍ ക്ഷമിക്കാമായിരുന്നു.
കാണുമ്പോള്‍ പുഞ്ചിരിക്കുകയും,ഹസ്തദാനം നടത്തുകയും,ആലിംഗനം ചെയ്യുകയും,ചെയ്യുന്ന ചില കൂട്ടരും തരംഒത്തു വന്നപ്പോള്‍ പിന്നില്‍ നിന്ന് കുത്തുകയാണ്.

നിയമസഭയില്‍ എത്താന്‍ കഴിയാതെ പുറത്തു അലഞ്ഞു തിരിയുന്ന കുഞ്ഞാലിക്കുട്ടിയാണ് ,കരുണാകരന്‍ പറഞ്ഞത് സത്യം, പരമസത്യം, പ്രതിപക്ഷം ദുര്‍ബലം തന്നെ എന്ന് അലമുറയിട്ടു വിളിച്ചത്.
ജനങ്ങള്‍ തോല്‍പ്പിച്ചതിനു മറ്റുള്ളവര്‍ എന്ത് പിഴച്ചു?
പെണ്ണ് കേസില്‍ പെട്ട് തലയില്‍ കരിന്തുണി വീണപ്പോള്‍ സഹായിക്കാനും, കുഞ്ഞാലിക്കുട്ടി ചെയ്തത് ശരികളില്‍ വലിയ ശരി യാണെന്നും പറയാന്‍ ഈ ദുര്‍ബലരെ ഉണ്ടായിരുന്നുള്ളൂ എന്ന് ഓര്‍ക്കേണ്ടതായിരുന്നു.

അതിനു "നന്ദി" എന്നുള്ളത് അജണ്ടയില്‍ ഇല്ലാത്തവരോടു പറഞ്ഞിട്ടെന്തു കാര്യം?

മുരളി കൂടി വന്നാല്‍ അതിയായ ആനന്ദം വിളയാടുമെന്നു പറഞ്ഞു പാര പണിയാന്‍ കെ.എം.മാണി തിരുവനന്തപുരത്ത് വന്നു പത്രസമ്മേളനം വിളിച്ചു കളഞ്ഞു.
മതികെട്ടാനിലും,വാഗമണ്ണിലുമൊക്കെ അരുതായ്കകള്‍ ചെയ്തപ്പോള്‍ ഒപ്പം നിന്നതിനു ഇങ്ങനെയാണോ പ്രത്യുപകാരം ചെയ്യേണ്ടത്?


വാതിലടഞ്ഞു,ആരുടെ മുന്നിലും അത് തുറന്നു കൊടുക്കുകയില്ലായെന്നൊക്കെ പറഞ്ഞ്, നിത്യേന മുരളീധരനെ നോക്കി കൊഞ്ഞനം കുത്തുന്നത് കണ്ടു നില്‍ക്കാനൊന്നും മുരളിയെ കിട്ടില്ല.
ഒരു സുന്ദര കുട്ടപ്പന്റെയും സഹായം തനിക്കും,എന്‍.സി.പി ക്കും വേണ്ടെന്ന് വച്ച് കാച്ചിയിട്ടുണ്ട്. ഒന്നരകിലോ പൌഡര്‍ ദിവസവും മുഖത്തണിയുന്ന ചെന്നിത്തലയെ, സുന്ദര കുട്ടപ്പന്‍ എന്ന് അംഗീകരിച്ചതില്‍ കൊണ്ഗ്രെസ്സുകാര്‍ക്കും പെരുത്ത സന്തോഷം.

ഐക്യം വിളയാടി നില്‍ക്കുകയാണ് ഐക്യജനാധിപത്യ മുന്നണിയിലെന്ന് മാനവരാശിയെയാകെ അറിയിക്കുകയാണ് ലക്‌ഷ്യം.

മുന്നണിയില്‍ തന്നെയുള്ള ഒരു മഹാന്‍ നാടായ നാടൊക്കെ നടന്നു ഭള്ളു പറഞ്ഞും,ജാതി പറഞ്ഞും രസിക്കുകയാണ്.

കേരളം ഭ്രാന്താലയമാണ്‌ എന്ന് വിവേകാനന്ദന്‍ പറഞ്ഞത് ജാതിഭ്രാന്ത് മൂത്തവരെ കണ്ടു തളര്ന്നപ്പോഴാണ്.
ഇപ്പോഴും അത്തരം ഭ്രാന്തന്മാര്‍ കേരളത്തില്‍ ജീവിച്ചിരിപ്പുണ്ടെന്ന് സ്ഥാപിക്കാന്‍ ബാലകൃഷ്ണ പിള്ള കൂടെയുള്ളത് കൊണ്ട് ഐക്യ ജനാധിപത്യ മുന്നണിക്ക്‌ കഴിയുന്നു എന്ന അഭിമാനം മാത്രമാണ് ബാക്കി.

"ഈറ്റപ്പുലികളും സിംഹഗജങ്ങളും ചേറ്റില്‍ കിടക്കുന്ന പന്നിത്തടിയനും"
എന്നൊക്കെ കവി പാടിയിട്ടുണ്ട്.
ഈറ്റപ്പുലികളും സിംഹ,ഗജങ്ങളും ഇപ്പോള്‍ കൂട്ടത്തിലില്ല.
പക്ഷെ ചേറ്റില്‍ കിടക്കുന്ന പന്നിത്തടിയന്മാര്‍ ഉണ്ടെന്നത് ആശ്വാസകരം തന്നെ.

വാ തുറന്നാല്‍ നല്ലത് പറയില്ലെന്ന ദ്രിഡനിശ്ചയം ഇങ്ങനെ കൂടെക്കൊണ്ടു നടക്കാന്‍ കഴിയുന്നത്‌ ചെറിയ കാര്യമല്ല. സജ്ജനാചാരം പിടിപെടാതുള്ളോരു ദുര്‍ജ്ജ്ജനങ്ങളെ കുടെക്കൂട്ടി നടക്കുന്നത് മഹത്തായ കാര്യമാണെന്ന കാര്യത്തില്‍ ആര്‍ക്കും തര്‍ക്കം പറയാനാവുകയില്ല.

ദുര്ജ്ജനങ്ങളെയും ചെണ്ടയെയും എത്രകണ്ട് മര്‍ദിക്കുമോ അത്രകണ്ട് നന്നാവുമെന്ന് കരുതുന്ന കൂട്ടര്‍ക്ക് വായില്‍ തോന്നിയത് കോതയ്ക്ക് പാട്ടെന്ന മട്ടില്‍ പറഞ്ഞ് നടക്കുന്ന പിള്ളയെയും നന്നാക്കിയെടുക്കണമെന്നു തോന്നിപ്പോയാല്‍ കാര്യം കുഴയുമെന്നുള്ളത് മാത്രമാണ് ഏകപ്രശ്നം.
========================================================================
ജനുവരി 5, 2009

2010, നവംബർ 6, ശനിയാഴ്‌ച

മുഖ്യമന്ത്രിയാരെന്ന് തൊട്ടുകാണിക്കാം,അവരവരുടെ സ്വന്തം കൈയില്‍ തൊട്ടാണെന്നു മാത്രം!

അടുത്ത നിയമസഭാ തിരഞ്ഞെടുപ്പിനുശേഷം ആരാണ് മുഖ്യമന്ത്രിയെന്ന് ആരായാന്‍ സമയമായിട്ടില്ലെന്ന് ഏതു കുഞ്ഞുകുട്ടികള്‍ക്കും അറിയാം.

പക്ഷേ കോണ്‍ഗ്രസുകാര്‍ തിരഞ്ഞെടുപ്പിന് ആറുമാസത്തോളം ശേഷിക്കുമ്പോള്‍ തന്നെ കുപ്പായം തുന്നി, മുഖത്ത് പൗഡര്‍ പൂശി ഉത്സാഹഭരിതരായി ടി വി ക്യാമറകള്‍ക്കു മുന്നില്‍ മുഖ്യമന്ത്രി വേഷം അഭിനയിക്കുന്നതു കണ്ട് വീണ്ടുവിചാരമുളളവരാകെ ചിരിക്കുകയാണ്.
ഇങ്ങനെ കുപ്പായം തുന്നിയ എത്രയെത്ര പേരുടെ കുപ്പായങ്ങള്‍ നെടുകെ കീറിപ്പോയിട്ടുണ്ടെന്നുള്ള പഴയതും അധികം പഴയതല്ലാത്തതുമായ കഥകള്‍ മറന്നുപോയല്ലോ ഇക്കൂട്ടര്‍ എന്ന സഹതാപവും അലയടിച്ചു തുടങ്ങിയിട്ടുണ്ട്.

ഉമ്മന്‍ചാണ്ടിയാണ് അടുത്ത മുഖ്യമന്ത്രിയെന്ന് ആരു പറഞ്ഞുവെന്ന് വയലാര്‍രവി ഉമ്മന്‍ചാണ്ടിയുടെ ഉറ്റ അനുയായികളെ ചാരത്തിരുത്തി ഗര്‍ജ്ജനത്തോടെ ചോദിച്ചു.

താന്‍ അങ്ങനെ പറഞ്ഞിട്ടേയില്ലെന്ന് ഉടന്‍ രമേശ് ചെന്നിത്തലയുടെ പ്രതിവചനമുണ്ടായി. വയലാര്‍ജീ പറഞ്ഞതാണ് 'ശരിയിലും വലിയ ശരി' എന്നു കൂടി ചെന്നിത്തല പറഞ്ഞു.

ഈ കൂത്ത് കണ്ട് ആസ്വദിച്ച് അങ്ങു ഡല്‍ഹിയിലിരുന്ന് പമ്മി പമ്മി ചിരിയ്ക്കുന്നൂ എ കെ ആന്റണി.

ഉമ്മന്‍ചാണ്ടി പ്രതികരണമില്ലാതെ സ്വന്തം മുറിയ്ക്കുള്ളില്‍ യോഗാസനം അനുഷ്ഠിക്കുന്നു.

ഇപ്പോള്‍ നടന്നത് നിയമസഭയിലേയ്ക്കുള്ള തിരഞ്ഞെടുപ്പല്ലെന്ന് അറിയാത്തത് കോണ്‍ഗ്രസുകാര്‍ മാത്രമാണ്. കോര്‍പ്പറേഷന്‍ മേയര്‍മാരെയും മുനിസിപ്പല്‍ ചെയര്‍മാന്‍മാരെയും ജില്ലാ-ബ്ലോക്ക്-ഗ്രാമപഞ്ചായത്ത് പ്രസിഡന്റുമാരെയും തിരഞ്ഞെടുക്കുവാനുള്ളതായിരുന്നൂവെന്നത് മറന്നുപോയി.
മറവി രോഗത്തിനുള്ള ആയുര്‍വേദ-അലോപ്പതി ഔഷധങ്ങള്‍ക്ക് മരുന്നു വിപണിയില്‍ ക്ഷാമമില്ലെങ്കിലും അവ വാങ്ങിക്കഴിക്കുവാനുള്ള സമയം കോണ്‍ഗ്രസ് നേതാക്കള്‍ക്ക് ലഭിക്കാത്തതാണ് കാരണം എന്ന് ഒരു കൂട്ടര്‍.
ആ മരുന്നുകള്‍ വെറുതേ പ്രചരണം നടത്തുകയും ഓര്‍മ്മശക്തി വീണ്ടെടുക്കുന്നതില്‍ പരാജയവുമാണെന്ന് മറ്റൊരു കൂട്ടര്‍.

തദ്ദേശ സ്വയംഭരണ തിരഞ്ഞെടുപ്പില്‍ ചില ജില്ലകളില്‍ നാമമാത്രമായ മുന്‍കൈ ഉണ്ടായപ്പോള്‍ തന്നെ മുഖ്യമന്ത്രിയാരെന്ന ചര്‍ച്ച തുടങ്ങിയത് വരാനിരിക്കുന്ന ഉഗ്രന്‍ സംഘട്ടനങ്ങളുടെ വിസ്‌ഫോടന രംഗങ്ങളുള്‍പ്പെടുന്ന തിരക്കഥാ രചനയുടെ പ്രാരംഭ ഘട്ടമായെന്ന് മലയാളികളെ അറിയിക്കുന്നു.

തദ്ദേശ സ്വയംഭരണ സ്ഥാപനങ്ങളിലെ തിരഞ്ഞെടുപ്പില്‍ ജയിച്ചാല്‍ നിയമസഭയിലേയ്ക്ക് ജയിച്ചതാവുകയില്ല.

1990 ലെ ജില്ലാ കൗണ്‍സില്‍ തിരഞ്ഞെടുപ്പില്‍ എല്‍ ഡി എഫിന് മഹാഭൂരിപക്ഷം ലഭിച്ചു. നാലു മാസത്തിനു ശേഷം നടന്ന നിയമസഭാ തിരഞ്ഞെടുപ്പില്‍ യു ഡി എഫിനായിരുന്നൂ വിജയം.

നിയമസഭയിലേയ്ക്കും പാര്‍ലമെന്റിലേയ്ക്കും ഒരുമിച്ചു തിരഞ്ഞെടുപ്പ് നടന്നപ്പോള്‍ പാര്‍ലമെന്റിലേയ്ക്ക് ഒരു മുന്നണിയെയും നിയമസഭയിലേയ്ക്കു മറ്റൊരു മുന്നണിയെയും തിരഞ്ഞെടുത്ത ചരിത്രമുണ്ട്.
ഇന്ത്യയാകെ അലയടിച്ച കോണ്‍ഗ്രസ് വിരുദ്ധ തരംഗകാലത്തും കോണ്‍ഗ്രസ് അനുകൂല തരംഗ കാലത്തും വ്യത്യസ്തമായി ചിന്തിച്ച പാരമ്പര്യമാണ് കേരളത്തിന്റേത്.
ഈ ചരിത്ര പാഠങ്ങള്‍ ഒന്നും അറിയാത്തതുകൊണ്ടല്ല, ഓര്‍മ്മശക്തി വീണ്ടെടുക്കുവാനുള്ള ഔഷധങ്ങള്‍ ഫലിക്കാത്തതുകൊണ്ടോ, അത്തരം ഔഷധങ്ങള്‍ ഉപയോഗിക്കാത്തതുകൊണ്ടോ മാത്രം സംഭവിക്കുന്നതാണ്.

പഞ്ചായത്ത് പ്രസിഡന്റിനെ തീരുമാനിക്കേണ്ട സമയത്ത് മുഖ്യമന്ത്രിയാരായിരിക്കും എന്നു ചര്‍ച്ച ചെയ്യുന്നത് അതുകൊണ്ടു മാത്രമാണ്.

വയലാര്‍ രവി സിംഹ രൂപമെടുത്ത് ഗര്‍ജ്ജിക്കുന്നതിനെ ആര്‍ക്ക് കുറ്റം പറയാനാവും. കേരളത്തിന്റെ മുഖ്യമന്ത്രിക്കസേര അദ്ദേഹത്തിന്റെ ചിരകാല സ്വപ്നമാണ്.
പക്ഷേ അത് അനുദിനം കിട്ടാക്കനിയായി അകലങ്ങളിലേയ്ക്ക് അകന്നകന്നു പോവുന്നു.
കരുണാകരനും മുമ്പ് കോണ്‍ഗ്രസ് പ്രവര്‍ത്തക സമിതിയില്‍ വന്നു.
എന്നിട്ടെന്ത് കാര്യം?
കരുണാകരന്‍ നാലുതവണ മുഖ്യമന്ത്രിയായി.
ആന്റണിയെ കെ എസ് യുക്കാരനാക്കിയതു തന്നെ വയലാര്‍ജീയാണ്.
പക്ഷേ ആന്റണി നല്ല പ്രായത്തില്‍ മുഖ്യമന്ത്രിയായി.
വയലാര്‍ജീയ്ക്ക് കാഴ്ചക്കാരനായി നില്‍ക്കുവാനേ കഴിഞ്ഞുള്ളൂ.

1982 ല്‍ കരുണാകരന്‍ വീണ്ടും മുഖ്യമന്ത്രിയായപ്പോള്‍ ആഭ്യന്തരമന്ത്രി പദം കിട്ടി. കിട്ടിയതെങ്കില്‍ കിട്ടിയത് എന്ന് സമാധാനിച്ചപ്പോഴാണ് കരുണാകരന്‍ ആഭ്യന്തരമന്ത്രി പദവി തട്ടിപ്പറിച്ചത്. വേണമെങ്കില്‍ കൃഷി വകുപ്പ് എടുത്തുകൊള്ളാന്‍ ഉപദേശിച്ചത്.
ഇന്നത്തെപ്പോലെ അന്ന് അഭിമാനം നഷ്ടപ്പെടാതിരുന്ന കാലമായതുകൊണ്ട് കൃഷിയും വേണ്ട കാര്യവും വേണ്ട എന്നു പറഞ്ഞ് ഇറങ്ങിപ്പോന്നു.


പിന്നെ കടുത്ത പ്രയാസങ്ങളുടെ കാലമായിരുന്നൂ.
ആന്റണിമാരും ഉമ്മന്‍ചാണ്ടിമാരും പോലും തിരിഞ്ഞുനോക്കിയില്ല.
ചെന്നിത്തല അന്ന് വെറും കൊച്ചനായിരുന്നതുകൊണ്ട് പരിഭവം തോന്നിയില്ല. പിന്നെയൊന്ന് തിരിച്ചുവരാന്‍ കരുണാകരന്‍ തന്നെ വേണ്ടിവന്നു.
കെ പി സി സി തിരഞ്ഞെടുപ്പില്‍ എകെ ആന്റണിയെ തോല്‍പ്പിക്കുവാന്‍ സ്ഥാനാര്‍ഥിയാവണെന്ന് പറഞ്ഞപ്പോള്‍ തന്നെ ഏറ്റു.
കോണ്‍ഗ്രസുകാരനായി താനൊരുത്തന്‍ ഇവിടെ ജീവിച്ചിരിക്കുന്നുവെന്ന് മാലോകരെ അറിയിക്കേണ്ടതാണെന്ന് വയലാര്‍രവിയ്ക്കും തോന്നി.

കസേരയടികള്‍ക്കും സോഡാകുപ്പി കൊണ്ടുള്ള കൂത്തു പ്രയോഗത്തിനും ഉടുതുണിയഴിക്കലിനും ശേഷം ആന്റണിയെ മലര്‍ത്തിയടിച്ചു. കരുണാകരനുള്ള പാരിതോഷികമായി കരുണാകരപുത്രന്‍ മുരളീധരനെ ഒന്നാം ജനറല്‍ സെക്രട്ടറിയായി വാഴിച്ചു.

പക്ഷേ ആശകള്‍ ഫലം കണ്ടില്ല.
രാജ്യസഭാ സീറ്റ് വന്നപ്പോള്‍ തഴയാനുള്ള ശ്രമമുണ്ടായി. പഴയ ആവേശം ചെറിയൊരു തോതില്‍ ശേഷിച്ചിരുന്നതുകൊണ്ട് പ്രതികരിച്ചു.

പിന്നീട് സന്ദര്‍ഭം ഒത്തുവന്നപ്പോള്‍ കരുണാകരന് കനത്ത പണി സമ്മാനിച്ചു, കരുണാകരനേക്കാള്‍ വലിയ കളിക്കാരനാണെന്ന് കാണിച്ചുകൊടുത്തു.

പ്രവര്‍ത്തക സമിതിയിലേയ്ക്ക് കരുണാകരന്റെ നാമനിര്‍ദ്ദേശക പത്രിക ഒപ്പിട്ടുവാങ്ങിയതിനു ശേഷം സമയപരിധി അവസാനിച്ച് കഴിഞ്ഞ് പത്തു മിനിട്ട് എപ്പോഴുമാവുമെന്ന് നോക്കി കൊല്‍ക്കത്താ തെരുവിലൂടെ കാര്‍ പലവഴി തിരിച്ചുവിട്ടു. കരുണാകരന്‍ പ്രവര്‍ത്തക സമിതിയില്‍ നിന്ന് പുറത്ത്.

വയലാര്‍രവി 'മധുരമായ പ്രതികാരം' എന്ന പ്രയോഗത്തിന്റെ സാരാംശം ശരിക്കും ഗ്രഹിച്ചത് അന്നാണ്.

കരുണാകരന്‍ കോടതി വിധിയെ തുടര്‍ന്ന് മാറിയപ്പോള്‍ മുഖ്യമന്ത്രി കസേരയില്‍ ആന്റണി.
തിരുത്തല്‍വാദത്തെ തുടര്‍ന്ന് ഒഴിയാന്‍ നരസിംഹ റാവു കിംഗ് മേക്കറോട് കല്‍പ്പിച്ചപ്പോഴും ആന്റണി, പാവം വയലാര്‍രവി ജീവിച്ചിരിക്കുന്നുവെന്ന് ആരുമാരും ഓര്‍ത്തില്ല.

ആന്റണിയെ അട്ടിമറി പണിയിലൂടെ താഴെയിറക്കിയപ്പോള്‍ ഉമ്മന്‍ചാണ്ടി.
എത്രയോ ജൂനിയറാണ് തന്നേക്കാള്‍ ഉമ്മന്‍ചാണ്ടി.
എന്നിട്ടും മുഖ്യമന്ത്രി പദവി കിട്ടി.
'കാത്തു സൂക്ഷിച്ചൊരു കസ്തൂരി മാമ്പഴം കാക്ക കൊത്തിപ്പോയി' എന്നതായിരുന്നൂ സ്ഥിതി.

കേന്ദ്രത്തില്‍ മന്ത്രിസ്ഥാനമൊക്കെ കിട്ടിയിരിക്കാം.
ആരുമാരും പരിഗണിക്കാത്ത പ്രവാസി വകുപ്പില്‍ കിടന്ന് താനിവിടെ ഉണ്ടേ എന്ന് അലമുറയിേടണ്ട സ്ഥിതിവിശേഷമാണ് തനിക്കുള്ളതെന്ന് മറ്റാര്‍ക്കറിയാം.

ലോക്‌സഭാ തിരഞ്ഞെടുപ്പില്‍ ആലപ്പുഴയില്‍ നിന്ന് മത്സരിക്കണമെന്ന് പരസ്യമായി ആവശ്യപ്പെട്ടത് അതുകൊണ്ടാണ്. അതിനും അവസരം തന്നില്ല. പകരം എം എല്‍ എയെ രാജിവെയ്പ്പിച്ച് മത്സരിപ്പിച്ചു, ജയിപ്പിച്ചു.

ഇപ്പോള്‍ അടുത്ത മുഖ്യമന്ത്രി ഉമ്മന്‍ചാണ്ടിയാണെന്ന് പറഞ്ഞാല്‍ സഹിക്കുവാനാകുമോ?

അതുകൊണ്ടു മാത്രമാണ് പാവം വയലാര്‍ രവി പ്രതികരിച്ചുപോയത്.

വയലാര്‍ജീ പറയുന്നത് കേള്‍ക്കുവാന്‍ കാത്തിരിക്കുകയായിരുന്നൂ ചെന്നിത്തല.

മുഖ്യമന്ത്രി കസേര ചെന്നിത്തലയെയും വല്ലാതെ മോഹിപ്പിക്കുന്നുണ്ട്.

ചാനലുകാരായ ചാനലുകാരൊക്കെ ചോദിച്ചു; യു ഡി എഫ് അധികാരത്തില്‍ വന്നാല്‍ ആരാണ് അടുത്ത മുഖ്യമന്ത്രി?

മാറ്റിയും മറിച്ചും ചോദിച്ചിട്ടും ഹൈക്കമാന്‍ഡ് തീരുമാനിക്കുമെന്ന് മാത്രമേ പറഞ്ഞുള്ളൂ.

പിന്നെ ഹൈക്കമാന്‍ഡുകാര്‍ക്ക് മനസ്സിലാകാന്‍ വേണ്ടി ഇത്രകൂടി പറഞ്ഞു; നഷ്ടപ്പെട്ടുപോയ കോണ്‍ഗ്രസിന്റെ വസന്തകാലം വീണ്ടെടുക്കുവാനാണ് തന്നെ നിയോഗിച്ചത്. താന്‍ ആ വസന്തകാലം വീണ്ടെടുത്തു. പുഷ്പങ്ങളാലും കായ്കനികളാലും സമൃദ്ധമാണ് ഇപ്പോഴത്തെ കോണ്‍ഗ്രസ്.

പ്രതിഫലമായി മുഖ്യമന്ത്രി കസേര വേണമെന്ന് ചെന്നിത്തല പറയാതെ പറയുകയായിരുന്നൂ.

ഒരു ചാനലില്‍ നിന്ന് ഇങ്ങനെയൊരു ചോദ്യമുയര്‍ന്നു. 'അടുത്ത നിയമസഭാ തിരഞ്ഞെടുപ്പില്‍ മത്സരിച്ച് മന്ത്രിസഭയിലെ രണ്ടാമനായി കുറച്ചു കഴിഞ്ഞ് ഒന്നാമനാകാനാണല്ലോ പദ്ധതി' എന്നു കേട്ടപ്പോഴും അച്ചടക്കമുള്ള രമേശന്‍ പറഞ്ഞു; എല്ലാം ഹൈക്കമാന്റ് തീരുമാനിക്കും; എല്ലാം ഭഗവാന്റെ കൈയ്യില്‍ എന്നു പറയുന്ന ഭക്തിയോടെ.


പട്ടം താണുപിള്ളയെമാറ്റി ആര്‍ ശങ്കര്‍ ആയതും കരുണാകരനെ മാറ്റി ആന്റണി ആയതും ആന്റണിയെ ഒഴിവാക്കി കരുണാകരനായതും കരുണാകരനെ അട്ടിമറിച്ച് ആന്റണിയായതും ആന്റണിയെ മാറ്റി ഉമ്മന്‍ചാണ്ടിയായതുമൊക്കെ ഓര്‍മ്മിക്കുവാനുള്ള ശക്തി ചെന്നിത്തലയ്ക്കുണ്ട്.

പക്ഷേ വയലാര്‍രവി കയര്‍ക്കുമ്പോള്‍ ചെന്നിത്തലയ്ക്ക് ഒപ്പം നില്‍ക്കാതിരിക്കാനാവില്ല. കാരണം ഉമ്മന്‍ചാണ്ടിയെ കളത്തിനു പുറത്താക്കലാണ് ആദ്യത്തെ ആവശ്യം. പിന്നെ വയലാര്‍ജീ അല്ലെങ്കില്‍ ഞാന്‍ജീ.

അതുകൊണ്ടാണ് മുഖ്യമന്ത്രിയാരെന്ന് സ്വന്തം കൈയ്യില്‍ തൊട്ടുകാണിക്കാമെന്ന നിലപാട് വയലാര്‍രവിയ്‌ക്കൊപ്പം രമേശും കൈക്കൊണ്ടത്.

'ആടിക്കളിയ്‌ക്കെടാ കുഞ്ഞിരാമാ' എന്ന മട്ടില്‍ പാവം പാവം ആന്റണി ഡല്‍ഹിയിലിരുന്ന് ചിരിക്കുന്നത് കാണുന്നുണ്ടോ, കേള്‍ക്കുന്നുണ്ടോ?

വ്യാസന്റെ ഭാരതകഥ മന്‍മോഹന്‍ തിരുത്തുമ്പോള്‍

ഓണക്കാലമാണിത്.

ഓണം മലയാളികളുടെത് മാത്രമെന്നാര് പറഞ്ഞു?

മന്‍മോഹന്‍ സിങ്ങിനും, ബുഷിനും, പ്രണാബ് മുകര്‍ജിക്കും, കോണ്ടലീസ രൈസിനുമൊക്കെ ഇത് ഓണക്കാലമാണ്. "ഓണം വന്നോണം വന്നോണം വന്നേ" എന്ന് മന്‍മോഹന്‍ സിങ്ങും, എ.കെ.ആന്റണിയും, പ്രണാബ് മുഖര്‍ജിയും, സോണിയ ഗാന്ധിയും ആലപിക്കുന്നതിനോപ്പം ബുഷും, റൈസും, മുടോള്‍ഫും, നിക്കോളാസ് ബേണ്‍സും ഏറ്റുപാടുകയും ചെയ്യുന്നു. ആഘോഷങ്ങളുടെയും തിമിര്‍പ്പിന്റെയും, കളിപരമ്പരകളുടെയും ഉത്സവ ലഹരിയില്‍ മതിമറന്നു ആടുകയാണ് എല്ലാ കുട്ടരും.

അകലങ്ങളിലിരുന്നാണ് എല്ലാ കുട്ടരും "ഓണം വന്നോണം വന്നോണം വന്നേ" എന്ന് പാടുന്നതെങ്കില്‍, മാവേലിമന്നന്റെ നാട്ടില്‍ പിറന്ന ആധുനിക വാമനനായ എ.കെ.ആന്റണി നേരിട്ട് തന്നെ അമേരിക്കയില്‍ എത്തി കഴിഞ്ഞു. കീഴടക്കാന്‍ അല്ല, വെറുതെഒന്ന് കീഴടങ്ങി കൊടുക്കാന്‍. ബുഷിനെ കാണാന്‍മാത്രം ആന്റണി വളര്‍ന്നിട്ടില്ലാത്തത് കൊണ്ട്, പ്രതിരോധ സെക്രെട്ടരിയെയും വിദേശകാര്യ സെക്രട്ടറിയെയും മുഖം കാണിച്ചു മടങ്ങി വരാവുന്നതാണ്. അവര്‍ വഴി ബുഷിനെയും ആന്റണി ഓണാശംസകള്‍ അറിയിക്കും.അത് സെക്രട്ടറിമാരുടെ നാവില്‍ നിന്നറിഞ്ഞു ബുഷ്‌ കോള്‍മയിര്‍ കൊണ്ട് തളര്‍ന്നും,തകര്‍ന്നും അവശനായി വൈറ്റ് ഹൌസില്‍ കിടന്നു പോവും. അമിതമായി പായസം കുടിച്ചു മത്തു പിടിച്ചത് പോലെ, ആന്റണിയുടെ പ്രശംസ അറിഞ്ഞു ബുഷ്‌ അവശനായി പോകുമെന്ന കാര്യത്തില്‍ കൊണ്ഗ്രെസ്സുകാരന്റെ വേഷമണിഞ്ഞ ഒരാള്‍ക്ക്‌ പോലും സംശയം ഇല്ല.

ബുഷിന്‌ ഇത് സന്തോഷ കാലമാണ്.അമേരിക്കന്‍ കൊണ്ഗ്രെസ്സിനെ അഭിമുഖികരിക്കുമ്പോള്‍ ബുഷ്‌ അത് വിളിച്ചറിയിക്കുവാന്‍ മടിച്ചതുമില്ല. ഇന്ത്യ-യു.എസ് ആണവകരാര്‍ അമേരിക്കന്‍ കൊണ്ഗ്രെസ്സിന്റെ മുമ്പാകെ സമര്‍പ്പിക്കുന്നതില്‍ തനിക്കു അതിയായ സന്തോഷവും, അഭിമാനവും ഉണ്ടെന്നു ബുഷ്‌ വെട്ടിത്തുറന്ന് പറഞ്ഞത് വെറുതെയോന്നുമല്ല. 1954 ലെ ആണവോര്‍ജ നിയമത്തിലെ 123 വകുപ്പ് പ്രകാരമുള്ള ഇന്ത്യ-യു.എസ് ആണവകരാര്‍ അമേരിക്കയ്ക്കും, ഇന്ത്യക്കും ഗുണം പകര്‍ന്നു നല്‍കുമെന്നാണ് ബുഷ്‌ പ്രഖ്യാപിച്ചത്.

ഇന്ത്യ ആണവ സാങ്കേതിക വിദ്യയില്‍ അമേരിക്കയെക്കാള്‍ വലിയ രാഷ്ട്രമായത് കൊണ്ടല്ല ബുഷിന്‌ സന്തോഷം ഏറുന്നത്. ഇന്ത്യ അവരുടെ മുമ്പില്‍ ആണവ ശക്തിയുടെ കാര്യത്തില്‍ കേവലം അശുവാണ്‌. അറുപതു വയസ്സുകാരന്റെ മുമ്പില്‍ നില്‍ക്കുന്ന ആര് വയസ്സുകാരനെപ്പോലെ. പക്ഷെ ഈ ആര് വയസ്സുകാരന്‍ പിന്നീടെന്നെങ്കിലും ഒരു അറുപതു വയസ്സുകാരനായി വളര്‍ന്നു വലുതാവരുത്. "അച്ഛനെപ്പോലെ, അമ്മയെപ്പോലെ ഞാനും വളരും,വലുതാകും" എന്ന് ഈ ആറുവയസ്സുകാരന്‍ പാടാന്‍ പോലും പാടില്ല. ആറു വയസ്സുകാരന്‍ 40 വര്‍ഷക്കാലത്തേക്ക് വെറും ആറു വയസ്സുകാരന്‍ തന്നെയായിരിക്കണം. അതിനാണ് കരാര്‍.
എന്നെങ്കിലുമൊരു നാള്‍ തനിക്കു ഭീഷണിയായി തീരാന്‍ സാധ്യതയുള്ളവനെ വെറും മന്ധബുദ്ധിയാക്കി തടങ്കലില്‍ വയ്ക്കുമ്പോള്‍ ഉണ്ടാകുന്ന ഹരം തെല്ലൊന്നുമല്ല. അത് കൊണ്ടാണ് ബുഷ്‌ അഭിമാനത്തോടെയും,ആഹ്ലാദത്തോടെയും അമേരിക്കന്‍ കൊണ്ഗ്രെസ്സിനെ അഭിമുഖീകരിച്ചത്. ആണവായുധ നിരായുധീകരണ കരാറില്‍ ഒപ്പ് വയ്ക്കാതെ വിലസി നടന്ന ഇന്ത്യയെ കൈകാലുകളില്‍ വിലങ്ങണിയിച്ചു ഇനിയൊരിക്കലും ആണവ പരീക്ഷണത്തിന്‌ മുതിരില്ലെന്ന് പറയിച്ച് കുളിപ്പിച്ച് കിടത്തുമ്പോള്‍ ഉണ്ടാകുന്ന വിജയം ബുഷിനെ സംബന്ധിച്ച് ചെറുതൊന്നുമല്ല.

ബുഷ്‌ സ്വന്തം ജനതയോട് പറഞ്ഞത് വായിച്ചാലേ മന്മോഹന്റെയും, സോണിയയുടെയും, ആന്റണിയുടെയും, പ്രനാബിന്റെയും "മഹത്വം" പിടി കിട്ടുകയുള്ളൂ.

ബുഷ്‌ പറഞ്ഞതിങ്ങനെ:
"ആണവോര്‍ജ്ജം സംബന്ധിച്ചുള്ള വിലക്കപ്പെട്ട വിവരങ്ങള്‍ കൈമാറാന്‍ കരാറില്‍ വ്യവസ്ഥയില്ല. നിര്‍ണായകമായ ആണവ സാങ്കേതിക വിദ്യ, ഘനജല ഉത്പാദനത്തിനുള്ള ഉപകരണങ്ങള്‍, നിര്‍ണായകമായ ആണവ സംവിധാനങ്ങള്‍, അത്തരം യന്ത്രസമുച്ചയങ്ങളുടെ നിര്‍ണ്ണായക ഭാഗങ്ങള്‍ എന്നിവ കൈമാറാന്‍ കരാറില്‍ വ്യവസ്ഥയില്ല.."

മന്മോഹനും കുട്ടരും വീമ്പിളക്കിയ ഒരു സാങ്കേതിക വിദ്യയും ലഭിക്കുക ഇല്ലെന്നു സാരം. ഇന്ത്യയെയും ഇന്ത്യന്‍ പാര്‍ലമെന്റിനെയും ഒരു വിലയുമില്ലാത്ത ഇനങ്ങളായി കണ്ട് ബുഷിന്റെ മുമ്പില്‍ കാലു നീട്ടി, മുഖം കുമ്പിട്ട്‌, കൈകൂപ്പി നിന്ന് ഇരന്നു വാങ്ങിയ കരാറിനെക്കുറിച്ച് ബുഷ്‌ പറഞ്ഞ ഈ വരികള്‍ കൂടി വായിച്ചാലേ നമുക്ക് ഓണക്കാലത്തിന്റെ ഭംഗിയും,ആഹ്ലാദവും യഥാര്‍ത്ഥത്തില്‍ സ്വായത്തമാവുക യുള്ളൂ.

"തടസ്സമില്ലാതെ ആണവഇന്ധനം നല്‍കുന്നതിനാവശ്യമായ ചില രാഷ്ട്രീയ നിലപാടുകളെ കുറിച്ച് കരാറിലെ 5 (6 ) ഉപവകുപ്പ് പരാമര്‍ശിക്കുന്നുന്ടെങ്കിലും, അത് നിയമപരമായ ഒരു ബാദ്യത ആക്കിമാറ്റാന്‍ സര്‍ക്കാര്‍ ആലോചിക്കുന്നില്ല. മറ്റേതു യു.എസ്. കരാര്‍ പോലെയും ഇത് ഒരു ചട്ടക്കുട് മാത്രമായതിനാല്‍ ആണത്."

ബുഷ്‌ ഒരുക്കിയ ചട്ടകൂടില്‍ അപാര ചര്മ്മശേഷിയോടെയും, തരിമ്പും രാജ്യ സ്നേഹമില്ലാതെയും വാസമുറപ്പിച്ചവരെ കുറിച്ച് പറഞ്ഞു സ്വന്തം ജനതയ്ക്ക് മുന്നില്‍ ബുഷ്‌ കോരിത്തരിക്കുകയാണ്.

ബുഷിന്റെ കോരിത്തരിപ്പ് കണ്ട്, കോരിത്തരിപ്പിന്റെ വിധം മനസ്സിലാക്കാനും, ഓണാശംസ നേരാനുമായി ആദര്‍ശപര്യായമായ ആന്റണി അമേരിക്കയിലുള്ളത്‌ കൊണ്ട് എല്ലാവര്ക്കും പെരുത്ത്‌ സന്തോഷം.

മഹാഭാരതം ഋഷി വര്യനായ വേദവ്യാസന്‍ എഴുതി.
അനുക്രമണികാ പര്‍വ്വം, പര്‍വ്വ സംഗ്രഹം, പൌശ്യം, പൌലോമം, ആസ്തികം, അംശാവതരണം, സംഭവപര്‍വ്വം, ജന്മ ഗ്രഹ പര്‍വ്വം, ബകവധ പര്‍വ്വം, സ്വയംവര പര്‍വ്വം, സുഭദ്രാഹരണ പര്‍വ്വം, ഹരണഹാരിക പര്‍വ്വം, ഉദ്യോഗ പര്‍വ്വം, ദ്രോണ പര്‍വ്വം, ആരണ്യ പര്‍വ്വം, ഭീഷ്മ പര്‍വ്വം, മൌസല പര്‍വ്വം, ഇങ്ങനെ പലവിധ അധ്യായങ്ങളായി വ്യാസന്‍ ഭാരതകഥ പറഞ്ഞു വച്ചിട്ടുണ്ട്.

മഹാഭാരതം കേള്‍ക്കുന്നവന് മറ്റ് ഒരു കാവ്യവും രുചിക്കുകയില്ലെന്നാണ് പറയാറ്. എന്നാലിതാ മന്മോഹനും, ആന്റണിയും, മറ്റ് കൊണ്ഗ്രെസ്സ് കൂട്ടാളികളും ചേര്‍ന്ന് അടിമത്വ പര്‍വ്വം രചിച്ചിരിക്കുന്നു.

ഭാരതകഥ നീണ്ടു നീണ്ടു പോവുകയാണ്.
വ്യാസനില്‍ നിന്ന് ഭാരത കഥ കൈവിട്ടു പോവുകയും, ബുഷ്‌ പുതിയ ഭാരത കഥ രചിക്കുകയും ചെയ്യുന്നു.

"കേഴുക പ്രിയനാടേ" എന്നല്ലാതെ മറ്റെന്തു പറയാന്‍ കഴിയും!

=======================

സെപ്റ്റംബര്‍ 16, 2008.

2010, ഒക്‌ടോബർ 23, ശനിയാഴ്‌ച

കൈപ്പത്തിക്കും താമരയ്ക്കും വിട; ആപ്പിളിനും മാങ്ങയ്ക്കും സ്തുതി

കളിക്കളത്തിലിറങ്ങുന്നതിനു മുമ്പുതന്നെ തോറ്റു തുന്നംപാടി പവലിയനില്‍ താടിക്ക് കൈയും കൊടുത്തിരിക്കുകയാണ് ഐക്യജനാധിപത്യ മുന്നണി.

ഐക്യം അത്രമേല്‍ ശക്തമായതുകൊണ്ടുണ്ടായ ആഹ്‌ളാദകരമായ അവസ്ഥയാണിത്. സ്ഥാനാര്‍ഥികളാല്‍ സമൃദ്ധവും സമ്പന്നവുമാണ് ഐക്യ ജനാധിപത്യ മുന്നണി.
ഓരോ വാര്‍ഡിലും രണ്ടില്‍ കുറയാത്ത സ്ഥാനാര്‍ഥികളെ നിര്‍ത്താന്‍ മാത്രം സമൃദ്ധം.
രണ്ടു മുതല്‍ എത്രവരെ വേണമെങ്കിലും സ്ഥാനാര്‍ഥികളുടെ എണ്ണം ഉയരാവുന്നതാണ്.
അത് എത്രവരെയെന്ന് കോണ്‍ഗ്രസിനോ ഐക്യജനാധിപത്യ മുന്നണിയിലെ മറ്റ് ഐക്യ മോഹികള്‍ക്കോ പോലും ഇതുവരെ തിട്ടപ്പെടുത്താനായിട്ടില്ല.


ധീരയും മുന്‍കോപക്കാരിയുമായ ഗൗരിയമ്മ തിരഞ്ഞെടുപ്പ് പ്രഖ്യാപിക്കുന്നതിനു മുമ്പുതന്നെ കല്‍പന പുറപ്പെടുവിച്ചിരുന്നതാണ്.
തന്റെ കക്ഷിയായ ജെ എസ് എസിനുള്ള സീറ്റുകളില്‍ റിബലുകളെ നിര്‍ത്തുന്ന കലാപരിപാടി ഉപേക്ഷിച്ചില്ലെങ്കില്‍ കളി വഷളാകുമെന്ന്.

പക്ഷേ ഗൗരിയമ്മയെ വിരട്ടാനാണ് ഐക്യം ഊട്ടിയുറപ്പിക്കുന്നതില്‍ അമരക്കാരായ ഉമ്മന്‍ചാണ്ടിയും രമേശ് ചെന്നിത്തലയും കച്ചകെട്ടിയിറങ്ങിയത്.
അതുകൊണ്ടവസാനിച്ചെങ്കില്‍ സമാധാനമായേനേ. പക്ഷേ ജെ എസ് എസിന്റെ സീറ്റുകളില്‍ തീപ്പന്തം മുതല്‍ തെങ്ങുവരെയുള്ള അടയാളങ്ങളില്‍ കെ പി സി സി മുതല്‍ ബൂത്ത് കമ്മിറ്റി വരെയുള്ള ഖദര്‍ധാരികള്‍ രംഗപ്രവേശം ചെയ്തു.

അതിനു കോണ്‍ഗ്രസ് നേതാക്കളെ കുറ്റം പറഞ്ഞിട്ടു കാര്യമില്ല.
കാരണം കൈപ്പത്തിയ്‌ക്കെതിരെ കോണ്‍ഗ്രസുകാര്‍ തന്നെ ശംഖും ആദിയായ മറ്റടയാളങ്ങളും സ്വീകരിച്ച് ശംഖധ്വനി മുഴക്കുമ്പോള്‍ അവര്‍ക്കെന്ത് ചെയ്യാനാവും?

എല്ലാം ഐക്യത്തിന്റെ മഹോന്നതങ്ങളായ ഉദാഹരണങ്ങള്‍.

ഉമ്മന്‍ചാണ്ടി പക്ഷക്കാരനെതിരെ ചെന്നിത്തല പക്ഷം നില്‍ക്കും. മറിച്ചും അങ്ങനെ തന്നെ. കരുണാകര പക്ഷമാണെങ്കില്‍ ചാണ്ടി-ചെന്നിത്തല പക്ഷം ഒന്നിച്ചെതിര്‍ക്കും വയലാര്‍ രവി പക്ഷത്തെയും കൂടെ ചേര്‍ക്കും.

അധിക്ഷേപിക്കരുതെന്നും കുടികിടപ്പുകാരനായി കാണരുതെന്നും പാവം ടി എം ജേക്കബ് പത്രക്കാരൂടെ മുന്നില്‍ വിതുമ്പുന്നു.

മാന്യതയില്ലാത്ത പണി മാത്രമാണ് കോണ്‍ഗ്രസിന് വശമായിട്ടുള്ളതെന്ന് എം വി രാഘവന്‍.

രണ്ടില കൈപ്പിടിയിലുയര്‍ത്തി മാണിക്ക് കീഴടങ്ങിയ ജോസഫിന്റെ കുഞ്ഞാടുകളില്‍ ഭൂരിപക്ഷത്തിനും രണ്ടില പോയിട്ട് ഒരിലപോലും മാണി നല്‍കിയില്ല.
കയ്ച്ചിട്ടിറക്കാനും വയ്യ തുപ്പാനും വയ്യ എന്ന മട്ടില്‍ കഴിയുകയാണ് പാവങ്ങള്‍.

സോഷ്യലിസ്റ്റ് ജനതാദളായി പരകായ പ്രവേശം നടത്തിയ വീരശൂരപരാക്രമികളുടെ പാര്‍ട്ടിക്കും ആശിച്ചതൊന്നും കിട്ടിയില്ല.

നാലാളുള്ളിടത്തൊക്കെ കോണ്‍ഗ്രസിനെതിരെ മത്സരിക്കുവാനുള്ള വീരശൂരത്വം പ്രകടിപ്പിച്ചിട്ടുണ്ട്.
ഇടുക്കിയും കോട്ടയവും ആരുടെ കോട്ടയാണെന്ന് തീര്‍ച്ചപ്പെടുത്താന്‍ മാണി കോണ്‍ഗ്രസും കോണ്‍ഗ്രസും പരസ്പരം കൊമ്പുകോര്‍ക്കുന്നു.

ഐക്യത്തിന് ഇനി മറ്റെന്തുവേണം ഉദാഹരണങ്ങളായി.

ഐക്യത്തിന്റെ മറ്റു ചില വകഭേദങ്ങളുമുണ്ട്.

ബി ജെ പിയും എസ് ഡി പി ഐയും യു ഡി എഫുമായുള്ള ഐക്യമാണ് ശരിയായ ഐക്യം.
പലയിടങ്ങളിലും ഒരുമയുണ്ടെങ്കില്‍ ഒലക്കമേലും കിടക്കാമെന്ന് കോണ്‍ഗ്രസും ലീഗും കേരള കോണ്‍ഗ്രസും സി എം പിയും ജെ എസ് എസും ബി ജെ പിയും എസ് ഡി പി ഐയും പി ഡി പിയും തെളിയിച്ചുകൊണ്ടിരിക്കുന്നു.

കൈപ്പത്തിയും ഏണിയും താമരയും രണ്ടിലയുമൊന്നും പലയിടങ്ങളിലും കണ്ടുകിട്ടാനില്ല. മാങ്ങ, ഉദയസൂര്യന്‍, ആപ്പിള്‍ എന്നിവയ്ക്കാണ് അവിടങ്ങളിലെല്ലാം വന്‍ ഡിമാന്‍ഡ്.

കൈപ്പത്തിക്ക് വിട. താമരയ്ക്ക് വിട.
അല്ലെങ്കിലും കൈപ്പത്തിയെ കൈപ്പറ്റി എന്നു പറഞ്ഞ് ആക്ഷേപിക്കുന്നവരുണ്ട്.
താമര തണ്ടൊടിഞ്ഞു എന്നു പറഞ്ഞ് കളിയാക്കുന്നവരുണ്ട്.

മാങ്ങയും ആപ്പിളുമൊക്കെയായാല്‍ അങ്ങനെ ആക്ഷേപിക്കുവാന്‍ ആര്‍ക്കും പറ്റില്ലല്ലോ.

മാങ്ങയും ആപ്പിളും ഉദയസൂര്യനും ശംഖും തീപ്പന്തവുമായി ഐക്യമഹാഗാഥകള്‍ രചിക്കുന്നവരെ മാലോകരാകെ കാണുന്നു.
പക്ഷേ ചെന്നിത്തലമാരും ഉമ്മന്‍ചാണ്ടിമാരും കുഞ്ഞാലിക്കുട്ടിമാരും മാണിമാരും ഇതുവരെ കണ്ടട്ടില്ല.

മോഡറേഷന്‍ മാര്‍ക്ക് കിട്ടി കോണ്‍ഗ്രസില്‍ തിരിച്ചുവരുമെന്ന മുരളീധരന്റെ ഫലിതം കേട്ട് തലയറഞ്ഞ് ചിരിക്കുന്ന തിരക്കിലായതുകൊണ്ടാണ് കാണാതെ പോയത്,........

കാഴ്ചയില്ലാത്തതുകൊണ്ടല്ല.

മുഖ്യമന്ത്രിപദമോഹികളും ഗൗരിയമ്മ പറഞ്ഞ പാതിസത്യവും

പണത്തിനുമേല്‍ പരുന്തും പറക്കില്ലെന്ന് പണ്ടേയ്ക്ക് പണ്ടുള്ളവര്‍ പറഞ്ഞിട്ടുണ്ട്.

കേരളഭൂമിയില്‍ ജീവിച്ചിരിക്കുന്ന പഴമക്കാരില്‍ പ്രധാനിയായ ഗൗരിയമ്മ പറയുന്നു; ഒരു സര്‍ക്കാരിനെ അട്ടിമറിക്കാന്‍ ഒരു കോടി രൂപയും മറ്റു പലവിധ സ്ഥാനമാനങ്ങളും വാഗ്ദാനം ചെയ്യപ്പെട്ടിരുന്നുവെന്ന്.
പണത്തിന്റെ കനവും ബലവും എത്രമേല്‍ വലുതാണെന്ന് ഗൗരിയമ്മയുടെ വാക്കുകളും തെളിയിക്കുന്നു.
ഒരു കോടി കണ്ടാല്‍ മതിമറക്കുകയോ മയങ്ങിവീഴുകയോ ചെയ്യുന്ന പാര്‍ട്ടിയല്ല രാജന്‍ബാബുവും കെ കെ ഷാജുവുമൊക്കെയുള്ള ജനാധിപത്യ സംരക്ഷണമുന്നണി എന്ന വലിയ രാഷ്ട്രീയ കക്ഷി.

അവര്‍ വഴങ്ങിയില്ലെങ്കിലും ആന്റണി സര്‍ക്കാര്‍ വീണു.
ഉമ്മന്‍ചാണ്ടി മുഖ്യമന്ത്രിയായി.
ഉമ്മന്‍ചാണ്ടിയെ മുഖ്യമന്ത്രിയാക്കാതിരിക്കാന്‍ രൂപ വാഗ്ദാനം ചെയ്തവര്‍ മാത്രം പരാജിതരായി. പണവും പോയി. ഉമ്മന്‍ചാണ്ടി മുഖ്യമന്ത്രിയുമായി.
കാത്തുസൂക്ഷിച്ചൊരു കസ്തൂരിമാമ്പഴം കാക്കകൊത്തി പോയി എന്ന നിലയിലായിരുന്നു അറയ്ക്കപറമ്പില്‍ കുര്യന്‍ ആന്റണിയെങ്കില്‍ അതിനേക്കാള്‍ പരിതാപകരമായ നിലയിലായിരുന്നു ഗൗരിയമ്മ പറയുന്ന പണ വാഗ്ദാനക്കാരുടെ അവസ്ഥ.
മോഹിച്ച കസേര കിട്ടിയതുമില്ല, കയ്യിലുണ്ടായിരുന്ന പണം നഷ്ടപ്പെടുകയും ചെയ്തു.


മുഖ്യമന്ത്രിയാകാന്‍ നിത്യേന പ്രാര്‍ഥന നടത്തുന്നവരുടെ എണ്ണം യു ഡി എഫില്‍ തെല്ലും കുറവല്ല.
ഉമ്മന്‍ചാണ്ടി എന്ന കുഞ്ഞൂഞ്ഞ് അല്‍പകാലത്തേയ്‌ക്കെങ്കിലും അത് സാധിച്ചെടുത്തു. മോഹിച്ച് മോഹിച്ച് വശംകെട്ട പഴയ ലെഫ്റ്റനന്റ് ഗവര്‍ണര്‍ വക്കം പുരുഷോത്തമന്‍ ഇപ്പോള്‍ മോഹഭംഗത്തിന്റെ നടുക്കടലിലാണ്.
മുഖ്യമന്ത്രിയാകാന്‍ മോഹിച്ച് കളികളായ കളികളൊക്കെ പുറത്തെടുത്ത് കളത്തിന് പുറത്തായ പാവം പാവം കെ മുരളീധരനുണ്ട്.
എന്നെങ്കിലും മുഖ്യമന്ത്രിയാവുമെന്ന് കരുതി അനുദിനം പോരടിക്കുന്ന രമേശ് ചെന്നിത്തലയുണ്ട്.
മുഖ്യമന്ത്രിപദം മോഹിച്ച് മോഹിച്ച് നിരാശാഗര്‍ത്തത്തില്‍പെട്ട്, ഒടുവില്‍ കേന്ദ്രമന്ത്രിപദവി തരപ്പെടുത്തിയ (വലിയ പണിയൊന്നുമില്ലാത്ത പ്രവാസി വകുപ്പ്) വയലാര്‍ രവിയുണ്ട്.

പിന്നെ നിലക്കണ്ണാടി നോക്കിപോലും താനാരാണ് എന്നു മനസിലാക്കാത്ത തറയിലും മാനത്തിലുമൊക്കെയുള്ള പാര്‍ട്ടിയില്‍ ആരാണ് ഗൗരിയമ്മയ്ക്ക് ഒരു കോടി വാഗ്ദാനം ചെയ്തത്?
ആ വല്യമ്മ ഒന്നു പറഞ്ഞുതന്ന് കേരളത്തിന്റെ കൗതുകത്തിന് പരിഹാരമുണ്ടാക്കേണ്ടതാണ്.

മുഖ്യമന്ത്രിസ്ഥാനം പരമപ്രധാനമായി കണ്ട് പെടാപാടുപെടുന്ന ഘടകകക്ഷി നേതാവ് കെ എം മാണിക്ക് പണ വാഗ്ദാനത്തില്‍ പങ്കുണ്ടോയെന്നും കേരള പൗരന്മാര്‍ സംശയിച്ചുപോകുന്നത് സ്വാഭാവികമാണ്.

ചതിയും വഞ്ചനയും നടത്തുന്നവര്‍ക്ക് എന്നെങ്കിലും ഒരുനാള്‍ അത് അനുഭവിക്കേണ്ടിവരും. 1995 ല്‍ കെ കരുണാകരനെ മുഖ്യമന്ത്രിപദത്തില്‍ നിന്ന് ഇറക്കിവിടാന്‍ വഴിവിട്ട കളികളൊക്കെ കളിച്ച ആളാണ് ഏ കെ ആന്റണി.
പഞ്ചസാര കുംഭകോണത്തില്‍പെട്ട് കേന്ദ്രമന്ത്രിസ്ഥാനം പോയപ്പോള്‍, കേരളമുഖ്യമന്ത്രി കസേര തരപ്പെടുത്താന്‍ ഗ്രൂപ്പ് ലഹള പൊട്ടിപ്പുറപ്പെടുവിക്കുന്നതിന് ഞാനൊന്നുമറിഞ്ഞില്ലേ രാമനാരായണ എന്ന മട്ടില്‍ പ്രവര്‍ത്തിച്ച ബുദ്ധിമാനാണ് ആന്റണി.

അതേ ആന്റണിയെ ഒരു പ്രസ്താവനയുടെ പേരില്‍ കസേരയില്‍ നിന്ന് ഇറക്കിവിടാന്‍ ഉമ്മന്‍ചാണ്ടിക്കും കൂട്ടര്‍ക്കും അധികം ആയാസപ്പെടേണ്ടിവന്നില്ല.
ഓണാഘോഷങ്ങള്‍ തിമിര്‍ത്താടുന്ന നാളുകളിലൊന്നില്‍ വിമാനത്തില്‍വെച്ച് സോണിയാ മാഡം ആന്റണിയോടു പറഞ്ഞു, 'രാജി വച്ചേയ്ക്കു' എന്ന്.
പാവം മറുപടിയൊന്നും പറയാനാവാത്തതുകൊണ്ട് വിമാനത്താവളത്തില്‍വെച്ച് വിതുമ്പല്‍ പ്രകടമാക്കുന്നവിധം രാജി പ്രഖ്യാപനം നടത്തി.
പക്ഷേ സ്വതസിദ്ധമായ വൈഭവം കൊണ്ട് ആന്റണി രക്ഷപ്പെട്ടു.

സ്വയരക്ഷയ്ക്കുപോലും ത്രാണിയില്ലാത്ത ആന്റണി രാജ്യരക്ഷ കൈകാര്യം ചെയ്യുന്ന ഭരണസാരഥിയായി കുറച്ചു വൈകിയാണെങ്കിലും എത്തിച്ചേര്‍ന്നു.


കേരളത്തിന്റെ വലിയമ്മ സ്വന്തം പാര്‍ട്ടിക്ക് സീറ്റ് നിഷേധിക്കപ്പെടുമ്പോഴും സ്വന്തം സ്ഥാനാര്‍ഥികള്‍ക്കെതിരെ റിബലുകള്‍ രംഗപ്രവേശം നടത്തുമ്പോഴും അല്ല ഇത്തരം അരുതായ്മകള്‍ വെളിപ്പെടുത്തേണ്ടത്.

രാഷ്ട്രീയത്തിലെ അപചയത്തെക്കുറിച്ച് അപ്പപ്പോള്‍ വിളിച്ചുപറയാന്‍ ബാധ്യസ്ഥയാണ് ഒളിവിലും ജയിലിലും കഴിഞ്ഞ ഈ വനിതാ പോരാളി.

പക്ഷേ കോണ്‍ഗ്രസ് പ്രഭുക്കളാല്‍ അവഹേളിതയാകുമ്പോള്‍ ഗൗരിയമ്മ പാതി സത്യം പറയുന്നു. പൂര്‍ണസത്യം പറയാന്‍ ഗൗരിയമ്മ മടികാട്ടുമ്പോള്‍ നാണം കെട്ടുപോകുന്നത് അവര്‍ തന്നെയാണ്.

ഇനിയെങ്കിലും പറയണം ഗൗരിയമ്മേ, കര്‍ണാടകയില്‍ ഇപ്പോള്‍ കാണുന്ന രാഷ്ട്രീയം കേരളത്തില്‍ പരീക്ഷിക്കുവാന്‍ മുമ്പേ യത്‌നിച്ചവര്‍ ആരെന്ന്?

അതിനുള്ള ധൈര്യം പോലും വാര്‍ധക്യകാലത്ത് നഷ്ടപ്പെട്ടുവോ എന്ന് തിരുത്തല്‍ പ്രസ്താവനകള്‍ കേരളത്തെ കൊണ്ട് ചോദിപ്പിക്കുന്നു.

ഗതി കെട്ടാല്‍ പുലി പുല്ലും തിന്നും എന്ന ചൊല്ല് അന്വര്‍ഥമാകാതിരിക്കട്ടെ.

2010, ഒക്‌ടോബർ 17, ഞായറാഴ്‌ച

മുഖം മുണ്ടിനാല്‍ മൂടിയ കോണ്‍ഗ്രസ്,ആഹ്ലാദത്തില്‍ ആറാടിയ ലോട്ടറി അഭിഭാഷകന്‍

''വീണിതല്ലോ കിടക്കുന്നൂ ധരണിയില്‍,

ക്ഷോണിതവുമണിഞ്ഞയ്യോ ശിവ! ശിവ!''

എന്ന് വിലാപസ്വരത്തില്‍ പാടിയത് നാം വായിച്ചറിഞ്ഞിട്ടുണ്ട്.

ക്ഷോണിതമണിയാതെ വീണുകിടക്കുന്ന, നാണക്കേടുകൊണ്ട് മുഖം മണ്ണില്‍ പൂഴ്ത്തിവെച്ചിരിക്കുന്ന കോണ്‍ഗ്രസ് നേതാക്കളെയാണ് ഇപ്പോള്‍ നാം കണ്ടുകൊണ്ടിരിക്കുന്നത്.
പുറമേ രക്തം കാണാനില്ലെങ്കിലും ഉമ്മന്‍ചാണ്ടി, രമേശ്‌ചെന്നിത്തല മുതല്‍ വി ഡി സതീശന്‍ വരെയുള്ള കെ പി സി സി നേതാക്കളുടെയും ബൂത്ത്തല യൂത്ത് കോണ്‍ഗ്രസ് നേതാക്കളുടെയും ഹൃദയത്തില്‍ നിന്നും മനസ്സില്‍ നിന്നും വിഷാദത്തിന്റെയും നൈരാശ്യത്തിന്റെയും കറുത്ത രക്തം ഒഴുകികൊണ്ടിരിക്കുകയാണ്.

മലര്‍ന്നടിച്ചു വീണാലും മലര്‍ന്നുകിടന്നു തുപ്പാന്‍ പുതുകാലത്തെ കോണ്‍ഗ്രസ് നേതാക്കള്‍ സമര്‍ഥരാണ്. ആ സാമര്‍ഥ്യം സംശയരഹിതമായി തെളിയിച്ചുകൊണ്ടിരിക്കുകയാണ് കെ പി സി സി പ്രസിഡന്റ് രമേശ് ചെന്നിത്തലയും അദ്ദേഹത്തിന്റെ അനുചരന്‍മാരായ പി ടി തോമസും വി ഡി സതീശനും ഉള്‍പ്പെടെയുള്ളവര്‍.
സീനിയര്‍ നേതാവ് എന്നവകാശപ്പെടുന്ന ആര്യാടന്‍ മുഹമ്മദും ഈ ഫലിത നാടകത്തിലെ ഒരു പ്രധാന കഥാപാത്രമായി എന്നതാണ് മലയാളികളെ അമ്പരപ്പിക്കുന്നത്. പ്രഗത്ഭന്‍മാര്‍ ചിലപ്പോള്‍ ബഫൂണ്‍ വേഷങ്ങളായും അവതരിക്കാറുണ്ടെന്ന് പഴയകാലം പറഞ്ഞുതന്നിട്ടുണ്ടെന്നുള്ളതാണ് ആശ്വാസം.

അഭിഷേക് മനുസിംഗ്‌വി പേരുകേട്ടയാളാണ്.
നാടുവാണരുളുന്ന കോണ്‍ഗ്രസിന്റെ ഔദ്യോഗികമായ നാവാണ്. സോണിയാഗാന്ധിക്ക് പറയാനുളളത് മാലോകരും, അല്ല ലോകംതന്നെയും അറിയുന്നത് അഭിഷേക് സിംഗ്‌വിയുടെയും ജനാര്‍ദ്ദനന്‍ ദ്വിവേദിയുടേയും മനീഷ് തിവാരിയുടേയും നാവിലൂടെയാണ്.
പേരു പറഞ്ഞ മൂവരില്‍ മുമ്പനാണ് അഭിഷേക്.
ഹൈക്കമാന്‍ഡിനും സോണിയയ്ക്കും പറയാനുള്ളത് അണുവിട വ്യത്യാസമില്ലാതെ, ഇന്ദ്രപ്രസ്ഥത്തിലെ പത്രപ്രവര്‍ത്തകരെ വിളിച്ചുകൂട്ടി മനസ്സിലാക്കിക്കുന്നതില്‍ പ്രധാനിയാണ് അദ്ദേഹം.

അഭിഷേക് പത്രക്കാരോട് പറയുന്നത് കേട്ട് അതേപടി ആവര്‍ത്തിക്കുകയും അതിനനുസരിച്ച് പ്രവര്‍ത്തിക്കുകയുമാണ് രമേശ് ചെന്നിത്തല അടക്കമുള്ളവര്‍ ചെയ്യേണ്ടത്.

പക്ഷേ അഭിഷേക് കെ പി സി സി അധ്യക്ഷ കസേരയില്‍ അഭിഷിക്തനായിരിക്കുന്ന രമേശ് ചെന്നിത്തലയെയും പ്രതിപക്ഷ നേതാവ് സ്ഥാനം അലങ്കരിക്കുന്ന ഉമ്മന്‍ചാണ്ടിയെയും കുരുക്കഴിയാത്ത കെണിയില്‍പ്പെടുത്തിക്കളഞ്ഞു.

''വാളെടുക്കുന്നവരെല്ലാം വെളിച്ചപ്പാടെന്നപോലെ, മേളമേറ്റും പ്രഭുക്കന്‍മാരെന്ന ഭാവം ചിലര്‍ക്കുണ്ട്'' എന്ന് നന്നായറിയാവുന്ന അഭിഷേക് സിംഗ്‌വി ചെന്നിത്തലയെയും ചാണ്ടിയെയും വാളെടുക്കുന്നവരെല്ലാം വെളിച്ചപ്പാടല്ല എന്നോര്‍മ്മിപ്പിച്ചുകൊണ്ട് ഒരു ചെയ്ത്തു നടത്തി.

ലോട്ടറി മാഫിയയ്ക്കും ഒറ്റ ലോട്ടറിയ്ക്കും പേപ്പര്‍ ലോട്ടറിയ്ക്കും വേണ്ടി എന്നും നിലകൊണ്ടത് ചെന്നിത്തലയുടേയും ചാണ്ടിയുടേയും കോണ്‍ഗ്രസാണ്.

തദ്ദേശ സ്വയംഭരണ തിരഞ്ഞെടുപ്പ് വേളയില്‍, ആയുധരഹിതരായി നിലകൊള്ളുന്ന യു ഡി എഫിന് മുനയില്ലാത്തതാണെങ്കിലും ഒരു അമ്പ് വേണമായിരുന്നൂ.
അതിന് ലോട്ടറിയില്‍ ചാരി ഒരു ആക്ഷേപം ഉന്നയിച്ചു.
എറിഞ്ഞത് തിരിച്ചു മാറില്‍ പതിക്കുന്ന അവസ്ഥയിലായി പുളയുകയാണ് പാവം കോണ്‍ഗ്രസും പാവം പാവം ചാണ്ടിയും ചെന്നിത്തലയും സതീശനും.

വ്യാജ ലോട്ടറി മാഫിയയെ നിയന്ത്രിക്കുവാനും നിരോധിക്കുവാനും സംസ്ഥാന സര്‍ക്കാരുകള്‍ക്ക് അധികാരമില്ലാത്ത വിധം കേന്ദ്ര ലോട്ടറി നിയമം ഭേദഗതി ചെയ്തതും, പുതിയ ചട്ടങ്ങള്‍ ആവിഷ്‌ക്കരിച്ചതും പലയാവര്‍ത്തി ധനമന്ത്രിയും എല്‍ ഡി എഫ് നേതാക്കളും ചൂണ്ടിക്കാട്ടി.

'കേള്‍ക്കുന്നില്ലല്ലോ, ഞങ്ങള്‍ ഒന്നും കേള്‍ക്കുന്നില്ലല്ലോ' എന്ന മട്ടിലായിരുന്നൂ കോണ്‍ഗ്രസ്-യു ഡി എഫ് േനതൃത്വങ്ങള്‍.
കേട്ടാലറിയാത്തവര്‍ കൊണ്ടാലറിയും എന്നു പറഞ്ഞതുപോലെ ഇപ്പോള്‍ അവര്‍ എല്ലാം അറിയുന്നു.
കയ്യില്‍ പുണ്ണുകാണാന്‍ കണ്ണാടി വേണ്ടെന്ന പ്രമാണം ഓര്‍മ്മിച്ച് അവരാകെ കൈപ്പത്തികള്‍ നിവര്‍ത്തിവെച്ച് പുണ്ണുകണ്ട് വ്യസനിക്കുന്നു.

ഭൂട്ടാന്‍, സിക്കിം ലോട്ടറികള്‍ക്കെതിരായും വ്യാജ ലോട്ടറി മാഫിയയ്‌ക്കെതിരായും മാറുവിരിച്ചു നിന്ന് പൊരുതുന്നവര്‍ തങ്ങള്‍ മാത്രമാണെന്ന് ജനങ്ങളെ വിശ്വസിപ്പിക്കുവാനായിരുന്നൂ ചെന്നിത്തലയാദികളുടെ അഭ്യാസ പ്രകടനങ്ങള്‍.

ലോട്ടറി മാഫിയയ്ക്കുവേണ്ടി മുന്‍ധനമന്ത്രിയും ഇപ്പോഴത്തെ ആഭ്യന്തരമന്ത്രിയുമായ പി ചിദംബരം കോടതിയില്‍ വന്ന് വാതോരാതെ വാദിച്ചത് ചെന്നിത്തലമാരും ചാണ്ടിമാരും മറന്നു.
ചിദംബരത്തിന് മന്ത്രിക്കസേര കിട്ടിയപ്പോള്‍ അദ്ദേഹത്തിന്റെ പ്രിയതമ നളിനി ചിദംബരം കറുത്ത കോട്ടണിഞ്ഞ് കോടതിയിലെത്തിയതും മറന്നു.
മണികുമാര്‍ സുബ്ബ എന്ന ലോട്ടറി മാഫിയാ രാജാവ് കോണ്‍ഗ്രസ് നേതൃനിരയില്‍ പ്രവര്‍ത്തിക്കുന്നതും മറന്നു.
മറവി ഒരനുഗ്രഹമാണെന്ന് ഉമ്മന്‍ചാണ്ടിയ്ക്കും ചെന്നിത്തലയ്ക്കും മറ്റു കോണ്‍ഗ്രസ് നടന്‍മാര്‍ക്കും വ്യക്തമായി അറിയാം.

പക്ഷേ സിംഗ്‌വി പറ്റിച്ചുകളഞ്ഞു.

ലോട്ടറി മാഫിയയ്ക്കു വേണ്ടി അഭിഷേക് സിംഗ്‌വി കേരള ഹൈക്കോടതിയിലെത്തി.

അന്യ സംസ്ഥാന ലോട്ടറി മാഫിയകള്‍ക്കെതിരായി അതിശക്തമായ നിലപാടെടുക്കുന്ന കേരള സര്‍ക്കാരിനെതിരെ അദ്ദേഹം പോരാടി.
മേഘ ഡിസ്ട്രിബ്യൂട്ടേഴ്‌സിനു വേണ്ടി സിംഗ്‌വി തുപ്പല്‍ തൊടാതെ വാദിച്ചു. സംസ്ഥാന സര്‍ക്കാരുകള്‍ക്ക് ഇതിനൊന്നും അധികാരമില്ലെന്നു സ്ഥാപിച്ചു.
ലോട്ടറി മാഫിയയ്ക്ക് അനുകൂലമായ വിധി സമ്മാനിച്ചു കൊടുക്കുകയും ചെയ്തു.

സംസ്ഥാന സര്‍ക്കാരിനാണ് അധികാരം എന്നു പറഞ്ഞു നടക്കുകയും സംവാദത്തില്‍ ഏര്‍പ്പെടുകയും ചെയ്തവരുടെ മാറില്‍ തളയ്ക്കുന്ന അമ്പാണ് സിംഗ്‌വി എയ്തുവിട്ടത്.

'അമ്പേല്‍ക്കാത്തവരാരുമില്ല' എന്ന മട്ടില്‍ കോണ്‍ഗ്രസ് കൂടാരം പുളയുന്നത് കാണുമ്പോള്‍ അവരാടിയ നാടകത്തെയോര്‍ത്ത് ജനം ചിരിച്ചു മലര്‍ക്കുന്നു.

ലോട്ടറി മാഫിയയ്ക്കായി സിംഗ്‌വി വാദിക്കാന്‍ വന്നത് ചെന്നിത്തലയും, പി.ടി. തോമസും വന്ന അതേ വിമാനത്തില്‍.
ഡല്‍ഹിയിലെ വി.ഐ.പി മുറിയിലിരുന്നു എന്തിനു വരുന്നുവെന്ന് ആരാഞ്ഞറിയുകയും, വിവരം അറിഞ്ഞപ്പോള്‍ ചെന്നിത്തല ആനന്ദിക്കുകയും ചെയ്തുപോല്‍.

വിവാദമായപ്പോള്‍ കൊച്ചിയിലേയ്ക്കുള്ള വരവില്‍ സിംഗ്‌വിയെ കണ്ടതേയുളളൂ, ഒന്നും കേട്ടില്ലെന്ന് ചെന്നിത്തല.

വിമാനത്താവളത്തില്‍ വെച്ച് എല്ലാം ചോദിച്ചറിഞ്ഞെന്നും മേഘയ്ക്കും സാന്‍ഡിയാഗോയ്ക്കും വേണ്ടി വാദിക്കരുതെന്നും ആവശ്യപ്പെട്ടതായി പി ടി തോമസ്. വിവരങ്ങളാകെ ഉമ്മന്‍ചാണ്ടിയെയും ചെന്നിത്തലയെയും അപ്പോള്‍ തന്നെ അറിയിച്ചുവെന്നും തോമസ്.

പക്ഷേ സിംഗ്‌വി വാദിച്ചു, ലോട്ടറി മാഫിയയ്ക്ക് വിജയം സമ്മാനിച്ചു.

എന്നിട്ട് വിജയസ്മിതത്തോടെ മടങ്ങി.

എന്നിട്ടും കേരളത്തിലെ കോണ്‍ഗ്രസ് കൂത്ത് നടത്തുന്നു.

സിനിമകളിലെ ഫലിതങ്ങളേക്കാള്‍ വന്‍ഫലിതങ്ങള്‍ സാമൂഹ്യ-രാഷ്ട്രീയ രംഗത്ത് സൃഷ്ടിക്കുവാനാവും എന്നു തെളിയിക്കുന്നതിന് പ്രത്യേക പുരസ്‌കാരം ഏര്‍പ്പെടുത്തേണ്ടതാണ്.

ഭൂട്ടാന്‍ സര്‍ക്കാരിന്റെ വക്കീലാണ് താനെന്ന് സിംഗ്‌വി അവകാശപ്പെട്ടു.

പക്ഷേ ഹോട്ടല്‍ മുറിയിലെ വാസത്തിനും സമൃദ്ധമായ ഭക്ഷണത്തിനും എന്തിന് കുടിവെള്ളത്തിനു പോലും പൈസ നല്‍കിയത് സാന്‍ഡിയോഗോ മാര്‍ട്ടിന്‍.

അതു വെളിച്ചത്തായപ്പോള്‍ അഭിഷേക് സിംഗ്‌വിക്കെതിരെ നടപടി വേണമെന്ന് കേരളത്തിലെ കോണ്‍ഗ്രസ്, ഹൈക്കമാന്‍ഡിനോട് ആവശ്യപ്പെട്ടുപോലും.

പ്ലീസ്, ചെന്നിത്തല, ഇങ്ങനെ തമാശ പറഞ്ഞു ചിരിപ്പിക്കുരുത്.

''വേഷങ്ങള്‍ കണ്ടു രസിക്കും ചില ജനം
ഘോഷങ്ങള്‍ കണ്ടു രസിക്കും ചില ജനം''

എന്ന് കുഞ്ചന്‍ നമ്പ്യാര്‍ പാടിയത് ഓര്‍മ്മിച്ച് സമാധാനിക്കാം.

=================================
(2010-10-04)

2010, സെപ്റ്റംബർ 18, ശനിയാഴ്‌ച

ഹോം ഹ്രീം നീരാളി നമഹ:

നമുക്കിപ്പോള്‍ ഒരു പുതിയ തിരുമാലിപ്പണിക്കുകൂടി വഴി തുറന്നിരിക്കുന്നു.
ധാരാളം പണം സമ്പാദിക്കാവുന്ന വഴിയാണ്.
ഒരു തരം മന്ത്രവാദമാണ് സംഗതി.
പക്ഷേ, പൂണൂലിട്ട ആരും മത്സരിക്കാന്‍ വരില്ല എന്ന മെച്ചമുണ്ട്. കാരണം, മീന്‍ തൊട്ടു കൂട്ടണം!

വടക്കേ ഇന്ത്യയിലേയ്ക്ക് ഒരു യാത്ര ചെയ്യണമെന്നിരിക്കട്ടെ.
വണ്ടി ഓടുമോ, കൊങ്കണില്‍ മണ്ണിടിയുമോ, തീവ്രവാദികളോ നക്‌സലൈറ്റുകളോ ആപത്തുണ്ടാക്കുമോ, വണ്ടിയില്‍ ആഹാരം കിട്ടുമോ, കിട്ടിയാലുമത് ഭക്ഷ്യവിഷബാധ ഉണ്ടാക്കുമോ എന്നിങ്ങനെ നൂറായിരം ചോദ്യങ്ങള്‍ ഉദിക്കുന്നു.

വിമാനമാണെങ്കില്‍ റണ്‍വേ കഴിഞ്ഞാണോ ഇറങ്ങുക. പെട്ടി കയറ്റുന്ന അറയില്‍ തീയുണ്ടാകുമോ എന്നിങ്ങനെയും.

കല്യാണത്തീയതി നിശ്ചയിച്ച് താലി കെട്ടാന്‍ ഗള്‍ഫില്‍നിന്നു വന്ന ചെറുപ്പക്കാരന്‍ മുംബൈയിറങ്ങി കൊങ്കണില്‍ യാത്ര ചെയ്ത് വഴിയില്‍ വീട്ടിലേയ്ക്കു വിളിക്കുകയും തൊട്ടടുത്ത നിമിഷം മുതല്‍ അപ്രത്യക്ഷനാവുകയും ചെയ്ത സംഭവവും ഉണ്ട്.

അതിനാല്‍ നമ്മുടെ യാത്രയുടെ സുരക്ഷയെപ്പറ്റി ഒരു ഉറപ്പ് കിട്ടാന്‍ എന്തു ചെയ്യും?
മഷിനോട്ടക്കാരെയോ വെറ്റിലജ്യോത്സ്യക്കാരെയോ സമീപിക്കുകയായിരുന്നു അടുത്ത കാലം വരെ പതിവ്. ജ്യോതിഷികളെ സ്ഥിരമായി കാണുന്നവരുമുണ്ട്.
ആപന്നിവാരണയന്ത്രം വാങ്ങി അരയില്‍ കെട്ടുകയും പതിവാണല്ലോ.
എന്നിട്ടും ഈ വക പ്രവചനങ്ങളും ഉറപ്പുകളുമൊക്കെ പലപ്പോഴും പിഴയ്ക്കുന്നു.

ഒട്ടും പിഴയ്ക്കാത്തതാണ് തെളിഞ്ഞതായി പറയപ്പെടുന്ന ഒരു പ്രവചനമുറ നമുക്കിപ്പോള്‍ കണ്ടുകിട്ടിയിട്ടുണ്ട്.
സാക്ഷാല്‍ നീരാളിയെ വെച്ചുള്ള കളി!
ലോകകപ്പിന്റെ ഫലം വരെ കിറുകൃത്യം പ്രവചിച്ച നീരാളിസിദ്ധന്റെ അനേകായിരം ചാര്‍ച്ചക്കാര്‍ ഇപ്പോഴും കടലില്‍ ബാക്കിയല്ലേ?

ഒരു നീരാളിയെ വാങ്ങി കൂട്ടിലെ വെള്ളത്തില്‍ വളര്‍ത്തി അതിന് ആഹാരം കൊടുക്കാന്‍ രണ്ട് തീറ്റപ്പെട്ടിയും ഒരുക്കിയാല്‍ പണി തീര്‍ന്നു.
ഒന്ന് രക്ഷപ്പെട്ടി, മറ്റേത് അപായപ്പെട്ടി എന്നു സങ്കല്‍പ്പിക്കുക.
ഏതില്‍നിന്ന് നീരാളിദിവ്യന്‍ ആദ്യം ഭക്ഷിക്കുന്നുവോ അത് സംഭവിക്കും.

ഷെയര്‍മാര്‍ക്കറ്റിലെ അനിശ്ചിതത്വത്തില്‍ മുങ്ങിപ്പൊങ്ങി വിഷമിക്കുന്നവര്‍ക്ക് ഇതിലേറെ വലിയ ഒരു പിടിവള്ളി ഉണ്ടാകാനില്ല.
ഏത് ഷെയറിന്റെയും വിലയില്‍ ഏറ്റമോ ഇറക്കമോ വരുന്ന കാര്യം നീരാളിത്തമ്പുരാന്‍ പ്രവചിച്ചു തരും.

മീന്‍ പിടിക്കാന്‍ പോകുന്നവര്‍ ഇപ്പോള്‍ ചെമ്മീനോ നെയ്മീനോ ഒന്നുമല്ല പ്രധാനമായും അന്വേഷിക്കുന്നത്, നീരാളിയെ ആണത്രേ.
ജീവനോടെ കരയില്‍ കൊണ്ടുവന്നു കൊടുത്താല്‍ ലക്ഷങ്ങള്‍ കിട്ടുംപോലും!
വലിപ്പം കൂടുന്തോറും വിലയും കൂടും.

ഒരു കുഴപ്പമേ ഉള്ളൂ.

പിണങ്ങിയാല്‍ നീരാളി കറുത്ത മഷി വെള്ളത്തിലേയ്ക്ക് വിസര്‍ജിച്ച് ആകെ കലക്കി ചുറ്റുമുള്ള ഒന്നും കാണാതെയാക്കും.

അതിനാല്‍ പിണക്കാതെ വേണം ജ്യോത്സ്യം.

ജ്യോത്സ്യം അഥവാ പിഴച്ചാലും തല്ലു കിട്ടുക നീരാളിക്കാവുമെന്ന മെച്ചവുമുണ്ട്.

ഹോം ഹ്രീം നീരാളി നമഹ:...

===========================

2010-08-17

നെഹ്രു കുട്ടികളെ വഴിതെറ്റിക്കുമ്പോള്‍ കെ എസ്‌ യു ക്കാര്‍ അടങ്ങിയിരിക്കുമോ?

അറിവിലും വായനയിലും വല്യ കൊണ്ഗ്രെസ്സുകാരെയും,കുഞ്ഞു കെ എസ് യുക്കാരെയും വെല്ലാന്‍ കഴിയുന്ന ഒരു കുട്ടരുമില്ല.
മലയാളത്തില്‍ മാത്രമല്ല, സര്‍വ്വ ഇന്ത്യന്‍ഭാഷകളിലും ആരുമാരുമേ ഇന്നേവരെ ഉണ്ടായിട്ടില്ല.
മഹാഭാരതം മുതല്‍ മനോരമവാരിക വരെ വായിച്ചും,ഗ്രഹിച്ചും,ആനന്ദം കൊള്ളുന്നവര്‍ ആണവര്‍.
ഋഗ്വേദം മുതല്‍ പൂമ്പാറ്റ വരെ, ബ്രഹാതാരന്യകോപനിശത്തു മുതല്‍ നിങ്ങള്ക്ക് ഇഷ്ട്ടപ്പെട്ട ചലച്ചിത്ര ഗാനങ്ങള്‍ വരെ, ഖുറാന്‍ മുതല്‍ വീക്ഷണം പത്രത്തിന്റെ പ്രാദേശികപേജു വരെ, ബൈബിള്‍ മുതല്‍ ഇടയലേഖനം വരെ, രാമായണം മുതല്‍ ഒന്നാംക്ലാസ്സ് പാഠപുസ്തകം വരെ കൊണ്ഗ്രെസ്സുകാരുടെ കണ്ണെത്തും.
വ്യാസന്‍ മുതല്‍ ചെന്നിത്തല വരെയും, വാല്മീകി മുതല്‍ ഹസ്സന്‍ വരെയും, നെഹ്‌റു മുതല്‍ ബന്നി ബഹനാന്‍ വരെയും അവര്‍ വായിച്ചറിഞ്ഞിട്ടുണ്ട്.

ഈ വിധം മഹാസാഗരം പോലെ നിറഞ്ഞു തുളുമ്പുന്ന അറിവിന്റെ ഭാരം കൊണ്ട്, നടക്കാനും,ഇരിക്കാനും, കിടക്കാനും, പെടാപാട് പെടുന്നവര്‍ക്കാണ്, ഏഴാം ക്ലാസ്സിലെ പാഠപുസ്തകം വായിക്കുവാനും,അറിയുവാനും പ്രയാസം.

വായിച്ചു....... അറിഞ്ഞു.......

സെക്രെട്ടെരിയെട്ടിന്റെ മതില്‍ ചാടിക്കടന്നു, പള്ളിക്കുടത്തില്‍ ഇരച്ചു കയറി, പാവം സ്കൂള്‍ കുട്ടികളെ ആശുപത്രിയിലാക്കി, അധ്യാപികമാരെ ഓടിച്ചു തള്ളിയിട്ടു, പോലീസുകാരുടെ മുഖം അടിച്ചു പരത്തി....

തികച്ചും ഗാന്ധിയന്‍ വഴികളിലൂടെയുള്ള ഉദാത്തമായ സമരം.

ഗാന്ധിയെപ്പോലെ തന്നെ സഹിഷ്ണുതയും,ത്യാഗസന്നദ്ധതയുമുള്ളത് കൊണ്ട് സഹിച്ചും,ത്യജിച്ചും,സമരമനുഷ്ടിച്ചു.

ധീരതയും, നിര്‍ഭയത്വവും, ജന്മസിദ്ധമായത് കൊണ്ട് പോലീസുകാരെയും, അധ്യാപകരെയും, കുട്ടികളെയും തല്ലിയതിന് ശേഷം ഖദര്‍മുണ്ടുയര്‍ത്തിപ്പിടിച്ചു ഓടി രക്ഷപ്പെടും.

കുട്ടിനു ഇമ്മിണി വല്യനേതാകന്മാര്‍ ധാരാളമുണ്ട്.

കെ.എസ്യു.ക്കാരെ തല്ലിച്ചതച്ചെന്നു കരഞ്ഞു നിലവിളിച്ചു,പത്രസമ്മേളനം നടത്തുവാനും, ചാനല്‍ ചര്‍ച്ചകള്‍ നയിക്കുവാനും, ഉച്ചക്ക് ഒരു മണി വരെ ഉപവാസമിരിക്കുവാനും,കെ.കരുണാകരന്‍ മുതല്‍ ജോസഫ്‌ വാഴയ്ക്കന്‍ വരെയുണ്ട്.

തീര്‍ന്നില്ല കുട്ടുകാര്‍,...പുരോഹിതരും,സാമുദായിക സംഘടനകളുമുണ്ട്‌.

പിന്നെ മുന്‍പില്‍ നോക്കേണ്ട കാര്യമെന്തിരിക്കുന്നു?


"തനിക്കു വേണ്ടി ഇഷ്ട്ടപ്പെടുന്നതെല്ലാം, സഹോദരന് വേണ്ടിയും ഇഷ്ട്ടപ്പെടുക. തനിക്കു വേണ്ടി ഇഷ്ട്ടപ്പെടാത്തതെല്ലാം സഹോദരന് വേണ്ടിയും ഇഷ്ട്ടപ്പെടാതിരിക്കുക." എന്ന നബിവചനം, ഏഴാം ക്ലാസ്സിലെത്തിയ കുട്ടികളെ പഠിപ്പിക്കുന്നത്‌ മതനിഷേധം ആണെന്ന് കോണ്‍ഗ്രെസ്സുകാരെപ്പോലെ തന്നെ മുസ്ലിം ലീഗുകാര്‍ക്കും, ഇതര മുസ്ലിംസംഘടനകള്‍ക്കും അറിവുള്ളതാണ്.

"മറ്റുള്ളവര്‍ നിങ്ങളോട് എങ്ങനെ പ്രയൂമാരനമെന്നു നിങ്ങള്‍ ആഗ്രഹിക്കുന്നുവോ, അത് പോലെ അവരോടും പെരുമാറുക". എന്നാ ബൈബിള്‍ വാക്യം പുസ്തകത്തില്‍ ഉള്‍ചേര്‍ത്തത് വലിയ പാതകമാണെന്ന് ഉമ്മന്‍ ചാണ്ടിക്കും,കെ എം മാണിക്കും, പി പി തങ്കച്ചനും മനസ്സിലാവാതിരിക്കാന്‍ മാത്രം ബുദ്ധിക്കുറവു ഒന്നുമില്ല.

ഈ ഒരൊറ്റ വാക്യത്തിലുടെ വ്രണപ്പെട്ടു പോകുന്ന മതവികാരത്തെ കുറിച്ചറിയാന്‍ വൈദികര്‍ക്കു അഞ്ചു നിമിഷം പോലും വേണ്ടതില്ല.

"നിനക്ക് അഹിതമായത് എന്തോ, അത് അന്യനും അഹിതം ആണെന്ന് ധരിക്കണം. ഇതാണ് ധര്‍മ്മത്തിന്റെ സാരം" എന്ന മഹാഭാരതത്തിലെ വാക്യം മത വികാരങ്ങളെ പിടിച്ചുലയ്ക്കുന്നതാണെന്ന് കരുണാകരനും, ചെന്നിത്തലക്കും, ബാലകൃഷ്ണ പിള്ളക്കും, ആര്‍ എസ് എസ് ക്കാര്‍ക്കും അറിവുള്ളതാണ്.

ഇത്ര കഠിനവും ക്രൂരവുമായ നിലയില്‍ മത വികാരങ്ങളെ അടിച്ചമര്‍ത്താന്‍, ഏഴാംക്ലാസ്സിലെ പാഠപുസ്തകത്തെ ഉപയോഗിച്ചാല്‍ തിളയ്ക്കാതിരിക്കാന്‍ കോണ്‍ഗ്രസുകാരുടെ രക്തം പച്ചവെള്ളം ഒന്നുമല്ല.
ലീഗുകാരുടെ ബുദ്ധി തണുത്തുറഞ്ഞു പോയിട്ടൊന്നുമില്ല.
കേരള കൊണ്ഗ്രെസ്സുകാരുടെ മനസ്സ് റബ്ബര്‍ പോലെ ചുരുങ്ങിപ്പോയിട്ടുമില്ല....

കൊടിയെടുത്തു,...
പിന്നെ വടിയെടുത്തു,...
മൂര്‍ച്ചയേറിയ കരിങ്കല്‍ ചീളുകള്‍ എടുത്തു.

കേരളം ഇന്നേ വരെ കണ്ട ഏറ്റവും ബീഭത്സമായ നരനായാട്ട് ആണിതെന്ന കാര്യത്തില്‍ ഐക്യരാഹിത്യമുന്നണിക്ക്‌ തര്‍ക്കമില്ല.

തങ്ങളുടെ ഭരണകാലത്ത് എന്തായിരുന്നു വിശേഷം!...

സമരത്തിന്‌ വരുന്നവര്‍ക്ക് ലഡുവും, ജിലെബിയുമായാണ് ആന്റണിയുടെയും, ഉമ്മന്‍ ചാണ്ടിയുടെയും, പോലിസ് കാത്തു നിന്നത്.
വിദ്യാഭ്യാസ വ്യാപാരത്തിനെതിരെ ശബ്ദിച്ച വിദ്യാര്‍ഥികള്‍ക്ക് ആണ്‍-പെണ്‍ വ്യത്യാസമില്ലാതെ തലോടലാണ് നല്‍കിയിരുന്നത്.
മുദ്രാവാക്യം വിളിക്കുന്നവര്‍ക്ക് കേരളത്തിന്റെ ചരിത്രത്തില്‍ ആദ്യമായി ഗ്രനേഡ് സമ്മാനിച്ചതൊന്നും ഓര്‍മ്മിക്കരുത്. വൈദ്യുത ലാത്തി കൊണ്ട് ഗുഹ്യഭാഗത്ത്‌ പ്രയോഗം നടത്തി മര്‍ദിച്ചത് മറന്നേക്കണം.
ബുട്ടുകളും, തോക്കിന്റെ, പാത്തികളും കൊണ്ട് മര്മ്മഭാഗങ്ങളില്‍ പ്രയോഗം നടത്തിയത് സ്നേഹം മൂത്തിട്ടാനെന്നു മനസ്സിലാക്കണം.

വൈദ്യുതി നിരക്കിന്റെ അസാധാരണമായ വര്ധനവിനെതിരെയും, കുട്ടികള്‍ പഠിക്കാന്‍ നിര്‍വാഹമില്ലാതെ ആത്മഹത്യ ചെയ്യാന്‍ തുടങ്ങിയപ്പോഴും, കൊടിപിടിച്ച പെണ്‍കുട്ടികളെ തെരുവില്‍ ചവിട്ടിയരച്ചത് മനുഷ്യത്വത്തില്‍ അടിയുറച്ചു വിശ്വസിച്ചത് കൊണ്ടാണ്.

"എല്ലാ മതങ്ങളും മനുഷ്യ നന്മയെ ലക്‌ഷ്യം ആക്കുന്നു. സഹിഷ്ണുതയോടെ ജീവിക്കാന്‍ പ്രേരിപ്പിക്കുന്നു. വിവിധ മതവിഭാഗങ്ങളില്‍ പെടുന്ന ജനങ്ങള്‍ ഒന്നിച്ചു ചേര്‍ന്ന് പ്രവര്‍ത്തിക്കുന്ന അനവധി സന്ദര്‍ഭങ്ങള്‍ നമുക്ക് കാണാനാകും". എന്നൊക്കെ പാഠപുസ്തകത്തില്‍ എഴുതി വെയ്ക്കുന്നത് മതങ്ങള്‍ക്ക് നേരെയുള്ള വെല്ലുവിളി ആണെന്ന് ഉമ്മന്‍ ചാണ്ടിയും, കുഞ്ഞാലികുട്ടിയും പറഞ്ഞു തന്നാല്‍ തെറ്റുണ്ടാകില്ലെന്നു കെ.എസ്.യുക്കാര്‍ക്കറിയാം.

നെഹ്‌റു പറഞ്ഞ കാര്യങ്ങള്‍ പാഠപുസ്തകത്തില്‍ ഉള്‍ചേര്‍ത്ത പോലെ ഒരു മഹാപാതകം മറ്റൊന്നിനി ചെയ്യാനില്ല.

"എന്റെ മരണശേഷം എനിക്കായി മതപരമായ യാതൊരു കര്‍മ്മങ്ങളും നടത്തണമെന്ന് എനിക്കാഗ്രഹമില്ലെന്നു ഉള്ളഴിഞ്ഞു പ്രഖ്യാപിക്കാന്‍ ഞാന്‍ അഭിലഷിക്കുന്നു" എന്നൊക്കെ നെഹ്‌റു പറഞ്ഞത് പഠിപ്പിച്ചു കുട്ടികളെ വഴി തെറ്റിക്കാന്‍ നോക്കിയാല്‍, വടിയെടുത്തു തല്ലാതിരിക്കാനും, ഖദര്‍ മുണ്ട് മാടിക്കെട്ടി പുലഭ്യം പറയാതിരിക്കാനും കഴിയില്ല.
നെഹ്രുവും, ഗാന്ധിജിയുമൊക്കെ പറഞ്ഞ കാര്യങ്ങള്‍ തലമുറകളെ വഴി തെറ്റിക്കുമെന്ന കാര്യത്തില്‍ ബുദ്ധിയും, പാണ്ഡിത്യവും ഉത്തരോത്തരം വളര്‍ന്നു കൊണ്ടിരിക്കുന്ന കൊണ്ഗ്രെസ്സുകാര്‍ക്ക് അശേഷം സംശയം ഇല്ല.

"അടങ്ങുകില്ലിനി, ഒതുങ്ങുകില്ലിനി"
എന്ന് ചെന്നിത്തല മാത്രമല്ല പറയുന്നത്.,
ചോര ചിന്തിയും പോരുതണമെന്നു ഇടയലേഖനത്തിലൂടെ പള്ളിവളപ്പില്‍ നിന്ന് ദൈവവാക്യം ഉയര്‍ന്നിട്ടുണ്ട്. മുട്ടുമടക്കില്ലെന്ന് പുത്തന്‍ പ്രവാചകരും അറിയിച്ചിട്ടുണ്ട്.

ഇടയലേഖനങ്ങള്‍ക്കും, ശാസനകള്‍ക്കും, ഉദ്ഘോഷനങ്ങള്‍ക്കും കുറച്ചു കാലമായി ഒട്ടും തന്നെ വില കല്‍പ്പിക്കുന്നില്ല കുഞ്ഞാടുകള്‍.
അതങ്ങനെയായാലും,ഇടയലേഖനമിറക്കി കുഞ്ഞാടുകളെ ഉല്‍ബുദ്ധരാക്കാതിരിക്കാന്‍ കഴിയില്ല.

പാഠപുസ്തകങ്ങളോടും, മറ്റ് ഗ്രന്ഥങ്ങളോടും പണ്ടേക്കുപണ്ടേ പ്രിയമേറിയത് കൊണ്ട് പാഠപുസ്തകം കീറിയേറിയലും, ചവിട്ടി മെതിക്കലും തുടര്‍ന്നും നടക്കും.
ഏഴാം ക്ലാസ്സിലെ സാമുഹ്യശാസ്ത്ര പാഠപുസ്തകം മാത്രമല്ല, എല്ലാ ക്ലാസ്സുകളിലെയും,എല്ലാ പാഠപുസ്തകങ്ങളും പിന്‍വലിച്ചു., "വീക്ഷണം", "ചന്ദ്രിക" എന്നിത്യാദി പത്രങ്ങളും, ഉമ്മന്‍ ചാണ്ടിയുടെയും,കരുണാകരന്റെയും, ആര്യാടന്റെയും,ചെന്നിത്തലയുടെയും, കുഞ്ഞാലികുട്ടിയുടെയും, ബാലകൃഷ്ണപിള്ളയുടെയും മഹദ് വചനങ്ങളും, പ്രവര്‍ത്തിമാഹാത്മ്യവും പഠിക്കുകയും ചെയ്യുന്ന കാലത്ത് മാത്രമേ, ശരിയായ വിദ്യാഭ്യാസ സമ്പ്രദായം രൂപപ്പെട്ടു വരുകയുള്ളു.

അതിനാല്‍ വ്യാസനും, വാല്മീകിയും,നബിയും, ക്രിസ്തുവും,ഗാന്ധിജിയും, നെഹ്രുവും ഒക്കെ പാഠപുസ്തകങ്ങളില്‍ നിന്ന് ഇറങ്ങി പോയാലേ കെ.എസ്.യുവിലെ ഇളമുറക്കാര്‍ക്കും, കൊണ്ഗ്രെസ്സിലെ മൂത്തമുറക്കാര്‍ക്കും ഇനി ഉറങ്ങാന്‍ കഴിയുകയുള്ളൂ.

============================
ജൂണ്‍ 24, 2008

2010, സെപ്റ്റംബർ 16, വ്യാഴാഴ്‌ച

ചെന്നിത്തലയുടെ ചെന്നിയിലും തലയിലുമുദിച്ച “മനസ്സാക്ഷി വിചാരണ"

"ഊര്ജ്ജസ്വലന് രാഘവന്റെ
യോന്നാമത്തെ പരാക്രമം
കണ്ടത്ഭുതപ്പെട്ടു തമ്പി
ലക്ഷ്മണന് മുനിവര്യനും."

എന്നൊക്കെ ബാലരാമായണത്തില് ആശാന് എഴുതിയിട്ടുണ്ടെന്ന് വായനാ ശീലമുള്ള, കോണ്ഗ്രെസ്സുകാരല്ലാത്ത പലരും പറഞ്ഞു രമേശ് ചെന്നിത്തല കേട്ടിട്ടുണ്ട്.
പക്ഷെ ഉര്ജ്ജസ്വലന്മാരുടെ പരാക്രമപരമ്പരകളും, ഒളിയുദ്ധങ്ങളും കണ്ടും കേട്ടും ഈ വിധം അത്ഭുതപരതന്ത്രനായി പോകുമെന്ന് സ്വപ്നേപി കരുതിയിരുന്നില്ല.

ലക്ഷ്മണന് ജേഷ്ഠന്ആയ ഒരേയൊരു രാഘവന്റെ പരാക്രമം കണ്ടാണ് അതിശയം കുറി നിന്നത്. പല രാഘവന്മാരുടെയും ഒന്നാമത്തെയും, രണ്ടാമത്തെയും, എന്തിനു പതിനെട്ടാമത്തെയും പരാക്രമം കണ്ടു അന്ധാളിച്ചു നില്പ്പാണ് ചെന്നിത്തല.

താടകയെന്ന രാക്ഷസി സുന്ദരിക്ക് നേരെയുള്ള രാമന്റെ പരാക്രമം കണ്ടാണ് ലക്ഷ്മണനും മുനിവര്യനായ വിശ്വാമിത്രനും അത്ഭുതപ്പെട്ടതെങ്കില്, തന്റെ ഹൃദയത്തിലേക്കുള്ള പരാക്രമങ്ങള് കണ്ടാണ് ചെന്നിത്തല അത്ഭുതത്താല് പരതന്ത്രനായതും തളര്ന്നു വീണു പോയതും.

പരാക്രമങ്ങളില് പരമസ്ഥാനം നേടിയ പുര്വ്വചരിത്രമൊക്കെ ചെന്നിത്തലക്കുന്ടെങ്കിലും ഈ പുതിയ പരാക്രമത്തില് നിലം പതിച്ചു പോയി.

ഒരപ്പം നുറായി പകുത്തെടുത്തു കൊടുക്കാന് ആരോ പറഞ്ഞെന്ന് ചെന്നിത്തലയും കേട്ടിട്ടുണ്ട്.

"നാഴിയുരി പാല് കൊണ്ട് നാടാകെ കല്യാണം" എന്ന പാട്ട് ഖദര് അണിയുന്നതിനും, മുഖത്ത് പൌഡര് അടുക്കടുക്കായി പൂശുന്നതിനുമിടയില് ആകാശവാണിയില് നിന്ന് കേട്ടിട്ടുണ്ട്.

പക്ഷെ ഒരു രാജ്യസഭ സീറ്റ്, നുറ് പോയിട്ട്, രണ്ടായിട്ട് പോലും പകുക്കാന് പറ്റുകയില്ലെന്ന് ആര്ക്കാണറിയാത്തത്?

ഇല കഴുകിയും, ഒരേയിലയില്‍ നിന്ന് ഇഡ്ഡലി ഭക്ഷിച്ചും, അടുക്കളയില്‍ കയറിയിറങ്ങിയും, ചെറുപ്രായത്തില്‍ തന്നെ നിയമസഭ കണ്ടിട്ടുണ്ട്.
അപ്പോഴാണ്‌ പെട്ടെന്നൊരു പൂതി വന്നു കുടിയത്‌.
മന്ത്രിസഭയും ഒന്ന് കാണണം.
കാലു തിരുമ്മിയും, മുട്ടിലിഴഞ്ഞും,പ്രായം കുറഞ്ഞ ഗ്രാമവികസന മന്ത്രിയായി. നാടാകെ നടന്നു മണ്‍വെട്ടിയെടുത്തു കാട് വെട്ടുന്ന പരിപാടി ഉദ്ഘാടനം ചെയ്യുന്ന ഒരു നിമിഷത്തെ യജ്ഞത്തിന് ക്യാമറക്കു മുന്നില്‍ അഭിനയിച്ചു.

പിന്നെ ലോക്സഭ കാണണം എന്നായി പൂതി.
കോട്ടയത്ത്‌ നിന്നും ലോക്സഭ കണ്ടു.
പിന്നെ പിന്നെ കോട്ടയംകാര്‍ തോല്‍പ്പിച്ചപ്പോള്‍ മാവേലിക്കരയില്‍ നിന്ന് ലോക്സഭയിലേക്കു പോയി.
അവരും ശരിയായ വിധത്തില്‍ പഠിച്ചപ്പോള്‍ ഇനി ലോകസഭ കാണേണ്ടതില്ലെന്നു നിശ്ചയിച്ചു കളഞ്ഞു. ഇനിമേല്‍ ഏതു കരയില്‍ നിന്നാലും ലോക്സഭയിലേക്കു പഹയന്മാര്‍ അയയ്ക്കില്ലെന്ന് വന്നപ്പോള്‍ രാജ്യസഭയല്ലാതെ മറ്റൊരു ശരണം ഇല്ലെന്ന സ്ഥിതി സംജാതമായി.

രാജ്യസഭയും ഒന്ന് കണ്ടിരിക്കണമല്ലോ...
അങ്ങാടിമരുന്നാണോ പച്ചമരുന്നാണോ അവിടെ വാണിഭം ചെയ്യുന്നതെന്ന്, ചെന്നിയില്‍ തലയിരിക്കുന്നയാള്‍ അറിഞ്ഞില്ലെങ്കില്‍ പിന്നെ മറ്റാരാണ്‌ അറിയുന്നത്.
അതിനു വേണ്ടി മാത്രമാണ് മോഹിച്ചത്, രാജ്യസഭ ഒന്ന് കാണണമെന്ന്.

പണ്ടൊരാള്‍ ലോക്സഭയിലേക്കു ആളുകള്‍ പറഞ്ഞയച്ചിട്ട്, രാജ്യസഭയിലേക്ക് പോയത് പോലെ വഴിമാറി കേറാന്‍ ഒന്നുമല്ല പാട്പെട്ടത്.
കൊണ്ഗ്രെസ്സ് പാര്‍ട്ടിക്ക് ഒരേ ഒരു സീറ്റ്‌ കിട്ടും.
അത് കേരളത്തിലെ പ്രസിഡണ്ട്‌നു അല്ലാതെ മറ്റാര്‍ക്ക് എന്ന് ചിന്തിച്ചു പോയി.

അത് മാത്രമല്ല കാര്യം....

ധ്രിതരാഷ്ട്രര്‍ പാണ്ഡവരോട് അരക്ക് കൊട്ടാരത്തില്‍ ചെന്ന് താമസിക്കുവാന്‍ ഉപദേശിച്ച വേളയില്‍, പറഞ്ഞ വാക്കുകളും അറിയാതെ ഓര്‍മിച്ചു പോയി.

" അവിടത്തില്‍ ചിലര്‍ ചെന്ന് വസിച്ചേ,
ഭവനത്തിനൊരു ഭുതി ഭവിപ്പൂ!"
എന്ന വാക്കുകള്‍. ,

"രാജ്യസഭയ്ക്ക് ഒരു വിധത്തില്‍ ഭൂതി ഭവിപ്പു!", എന്ന വാക്കുകള്‍
എന്നാണ് കേട്ടു പോയത്.

രാജ്യസഭക്ക് ഒരു വിധത്തില്‍ ഭൂതി ഭവിപ്പിക്കണം തന്റെ കടന്നു ചെല്ലലിലൂടെ എന്നാ കലശമായ മോഹം അറിയാതെ പിടി കൂടിപ്പോയി.

എന്തൊരു കഷ്ടമാണിത്?
സന്താപങ്ങള്‍ ഈ വിധം വന്നു കൂടുമെന്ന് ആരുമാരും കണ്ടില്ല.

"എന്തെന്നേതു മറിഞ്ഞില്ലിത് ബത,
ചിന്തിച്ചാല്‍ ബഹു കഠിനം കഠിനം!"
എന്നതു പോലെയായി പിന്നീടുള്ള കാര്യങ്ങള്‍.

എല്ലാവര്ക്കും അസുഖങ്ങള്‍ വന്നു പെടും.
പക്ഷെ ഇങ്ങനെയുമുണ്ടോ ഒരു രോഗബാധ?

"രാജ്യസഭാ മോഹം" എന്നാ മാരക രോഗം താന്‍ ആദ്യക്ഷനായ പാര്‍ട്ടിയില്‍ അതികഠിനമാം വിധത്തില്‍ പടര്‍ന്നു പിടിച്ചിരിക്കുന്നുവെന്ന് ദുസ്വപ്നത്തില്‍ പോലും അറിഞ്ഞിരുന്നില്ല.

"വ്യാധികള്‍ ജീവികള്‍ക്ക്
വരുന്നു പലമട്ടായെല്ലാര്‍ക്കും മഹാമതെ!
ഇല്ലാരുമുടലെടുത്തവരിലെന്നെങ്കിലും
വല്ല രോഗവും വരാതുള്ളവരറിഞ്ഞാലും"
..................
എന്ന് ബുദ്ധ ചരിത്രത്തില്‍ പറഞ്ഞിട്ടുണ്ടെന്ന് കേട്ടിട്ടുണ്ട്.

അത് പല രൂപത്തിലായിരിക്കാം. ഉടലെടുത്തവരാരും ഏതെങ്കിലും രോഗം വരാത്തവരായിരിക്കില്ലെന്നു അറിഞ്ഞു കൊള്ളണമേന്നാണ് മേല്‍ പറഞ്ഞതിന്റെ അര്‍ത്ഥമെന്നു ചെന്നിത്തല അന്വേഷിച്ചു മനസ്സിലാക്കിയിട്ടുണ്ട്.

പക്ഷെ 'രാജ്യസഭാ മോഹം' ശ്രീ ബുദ്ധനോ, ഉത്തരാധുനിക ബുദ്ധന്മാരോ പ്രവചിച്ചിട്ടുള്ള ഒന്നല്ല.

എത്രയെത്ര പേരാണ് സ്വന്തം മോഹം അമിട്ടുവച്ച് തകര്‍ക്കാന്‍ അവരവരുടെ മോഹങ്ങളുമായി രംഗപ്രവേശനം ചെയ്തത്.

പണ്ട് കാലൊക്കെ തിരുമ്മിയത്‌ ശരി തന്നെ. മകനെ മുകളിലിരുത്താന്‍ ശ്രമിച്ചപ്പോള്‍ തന്നെ കാരണവര്‍ക്ക്‌ സന്ദേശം കൊടുത്തതാണ്, തിരുത്തല്‍ സിദ്ധാന്തത്തിലൂടെ.
പക്ഷെ പാഠം പഠിച്ചിട്ടില്ല.
പ്രായമേറെയായെങ്കിലും കാര്യങ്ങള്‍ മനസ്സിലാക്കുവാനുള്ള പ്രായം കാരണവര്‍ക്ക്‌ എത്തിയിട്ടില്ല.
ഡല്‍ഹിയില്‍ ചെന്ന് മകളുമായി തമ്പടിച്ചിരിക്കുകയാണ്. കരുണാകര്‍ജിക്ക് വേണം രാജ്യസഭാസീറ്റ്‌ എന്ന് പറയാന്‍ കുറെ അനുചരന്മാരേയും കൊണ്ടുപോയിട്ടുണ്ട്.

ത്യാഗിയും, നിഷ്കാമ കര്‍മ്മിയുമായ ഒരാള്‍ പൊടുന്നനെ വന്നു പറയുന്നു,ആലപ്പുഴ ലോകസഭ സീറ്റില്‍ വയലാര്‍ രവിക്ക് കണ്ണുണ്ടെങ്കില്‍ താനില്ലെന്ന്.
കേട്ടപ്പോള്‍ വല്ലാത്തൊരു കോരിത്തരിപ്പ് അനുഭവപ്പെട്ടു.
തൊട്ടു പിന്നാലെ ഹൈകമാണ്ടിലേക്ക് ഹൈ വോള്‍ട്ടേജില്‍ ഫാക്സ് അയക്കുകയാണ്.
രാജ്യസഭയോട് പ്രേമം മൂത്തിരിക്കുകയാനെന്ന ഫാക്സ്കള്‍ .

പേരില്‍ സുധീരം എന്നുണ്ട്.
പ്രവൃത്തിയില്‍ ധീരത തെല്ലുമില്ലാത്തത് കൊണ്ട് കുതന്ത്ര പരിപാടികളാണ് കക്ഷിക്ക് പണ്ടേക്കു പണ്ടേ കയ്യിലുള്ളത്.
ഇനി മത്സരിക്കില്ലെന്ന് പരസ്യമായി പറയും; ഹൈകമാണ്ട് നിര്‍ബന്ധിച്ചെന്നും കേണുവീണുവെന്നും പിന്നീട് പറയും.

പിന്നെ പിന്നെ വൈസ് പ്രസിഡന്റ്‌മാരും ജനറല്‍ സെക്രെട്ടരിമാരുമായി ഇരിക്കുന്നവരൊക്കെ രോഗത്തിനടിമപ്പെട്ട്, രാജ്യസഭ എന്ന് പലയാവര്‍ത്തിയുച്ചരിച്ചു
ചുറ്റിലും ഇരിക്കുന്നു.

വിലാപം അറിയാതെ വന്നു ഭവിച്ചു.
പെട്ടെന്ന് ചിന്താവിഷാദമുണ്ടായി.
ഏറെ നേരം ആലോചിച്ചു.

അതിനിടയിലാണ് യൂത്തന്മാരുടെ പ്രമേയം വരുന്നത്.,
"മരിച്ചാലും മാറില്ലേ" എന്ന ചോദ്യവുമായി, "ഞങ്ങള്‍ക്കും വേണം സീറ്റ്‌" എന്ന പ്രഖ്യാപനവുമായി.

തോറ്റു പോയി.
മനസാക്ഷി ചെന്നിയിലും തലയിലും കയറി ഇരുന്നു പറഞ്ഞു.
'പിന്മാറികൊള്ളു , പിന്മാറികൊള്ളു' എന്ന്.

യൂത്തന്മാരുടെ വേദിയില്‍ ചെന്ന് നിന്ന് പറഞ്ഞു,
"അര്‍ഹത എനിക്കാനെങ്കിലും പിന്മാറുന്നുവെന്ന്".
എല്ലാ ചെറുപ്പക്കാര്‍ക്കും സീറ്റ്‌ തരപ്പെടുത്തി തരാമെന്നു പറഞ്ഞപ്പോള്‍ എന്തൊരു കയ്യടിയായിരുന്നു.
എല്ലാവരും ചെന്നിത്തലയെപ്പോലെ നിഷ്കാമ കര്‍മ്മികള്‍.

"നേരു പറഞ്ഞാലതു നേരം പോക്കെന്നിരിക്കു-
മാരും നമുക്കൊരുപകാരം ചെയ്കയുമില്ലാ-"
..............................................എന്നത് പോലെ ഈ പരിക്ഷകളൊന്നും ഒരു ഉപകാരവും ചെയ്യുകയില്ലെന്ന വ്യസനത്തോടെ പാവം ചെന്നിത്തല കഴിഞ്ഞു കൂടുന്നു.

ശുഭാശംസകള്‍.

ഇനിയും രാജ്യസഭ വരാതിരിക്കില്ല.
======================================

ഫെബ്രുവരി 4, 2009

2010, സെപ്റ്റംബർ 4, ശനിയാഴ്‌ച

വെളിയം പറഞ്ഞതും ചാനലുകള്‍ പ്രചരിപ്പിച്ചതും

ഇതാണ് പുതിയകാലത്തെ മാധ്യമപ്രവര്‍ത്തനം.
മാധ്യമസംസ്‌കാരത്തെകുറിച്ച് തിരിച്ചറിവുള്ളവരെയാകെ അന്ധാളിപ്പിക്കുന്ന വിധത്തിലാണ് ഇക്കഴിഞ്ഞ ദിവസം ചില മാധ്യമങ്ങള്‍ വെളിയം ഭാര്‍ഗവന്റെ വാക്കുകളെ തങ്ങള്‍ക്ക് ആവശ്യമായ വിധത്തിലും ആഗ്രഹിച്ച നിലയിലും അവതരിപ്പിച്ചത്.

1939 ല്‍ പിണറായിയിലെ പാറപ്പുറത്തുവെച്ച് രൂപീകരിക്കപ്പെട്ട ഇന്ത്യന്‍ കമ്മ്യൂണിസ്റ്റ് പാര്‍ട്ടിയുടെ കേരള ഘടകം ചരിത്രത്തിന്റെ ഭാഗമാണ്. കയ്യൂരിലെയും പുന്നപ്ര-വയലാറിലെയും അന്തിക്കാട്ടെയും ശൂരനാട്ടെയും ഒഞ്ചിയത്തെയും കാവുമ്പായിയിലെയും ഐതിഹാസിക സമരങ്ങളും രക്തസാക്ഷിത്വങ്ങളും ചെറുത്തുനില്‍പ്പുകളും രക്തരൂക്ഷിത സമരങ്ങളും ചരിത്രത്തിന്റെ അനിഷേധ്യ അധ്യായങ്ങളാണ്. ഈ ചരിത്രത്തിന്റെ പിന്തുടര്‍ച്ച അവകാശപ്പെടാന്‍ അര്‍ഹതയുള്ള ജീവിച്ചിരിക്കുന്ന വ്യക്തിത്വങ്ങളുടെ ഉടമയാണ് കെ ആര്‍ ഗൗരിയമ്മയും വെളിയവും.

ഏതാണ്ട് രണ്ടു പതിറ്റാണ്ടിനുമുന്‍പ്, സ്വന്തം പാര്‍ട്ടിയിലെ സംഘടനാ നടപടികളുടെ പേരില്‍ പുറത്തായ ഗൗരിയമ്മ രാഷ്ട്രീയ വിദ്വേഷം തീര്‍ക്കുന്നതിനായി സ്വന്തമായി പാര്‍ട്ടി രൂപീകരിച്ച് യു ഡി എഫില്‍ ചേക്കേറുകയായിരുന്നു. ഒന്നര പതിറ്റാണ്ടുകാലത്തിനു ശേഷം യു ഡി എഫില്‍ അനുഭവിക്കേണ്ടിവന്ന പീഡനങ്ങളുടെ പശ്ചാത്തലത്തില്‍ ഗൗരിയമ്മ പൊട്ടിത്തെറിക്കുന്ന സാഹചര്യം സംജാതമായി. ഒളിവു ജീവിതത്തിന്റെയും കമ്മ്യൂണിസ്റ്റുകാര്‍ക്കു നേരെയുള്ള പീഡനങ്ങളുടെയും കാലത്ത് ഒപ്പം ഉണ്ടായിരുന്ന ഒരു നേതാവ്, റിബലുകളെ നിര്‍ത്തി തന്നെയും തന്റെ പാര്‍ട്ടി പ്രതിനിധികളെയും കോണ്‍ഗ്രസും ഐക്യജനാധിപത്യ മുന്നണിയും തോല്‍പിച്ചുവെന്നും വേറൊരു വഴി നോക്കേണ്ടിവരുമെന്നും പ്രതികരിച്ചപ്പോഴാണ് വെളിയത്തിന്റെ പ്രതികരണം ഉണ്ടായത്. ആ പ്രതികരണം തന്നെ പത്ര പ്രതിനിധികളെ വിളിച്ചുവരുത്തി വെളിയം ഭാര്‍ഗവന്‍ നടത്തിയതായിരുന്നില്ല. ദൃശ്യമാധ്യമ പ്രതിനിധികള്‍ അദ്ദേഹത്തെ സമീപിച്ച് അഭിപ്രായം ആരാഞ്ഞപ്പോഴാണ് അദ്ദേഹം അഭിപ്രായ പ്രകടനം നടത്തിയത്.

ഗൗരിയമ്മയെ ഇടതുമുന്നണിയിലേയ്ക്ക് സ്വീകരിക്കുമോ എന്ന് മാധ്യമ പ്രവര്‍ത്തകര്‍ ചോദിച്ചപ്പോള്‍ അവര്‍ അങ്ങനെ ഒരു ആഗ്രഹം പ്രകടിപ്പിക്കട്ടെ, അപ്പോള്‍ ആലോചിക്കാമെന്ന് വെളിയം മറുപടി നല്‍കി. സി പി ഐയിലേയ്ക്കുള്ള മടക്കത്തെക്കുറിച്ച് ചോദിച്ചപ്പോള്‍ സി പി ഐ അവരുടെ കുടുംബമാണെന്നും ഏത് നിമിഷവും കുടുംബത്തിലേയ്ക്ക് മടങ്ങിവരാമെന്നും വെളിയം പറഞ്ഞു. ഇതിനെ എന്തിനാണ് വിവാദമാക്കുന്നത്? യു ഡി എഫ് പോലെ ഒരു മുന്നണിയ്ക്കകത്ത് വീര്‍പ്പുമുട്ടുന്ന ഗൗരിയമ്മയോട് മാതൃ പ്രസ്ഥാനത്തിന്റെ വാതിലുകള്‍ തുറന്നുകിടക്കുന്നു എന്ന സന്ദേശം നല്‍കുന്നത് അവരോടുള്ള ബഹുമാനം കൊണ്ടും ഇന്നവര്‍ക്കുണ്ടായിരിക്കുന്ന അവസ്ഥയിലെ സഹതാപംകൊണ്ടും കൂടിയാണ്. അവര്‍ വരുന്നെങ്കില്‍തന്നെ അവര്‍ക്കൊപ്പമുള്ളവരെയാകെ സ്വീകരിക്കും എന്ന് കരുതേണ്ടെന്നും ദൃശ്യമാധ്യമങ്ങളോട് വെളിയം ഭാര്‍ഗവന്‍ വ്യക്തതയോടെ പറഞ്ഞിരുന്നു. അവരെ അങ്ങോട്ടുപോയി ക്ഷണിക്കണമെന്നല്ല വെളിയം പറഞ്ഞത്. സി പി ഐ ഓഫീസിലേയ്ക്ക് ഏതു നിമിഷവും വരാമെന്നാണ്.

പാര്‍ട്ടിയിലേയ്ക്ക് വരണമെന്ന് അവര്‍ ആഗ്രഹം പ്രകടിപ്പിച്ചാല്‍ പാര്‍ട്ടി ചര്‍ച്ചചെയ്യും എന്നു മാത്രമേ വെളിയം പറഞ്ഞിട്ടുള്ളൂ. ആവര്‍ത്തിച്ചുള്ള ചോദ്യങ്ങള്‍ക്കും ആഗ്രഹം പ്രകടിപ്പിച്ചാല്‍ പാര്‍ട്ടി ചര്‍ച്ച ചെയ്യുമെന്നാണ് വെളിയം ആവര്‍ത്തിച്ചത്. ഗൗരിയമ്മ ഒരു പോരാളിയാണെന്നും ഭരണ പരിചയമുള്ളയാളാണെന്നും വെളിയം തന്നെ സമീപിച്ച മാധ്യമ പ്രവര്‍ത്തകരോടു പറഞ്ഞതുപോലും ചര്‍ച്ചാ വിഷയമായി. യു ഡി എഫിനാല്‍ അവഹേളിക്കപ്പെടുന്ന ഗൗരിയമ്മയുടെ ഇപ്പോഴത്തെ സ്ഥിതിവിശേഷം തിരിച്ചറിഞ്ഞാണ് മാധ്യമ പ്രവര്‍ത്തകരുടെ ചോദ്യങ്ങള്‍ക്കുത്തരമായി വെളിയം ഇങ്ങനെ പ്രതികരിച്ചത്.

ഗൗരിയമ്മ സി പി ഐ യില്‍ ചേരുമെന്നോ ഗൗരിയമ്മയുടെ ജെ എസ് എസ്, എല്‍ ഡി എഫില്‍ ചേരുന്നതുകൊണ്ട് എല്‍ ഡി എഫിന് എന്തെങ്കിലും മെച്ചമുണ്ടാകുമെന്നോ കരുതിയല്ല വെളിയം പ്രതികരിച്ചത്. യു ഡി എഫ് ഗൗരിയമ്മയെപോലെ ഒരു നേതാവിനെ നിരന്തരം അവഹേളിക്കുന്ന സന്ദര്‍ഭമാണിത്. ഗൗരിയമ്മ ഇനിയും മത്സരിക്കുന്നുവെങ്കില്‍ ആംബുലന്‍സ് കൂടി കൊണ്ടുവരേണ്ടി വരുമെന്ന് ഒരു യു ഡി എഫ് നേതാവ് പരസ്യമായി പത്രസമ്മേളനത്തില്‍ പറഞ്ഞിരുന്നു. ഇത്തരമൊരു അപഹാസ്യമായ നിലയില്‍ ഗൗരിയമ്മ പെട്ടുപോയ സാഹചര്യത്തിലാണ് പത്രപ്രവര്‍ത്തകരുടെ ചോദ്യത്തോട് വെളിയം പ്രതികരിച്ചത്. കോണ്‍ഗ്രസിന്റെയോ യു ഡി എഫിന്റെയോ ഒരു നേതാവും ഗൗരിയമ്മയ്ക്കു വേണ്ടി രംഗത്തു വരുന്നതിനോ, ആംബുലന്‍സ് വേണ്ടിവരുമെന്ന യു ഡി എഫ് നേതാവിന്റെ പ്രസ്താവനയ്‌ക്കെതിരായി പ്രതികരിക്കുന്നതിനോ പ്രത്യക്ഷപ്പെട്ടില്ല. ഗൗരിയമ്മയുടെ നിസ്സഹായാവസ്ഥയുടെ സന്ദര്‍ഭത്തിലാണ് പത്രവര്‍ത്തകര്‍ വെളിയത്തോട് ചോദ്യം ഉന്നയിച്ചത്. ഗൗരിയമ്മയ്ക്ക് ഏതു സമയത്തും സി പി ഐയിലേയ്ക്ക് വരാമെന്നും സി പി ഐ ഓഫീസ് അവര്‍ക്ക് നന്നായി അറിയാമെന്നും വെളിയം പറഞ്ഞു.
സി പി എമ്മില്‍ നിന്ന് ഗൗരിയമ്മ പുറത്താക്കപ്പെട്ടപ്പോള്‍ പി കെ വിയെയും വെളിയത്തെയും കാണണമെന്ന് ദൂതന്‍ വഴി ഗൗരിയമ്മ അറിയിച്ച കാര്യവും പാര്‍ട്ടി ഓഫീസിലേയ്ക്കുള്ള വഴി അവര്‍ക്കറിയാമല്ലോ എന്ന് ഇരുവരും മറുപടി പറഞ്ഞതും വെളിയം അനുസ്മരിച്ചിട്ടുണ്ട്. ഗൗരിയമ്മയെ സ്വീകരിക്കുവാന്‍ കമ്മ്യൂണിസ്റ്റ് പാര്‍ട്ടി മോഹിച്ചുനില്‍ക്കുകയായിരുന്നെങ്കില്‍ അന്നുതന്നെ അവരെ സന്ദര്‍ശിക്കാമായിരുന്നതല്ലേ?
ചാനലുകാര്‍ കേള്‍ക്കുന്നത് മുഴുവന്‍ ശ്രദ്ധയോടെ ഗ്രഹിക്കുകയും പറഞ്ഞതുതന്നെ പ്രേക്ഷകര്‍ക്ക് പകര്‍ന്നുകൊടുക്കുകയും വേണം. അതാണ് മാധ്യമ ധര്‍മ്മം.


പറയുന്ന വാക്കുകള്‍ ആ അര്‍ഥത്തില്‍ പരിഗണിക്കുവാനും മനസ്സിലാക്കുവാനും എല്ലാവര്‍ക്കും കഴിയണം. വെളിയത്തെ രാഷ്ട്രീയം പഠിപ്പിക്കുവാന്‍ പുത്തന്‍ രാഷ്ട്രീയക്കാര്‍ മുതിരുന്നത് സാഹസമാണ്. അവര്‍ രാഷ്ട്രീയ ചരിത്രത്തിലേയ്ക്ക് ഒന്നു തിരിഞ്ഞു നോക്കുവാനുള്ള സന്മനസ്സെങ്കിലും കാണിക്കണം. ഗൗരിയമ്മ വന്നതു കൊണ്ട് സി പി ഐയ്ക്ക് ഒരു നേട്ടവുമില്ല, എല്‍ ഡി എഫിനുമില്ല. അത് വെളിയത്തിന് നിശ്ചയമുള്ളതുപോലെ, അനുഭവ സമ്പന്നതകൊണ്ട് അറിയുന്ന നേതാക്കള്‍ അപൂര്‍വ്വമാണുതാനും. ആ വലിയ സത്യം തിരിച്ചറിയാന്‍ മാധ്യമചര്‍ച്ചാപ്രഭുക്കള്‍ തയ്യാറാവണം.

അടുക്കള ബുദ്ധിജീവികളുടെ വിജയഗാഥ്കള്‍......

ഇന്ത്യ കണ്ട മഹാത്യാഗി ആരാണെന്ന് ചോദിച്ചാല്‍ കൊണ്ഗ്രെസ്സുകാര്‍ക്ക് രണ്ടുവട്ടം ആലോചിക്കേണ്ട കാര്യമില്ല.നിമിഷം വൈകാതെ അവര്‍ ഉത്തരം നല്‍കും.

കൊട്ടാരവും ചെങ്കോലും അന്തപ്പുരവും വിട്ടിറങ്ങി അലഞ്ഞ ഗൌതമ ബുദ്ധന്‍ എന്നോ, സ്വാതന്ത്ര്യ ദാഹത്തിന്റെ രണഭേരി മുഴക്കിയ താന്തിയതോപ്പിയെന്നോ, അര്‍ദ്ധനഗ്ന വേഷം ധരിച്ചു മുട്ടന്‍ വടിയും പിടിച്ചു ഗ്രാമങ്ങളില്‍ അലഞ്ഞ മോഹന്‍ദാസ്‌ കരംചന്ദ്‌ ഗാന്ധിഎന്നോ ഒന്നും പറയാത്തതില്‍ ആരും അസ്വസ്തര്‍ ആകാന്‍ പാടില്ല.

ഇവരെയും ഇവരെപ്പോലെ പരശതം മഹാത്യാഗികളുടെ ത്യാഗത്തെ അതിജീവിക്കുന്ന ത്യാഗം അനുഷ്ട്ടിച്ച ആളുണ്ടെന്നു യുത്ത് കൊണ്ഗ്രെസ്സുകാര്‍ക്ക് അറിയാം.

രാഹുല്‍ ഗാന്ധി.

രാജമാതാവ് വെച്ച് നീട്ടിയ രാജസിംഹാസനം പുല്ലു വിലയോടെ തിരസ്ക്കരിച്ച രാഹുല്‍ ഗാന്ധിയല്ലാതെ മഹാത്യാഗത്തിന്റെ ഹിമാലയം കയറിയ മറ്റേതു വീരസിംഹമുണ്ടിവിടെയെന്നു അഭിമാന വിജ്രംഭിതരായി കൊണ്ഗ്രെസ്സുകാരും യുത്ത് കോണ്‍ഗ്രസുകാരും അലറി ചോദിക്കും.

കേന്ദ്ര മന്ത്രിസഭയില്‍ ചുമ്മാതൊരു നിമിഷത്തില്‍ അഴിപ്പും, പണിയും നടത്തിയപ്പോള്‍ സോണിയഗാന്ധി മോഹിച്ചത് മകന്‍ രാഹുല്‍ ഗാന്ധിയെ മന്ത്രി പദത്തില്‍ ഇരുത്തി സാഫല്യംഅടയണം എന്നായിരുന്നു.
പക്ഷെ മകന്‍ അമ്മയുടെ ഇംഗിതങ്ങള്‍ക്കൊന്നും വഴങ്ങിക്കൊടുക്കുന്ന ആളല്ല.

മന്ത്രിമന്ദിരവും പരിവാരങ്ങളും പ്രൌഡിയും ഒന്നും കണ്ടു മനം മയങ്ങി വീഴുന്നവനല്ല ഈ മഹാ ത്യാഗിയും,പരിത്യാഗിയുമായ പുരുഷന്‍.

അമ്മയുടെ ഇംഗിതം തെല്ലൊരു വേള ആലോചിക്കാതെ മകന്‍ തള്ളികളഞ്ഞു.

മകന് യുത്ത് കൊണ്ഗ്രെസ്സിനെയും, കെ.എസ്‌.യുവിനെയും ശക്തിപ്പെടുത്തണം.നല്ല മസില്‍മാന്മാരായി യുത്തുകാരെയും, വിദ്യാര്‍ഥി യുണിയന്‍കാരെയും പരിവര്‍ത്തനം ചെയ്യേണം.
ആ കരുത്തേറിയ യന്ജ്ജത്തില്‍ മനസ്സും,ശരീരവും,പൂര്‍ണ്ണമായി അര്‍പ്പിച്ചിരിക്കുമ്പോള്‍ മന്ത്രിയാകാനോന്നും മനസ്സിനെയും, ശരീരത്തെയും,കിട്ടുകയില്ല.

അത് കൊണ്ട് അമ്മ ചൊല്ലിയത് കേള്‍ക്കാന്‍ രാഹുലന്‍ നിന്ന് കൊടുത്തില്ല.

അമ്മ തന്നെ അത് പത്രക്കാരോട് വ്യസനത്തോടെ വിളമ്പി.

"ഹോ! എന്റെ മകന്‍ എന്തൊരു മഹാത്യാഗിയാണ്" എന്ന ഭാവം അമ്മയുടെ വദനത്തില്‍ വിളയാടി നിന്നു.

മകനും പറഞ്ഞു "എനിക്ക് നേരമില്ല. അത് കൊണ്ട് മന്ത്രിയാവാന്‍ ക്ഷണിച്ചപ്പോള്‍ ഞാന്‍ പുറം തിരിഞ്ഞു നിന്നു. എനിക്ക് പല വിധ തിരക്കുമുണ്ട്. ഈ തിരക്കുകള്‍ക്കിടയില്‍,മന്ത്രിയായിരിക്കാന്‍ താന്‍ അമാനുഷനോന്നുമല്ലെന്നു വിനയം പ്രകടിപ്പിക്കാനും മറന്നില്ല.

കോണ്‍ഗ്രസ്‌ ഭാരവാഹിയും,മന്ത്രിയും ഒരുമിച്ചായിരിക്കാന്‍ താന്‍ അമാനുഷനല്ലെന്നു രാഹുലന്റെ നിഷ്കളങ്കമാനസത്തില്‍ നിന്നു പൊട്ടിപുറപ്പെട്ടപ്പോള്‍, അമാനുഷന്മാര്‍ കോണ്‍ഗ്രെസ്സിലുന്ടെന്ന പരിഹാസം കൂടിയുണ്ടായിരുന്നുവെന്നു ദോഷൈകദൃക്കുകള്‍ക്ക് തോന്നും.കോണ്‍ഗ്രസ്‌ നേത്രുനിരയിലും പ്രവര്‍ത്തക സമിതിയിലും പ്രവര്ത്തിക്കുന്നതിനോടൊപ്പം മന്ത്രിമാരായിരിക്കുന്ന പ്രണാബ് മുഖര്‍ജിയോടും പുന്ന്യാളരില്‍ പുന്ന്യാളനായ എ.കെ. അന്റോണിയോടുമോക്കെയുള്ള പുച്ച്ചം. ബംഗാളിന്റെ പി സി സി അധ്യക്ഷനായ ദാസ്‌ മുന്‍ഷിയാണ് കേന്ദ്രത്തിലെ ഒരു ക്യാബിനെറ്റ് മന്ത്രി.

അവരൊക്കെ അമാനുഷര്‍ എന്നാ പരിഹാസം പാവം രാഹുലന്റെതായികൊള്ളണമെന്നില്ല. പ്രസംഗം എഴുതി കൊടുത്ത കിച്ചന്‍ ഭുജികളുടെതാകും. കിച്ചന്‍ ബുജികള്‍ക്കും വേണമല്ലോ സ്വന്തം അഭിപ്രായ പ്രകടനങ്ങള്‍ സാധ്യമാകാനുള്ള അവസരങ്ങള്‍.എഴുതി കൊടുത്തത് അപ്പടി കാണാപ്പാഠം പഠിച്ചു പറയുന്ന ബുദ്ധിമാന്മാരും,ത്യാഗ സമ്പന്നരുമാകുമ്പോള്‍ അവര്‍ക്ക് അവരുടെ വഴി തുറന്നു കിട്ടും.

ഇതാദ്യമായോന്നുമല്ല രാഹുലന്റെ സ്ഥാനത്യാഗം.
എത്രയെത്ര നിരസിച്ചു എന്ന് ചോദിച്ചാല്‍ മതി.
കോണ്‍ഗ്രസിന്റെ മുഖ്യനേതാവാകാന്‍ എത്ര വട്ടം അണികള്‍ മുദ്രാവാക്യം വിളിച്ചു.പ്രകടനം നടത്തി.എ ഐ സി സി സമ്മേളനത്തില്‍ ഉറഞ്ഞു തുള്ളി, ആക്രോശിച്ചു. ഫലമുണ്ടായില്ല. വഴങ്ങി കൊടുത്തില്ല.

ഏറ്റവും ഒടുവില്‍ സമ്മേളനത്തില്‍ സംഘം സംഘമായി കോണ്‍ഗ്രസിനോട് കുറുള്ളവര്‍ ടി വി ക്യാമറകള്‍ക്ക് മുന്നില്‍ നിന്നു വേദിയിലേക്ക് വിളിക്കണമെന്ന് പറഞ്ഞപ്പോള്‍, ബഹളം ശമിപ്പിക്കാനും, സമ്മേളനത്തിന്റെ നല്ല നടത്തിപ്പിനുമായി മാത്രം വേദിയില്‍ കയറി, കീശയില്‍ എഴുതി തയ്യാറാക്കി, കാത്തു വെച്ചിരുന്ന പ്രസംഗം വായിച്ചു.

അപ്പോഴും സ്ഥാനം ഏറ്റെടുത്തില്ല. പിന്നെ അമ്മ ഒരുപാട് നിര്‍ബന്ധിച്ചപ്പോള്‍ വളരെ വൈകി ജനറല്‍ സെക്രെട്ടറി ആയി.പ്രവര്‍ത്തക സമിതി അംഗമായി. അത് യു പി നിയമസഭ തെരഞ്ഞെടുപ്പില്‍ കോണ്‍ഗ്രസിനെ ഒരു പരുവത്തിലെത്തിച്ച പ്രകടന ഗാംഭീര്യത്തിനു അമ്മ നല്‍കിയ അംഗീകാരം കൂടിയായിരുന്നു.

അമ്മക്കുമുണ്ട് ഈ പാരമ്പര്യം.
പലവട്ടം വിളിച്ചതാണ്. ചെന്നില്ല.
ഒടുവില്‍ ആരും വിളിക്കാത്ത നിമിഷത്തില്‍ അപ്രതീഷിതമായി സീതാറാം കേസരിയെ മറിച്ചിട്ട് സ്ഥാനം കൈയിലെടുത്തു.

'രാഹുലിനെ വിളിക്ക്, ഇന്ത്യയെ രക്ഷിക്കു" എന്ന് കരുണാകര്‍ജി അടക്കം പലരും പറഞ്ഞിട്ടുണ്ട്.
നിന്നു കൊടുത്തിട്ടില്ല.
അമേഠിയില്‍ മത്സരിച്ചതും,എം പി ആയതും സ്ഥാനമോഹമൊന്നും ഉണ്ടായിട്ടല്ല.അന്ന് പ്രത്യേകിച്ചൊന്നും ശക്തിപ്പെടുത്താന്‍ ഇല്ലാതിരുന്നത് കൊണ്ടും,തന്നെ തന്നെയാണ് ശക്തിപ്പെടുത്തെണ്ട്തെന്ന് തിരിച്ചറിഞ്ഞിരുന്നത് കൊണ്ടുമാണ്.

നിരന്തരമായി കഴിവ് തെളിയിച്ചു കൊണ്ടിരിക്കുകയാണ് രാഹുലന്‍ എന്നാ കാര്യത്തില്‍ ആര്‍ക്കും ത്ര്ക്കമുണ്ടാവാന്‍ തരമില്ല. ടാലെന്റ്റ് ടെസ്റ്റ്‌ നടത്തിയതിനു ശേഷം എത്ര പ്രതിഭാശാലികളെ പോലെയാണ് കേരളത്തില്‍ തന്നെ യുത്ത് കോണ്‍ഗ്രസ്‌ പെരുമാറുന്നത്.

പത്തനംതിട്ടയില്‍ കണ്ടത് പ്രതിഭവിലാസങ്ങളുടെ ആമുഖമെഴുത്താണ്.

ആരോഗ്യ പരിരക്ഷക്ക് വേണ്ടി നടന്ന സമ്മേളനത്തില്‍, നുരില്‍ നൂര് മാര്‍ക്ക് നല്‍കുവാന്‍ കഴിയും വിധത്തിലുള്ള പെര്‍ഫോര്‍മന്‍സ് ആണ് യുത്ത് കോണ്‍ഗ്രസുകാര്‍ പ്രകടിപ്പിച്ചത്.
കസേരയേര്‍, സ്ത്രീകള്‍ക്ക് നേരെയുള്ള അക്രമവും,അധിക്ഷേപവും,ആക്രോശവും,വാടാ പോടാ വിളികള്‍, മുണ്ട് മാടിക്കെട്ടിയുള്ള വെല്ലുവിളികള്‍,സ്ത്രീകള്‍ പ്രാണ രക്ഷാര്‍ത്ഥം ഓടുമ്പോഴുള്ള ആനന്ദാതിരെക പ്രകടനം, എന്നിങ്ങനെ അവര്‍ പ്രതിഭയുടെ മാറ്റ് തെളിയിച്ചു.
രാഹുലന്റെ പദ്ധതികള്‍ വിജയം പ്രാപിക്കുന്നു എന്നതിന് ഇതിലേറെ തെളിവ് മറ്റെന്തു വേണം?

അടുക്കളയില്‍ കലാപമല്ല ഇപ്പോള്‍ നടക്കുന്നത്. രാഹുലിന്റെ ഇമേജ് രൂപീകരണം ആണ്. ഒളിമ്പിക് ദീപശിഖയേന്തി ഓടാനുള്ള ക്ഷണം രുപപ്പെടുത്തിയതും അടുക്കള ബുജികള്‍ തന്നെ.
ഇല്ല, ചുരല്‍ അടി കിട്ടിയാലും താന്‍ ഓടില്ലെന്നു പറഞ്ഞതായി പ്രഖ്യാപിച്ചതും അതേ കിച്ചന്‍ ജീനിയസുകള്‍ തന്നെ.

അവര്‍ രാപകല്‍ പണിയെടുക്കുന്നുണ്ട്. സ്വസ്തിയും,സമാധാനവും,ധിഷണാശേഷിയും അടുക്കളക്കുള്ളില്‍ നാള്‍ക്കു നാള്‍ പ്രസരിക്കട്ടെ. രാഹുലന്‍ മഹാത്യാഗിമാരിലെ മഹാത്യാഗിയായി അടുക്കളയില്‍ നിന്ന്‌ വളര്‍ന്നു വളര്‍ന്നു വലുതാകട്ടെ.

===============
ഏപ്രില്‍ 21, 2008

2010, ഓഗസ്റ്റ് 22, ഞായറാഴ്‌ച

ഇത്രമേൽ വൈകി ബുദ്ധി ഉദിക്കുവാൻ പാടില്ല…

സത്യം പറഞ്ഞാല്‍ ഖേദിക്കരുത് കൂട്ടരേ.

1969 മുതല്‍ 80 വരെ അധികാരത്തിനു പുറത്തു അലഞ്ഞു നടന്ന ഒരു 13 വര്‍ഷകാലം ഉണ്ടായിരുന്നുവെന്നത്‌ ധാര്‍ഷ്ട്യം മറച്ചു വെയ്ക്കാനാവാത്തത് കൊണ്ട് സ്വയം പറയാനാവുകയില്ല.

പക്ഷെ അതാണ്‌ ചരിത്ര സത്യം.

സി പി ഐ ഇല്ലാതെ ഭരണാധികാരത്തിന്റെ ഇടനാഴികളില്‍ നിന്ന് മോചനം കിട്ടിയിട്ടില്ലെന്ന ആ ജാള്യത ചരിത്രമറിയുന്നവര്‍ക്ക് അറിയാം.
സത്യം പറഞ്ഞാല്‍ വ്യസനിക്കരുത്.
അല്ലെങ്കില്‍ തന്നെ വ്യസനം കൊണ്ട് എന്ത് ഫലം?
ചരിത്ര സത്യങ്ങളുടെ മുന്പില്‍ കരഞ്ഞത് കൊണ്ടും അലമുറയിട്ടു നിലവിളിച്ചതു കൊണ്ടും എന്ത് ഫലം? ഒരു ഫലവും കിട്ടാനില്ലെന്ന്തു കൊണ്ട് തന്നെ,ആത്യന്തികമായ ചരിത്രം അന്വേഷിക്കാതെ നിര്‍വാഹമില്ല.

അത് ബഡാ അബദ്ധത്തില്‍ നിന്ന് തുടങ്ങിയ പ്രവര്‍ത്തനമായിരുന്നു.

സി പി ഐയ്ക്ക് എന്ത് കാര്യം എന്നാ മട്ടില്‍ തുടങ്ങിയ ബഡാ അബദ്ധം.പക്ഷെ അതിനു 13 വര്ഷം അലഞ്ഞു തിരിയേണ്ടി വന്നു ആ അതിവിപ്ലവകാരികള്‍ക്ക്.

പിന്നീട് 40 കൊല്ലം കഴിഞ്ഞപ്പോള്‍ ബുദ്ധി ഉദിക്കുന്നതും ലോകം കണ്ടു.
സായുധ വിപ്ലവം വരുന്നെന്നും,ഇന്ത്യയില്‍ ആയുധധാരികള്‍ വിപ്ലവം സ്ഥാപിക്കുമെന്നും കരുതിയ ഒരു കാലത്തിന്റെ ഇച്ഛാഭംഗം.
ആ കാലത്തിന്റെ ഇച്ഛാഭ്രമത്തില്‍ നിന്ന് ഇനിയും വേര്‍പിരിയാനാകാത്ത ഒരു കൂട്ടര്‍ ഇപ്പോഴും ജീവിക്കുന്നത് കൊണ്ടാണ് 'അഹങ്കാരം' വന്നു പെട്ടുപോകുന്നത്.
എല്ലാറ്റിനെയും തകിടം മറിക്കും, ആയുധപരമായ മുന്നേറ്റം നടത്തും എന്നൊക്കെ ചിന്തിച്ചു കൂട്ടിയ കൂട്ടര്‍ക്ക് ഒന്നും ചെയ്യാനായില്ല.
ഒടുവില്‍ ആ ആശയ സിദ്ധാന്തങ്ങള്‍ മുഴുവന്‍ പണയപ്പെടുത്തി ലോകസഭ സ്പീക്കര്‍ സ്ഥാനം വാങ്ങുന്നത് വരെയെത്തി.
ആ കാലവും ആ കാലത്തിന്റെ ചരിത്രവുമൊക്കെ മറന്ന് ഇതു പാട്ടും പാടാന്‍ ഒരുക്കമായാണ് ഇപ്പോഴത്തെ ഒരുങ്ങി നില്‍പ്പ്.
'എത്ര കൌതുഹലം നോക്കിയാല്‍ മിണ്ടും ഈ ചിത്രലേഖത്തിന്റെ താളുകള്‍' എന്നാ മട്ടില്‍.

യോഗം ചേരുന്നു. നാല് സീറ്റ്‌ ഇന്ന കക്ഷിക്ക് എന്ന് നിശ്ചയിക്കുന്നു. അത് പരസ്യമായി പറയാതിരിക്കുന്നു. തീരുമാനം ആരുമാരും അറിയാതെ വിഴുങ്ങുന്നു.
പിന്നെ പിന്നെ മാധ്യമങ്ങള്‍ എഴുതുന്നത്‌ സി പി ഐ യ്ക്ക് മൂന്നു സീറ്റ്‌ എന്നാ പ്രണാമം. തിരുത്താന്‍ മനസ്സില്ല. മിണ്ടാട്ടമില്ല. സി പി ഐ യ്ക്ക് മൂന്നു സീറ്റുകള്‍ തന്നെ എന്ന് ആവര്‍ത്തിച്ചു പറയുന്നതിന് തുല്യമായ മൌനം.

പിന്നെ പിന്നെ 18 സീറ്റിലും മത്സരിക്കുമെന്ന പ്രഖ്യാപനം വന്നപ്പോള്‍ സി പി ഐ യ്ക്ക് നാല് സീറ്റ് തന്നെ എന്ന പ്രഖ്യാപനം വരുന്നു. വൈകിയുദിച്ച ബുദ്ധി എന്ന് പറയുന്നത് ഇത് തന്നെയാണ്.
ഇത്ര വൈകി ബുദ്ധി ഉദിക്കല്‍ ഒരു മുന്നണി നേതാവിനും പാടില്ലാത്തതാണ്. വൈകി ഉദിക്കുന്ന ബുദ്ധി എന്തെല്ലാം വിന വരുത്തി വ്യ്ക്കുന്നുവെന്നതാണ് പ്രശ്നം.

വാചക മേളയില്‍ കടന്നു കൂടാന്‍ തരത്തില്‍ എത്രയെത്ര വാചകങ്ങള്‍ പടച്ചു വിടുന്നു. ആ വാക്യങ്ങള്‍ക്കു കേള്‍ക്കാന്‍ രസവും വായിക്കുവാന്‍ സൌന്ദര്യവും ഉണ്ട്. എന്നാല്‍ രാഷ്ട്രീയമായ അര്‍ഥം ഇല്ല. നിരര്‍ത്ഥകവും അര്‍ത്ഥലോപം നിറഞ്ഞതുമായ വരികള്‍ എഴുതി വിടുന്നതില്‍ കാര്യമെന്തിരിക്കുന്നു. അവയൊക്കെ അര്‍ത്ഥശുന്യം എന്നല്ലാതെ എന്ത് പറയേണ്ടു....?

മുന്നണി രാഷ്ട്രീയ മര്യാദകള്‍ മറന്ന് പോകുന്നതും ഞാന്‍ ഞാന്‍ മിടുക്കന്‍ എന്ന് ഭാവിക്കുന്നതും വരുത്തി വെയ്ക്കാവുന്ന അപായങ്ങള്‍ ചെറുതൊന്നുമല്ല.

ഭയപ്പെടുത്തി കീഴ്പ്പെടുത്താന്‍ കഴിയുമെന്ന് തെറ്റിദ്ധരിക്കരുത്.
എല്ലാവരും ആ ഗണത്തില്‍ പെടുന്നവരല്ല.
ആത്മാഭിമാനം ഉള്ള കൂട്ടരും രാഷ്ട്രീയ ലോകത്ത് അവശേഷിക്കുന്നുണ്ട്.
വളരെ വലിയ സത്യം കാണാതിരിക്കാന്‍ കണ്ണുള്ളവര്‍ക്കാര്‍ക്കും കഴിയുകയില്ലല്ലോ?

പറയേണ്ടത് പറയാനും,കേള്‍ക്കേണ്ടത് കേള്‍ക്കാനും ചിലര്‍ക്കെങ്കിലും ആര്‍ജ്ജവത്വവും സഹിഷ്ണുതയും ഉണ്ടാവും. പക്ഷെ 'ഓര്‍ക്കുക വല്ലപ്പോഴും' എന്നാ രണ്ടു വാക്കുകള്‍ ഓര്‍മിക്കാന്‍ മറന്നു പോകരുതേ.

പി ഡി പി യും അത് പോലുള്ള കൂട്ടരും ജനിക്കുന്നതിനു മുന്‍പ് ഉണ്ടായ മുന്നണിക്ക്‌ ബോംബ്‌ വെയ്ക്കുമ്പോള്‍ ഇടതുപക്ഷത്തിന്റെ പ്രസക്തി മറക്കാതിരിക്കുന്നതിന് ഏത് ബ്രഹ്മി ഔഷധം ആണ് വേണ്ടത്?

പലരുടെയും സീറ്റുകള്‍ പിടിച്ചെടുത്തു. അതൊക്കെ ഉഭയകക്ഷി ചര്‍ച്ചയിലൂടെ മുഖദാവില്‍ പറഞ്ഞിട്ടാണ്. ഇപ്പോള്‍ മുഖദാവില്‍ പറയാതെ നാടകമാടി ഒരു സീറ്റ്‌ പിടിച്ചെടുക്കാന്‍ കാക്കാരിശ്ശി നാടകം അരങ്ങേറുകയാണ്. പക്ഷെ തിരകഥ ക്രിത്തുക്കളുടെ ക്ലൈമാക്സ്‌ നിര്‍ണ്ണയം ശരിയായില്ല.

കണ്ണില്‍ കണ്ടത് ഒന്ന്,ഫലത്തില്‍ വന്നത് മറ്റൊന്ന്.
കൊക്കിനു വച്ചത് മാറിനു കൊണ്ടത്‌ പോലെ.
നിന്ച്ചതോക്കെയും വീണ്ടും കാണാം.
ഇങ്ങേപ്പുറത്ത് ഒന്നാംതരം ആണ്‍കിടാങ്ങളാണ് നിലയുറപ്പിച്ചിരിക്കുന്നത്.
സത്യം കണ്ടാലും അറിഞ്ഞാലും ഇത്ര നീരസപ്പെടണോ?

==============
മാര്‍ച്ച് 16, 2009

2010, ഓഗസ്റ്റ് 19, വ്യാഴാഴ്‌ച

ഒറീസയിലെ ആരാച്ചാര്‍മാരേ,നിങ്ങള്‍ക്ക്‌ പൗവ്വത്തിലിന്റെ സ്തുതി.

വിശ്വാസികളായ കുഞ്ഞാടുകള്‍ അറിയാനായി അരുളിചെയ്യുന്നതെന്തെന്നാല്‍, ഒറീസയില്‍ നടക്കുന്നതൊന്നും കണ്ട്‌ ചകിതരും വേദനയുള്ളവരുമായി തീരേണ്ടതില്ലെന്നാണ്‌.
കര്‍ത്താവിന്റെ നേരവകാശിയായ മാര്‍ ജോസഫ്‌ പൗവ്വത്തിലിന്റെ തിരുമുഖത്തു നിന്നും ഉണ്ടായ വിളിച്ചറിയിക്കല്‍ കേട്ട്‌ എല്ലാ ക്രൈസ്തവ വിശ്വാസികളും ആമേന്‍ ആമേന്‍ എന്ന്‌പറയേണ്ടതാണ്‌.
കന്യാസ്ത്രീകളെ കൊന്നുതള്ളട്ടെ, പള്ളികള്‍ പൊളിച്ചു കൊള്ളട്ടെ, മിഷണറിമാരെ ചുട്ടുകൊന്നുകൊള്ളട്ടെ, കര്‍ത്താവിന്റെ മണവാട്ടിമാരെ മാനം കെടുത്തികൊള്ളട്ടെ, കാട്ടിലും ഒളിത്താവളങ്ങളിലുമായി അവര്‍ കഴിഞ്ഞുകൂടിക്കൊള്ളട്ടെ.
ആവലാതിവേണ്ട.
അതൊക്കെ കടുത്തക്രൂരതകളോ അക്രമങ്ങളോ ആയി കാണുന്നത്‌ പാപമാണ്‌.
പാപികള്‍ മുള്ളിലിഴയേണ്ടിവരും.

ഒറീസയില്‍ കണ്ടു കൊണ്ടിരിക്കുന്നതും മധ്യപ്രദേശിലുംആന്ധ്രയിലും ഒറീസയില്‍ തന്നെ മുമ്പു കണ്ടതുമൊക്കെ പ്രത്യക്ഷ ആക്രമണങ്ങളാണെന്ന പൗവ്വത്തില്‍ പിതാവ്‌ എല്ലാ വിശ്വാസികളെയും അറിയിച്ചുകഴിഞ്ഞു.
ചെറിയ ചെറിയ പ്രശനങ്ങളാണ്‌ പ്രത്യക്ഷ ആക്രമങ്ങളിലുള്ളത്‌.
വലിയ വലിയ പ്രശ്നങ്ങള്‍ ഒളിഞ്ഞിരിക്കുന്നത്‌ ഇവിടെ കേരളത്തില്‍ നടക്കുന്ന പരോക്ഷ ആക്രമണങ്ങളിലാണെന്ന്‌ സ്വര്‍ഗസ്ഥനായ പിതാവിനെ സാക്ഷിനിര്‍ത്തി തിരുമേനി ഉഗ്രസ്വരത്തില്‍, ദിഗന്തങ്ങള്‍ ഞെട്ടുമാറ്‌ പ്രഖ്യാപിച്ചിരിക്കുന്നു.

തകര്‍ക്കപ്പെട്ട ദേവാലയങ്ങള്‍ പുനര്‍നിര്‍മ്മിക്കാം. വിശ്വാസം തകര്‍ന്നു പോയാല്‍ പിന്നെ രക്ഷകിട്ടില്ല.
അതുകൊണ്ട്‌ ഒറീസയെക്കുറിച്ച്‌ ചിന്തിച്ചു നേരം കളയാതെ കേരളത്തെകുറിച്ച്‌ആലോചിച്ച്‌ ആലോചിച്ച്‌ തലപുകയ്ക്കണം എന്നാണ്‌ ‘അഭിവന്ദ്യ’ പിതാവിന്റെ കല്‍പന.
ഭൗതിക വാദവും നിരീശ്വരവാദവും ആണ്‌ സംഘപരിവാറിനേക്കാള്‍ അപകടകരമെന്നും വൈദിക ശ്രേഷ്ഠനറിയാം. സംഘപരിവാറുകാരോടു ക്ഷമിപ്പിന്‍. പക്ഷേ ഭൗതികവാദികളോട്‌ ക്ഷമിപ്പാതിരിക്കിന്‍.
ഇത്‌ മറന്നുകൂടാത്ത വചനമാണ്‌

തകര്‍ന്നുപോയ ദേവാലയങ്ങള്‍ പൗവ്വത്തില്‍ പുനര്‍നിര്‍മ്മിക്കും.
മാനംപോയ കന്യാസ്ത്രീകളുടെ മാനം വീണ്ടെടുക്കാനാവും.
ജീവന്‍പോയ ക്രൈസതവരായ പാവങ്ങളെ പൗവ്വത്തില്‍ പുനരുജ്ജീവിപ്പിക്കുമോ?
ചുട്ടുകൊല്ലപ്പെട്ട മിഷണറി ഗ്രഹാം സ്റ്റെയിന്‍സിനെയും കുഞ്ഞുങ്ങളെയും ഉയിര്‍ത്തെഴുന്നേല്‍പിക്കുമോ?
ഈവിധം അനാവശ്യ ചോദ്യങ്ങള്‍ കര്‍ത്താവില്‍ ഭയമുള്ള ആരുംചോദിച്ചേക്കരുത്‌.
കാരണം സര്‍വശക്തനായ കര്‍ത്താവ്‌ ക്ഷമൈക്കുകയില്ല.

ആര്‍ എസ്‌ എന്‍സുകാര്‍ നല്ലങ്കുട്ടികള്‍. കോണ്‍ഗ്രസുകാര്‍അവരെപ്പോലെ നല്ല കുട്ടികള്‍.
പക്ഷേ കന്യാസ്ത്രീകളെയും ക്രൈസ്തവ വിശ്വാസികളെയും സംരക്ഷിക്കാന്‍ നിലകൊള്ളുന്ന കമ്മ്യൂണിസ്റ്റുകാര്‍ പരമമായ പാപം ചെയ്യുന്നവര്‍.
ഒറീസയിലെ കുരുതികള്‍ക്കും വേട്ടയാടലുകള്‍ക്കും പീഡനങ്ങള്‍ക്കും അറുതിവരുത്താന്‍ ചെറുവിരലനക്കാതെ കയ്യുംകെട്ടി നോക്കിയിരുന്ന്‌ രസിച്ചുമദിക്കുന്ന കേന്ദ്രഭരണത്തിന്‌ നേതുത്വം നല്‍കുന്ന കോണ്‍ഗ്രസുകാരെ വിശ്വാസികളായ കസ്തവര്‍ കണ്ടാല്‍ കെട്ടിപ്പിടിച്ചുമ്മ കൊടുക്കണം.
കാരണം കേരളത്തിലും അവര്‍ ക്രൈസ്തവരെ നലതോതില്‍ സഹായിച്ചിട്ടുണ്ട്‌.
ഒളവണ്ണയില്‍ കന്യാസ്ത്രീകളെ ആക്രമിക്കുമ്പോള്‍ കേരളദേശം വാണരുളിയിരുന്നത്‌ അക്കൂട്ടരാണല്ലോ.

ആലപ്പുഴയിലെ മാര്‍സ്ലീബാ സണ്‍ഡേ സ്കൂളിലെ കുട്ടികളോടും അവരുടെ മാതാപിതാക്കളോടുമായി പൗവ്വത്തില്‍ ഞ്ഞായറാഴ്ച നാളില്‍ പൗരുഷത്തോടെ വിളിച്ചറിയിച്ച കാര്യങ്ങള്‍ കേട്ട്‌ കര്‍ദ്ദിനാള്‍ വര്‍ക്കി വിതയത്തില്‍ ശനിയാഴ്ചനാളില്‍ ഇങ്ങനെയല്ലല്ലൊ പറഞ്ഞത്‌ എന്ന്‌ ശങ്കപ്പെടുന്നവര്‍ ആരെങ്കിലുമുണ്ടെങ്കില്‍ അവര്‍ക്ക്‌ തെറ്റുപറ്റിയിരിക്കുന്നു.
കര്‍ദ്ദിനാള്‍ പറയുന്നതൊന്നുമല്ലശരി. ആര്‍ച്ച്‌ ബിഷപ്പ്‌ പറയുന്നതാണ്‌.
വിതയത്തില്‍ വിതക്കുന്നതിലല്ല പൗവ്വത്തില്‍ പറയുന്നതിലാണ്‌ കര്‍ത്താവിന്റെ ഇംഗിതം കുടികൊള്ളുന്നത്‌.

ആന്ധ്രയിലും ഒറീസയിലുമൊക്കെ ക്രൈസ്തവ വിശ്വാസികള്‍ക്കു നേരെ നടക്കുന്ന അക്രമങ്ങള്‍ നിയന്ത്രിക്കാന്‍ ശ്രമിക്കാതെ കേന്ദ്ര സര്‍ക്കാര്‍ നിസംഗത പുലര്‍ത്തിയെന്നും സഭയുടെ മേലധികാരികള്‍ പലവട്ടം ആവശ്യപ്പെട്ടിട്ടും കേന്ദ്രം അനങ്ങില്ലന്നും കത്തോലിക്ക സഭ ദു:ഖമുണ്ടെന്നുമൊക്കെ വിതയത്തില്‍ പറഞ്ഞെന്നിരിക്കും.
കാര്യങ്ങളുടെ കാതല്‍ അതിലൊന്നിലുമല്ല.
കേരളത്തിലാണ്‌ ക്രൈസ്തവര്‍കണ്ട്‌ ദു:ഖിക്കേണ്ട കാതലും അറിഞ്ഞ്‌ ചെറുക്കേണ്ട കുറ്റവും ഉള്ളതെന്ന്‌ വിതയത്തിലിന്റെ വിനീത ബുദ്ധിയില്‍ തോന്നുന്നിലെന്‍ന്നു കരുതിയാല്‍ മതി

ഇല്ലാത്ത ഒന്നിനോടാണ്‌ യുദ്ധം ചെയ്യേണ്ടത്‌.
സംഭവിച്ചിട്ടില്ലാത്തതും സംഭവിക്കാനിടയില്ലാത്തതുമായ കാര്യങ്ങള്‍ക്കെതിരെയാണ്‌ ജാഗ്രത വേണ്ടത്‌.
നിരീശ്വരവാദം അടിച്ചേല്‍പിക്കാനോ വിശ്വാസങ്ങളെ തകര്‍ക്കാനോ ആരുംശ്രമിക്കാത്ത കേരളത്തില്‍അങ്ങനെയുണ്ടെന്ന്‌ സങ്കല്‍പിച്ചു യുദ്ധം ചെയ്യുകയാണ്‌ കുഞ്ഞാടുകള്‍ ചെയ്യേണ്ടത്‌.
എത്ര വട്ടം പറഞ്ഞാലാണ ഇപ്പോള്‍ കുഞ്ഞാടുകളുടെ കുഞ്ഞുമനസ്സുകളെ മനസലാക്കിക്കാന്‍ കഴിയുന്നത്‌.
എത്രവട്ടം പള്ളി മണിയടിച്ചു.
എത്ര തതവണ ഇടയ ലേഖനം വായിച്ചു കേള്‍പ്പിച്ചു.
എത്ര തവണ രണ്ടാം വിമോചന സമരം പൗവ്വത്തില്‍ ആഹ്വാനം ചെയ്‌തു.
ഒരുകുഞ്ഞാടെങ്കിലും അനുസരിക്കുന്നുണ്ടോ.

ഇല്ല.

പണ്ടൊന്നും ഇങ്ങനെയായിരുന്നില്ല.
എതെങ്കിലും ഒരു ഇടവകയില്‍ ഒരു ഇടയലേഖനം വായിച്ചറിയിച്ചാല്‍ മതി വിശ്വാസികളാകെ ഇറങ്ങിതിരിക്കും.
അവര്‍ നല്ല കുഞ്ഞാടുകളായിരുന്നൂ.
ഇപ്പോഴുള്ളവര്‍ വഴിതെറ്റുന്നത്‌ കമ്മ്യൂണിസ്റ്റുകാരും ഭൗതികവാദികളുമൊക്കെയുള്ളതുകൊണ്ടാണ്‌.
ആയതിനാല്‍ കുഞ്ഞാടുകളേ, ഒറീസയല്ല കേരളമാണ്‍ പ്രശനമെന്ന തെര്യപ്പെട്ടുകൊള്ളിന്‍.

വിതയത്തില്‍ പറയുന്നതുപോലെ കേന്ദ്രം ഇനി കൈകെട്ടി നോക്കി ഇരിക്കാനൊന്നുംപോകുന്നില്ല.
കേരളത്തില്‍നിന്ന്‌ കോണ്‍ഗ്രസിന്റെ പ്രതിനിധി സംഘം ഡല്‍ഹിക്ക്‌ പറക്കുന്നുണ്ട്‌.
ഉമ്മന്‍ ചാണ്ടിയും തെന്നലയും കാര്‍ത്തികേയനും കെ വി തോമസുമൊക്കെ സംഘത്തിലുണ്ട്‌.
അവര്‍ സോണിയയെകാണും, മന്‍മോഹനെകാണും, ശിവരാജ്‌പാട്ടീലിനെകാണും.
അതോടുകൂടി എല്ലാം നേരെയാവും.
കര്‍ത്താവ്‌ വിചാരിച്ചാലും കഴിയാത്തത്‌ ഉമ്മന്‍ചാണ്ടിയും ചെന്നിത്തലയുമൊക്കെ വിചാരിച്ചാല്‍ കഴിയും.
അതുകൊണ്ട്‌ ഒറീസയെ മറക്കൂ.

ഇവര്‍ ചെയ്യുന്ന പാപങ്ങള്‍ എന്തെന്ന്‌ ഇവരറിയുന്നില്ല, കര്‍ത്താവ്‌ ഇവരോടു പൊറുക്കേണമേ എന്നൊന്നും ഒറീസയെ മറക്കാതിരിക്കുന്നവര്‍ക്കുവേണ്ടി പ്രാര്‍ത്ഥിക്കാന്‍ ആരെയും കിട്ടില്ലെ ന്നോര്‍ത്തുകൊള്ളണം.

പൗവ്വത്തിലിന്റെ പ്രസ്താവനകേട്ട്‌ പ്രവീണ്‍ തൊഗാഡിയയും വിനയ്‌ കത്യാറും അശോക്‌ സിംഗാളും എല്‍ കെ അദ്വാനിയും നരേന്ദ്രമോഡിയും രോമാഞ്ചമണിയട്ടെ.

പാവം പാവം കന്യാസ്ത്രീകളും വൈദികരും നല്ലവരില്‍ നല്ലവരായ വിശ്വാശസികളും വേദനിക്കട്ടെ.

================
സെപ്റ്റംബര്‍ 1, 2008

സക്കറിയയുടെ ഒളിവു ജീവിതത്തിലെ സുഖം

കമ്മ്യൂണിസ്റ്റ്‌ പാര്‍ട്ടി നിരോധിക്കപ്പെട്ടിരുന്ന കാലത്തെ ഒളിവുജീവിതത്തെക്കുറിച്ച് സക്കരിയയെപോലെ അറിയുന്ന ഒരാളും ഭുമി മലയാളത്തില്‍ മുന്‍പോ പിന്‍പോ ജീവിച്ചിട്ടില്ല.

കഴുമരങ്ങളും കാരാഗ്രഹങ്ങളും തോക്കിന്‍ കുഴലുകളും കംമുനിസ്ടുകാരെ തേടിയലഞ്ഞു നടന്ന കാലത്തെ ഒളിവു ജീവിതം സക്കറിയ അനുഭവിച്ചറിഞ്ഞിട്ടുണ്ട്. ചെഗുവേര പോലും അത്രമേല്‍ അറിഞ്ഞിട്ടില്ല.

അത് കൊണ്ടാണ് കമ്മ്യൂണിസ്റ്റ്‌ നേതാക്കള്‍ ഒളിവു ജീവിത കാലത്തെ സുഖവാസത്തിനിടയില്‍ ആസ്വാദ്യകരമായ ജീവിതം നയിച്ചുവെന്നു സക്കറിയ തീര്‍പ്പ് കല്‍പ്പിച്ചത്. ആസ്വാദ്യകരമായ ജീവിതം എന്ന് പറഞ്ഞാല്‍ ലൈംഗിക സുഖം നിറഞ്ഞു തുളുമ്പിയ ഉല്‍ഫുല്ലവും ഉന്മേഷദായകവുമായ ജീവിതമെന്നാണ് സക്കറിയ കല്‍പ്പിക്കുന്ന സാരം.

രാജ്മോഹന്‍ ഉണ്ണിത്താന്‍ സഹോദരീ തുല്യയായ മഹിളാമണിയുമായി രാത്രിയില്‍ ഒറ്റയ്ക്ക് സംസാരിച്ചിരിക്കുവാന്‍, മഞ്ചേരിയിലെ ആരോരുമില്ലാത്ത വീട്ടില്‍ പോയപ്പോള്‍ കണ്ടുപിടിക്കപ്പെട്ട പശ്ചാത്തലത്തിലാണ്, സക്കറിയ തന്റെ "ഒളിവിലെ ഓര്‍മ്മകള്‍" പുറത്തെടുത്തത്.
രാജ്മോഹന്‍ ചെയ്തത് ശരികളില്‍ മികച്ച ശരിയാണെന്നും, വീണ്ടും വീണ്ടും ഒളിത്താവളങ്ങളില്‍ 'സഹോദരി'മാരുമായി ആരോരുമറിയാതെ വസിക്കണമെന്നും, ആരെങ്കിലും പിടികൂടിയാല്‍ വിക്ടറി ചിഹ്നം ഉയര്‍ത്തി അഭിമാനിക്കണം എന്നുമുള്ള കാര്യത്തില്‍ സക്കറിയക്കു സംശയമില്ല.

ആ സംശയരാഹിത്യം ലേഖനമെഴുത്തിലെയ്ക്ക് സക്കറിയയെ നയിച്ചു.

ലേഖനമെഴുതിയത് കൊണ്ട് സക്കറിയയ്ക്ക്‌ തൃപ്തി വന്നില്ല.
നാടായ നാടൊക്കെ പ്രസംഗിക്കണമെന്ന് അഭിനിവേശം ഉണ്ടായി.
വടക്കേ അറ്റത്തു നിന്ന് തന്നെ പ്രസംഗപര്യടനം തുടങ്ങി.
പ്രസംഗപര്യടനം തെക്കേയറ്റം വരെ ദീര്ഘിപ്പിക്കണമെന്നായിരുന്നു ആലോചന.

പക്ഷെ വടക്കേ അറ്റത്തു വെച്ച് തന്നെ വിഘ്നങ്ങള്‍ ഉയര്‍ന്നു പൊങ്ങി. തടഞ്ഞുവെയ്ക്കലും ചോദ്യം ചെയ്യലും. ചോദ്യങ്ങള്‍ക്ക് ഉത്തരം നല്‍കാനാവാതെ വന്നപ്പോള്‍ കാറില്‍ കയറി തടി രക്ഷപ്പെടുത്തി. നാട് മാറിയപ്പോഴും ഭയം മാറിയില്ല. അത് കൊണ്ട് തീവണ്ടിയിലെ സമശീതോഷ്ണ മുറിയില്‍ കയറിയിരുന്ന ശേഷം മാത്രം നെടുവീര്‍പ്പ് വിട്ടു.
നെടുവീര്‍പ്പ് പോയപ്പോള്‍ ചാനലുകാരെയൊക്കെ വിളിച്ചറിയിച്ചു.
ലൈംഗിക സ്വാതന്ത്ര്യത്തിനായി ശബ്ദിച്ചതിന്റെ പേരില്‍, സഹോദരീ തുല്യയായ ഒരുവളുമോത്ത് രഹസ്യമായി പാര്‍ത്തതിന്റെ ന്യായം ഉയര്‍ത്തിയതിന്റെ പേരില്‍ ഒരു കൂട്ടം കശ്മലന്മാര്‍ ആക്രമിച്ചു എന്ന ചൂടുവാര്‍ത്ത, തണുപ്പേറിയ തീവണ്ടിമുറിയില്‍ ഇരുന്ന് മാലോകരെ അറിയിച്ചു.
അഭിപ്രായ സ്വാതന്ത്ര്യവും സര്‍ഗ്ഗാത്മ അവകാശവും ഉന്നയിക്കപ്പെടനമെന്ക്കില്‍ സമശീതോഷ്ണ കാലാവസ്ഥ തന്നെ വേണം.

എല്ലാം പണയപ്പെടുത്താന്‍ സന്നദ്ധമാവുകയും, സര്‍വ്വവും നഷ്ടപ്പെടുന്നതില്‍ മനസുരുകി വേദനിക്കുകയും ചെയ്യുന്ന തോമ്മിയെയും, എല്ലാം കീഴ്പ്പെടുത്തുന്നതില്‍ ആനന്ദിക്കുന്ന പട്ടെലരെയും അവതരിപ്പിച്ച സക്കറിയയ്ക്ക്‌ ഇത്തരം വേഷങ്ങള്‍ എടുത്തണിയാനും വൈക്ലബ്യം ഇല്ല.

വെബ്സൈറ്റുകളില്‍ അശ്ലീല കഥയെഴുതി പണം സമ്പാദിക്കുന്ന ഒരാള്‍ക്ക്‌ ഉണ്നിത്താനോടൊപ്പം നില്‍ക്കാതെ തരമില്ല തന്നെ.

സക്കരിയയാലും നാവിനു ലൈസന്‍സ് വേണമെന്ന കാര്യം മാത്രം മറന്നുപോയി.

ബംഗലുരുരിലേക്കുള്ള യാത്രാമധ്യേ വിശ്രമിക്കുവാന്‍ എഴുകോണില്‍ നിന്നെത്തിയ, കണ്ണെഴുതിയ സുന്ദരിയുമായി മഞ്ചേരിയിലെ ആള്‍ പാര്‍പ്പില്ലാത്ത വീട്ടിലെത്തിയ ഉണ്ണിത്താനെ തടഞ്ഞു വെയ്ക്കുകയും, പോലീസിനെ കൊണ്ട് പിടിപ്പിക്കുകയും ചെയ്ത അന്യായത്തില്‍ സക്കരിയക്കുള്ള കൊപതാപങ്ങള്‍ മനസിലാക്കാവുന്നതെ ഉള്ളു.
എഴുകോണില്‍ ഉള്ള ഒരു വനിതയെ മഞ്ചേരിയില്‍ എത്തിക്കുമ്പോള്‍ സഹോദരിയായി കാണാനും, ആരോരുമില്ലാത്ത വീട്ടില്‍ കൊണ്ട് ചെന്നെത്തിച്ചു സഹോദര നിര്‍വിശേഷ സ്നേഹം പങ്കിടാനും അവകാശമില്ലെന്നു വന്നാല്‍ സാംസ്ക്കാരിക നായകരില്‍ മുമ്പനായ സക്കറിയക്കു പ്രതികരിക്കാനും പ്രതിഷേധിക്കുവാനും കഴിയാതിരിക്കുമോ?
കൊല്ലം മുതല്‍ ബംഗളുരു വരെ നീളുന്ന യാത്രയില്‍ എളുപ്പവഴിയായ മഞ്ചേരിയില്‍ എത്തുമ്പോള്‍ സഹോദര നിര്‍വിശേഷ സ്നേഹം അണപൊട്ടി ഒഴുകിയ ഉണ്ണിത്താന്, സ്വച്ഛന്ദമായ അന്തരീഷത്തില്‍ സഹോദര സ്നേഹം പങ്കു വയ്ക്കാന്‍ തോന്നിയതിനെ ആലോസരപ്പെടുത്തിയതിലാണ്, സക്കറിയക്കു വിഷമം.

പക്ഷെ സക്കറിയ പ്രസംഗിച്ചതിന് ശേഷം കൈയ്യേറ്റം ചെയ്തത് തെറ്റ്. ആശയ പ്രകടനത്തെ പേശി ബലം കൊണ്ട് നേരിടുക എന്നത് അക്ഷന്തവ്യമായ അപരാധവും കടുത്ത തെറ്റ് നിറഞ്ഞ പ്രവൃത്തിയും ആണ്.

പക്ഷെ,ഉണ്ണിത്താന്‍ ചെയ്തത് സത്കര്‍മ്മവും പിടി കൂടിയവരുടെത് ദുഷ്കര്‍മവും എന്ന് വ്യാഖ്യാനിക്കുന്നതില്‍ തരക്കേടുണ്ട്‌.
വാദങ്ങളെ ബലപ്പെടുത്താന്‍ കംമുനിസ്ടുകാര്‍ ഒളിവു ജീവിതത്തിന്റെ സുഖം അനുഭവിച്ചു ലൈംഗിക അരാജകത്വത്തിന്റെ തിരശ്ശീല ഉയര്‍ത്തി എന്ന് പറയുന്നത് അങ്ങേയറ്റത്തെ അപരാധമാണ്.

അങ്ങാടിയിലെ മത്സരത്തില്‍ ജയിക്കാന്‍ അമ്മയെ പുലഭ്യം പറയരുത്.

ഒളിവുജീവിതം സുഖകരമോ?

അങ്ങനെയാണ് സക്കറിയ പറയുന്നത്.

സക്കറിയയുടെ ഒളിവുജീവിതം സുഖകരമാണെന്ന കാര്യത്തില്‍ ആര്‍ക്കും ശങ്കയുണ്ടാകാന്‍ തരമില്ല. ഫ്ലാറ്റ് മുറികളിലും ഹോട്ടല്‍ ശാലകളിലും സക്കറിയ നടത്തിയ തന്നോട് തെന്നെയുള്ള ഒളിവുജീവിതത്തിന്റെ സൌഖ്യം സക്കറിയക്കു മാത്രമേ അറിയാവു.

ദയവായി, ഒന്നു ശ്രദ്ധിക്കു, സക്കറിയ ഏമ്മാനെ,

ആ ഒളിവുജീവിതമല്ല കംമുനിസ്ട്ടുകാരുടെ ഒളിവുജീവിതം.

അങ്ങ് സുഖഭരിതമായ അവസ്ഥയില്‍ ആസ്വദിച്ച ഒളിവുജീവിതം വേറെ; കംമുനിസ്ട്ടുകാരുടെ ഒലിവു ജീവിതം വേറെ.

മരണം മുന്നില്‍ വന്നു വാ പിളര്‍ത്തി നില്‍ക്കുമ്പോഴും സമത്വ സുന്ദര ലോകം സ്വപ്നം കണ്ട്, അടിമകളെപ്പോലെ ജീവിക്കുന്ന മാനവരുടെ മോചനം ലക്ഷ്യമാക്കി പൊരുതാന്‍ ഇറങ്ങിയവര്‍ ഒളിവില്‍ പോയതും, ദൈന്യജീവിതം നയിച്ചതും, പട്ടിണി കിടന്നതും, സുഖതാല്പര്യങ്ങള്‍ മുന്‍ നിര്‍ത്തിയായിരുന്നില്ല.
നാടിന്റെയും ജനങ്ങളുടെയും താല്പര്യങ്ങളാണ് അവര്‍ ലക്‌ഷ്യം വച്ചത്.

അവര്‍ സ്വയം ഏറ്റുവാങ്ങിയ വൈഷമ്യങ്ങളുടെയും ഒളിവുജീവിതതിന്റെയും സഹനത്തിന്റെയും പിന്നിലുണ്ടായിരുന്ന വിവേകവും വികാരവും ഉണ്ണിത്താന്റെ മഞ്ചേരിയിലെ ഒളിവു താമസത്തിന്റെതായിരുന്നില്ല.

ആരുമാരും കാണാത്ത ഒളിവുജീവിതത്തിലെ നൈമിഷിക സുഖമായിരുന്നില്ല അവര്‍ അനുഭവിച്ചത്.
കടുത്ത ത്യാഗത്തിന്റെ വേദനയും ആ വേദനയില്‍ നിന്നുണരുന്ന മാനസികോല്ലാസവുമാണ് അവര്‍ അറിഞ്ഞത്.

സക്കറിയ കര്‍ട്ടനു പിന്നിലെ ഒളിവിനെയും, അത് പകര്‍ന്ന കുളിരിനെയും ഓര്‍ത്ത്, കമ്മ്യുനിസ്ടുകാരുടെ ഒളിവു ജീവിതത്തെ താരതമ്യം ചെയ്തു കളഞ്ഞു.

സക്കറിയയുടെ കുളിരല്ല കമ്മ്യുനിസ്ടുകാരുടെ ഒളിവു ജീവിതത്തിന്റെത്.

ലൈംഗിക സുഖത്തിനാണെങ്കില്‍ അന്നത്തെ കംമ്യുനിസ്റ്റുകാര്‍ കമ്മ്യുനിസ്ട്ടുകാരാവേണ്ടതില്ല. ഒളിവില്‍ പോകേണ്ടതില്ല. സമ്പന്ന കുടുംബത്തില്‍ പിറന്ന് എല്ലാം ഉപേക്ഷിച്ച് കംമുനിസ്ട്ടുകാരായ അവര്‍ക്ക് ജന്മിമാരായി ജീവിച്ചാല്‍ മതിയായിരുന്നു. അങ്ങനെയല്ലാത്തവര്‍ ജന്മിമാരുടെ ഉപാസകരായി നില കൊണ്ടാല്‍ മതി. തെളിവില്‍ തന്നെ ലൈംഗിക അരാജകത്വം അരങ്ങേറ്റാമായിരുന്നു.

പക്ഷെ അവര്‍ ഉള്ളതെല്ലാം ഉപേക്ഷിച്ചു. ത്യാഗത്തെയും സഹനത്തെയും വരിച്ചു. ഒളിവിലും ജയിലിലും കഴിഞ്ഞു. സക്കറിയയെ പോലെ ചിക്കന്‍ ചാപ്സും, മട്ടന്‍ സ്റ്റുവും കഴിച്ചു വിലസുന്നവര്‍ക്ക്, കംമ്യുനിസ്ട്ടുകാരുടെ ഒളിവുജീവിതം, ഉണ്ണിത്താന്റെ മഞ്ചേരിയിലെ രാത്രികാല ഒളിവു ജീവിതമായി തോന്നാം.

ഉണ്ണിത്താന് വേണ്ടി ഫീസില്ലാ വക്കീലായി വാദിച്ചോ. പക്ഷെ കംമ്യുനിസ്ട്ടുകാര്‍ ഒളിവുജീവിതം സ്വീകരിച്ചത് ഉണ്ണിത്താന്‍ നടത്തുന്ന പണിയ്ക്കാനെന്നു തട്ടിമുളിച്ചു
കളയരുത്.

"ഒരിടത്ത്" എന്നാ കഥ സക്കറിയ എഴുതിയിട്ടുണ്ട്. ഭാവിയില്‍ ഒരിടത്ത് സക്കരിയയെപ്പോലെ ഒരു വേരില്ലാതാളിയും നിദ്രാകേളികളുടെ വക്താവുമായ ഒരാള്‍ ജീവിച്ചിരുന്നുവെന്ന് കുട്ടികള്‍ കഥ പറഞ്ഞു തുടങ്ങാതിരുന്നാല്‍ മതിയായിരുന്നു.


-----------------
25-02-2010

2010, ഓഗസ്റ്റ് 10, ചൊവ്വാഴ്ച

മന്‍മോഹന്റെ സത്യാന്വേഷണ പരീക്ഷണങ്ങള്‍

" വിട്യേത്തമോരോന്നു കാട്ടി ഫലിക്കാഞ്ഞു,
വട്ടിയും കൊട്ടയും ചട്ടികലങ്ങളും,
കേട്ടിച്ചുമന്നങ്ങു കാട്ടില്‍ നടക്കുന്നു."
എന്ന് പറഞ്ഞത് പോലെയായി കാര്യങ്ങള്‍.
കാട്ടിലല്ല നടപ്പെന്നു മാത്രം.
ന്യുയോര്‍ക്കില്‍,.... വാഷിങ്ങ്ടണില്‍,......വീണ്ടും ന്യുയോര്‍ക്കില്‍,...
കെട്ടിച്ചുമന്നു നടന്നു. കാത്തു കാത്തു കിടന്നു.
തെല്ലും അലിവുണ്ടായില്ല ലോക രാജാവിന്.

വെറുതെ മുഷിഞ്ഞു കാത്തിരിക്കേണ്ട, ഡല്‍ഹിയിലേക്കു പൊയ്ക്കൊള്ളു എന്ന് തലപ്പാവുകാരനെ നോക്കി കണ്ണ് കാട്ടി. പിന്നാലെ തന്റെ വിദേശകാര്യ സെക്രട്ടറി പൊടുന്നനെ ഡല്‍ഹിയില്‍ എത്തുമെന്നും ഒപ്പ് വയ്ക്കാനുള്ള കരാര്‍ കൊണ്ട് തരുമെന്നും പറഞ്ഞു സമാധാനിപ്പിച്ചു.

"കണ്ണില്ലാത്തൊരു പോണ്ണന്‍, കാഴ്ചകള്‍ കാണാന്‍ഇച്ച്ചിക്കുന്നത് പോലെ" മന്‍മോഹന്‍ അമേരിക്കയില്‍ വെറുതെ കറങ്ങി നടക്കുകയോന്നുമായിരുന്നില്ല.
കൂട്ടത്തില്‍ കൊണ്ട് പോയ പത്രക്കാരെയൊക്കെ വഴിവക്കില്‍ താമസിപ്പിച്ചിട്ട്, ഒറ്റയ്ക്ക് ബുഷിന്റെ താവളത്തില്‍ ചെന്ന് വിനീത വിധേയനായി കുമ്പിട്ടു.എങ്ങനെയെങ്കിലും കരാര്‍ ഒന്ന് തരപ്പെടുത്തി തരണം എന്ന് യാചിച്ചു.

പത്രക്കാരെ കൊണ്ട് പോകാത്തത് അവരോട് വിരോധമൊന്നും ഉണ്ടായിട്ടല്ല.
എന്തും ഏതും അവര്‍ പകര്‍ത്തിക്കളയും എന്നത് കൊണ്ടാണ്.
അല്ലെങ്കില്‍ തന്നെ കുമ്പിട്ടു നില്‍ക്കുന്നതും, യാചനാ ഭാവത്തില്‍ ഇരിക്കുന്നതുമായ ധാരാളം ചിത്രങ്ങള്‍ അവര്‍ മാലോകരെ കാണിച്ചു കൊടുത്തിട്ടുണ്ട്. വീണ്ടും അത് വേണ്ടാ എന്നത് കൊണ്ട് മാത്രമാണ് അവരെ പാതി വഴിയില്‍ ഇറക്കി വിട്ടത്.

ഇന്ത്യയില്‍ നിന്ന് അമേരിക്കയിലേക്ക് വിമാനം കയറുമ്പോള്‍ സ്വന്തം കക്ഷിക്കാര്‍ ആഹ്ലാദത്താല്‍ കുതിച്ചു ചാടുകയും, അഭിമാനത്താല്‍ വിജിംഭ്രതരാവുകയും ചെയ്തതാണ്.
ആശാന്‍ "ദുരവസ്ഥയില്‍" പാടിയത് പോലെ
"ഉദ്യാന പാലകരെ ഭാവാന്മാരുന്നര്‍-
‍ന്നുദ്യമിപ്പിന്‍ പുഷ്പകാലമായി"
എന്ന് ദേശമോട്ടാകെ പാടി നടക്കുകയായിരുന്നു ഗാന്ധിജിയുടെ കൊണ്ഗ്രെസ്സുകാര്‍.

ക്ഷമിക്കണം ...
'ആശാന്‍' എന്ന് ചോദിച്ചാല്‍ 'ഏത് കളരിയിലെ ആശാന്‍?',..
'ദുരവസ്ഥ' എന്ന് പറഞ്ഞാല്‍ 'ആ പലഹാരം ഏത് ബേക്കറിയില്‍ കിട്ടും?', എന്നൊക്കെ ചോദിക്കുന്നവരാണ്‌ കൊണ്ഗ്രെസ്സുകാര്‍ എന്ന് ആലോചിക്കാതെ എഴുതിപ്പോയതാണ്.

ഇന്ത്യയുടെ ചരിത്രത്തിലെ, അതും സഹസ്രാബ്ധങ്ങള്‍ നീണ്ട ചരിത്രത്തിലെ, ഇത് വരെ ആരും കാണാത്ത നിമിഷമാണ് വന്നു ഭവിക്കാന്‍ പോവുന്നത് എന്നായിരുന്നു ആവര്‍ത്തിച്ചു പറഞ്ഞിരുന്നത്.

അവരറിയുന്നുണ്ടോ അമേരിക്കയിലെ ജനാധിപത്യത്തിന്റെ നുലാമാലകള്‍.
ഇന്ത്യാക്കാന്നെങ്കില്‍ അങ്ങനെയൊരു പോല്ലാപ്പില്ലാത്തത് കൊണ്ട് പ്രശ്നമില്ല.
സ്വാതന്ത്ര്യവും ജനാധിപത്യവും സ്വാശ്രയത്വവും പണയപ്പെടുത്താന്‍ ആരോടും ആലോചിക്കേണ്ടതില്ല, ഒരു സഭയിലും ചര്‍ച്ച ചെയ്യേണ്ടതില്ല.

അമേരിക്ക ഇപ്പോഴും പഴഞ്ചനാണ്. സെനറ്റ് ഉപസമിതി, സെനറ്റ്, അമേരിക്കന്‍ കോണ്‍ഗ്രസ്‌ ഇങ്ങനെ പല കടമ്പകള്‍ കടക്കണം. പല ചോദ്യങ്ങള്‍ക്ക് ശരിയാംവണ്ണം ഉത്തരം നല്‍കണം.
കീഴടങ്ങി കൊടുക്കുന്നവന് ഒരു ചര്‍ച്ചയും, ആലോചനയും, വിചാരവും വേണ്ട. കീഴടങ്ങുന്നവന് എന്തിനാണ് ഇത്രയും ആലോചനയും വീണ്ടുവിചാരവും എന്നാണ് മന്മോഹനും സോണിയക്കും ഇനിയും പിടികിട്ടാതെ ബാക്കിയാകുന്നത്.

"വീട്ടിലുണ്ടെങ്കില്‍ വിരുന്നുചോറും കിട്ടു-
മൂട്ടിലുമ് കിട്ടാ ദരിദ്രനെന്നാകിലോ"
എന്നാ നല്ല പാഠം അമേരിക്കയ്ക്ക് അറിയാവുന്നത് കൊണ്ടാണ്, നാരും നീരും തിരഞ്ഞ് അവര്‍ ചര്‍ച്ച ചെയ്യുന്നതെന്ന് ഇന്ത്യാക്കാര്‍ക്ക് പിടി കിട്ടുന്നില്ല എന്നതിലാണ് പ്രശ്നം.

കുഴപ്പമില്ല.
കോണ്ടലിസ എന്നാ വനിതാ പ്രമാണി ഡല്‍ഹിയില്‍ വരുമെന്ന് ബുഷ്‌ ഏമാന്‍ അരുളി ചെയ്തിട്ടുണ്ടല്ലോ.,
അന്ന് കരാര്‍ കൊണ്ട് വരും.

അമേരിക്കന്‍ താല്പര്യങ്ങള്‍ സംരക്ഷിക്കാന്‍ ഉണ്ടാക്കിയ ഹൈഡ് ആക്ടിന് വിധേയമായിട്ടായിരിക്കും അമേരിക്കന്‍ ആണവ കരാറെന്ന് പലയാവര്‍ത്തി അമേരിക്കന്‍ നേതാകന്മാര്‍ പരസ്യമായി പറഞ്ഞു.
ബുഷ്‌ രേഹസ്യ കത്തിലുടെ സെനട്ടര്മാരെയാകെ അറിയിച്ചു.
അപ്പോഴും പ്രണബും മന്മോഹനും തങ്ങളുടെ പല്ലവി ആവര്‍ത്തിച്ചു കൊണ്ടിരുന്നു.

ഒടുവില്‍ മന്‍മോഹന്‍ അമേരിക്കയില്‍ തമ്പടിച്ചു കാത്തുകെട്ടി കിടക്കുമ്പോള്‍ ബുഷ്‌ സെനറ്റിലും കൊന്ഗ്രെസ്സിലുമൊക്കെ ആവര്‍ത്തിച്ചാവര്‍ത്തിച്ചു പറഞ്ഞിരുന്നു; ഹൈഡ് ആക്ടിന് വിധേയമായിട്ടായിരിക്കും കരാര്‍, അണുപരീക്ഷണം നടത്തിയാല്‍ കരാര്‍ റദ്ദാക്കും, ഇന്ത്യ അനുഭവിക്കേണ്ടി വരും എന്നിത്യാദി കാര്യങ്ങള്‍.

മന്‍മോഹന്‍ അതൊന്നും കേട്ടതേയില്ല.
എങ്ങനെ കേള്‍ക്കും?
"കര്‍മ ദോഷത്താല്‍ വരുന്ന രോഗങ്ങള്‍ക്ക്, ചെമ്മേ കഷായം കുടിച്ചാല്‍ ഫലിക്കുമോ?" എന്ന കാര്യം മന്മോഹന് അറിയാവുന്നതാണ്.

മന്‍മോഹന്‍ അമേരിക്കയില്‍ നിന്ന് വന്ന ശേഷവും ബുഷ്‌ സെനറ്റില്‍ പറഞ്ഞതൊക്കെ അറിഞ്ഞ ശേഷവും, ഇന്ത്യക്ക് അണുപരീക്ഷണം നടത്താന്‍ അവകാശം ഉണ്ടെന്നും ഹൈഡ് നിയമം കരാറിന് ബാധകം അല്ലെന്നും, ചെറിയ ശരീരത്തിനുള്ളില്‍ നിന്ന് വരുന്ന വലിയ ശബ്ദവുമായി പറഞ്ഞു നടന്ന ദിവ്യനാണ് പ്രണാബ് മുഖര്‍ജി.
കോണ്ടലിസ വരുമ്പോള്‍ ഒപ്പ് വയ്ക്കേണ്ട ആളാണ്. ആ ഗമ ഒട്ടും കുറച്ചതുമില്ല.
ചുവരുടെന്കിലെ ചിത്രം വരയ്ക്കനാവു എന്ന പഴയ പാഠം മന്മോഹനെപ്പോലെ പ്രണബിനും വലിയ നിശ്ചയാമുണ്ടായിരുന്നില്ലലോ.

ഒടുവില്‍ അത് സംഭവിച്ചു.
പ്രണബിനാല്‍ ആനയിക്കപ്പെട്ടു പത്രപ്രവര്‍ത്തകരുടെ മുന്നില്‍ എത്തിച്ചേര്‍ന്ന കോണ്ടലീസ, പ്രണബിനെ തൊട്ടടുത്തിരുത്തി ഉച്ചത്തില്‍ പറഞ്ഞു.
" ഹൈഡ് നിയമം കരാറിന് പൂരകമായി നില കൊള്ളുമെന്ന്., അണുപരീക്ഷണം നടത്താന്‍ ഇന്ത്യയ്ക്ക് അവകാശമില്ലെന്ന്".
എല്ലാം കേട്ട് പ്രണബ് തലകുലുക്കി മിടുക്കരില്‍ മിടുക്കനായി കൊണ്ടാലീസക്കടുത്ത് അഭിമാനത്തിന്റെ ചിരിയുമായി ഇരുന്നു.

"എനിക്ക് വേണ്ടി ജീവന്‍ ത്യജിക്കാന്‍ നീ തയ്യാരാണെന്നോ? എന്നാല്‍ ഞാന്‍ സത്യമായി സത്യമായി നിന്നോട് പറയുന്നു, ഇന്ന് കോഴി കൂവും മുന്‍പേ നീ എന്നെ മൂന്നു പ്രാവശ്യം തള്ളിപ്പറയും" എന്നാണ് യേശു പത്രോസിനോട് പറഞ്ഞത്. അത് പോലെയാണ് രാജ്യത്തിന്‌ വേണ്ടി ജീവന്‍ ത്യജിക്കുമെന്നു പറഞ്ഞു നടന്ന കോണ്‍ഗ്രസുകാര്‍, കോഴി കൂവുന്നതിനു മുന്നേ മുന്നൂറു വട്ടം തള്ളിക്കളഞ്ഞു കൊണ്ടിരിക്കുന്നത്.

ബുഷിന്റെ ഒപ്പിനു പോലും പവന്‍ വിലയാണ്.
ഇവിടെ ഒപ്പ് വയ്ക്കാന്‍ നിവര്ത്തിപിടിച്ച പേനയുമായി മന്മോഹനും സോണിയയും പ്രണബും, എന്തിന് എം ഐ ഷാനവാസ് പോലും റെഡിയായി നില്‍ക്കുകയാണ്.
പക്ഷെ ബുഷ്‌ ഇത് വരെ കരാറില്‍ ഒപ്പ് വെച്ചിട്ടില്ല.
ബുഷ്‌ ഒപ്പ് വച്ചാലേ കരാര്‍ കരാരാവൂ.മറ്റുള്ളവരുടെ ഒപ്പെല്ലാം ഉപ്പു അലിയുന്നത് പോലെയേ ഉള്ളു.
ബുഷ്‌ എമ്മാന്‍ ഒപ്പിട്ടു കിട്ടാന്‍ ക്ഷേത്രവളപ്പില്‍ ഉരുളലും തിങ്കളാഴ്ചവ്രതവും ശുലം കുത്തിയോടലും പൊങ്കാല പായസവും കാവടിയെടുക്കലും നേര്‍ന്നു കഴിയുകയാണ് ദേശാഭിമാനികളായ കോണ്‍ഗ്രസുകാര്‍.

കണ്ടും കൊണ്ടും അറിയാത്തവര്‍ പിന്നെ അറിയുന്നത് ഒരു വല്ലാത്ത അറിയലായിരിക്കും.

"നാട്ടിലിരിക്കുന്നൊരു നാനാ ജനത്തിന്റെയും
പാട്ടിലിരിക്കും ദ്രവ്യം പാടെ കരസ്ഥമാക്കി
വീട്ടിലിരുന്നോരോരോ ഗോഷ്ട്ടികള്‍ കാട്ടും നിന്നെ
ആട്ടിക്കളവാനുമീ നാട്ടിലാരുമില്ലല്ലോ"
എന്ന് എവിടെ നിന്നൊക്കെയോ ഉയര്‍ന്നു കേള്‍ക്കുന്നതായി തോന്നുന്നില്ലേ.


=================
(06-10-2008)

2010, ജൂലൈ 28, ബുധനാഴ്‌ച

പറയാതിനി വയ്യ, പറയാനും വയ്യ

ര.ചെ, ഉ.ചാ, കെ.കെ, കെ.മാ, എന്നിങ്ങനെ ചുരുക്കെഴുത്തുകള്‍ കൊണ്ടുതന്നെ പ്രസിദ്ധമാണ് യു.ഡി.എഫ് എന്ന ഐക്യരാഹിത്യം നിറഞ്ഞാടുന്ന ഐക്യ ജനാധിപത്യ മുന്നണിയുടെ നേതാക്കള്‍.

ര.ചെ എന്നതിനര്‍ഥം രമേശ് ചെന്നിത്തലയെന്നാണ്. ഉ.ചാ എന്നതിന്റെ വിശദീകരണം ഉമ്മന്‍ചാണ്ടിയെന്നും. കെ.കെ എന്നാല്‍ കുഞ്ഞാലിക്കുട്ടിയും കെ.മാ എന്നാല്‍ കെ.എം മാണിയുമൊക്കെയാണ്. സി.കെ ഗോവിന്ദന്‍ നായരും പനമ്പിള്ളി ഗോവിന്ദമേനോനും ബാഫഖി തങ്ങളും കെ.എം ജോര്‍ജുമൊന്നും ഇത്തരം, ലഘു എഴുത്തുകളാല്‍ പ്രസിദ്ധമായിരുന്നില്ല എന്നതു ശരിതന്നെ. അവരെയൊക്കെ മറികടക്കുന്ന ഇന്നത്തെ നേതാക്കള്‍ക്ക് ചുരുക്കെഴുത്തിലൂടെയും പ്രശസ്തരാവാമെന്ന പാഠം ര ചെ, ഉ ചാ, കെ കെ, കെ മാ എന്നിവ പകര്‍ന്നു തരുന്നുണ്ട്.

വാള്‍, കഠാരി, കൈവെട്ടുകത്തി, കൊടുവാള്‍, ആര്‍.ഡി.എക്‌സ്, ബോംബ് എന്നിവയെക്കുറിച്ച് പരാമര്‍ശിക്കുവാനും, അവ നിത്യേന കൈകാര്യം ചെയ്യുന്ന സംഘടനകളുടെ പേരു പറയുവാനും ചുരുക്കെഴുത്തിനാല്‍ പ്രശസ്തരായ നേതാക്കള്‍ക്ക് വലിയ പ്രയാസമാണ്.
'മടിയാണ് എനിക്കത് മൊഴിയാന്‍' എന്ന മട്ടിലേ പത്രസമ്മേളന വേദികളില്‍ കോണ്‍ഗ്രസിന്റെയും, ലീഗിന്റെയും, കേരള കോണ്‍ഗ്രസിന്റെയും നേതാക്കള്‍ക്ക് ഇരിക്കാനാവൂ. പത്രക്കാര്‍ ചോദിച്ച് വശംകെടുത്തിയാല്‍ തങ്ങളുടെ പേരിന്റെ ചുരുക്കെഴുത്തു പോലെ, ആര്‍ക്കുമാര്‍ക്കും ഒന്നുമൊന്നും മനസിലാക്കാന്‍ കഴിയാത്ത ഭാഷയില്‍ വല്ലതും പറഞ്ഞെന്നുവരും.

കൈവെട്ടിനിരയായ അധ്യാപകന്റെ വീട്ടില്‍ ഈ ചുരുക്കെഴുത്തു പേരുകാര്‍ സന്ദര്‍ശനം നടത്തും. സന്ദര്‍ശനം എന്നു പറഞ്ഞാല്‍, ടി വി ചാനലുകളായ ചാനലുകളൊക്കെയും, പത്രങ്ങളായ പത്രങ്ങളൊക്കെയും ഒപ്പം വേണമെന്നത് കണിശമാണ്. അവരൊക്കെയുള്ളതുകൊണ്ട് തന്നെ സന്ദര്‍ശനവേളയില്‍ ദുഃഖം ഖനീഭവിച്ച് മുഖത്ത് പ്രതിഫലിക്കും. കണ്ണുകള്‍ നിറയും. തല കുമ്പിടും. ശബ്ദം ഇടറും.

ഇങ്ങനെയൊക്കെ സംഭവിച്ചാലും അധ്യാപകന്റെ കൈവെട്ടിയ സംഘടനയുടെ പേരു പറയാന്‍ ചുരുക്കെഴുത്തുകാര്‍ക്ക് ഗദ്ഗദസ്വരത്തില്‍ പോലും സാധ്യമാവുകയില്ല. പേര് മറന്നുപോകുന്നതൊന്നും കൊണ്ടല്ല അങ്ങനെ സംഭവിച്ചുപോകുന്നത്. പറയാന്‍ മനസ്സില്ലാത്തതു കൊണ്ടുതന്നെ. കൊടുവാളിന്റെയും ആര്‍.ഡി.എക്‌സിന്റെയും ഉപാസകര്‍ ന്യൂനപക്ഷ ഭീകരവാദിയാകട്ടെ, ഭൂരിപക്ഷ വര്‍ഗീയ വാദിയാകട്ടെ ഈ ചുരുക്കെഴുത്തുകാര്‍ക്ക് പ്രിയങ്കരരാണ്. അവരുടെ പേരുകള്‍ അത്യാവേശത്തില്‍ വിളിച്ചു പറഞ്ഞാല്‍ സൗഹൃദത്തിന് ഭംഗം ഉണ്ടാകുമെന്ന് യു.ഡി.എഫ് കണ്‍വീനര്‍ പി.പി.താ എന്ന പി.പി തങ്കച്ചനും കെ.മാ എന്ന കെ.എം മാണിക്കും അറിയാം.

രാഷ്ട്രീയം പഠിച്ചും കളിച്ചും, പഠിപ്പിച്ചും കളിപ്പിച്ചും ഇത്രത്തോളമെത്തിയ മാണിയോടും തങ്കച്ചനോടും ഇത്തിരിപ്പോന്ന മാധ്യമപ്രവര്‍ത്തകരുടെ കളിയൊന്നും വേണ്ട.
ആശാനെ കളി പഠിപ്പിക്കുവാന്‍ വരേണ്ടെന്ന് സാരം. കളരിയില്‍ പതിനെട്ടടവും അതിലുള്‍പ്പെടാത്ത അടവും പഠിച്ചവരോട് ഉറുമിയെന്താണെന്ന് കാട്ടിക്കൊടുക്കേണ്ടെന്നും, മണ്ണുവാരി കണ്ണിലെറിയുന്ന പണിയെന്തെന്ന് പഠിപ്പിക്കേണ്ടന്നുമാണ് ശരിയായ സാരം.

ഒരുപാടൊരുപാട് നിര്‍ബന്ധിക്കുകയും, പൂഴിക്കടകന്‍ അടവുകള്‍ മനസിലാക്കി പത്രക്കാര്‍ എഴുതുകയും പറയുകയും ചെയ്താല്‍, ഒഴിഞ്ഞുമാറ്റം എന്ന അടവു പ്രയോഗത്തിനായി മുതുകു വല്ലാതെ വളച്ച് നുഴഞ്ഞുകയറാന്‍ യത്‌നിക്കും. അങ്ങനെ വരുന്ന ഘട്ടങ്ങളില്‍ ഉ.ചായും ര.ചെയും, "പോപ്പുലര്‍ ഫ്രണ്ട്" എന്ന പേരു പറയാന്‍ തങ്ങള്‍ക്ക് തെല്ലും മടിയില്ലെന്നും അങ്കത്തട്ടില്‍ നിന്ന് ചുരിക വീശി ഉച്ചത്തില്‍ അത് വിളിച്ചുപറയുമെന്നും അവകാശപ്പെടും.
ഉ.ചായും ര.ചെയും പറഞ്ഞാല്‍ കെ.മായും പി.പി.തായും അത് ആവര്‍ത്തിക്കുകയും ചെയ്യും. കാരണം മാറ്റച്ചുരിക കൈവശമുള്ളവര്‍ മാത്രമാണ് അവര്‍.

ആയുധങ്ങള്‍, ബോംബുകള്‍, സ്‌ഫോടക വസ്തുക്കള്‍ എന്നിവ ആസ്ഥാനങ്ങളില്‍ നിന്ന് കണ്ടെടുക്കപ്പെട്ടാലും, കൈപ്പത്തിവെട്ടിലെ കുപ്രസിദ്ധ കുറ്റവാളികളെ തിരിച്ചറിഞ്ഞാലും ഉ.ചാ, ര.ചെ, കെ.മാ, കെ.കെ, പി.പി.ത, എന്നിത്യാദി ചുരുക്കെഴുത്ത് വിദ്വാന്‍മാര്‍ക്ക് അങ്കലാപ്പൊന്നുമില്ല. തങ്ങള്‍ക്ക് വോട്ടുമറിച്ചു നല്‍കുകയും, തിരശീലയ്ക്കു പിന്നില്‍ നിന്ന് തങ്ങളെ ആലിംഗനം ചെയ്യുകയും ചെയ്തവര്‍ക്ക് നീരസമൊന്നും ഉണ്ടാവരുത് എന്ന നിഷ്‌കര്‍ഷ മാത്രമാണ് ചുരുക്കെഴുത്തു നാമധാരികളെ നയിക്കുന്നത്. അതുകൊണ്ടു മാത്രം എന്‍.ഡി.എഫ്, ആര്‍.എസ്.എസ് എന്നിത്യാദി ചുരുക്കപ്പേരുകള്‍ അവരുടെ അധരങ്ങള്‍ കടന്ന് പുറത്തേക്കു വരുകയില്ല.

സംഘടനകളുടെ പേരു പറയാത്തതെന്ത്, എന്ന് പത്ര പ്രവര്‍ത്തകര്‍ പലയാവര്‍ത്തി എഴുതുകയും മറ്റു കക്ഷികളുടെ പ്രതിനിധികള്‍ ആരായുകയും ചെയ്യുമ്പോള്‍ എങ്കില്‍ ഇതാ പേരു പറഞ്ഞിരിക്കുന്നൂ, ഞങ്ങള്‍ വില്ലാളി വീരന്‍മാര്‍ എന്ന മട്ടില്‍, നാലഞ്ചു ദിനം കഴിഞ്ഞിട്ടാണെങ്കിലും, നടിക്കുന്നതിന് ഉ.ചാ, ര.ചെ മാര്‍ക്ക് മടിയില്ല.
അപ്പോള്‍ അവരുടെ വോട്ട് വേണ്ടെന്നു പറയുമോ എന്നു ചോദിച്ചാല്‍ അങ്ങനെ പറയാനുള്ള ധാര്‍ഷ്ട്യം തനിക്കില്ലെന്ന് ഉ.ചാ വിനയാന്വിതനാവും.
വോട്ടുവേണ്ടെന്നതല്ല, സഹകരണമില്ലെന്നതാണ് പ്രധാനമെന്ന് കെ.കെ അഴകൊഴമ്പന്‍ സിദ്ധാന്തം അവതരിപ്പിക്കും.
വോട്ടു വേണമോ വേണ്ടയോ എന്ന് പറയേണ്ട കാര്യമില്ല, പറഞ്ഞതില്‍ എല്ലാമുണ്ടെന്ന് ആര്‍ക്കും മനസിലാകാത്ത ഭാഷയില്‍ ര.ചെ മൊഴിയും.

പാലായില്‍ ഏതവന്‍ വോട്ടുതന്നാലും വേണ്ടെന്നു പറയില്ലെന്ന് കെ.മാ പറയും.
ഞാനും, എന്റെ മകനും, പിന്നെ എന്റെ പാലായും എന്നു കരുതി ജീവിതം കഴിക്കുന്ന കെ.മായ്ക്ക്,പാലായിലെ കാര്യം മാത്രമേ പറയാന്‍ കഴിയൂ.

വര്‍ഗീയ-ഭീകരവാദികളുടെയൊന്നും വോട്ടു തനിക്കു വേണ്ടെന്ന് ആര്യാടന്‍ മുഹമ്മദ് പറഞ്ഞല്ലോ എന്നു ചോദിച്ചാല്‍, അങ്ങനെ പറയാനുള്ള ധാര്‍ഷ്ട്യം തനിക്കില്ലെന്നും തന്റേതാണ് ഔദ്യോഗിക ഭാഷ്യമെന്നും ഉമ്മന്‍ചാണ്ടി.
അതുതന്നെയാണ് ശരിയിലും വലിയ ശരിയെന്ന്, രമേശ് ചെന്നിത്തല.
ഉ.ചാ മാരും ര.ചെമാരും, എന്‍.ഡി.എഫുകാര്‍ വീശുന്ന വാളിനേക്കാളും ചുരികയേക്കാളും മൂര്‍ച്ചയുള്ള ആയുധങ്ങള്‍ വീശി, പാവം മലയാളികളുടെ മനസിനെ മുറിക്കുന്നു.

'പറയാനും വയ്യ, പറയാതിനി വയ്യ' എന്ന നിലയില്‍ മണ്ണില്‍ കിടന്നുരുളുന്ന ര.ചെമാരെയും ഉ.ചാമാരെയും കാണുമ്പോള്‍ പാവം കാഴ്ചക്കാര്‍ ചിരിച്ച് മണ്ണുകപ്പുന്നു.

ഭയന്നു വിറങ്ങലിക്കുന്നു.

2010, ജൂലൈ 25, ഞായറാഴ്‌ച

ചാക്കോയ്ക്കും ഉള്ളു തുറക്കാം, ഉള്ളതു പറയാം

കോണ്‍ഗ്രസിനകത്ത് സത്യം എന്നു കേട്ടാല്‍ കലിതുള്ളുന്നവര്‍ക്ക് മാത്രമായി പ്രവേശനം പരിമിതപ്പെടുത്തിയിട്ടു കാലം കുറച്ചേറെയായെന്ന് മാലോകര്‍ക്കൊക്കെ അറിയാം. കേന്ദ്രത്തിലായാലും കേരളത്തിലായാലും ഇക്കാര്യത്തില്‍ കോണ്‍ഗ്രസായ കോണ്‍ഗ്രസുകാര്‍ക്കൊക്കെ നിര്‍ബന്ധബുദ്ധിയുണ്ട്.
പുലരും മുമ്പേ എഴുന്നേല്‍ക്കണമെന്ന ചൊല്ലും കോണ്‍ഗ്രസുകാര്‍ അക്ഷരംപ്രതി അനുസരിക്കും. മെറ്റാന്നിനും വേണ്ടിയല്ല. ഇന്ന് എത്ര അസത്യം പറയാം, അത് ഏതൊക്കെ, ഏതേതു വിധത്തില്‍ എന്തു ചിന്തിക്കാന്‍ പുലര്‍കാലമാണ് പറ്റിയ സമയമെന്ന് കോണ്‍ഗ്രസുകാര്‍ക്ക് അനുഭവത്തിലൂടെ ബോധ്യപ്പെട്ടിട്ടുള്ളതാണ്.

പക്ഷേ പ്രകോപനനിമിഷങ്ങളില്‍ അപൂര്‍വം കോണ്‍ഗ്രസുകാര്‍ അറിയാതെ സത്യം വിളിച്ചുപറഞ്ഞുപോകും. അത് അത്യപൂര്‍വങ്ങളില്‍ അത്യപൂര്‍വമായി മാത്രം സംഭവിക്കുന്ന ഒന്നാണ്.
സംവത്സരങ്ങള്‍ക്കുശേഷം ഒരു കോണ്‍ഗ്രസ് നേതാവ് ഒരു സത്യം വിളിച്ചുപറഞ്ഞിരിക്കുന്നു. പി.സി ചാക്കോയാണ് ഉള്ള് തുറന്ന് ഉള്ള സത്യം വിളിച്ചോതിയത്.

കെ പി സി സി പ്രസിഡന്റായിരിക്കുന്ന രമേശ് ചെന്നിത്തല ആ കസേരയിലിരിക്കാന്‍ യോഗ്യതയുള്ളയാളല്ലെന്നതാണ് ചാക്കോയുടെ ഉഗ്രപ്രഖ്യാപനം.

കായബലത്തില്‍ മുമ്പനായ ടി എച്ച് മുസ്തഫയും കായബലത്തില്‍ പിന്നോക്കം നില്‍ക്കുന്ന കെ കെ രാമചന്ദ്രനുമെല്ലാം ചാക്കോ പറഞ്ഞത് സത്യത്തിലും സത്യമാണെന്ന് ആണയിട്ടു പറഞ്ഞു.
ചാക്കോ പറഞ്ഞു കേട്ടതില്‍ സുഖം തോന്നിയ ഉമ്മന്‍ചാണ്ടി തന്റെ മെയ്‌വഴക്കം ഒരിക്കല്‍ കൂടി തെളിയിച്ചു. ചാക്കോ പറഞ്ഞത് വിവാദമാക്കരുതെന്ന അഭ്യര്‍ഥന മാത്രമാണ് ചാണ്ടിക്കുള്ളത്. സത്യം പറയുന്നത് വിവാദമാക്കരുതെന്ന അര്‍ഥഗര്‍ഭമായ സന്ദേശമാണ് ചാണ്ടി നല്‍കിയത്.
കെ വി തോമസും മുല്ലപ്പള്ളി രാമചന്ദ്രനുമെല്ലാം ചാക്കോയെ രഹസ്യമായി ആലിംഗനം ചെയ്തുപോലും. വി എം സുധീരന്‍ തനിക്കുണ്ടായ രോമാഞ്ചം അറിയിക്കുന്നതില്‍ അമാന്തം വരുത്തിയതുമില്ലത്രേ.

പക്ഷേ രമേശ് ചെന്നിത്തലയുടെ കാലാള്‍പ്പടയും നാവ് ആയുധമാക്കി പത്രക്കാരുടെ മുന്നില്‍വന്ന് അങ്കക്കലി മുഴക്കി. ചാക്കോയ്ക്ക് സമനില തെറ്റിയിരിക്കുന്നുവെന്ന് അവര്‍ കണ്ടുപിടിച്ചു.
അത്ഭുതം വേണ്ട, കോണ്‍ഗ്രസുകാര്‍ സത്യം പറയുന്നത് സമനില തെറ്റുമ്പോള്‍ മാത്രമാണെന്നാണ് കോണ്‍ഗ്രസുകാര്‍ തന്നെ വിശ്വസിക്കുന്നത്.
ചെന്നിത്തലയെപ്പോലെ ഒരു പരമയോഗ്യന്‍ ഇതിനു മുമ്പ് ആ കസേരയില്‍ ഇരുന്നിട്ടില്ലെന്നും ഇനി ഇരിക്കുവാനായി ശേഷിക്കുന്നില്ലെന്നുമാണ് സുധാകര-വേണുഗോപാലാദികളുടെ കണ്ടുപിടിത്തം.

നാലുവര്‍ഷം സഹിച്ചു നടന്നതുകൊണ്ട് രമേശ് ചെന്നിത്തല കെ പി സി സി പ്രസിഡന്റ് കസേരയില്‍ ഇരിക്കാന്‍ യോഗ്യനാണെന്ന് അര്‍ഥമില്ലെന്ന് ചാക്കോയും മുസ്തഫയും രാമചന്ദ്രനും മൊഴിഞ്ഞു. സംഘടനാ തിരഞ്ഞെടുപ്പ് നടന്നുകൊണ്ടിരിക്കുമ്പോള്‍ കെ പി സി സി പ്രസിഡന്റ് ഗീര്‍വാണം മുഴക്കി നടക്കാന്‍ പാടില്ലെന്നും അങ്ങനെ ചെയ്താല്‍ എല്ലാ കോണ്‍ഗ്രസുകാര്‍ക്കും ഗീര്‍വാണം പത്രക്കാരുടെ മുന്നില്‍ മുഴക്കാന്‍ അവകാശമുണ്ടെന്നുമാണ് ചാക്കോ ആദികളായവരുടെ പക്ഷം.

രമേശ് ചെന്നിത്തലയ്ക്ക് കെ പി സി സി പ്രസിഡന്റാവാനുള്ള യോഗ്യതയില്ലെന്നും നിത്യേന രണ്ടു കിലോ റോസ് പൗഡര്‍ മുഖത്തണിയുന്നതല്ല കെ പി സി സി അധ്യക്ഷനാവാനുള്ള മാനദണ്ഡമെന്നും പാവങ്ങളില്‍ പാവമായ, ഇടയ്ക്കിടെ തമാശപറഞ്ഞ് കേരളീയരെ ചിരിപ്പിക്കുന്ന, പഞ്ചായത്ത് തിരഞ്ഞെടുപ്പില്‍ ഒറ്റയ്ക്കു മത്സരിച്ച് ശക്തി തെളിയിക്കുമെന്ന് ഏറ്റവും ഒടുവിലായി ഫലിതം പൊട്ടിച്ച കെ മുരളീധരന്‍ പറഞ്ഞപ്പോള്‍ ചാക്കോയും മുസ്തഫയും രാമചന്ദ്രനും കെ വി തോമസും മുല്ലപ്പള്ളിയും ഉമ്മന്‍ചാണ്ടിയുമൊക്കെ പത്തായപ്പുരയിലായിരുന്നു.

അതങ്ങനെതന്നെയാണ് അല്ലെങ്കിലും. വിവരവും വിവേകവുമുള്ളവര്‍ മുമ്പേനടക്കുകയും ആദ്യമേ ചൊല്ലുകയും ചെയ്യും. അതില്ലാത്തവര്‍ പിന്നാലെ വരുകയും വൈകി മൊഴിയുകയും ചെയ്യും.

ചാക്കോയുടെ അഭിപ്രായത്തോട് പ്രതികരിക്കാനില്ലെന്ന് പറഞ്ഞ്, മുഖം വീര്‍പ്പിച്ചും കണ്ണു തള്ളിച്ചും രമേശ് ചെന്നിത്തല ചാക്കോയെയും കൂട്ടാളികളെയും വിരട്ടാന്‍ നോക്കി. ചാണ്ടിയെ തറപറ്റിച്ച് മുഖ്യമന്ത്രിക്കസേരയിലെത്തണമെന്നു കിനാവുകാണുന്നവരാണ് വയലാര്‍ രവിയും ചെന്നിത്തലയുമെങ്കിലും ഇപ്പോഴത്തെ ചവിട്ടു നാടകത്തില്‍ അവര്‍ ഒറ്റക്കരളും ഒറ്റഹൃദയവുമാണ്. അതുകൊണ്ടു തന്നെ തിരഞ്ഞെടുപ്പ് നടക്കുമ്പോഴും നടന്നുകഴിഞ്ഞാലും ചെന്നിത്തലയ്ക്ക് വാ പോയ കോടാലിയായി എന്തും ഏതും പറയാമെന്ന് വയലാര്‍ രവി അനുമതി നല്‍കി.

വിരട്ടലൊന്നും വേണ്ടെന്ന് ചാക്കോ ചാനല്‍ മുറികളിലിരുന്ന് പറയുന്നത് കേട്ട് ഞെട്ടാന്‍ മാത്രമേ ചെന്നിത്തലകള്‍ക്ക് കഴിഞ്ഞുള്ളൂ. അഭിപ്രായം പറഞ്ഞാല്‍ മൂക്ക് ചെത്തിക്കളയും എന്നൊന്നും ആരും ഭയപ്പെടുത്തേണ്ടെന്നാണ് ചാക്കോ ഗര്‍ജിച്ചത്.

സംഘടനാ തിരഞ്ഞെടുപ്പ് എന്ന വമ്പന്‍ ഫലിതവും കേരളീയര്‍ ഇതിനിടയില്‍ ആസ്വദിക്കുന്നുണ്ട്.

തിരഞ്ഞെടുപ്പ് വേണ്ടിടത്ത് തിരഞ്ഞെടുപ്പ്, വേണ്ടാത്തിടത്ത് സമവായം എന്നായിരുന്നു തിരഞ്ഞെടുപ്പ് തീയതികള്‍ പ്രഖ്യാപിച്ചു കഴിഞ്ഞപ്പോള്‍ കോണ്‍ഗ്രസ് നേതാക്കള്‍ പറഞ്ഞത്. പിന്നെപ്പറഞ്ഞു, തിരഞ്ഞെടുപ്പൊന്നും വേണ്ടേ വേണ്ട. അതൊന്നും ഒരു ജനാധിപത്യകക്ഷിയ്ക്ക് ഭൂഷണമല്ല. അതുകൊണ്ട് സമവായം മാത്രം മതി.

സമവായം എന്നൊന്നും കേട്ട് ആരും അന്തിച്ചു പോകേണ്ട. ഗ്രൂപ്പുകള്‍ സ്ഥാനങ്ങള്‍ ശതമാനക്കണക്കിന് വീതം വെച്ചെടുക്കും എന്ന ലളിതമായ അര്‍ഥമാണ് ഉദ്ദേശിച്ചത്.

കുറച്ചുകൂടി കഴിഞ്ഞപ്പോള്‍ വയലാര്‍ രവി കൃത്യതയോടെ കാര്യം പറഞ്ഞു. തിരഞ്ഞെടുപ്പൊന്നുമില്ല. ആരൊക്കെ ഏതേതു കസേരകളിലിരിക്കുന്നുവോ അവരെല്ലാം അതാതു കസേരകളില്‍ അനങ്ങാതെ ഇരുന്നുകൊള്ളണം. അതാണ് സംഘടനയിലെ സമവായം. കസേരകളില്ലാത്തവര്‍ക്ക് ചെറിയ സ്റ്റൂളുകളോ വീതികുറഞ്ഞ ബഞ്ചുകളോ സംഘടിപ്പിച്ച് ഇരിക്കാവുന്നതാണ് എന്നുകൂടി കോണ്‍ഗ്രസുകാര്‍ തിരിച്ചറിയേണ്ടതാണ്.

സമവായം എന്നു പറഞ്ഞ് സാക്ഷാല്‍ കെ കരുണാകരനെയും ചെന്നിത്തലയാദികള്‍ പറ്റിച്ചുകളഞ്ഞു. അരമുറിയും ഒരുമുറിയും നല്‍കി കരുണാകരന്റെ വയ്യായ്മകളെ വസൂലാക്കാന്‍ പഴയ വത്സലശിഷ്യന്‍ യത്‌നിച്ചു.
ശൗര്യം പണ്ടേപോലെ ഫലിക്കുന്നില്ലെങ്കിലും ശോഷിച്ച് എല്ലും തോലുമായ ഗ്രൂപ്പ് പോലും അവകാശ തര്‍ക്കം മൂത്ത് അതീവ ഗുരുതരാവസ്ഥയിലാണെങ്കിലും കിട്ടിയ നക്കാപ്പിച്ചാ കസേരകള്‍ ഉപേക്ഷിക്കാന്‍ കരുണാകരന്‍ അണികളോട് ആഹ്വാനം ചെയ്തു.
കസേരകള്‍ കളയാന്‍ അവശേഷിക്കുന്ന കരുണാകര അനുയായികള്‍ സന്നദ്ധമായോ എന്ന് ആര്‍ക്കുമാര്‍ക്കും അറിയില്ല.

നിശ്ചയമില്ലയൊന്നിനും എന്നു പറഞ്ഞതുപോലെ കോണ്‍ഗ്രസില്‍ ഇപ്പോള്‍ എത്ര ഗ്രൂപ്പുണ്ടെന്ന് ആര്‍ക്കുമാര്‍ക്കും നിശ്ചയമില്ല.

പണ്ട് ഐയും ഏയും എന്നു കേട്ടാല്‍ മതിയായിരുന്നു. പിന്നെ തിരുത്തല്‍വാദി ഗ്രൂപ്പ് വന്നു. അവര്‍ വേഷം മാറി മൂന്നാം ഗ്രൂപ്പായി വീണ്ടും വന്നു. മൂന്നാകാമെങ്കില്‍ നാലായിക്കൂടെ എന്ന് ചോദിച്ച് നാലാം ഗ്രൂപ്പും രംഗപ്രവേശം ചെയ്തു.
ഇംഗ്ലീഷ് അക്ഷരമാലയിലും അക്കങ്ങളിലും ഇനിയും ഒട്ടേറെ ശേഷിക്കുന്നതുകൊണ്ട് ഗ്രൂപ്പ് ഒയും സിയും ബിയും ഒക്കെ ഓരോരോ സ്ഥലത്ത് പിറവിയെടുക്കുന്നു. വടക്കന്‍ ഗ്രൂപ്പും വാഴക്കന്‍ ഗ്രൂപ്പും പത്മജ ഗ്രൂപ്പും തറയില്‍ ഗ്രൂപ്പുമൊക്കെയുണ്ടത്രേ. വിശാല ഐയും വിശാലമല്ലാത്ത ഐയും ദുര്‍ബല ഐയും ഏയ്ക്കുള്ളിലെ ഏയും ഏയ്ക്കു പുറത്തെ ഏയും എല്ലാം കൊണ്ട് സമ്പുഷ്ടമാണ് കോണ്‍ഗ്രസ്.
ഗ്രൂപ്പുകള്‍ക്ക് ക്ഷാമമില്ലാത്ത ഗ്രൂപ്പ് രഹിത കോണ്‍ഗ്രസിന്റെ വസന്തകാലമാണിത്.

ചാക്കോയും മുസ്തഫയും മുല്ലപ്പള്ളിയും കെ കെ രാമചന്ദ്രനും കെ വി തോമസുമൊക്കെ കരുതിയിരിക്കണം.
കസേരയേറും ഉടുമുണ്ടഴിയ്ക്കലും കമ്പിപ്പാരകൊണ്ടുള്ള മര്‍ദനവുമൊക്കെ പ്രതീക്ഷിക്കാവുന്നതാണ്.

ഗ്രൂപ്പ് രഹിത കോണ്‍ഗ്രസിലെ അനിവാര്യ അജണ്ടകളാണ് ഇവയെല്ലാം.